Podcast: Download (Duration: 5:33 — 4.0MB)
Paggunita kay San Estanislao, Obispo at Martir
Mga Gawa 5, 27-33
Salmo 33, 2 at 9. 17-18. 19-20
Dukhang sa D’yos tumatawag
ay kanyang inililigtas.
Juan 3, 31-36
Subscribe to Awit at Papuri Communications YouTube Channel
Memorial of St. Stanislaus, Bishop and Martyr (Red)
Mga Pagbasa mula sa
Huwebes sa Ika-2 Linggo ng Pasko ng Pagkabuhay
UNANG PAGBASA
Mga Gawa 5, 27-33
Pagbasa mula sa mga Gawa ng mga Apostol
Noong mga araw na iyon, ang mga Apostol ay siniyasat ng pinakapunong saserdote. “Mahigpit naming ipinagbawal sa inyo ang pangangaral sa pangalan ng Hesus na iyan,” wika niya, “ngunit tingnan ninyo ang inyong ginawa! Laganap na sa Jerusalem ang inyong aral, at ibig pa ninyo kaming panagutin sa pagkamatay ng taong iyan!” Ngunit sumagot si Pedro at ang ibang mga apostol, “Ang Diyos ang dapat naming sundin, hindi ang tao. Ang Diyos ng ating mga ninuno ang muling bumuhay kay Hesus na pinatay ninyo nang inyong ipabitay sa krus. Iniakyat siya ng Diyos sa kanyang kanan bilang Tagapanguna at Tagapagligtas, upang bigyan ng pagkakataon ang mga Israelita na magsisi’t tumalikod sa kanilang mga kasalanan, at sa gayun, sila’y patawarin. Saksi kami sa mga bagay na ito – kami at ang Espiritu Santo na ipinagkaloob ng Diyos sa mga tumatalima sa kanya.” Nagngitngit sa galit ang mga bumubuo ng Sanedrin nang marinig ito, at ibig nilang ipapatay ang mga apostol.
Ang Salita ng Diyos.
SALMONG TUGUNAN
Salmo 33, 2 at 9. 17-18. 19-20
Dukhang sa D’yos tumatawag
ay kanyang inililigtas.
o kaya: Aleluya!
Panginoo’y aking laging pupurihin;
sa pasasalamat di ako titigil.
Ang galing ng Poon hanaping masikap;
yaong nagtiwala sa kanya’t naligtas
ay maituturing na taong mapalad.
Dukhang sa D’yos tumatawag
ay kanyang inililigtas.
Nililipol niya yaong masasama
hanggang sa mapawi sa isip ng madla.
Agad dinirinig daing ng matuwid,
inililigtas sila sa mga panganib.
Dukhang sa D’yos tumatawag
ay kanyang inililigtas.
Tumutulong siya sa nasisiphayo
ang walang pag-asa’y hindi binibigo.
Ang taong matuwid, masuliranin man,
sa tulong Poon, agad maiibsan.
Dukhang sa D’yos tumatawag
ay kanyang inililigtas.
ALELUYA
Juan 20, 29
Aleluya! Aleluya!
Mapalad at maligaya
ang sumasampalataya
sa di nakita ng mata!
Aleluya! Aleluya!
MABUTING BALITA
Juan 3, 31-36
Ang Mabuting Balita ng Panginoon ayon kay San Juan
Noong panahong iyon: sinabi ni Hesus kay Nicodemo:
“Ang mula sa itaas ay dakila sa lahat; ang mula sa lupa ay taga-lupa at nagsasalita tungkol sa mga bagay sa lupa. Ang mula sa langit ay dakila sa lahat. Pinatototohanan niya ang kanyang nakita at narinig, ngunit walang maniwala sa kanyang patotoo. Ang naniniwala sa kanyang patotoo ay nagpapatunay na tapat ang Diyos. Sapagkat ang sinugo ng Diyos ay nagpapahayag ng mga salita ng Diyos; at walang sukat ang kanyang pagkakaloob ng Espiritu Santo. Minamahal ng Ama ang Anak, at ibinigay sa kanya ang kapamahalaan ng lahat ng bagay. Ang nananalig sa Anak ay may buhay na walang hanggan; ngunit ang hindi tumatalima sa Anak, hindi nagkakaroon ng buhay – mananatili sa kanya ang poot ng Diyos.”
Ang Mabuting Balita ng Panginoon.
Pages: 1 2
« Miyerkules, Abril 10, 2024
Biyernes, Abril 12, 2024 »
{ 6 comments… read them below or add one }
PAGNINILAY: Ang Ebanghelyo ngayon ay isang magandang pahayag ni San Juan tungkol kay Hesus. Para sa Ebanghelista, ang pokus ng panunulat nito ng aklat ay upang kilalanin natin si Hesukristo na tunay na Tao at higit pa riyan tunay na Diyos. Sa mga nakaraang pahayag, nakita natin ang pagtatagpo ni Hesus kay Nicodemo, isang Pariseong naging malapit na tagasunod niya. Makikita natin na ipinakilala ni Kristo ang kanyang sarili na nanggaling mula sa langit. Tunay nga isinugo siya ng Diyos Ama upang tayo ay magkaroon ng buhay na walang hanggan.
Nitong nakaraang Semana Santa, ginunita natin ang Pagpapakasakit at Pagkamatay niya sa Krus upang iligtas tayo mula sa kasalanan. At ngayong panahong bumubuo ng 50 araw, patuloy natin inaalala ang kanyang Muling Pagkabuhay na nagtagumpay laban sa kamandag ng kamatayan at kasalanan. At ito rin ay pagkakataon na patuloy tayong sumampalataya sa kanya at maging kanyang mga saksi.
Kaya makikita natin sa Unang Pagbasa ang katatagan ng misyon ng mga Apostol na ipagpatuloy na ipahayag si Kristo sa bawat dako ng mundo. Kahit sila’y binantaan at binabalaan ng Sanhedrin na huwag mangaral sa pangalan ni Hesus, totoong sinabi ni Pedro na kailangan nilang sundin ang utos ng Diyos na higit pa sa utos ng tao. Hindi pa rin kilala ng mga pinuno ng mga Hudyo si Hesus bilang Mesiyas, subalit marami sa kanilang mga kababayan ay sumaanib na sa pananampalatayang ipinagkaloob ng Panginoon para ipamana rin ng Simbahan sa ating lahat.
Kaya nawa’y patuloy tayo sa pagbibigay-saksi sa Kristong namatay at muling nabuhay upang makilala ng lahat ang plano ng Diyos Ama at mapasailalim sa dakilang kalooban na ipadala ang kabutihan sa isa’t isa.
Ang nanalig sa Anak ay magkakaron ng buhay na walang hanggan ngunit ang hindi ay hindi magkakaron ng buhay, -at manantili sa kanya ang poot ng Diyos.
Ang punto ng ebanghelyo ngayon ay pananalig kay Hesus. Marahil masasabi ng isang tao na sya nman ay nananalig sapagkat naniniwala sya kay Hesus. Ngunit hindi sapat ang naniniwala ka lamang. Kung ikaw ay nananalig ay susundin mo ang kalooban ng Diyos. Hindi ka gagawa ng mga ipinagbabawal nya.
Baka nman tayo ay nananalig at palasimba subalit nananatiling; tsismosa, mapanirang puri, mapagnasa sa laman, nakiki-apid, nangangalunya, inggitera, nananalangin na may masamang mangyari sa kaaway, mandaraya, mayabang, mapang api, mapagmataas, bastos, at hindi kayang patawarin ang kaptid na nakasakit o ang kaaway.
Kung ikaw aya nanalig ay dapat na nakikita ito sa iyo kundi ay isa ka lamang mapag imbabaw sa mata ng tao at ng Diyos.
Katakutan natin ang huling parirala sa ebanghelyo. Kung hindi nananalig ay mananatili ang poot sa atin ng Diyos… alam natin amg kayang gawin ng Diyos.
PAGNINILAY
Ang paniniwala natin kay Hesus ay may kaakibat na responsibilidad. Tayo ay tinawag upang ipahayag ang Ebanghelyo sa pamamagitan ng ating mga salita at mas mahalaga, sa pamamagitan ng ating
mga gawa. Kailangan nating buhayin ang ating pananampalataya, hindi lamang sa pagpapahayag ng ating pananampalataya kay Hesus. Tulad ni Hesus ng inatasan ang Kanyang mga disipulo na “humayo at mangaral ng Ebanghelyo,” ipinapadala rin tayo ni Hesus upang isabuhay ang Ebanghelyo at ipangaral ang Ebanghelyo sa salita at gawa. Ito ang ating tawag, ang ating hamon at ang ating kaloob! Ano ang gagawin natin? Nawa’y humayo tayo at magpakalat ng Ebanghelyo sa pamamagitan ng salita at halimbawa. Nawa’y ibahagi natin sa iba ang palagi nating natatanggap. Si Hesus ay umaasa sa atin!
Panginoon, tulungan Mo kaming makinig sa Iyong mga salita upang malaman namin kung paano kumilos sa katotohanan. Amen.
***
Salamat po sa awitatpapuri.com lagi ko etong nagagamit
MAGNILAY: Hindi natin maibibigay ang isang bagay na wala tayo. Si Hesus lang ang puwedeng umakay sa atin patungong langit pagkat siya lang ang galing sa langit. Siya lang ang puwedeng magpakilala sa Ama dahil siya lang ang tanging nakakita sa kanya. Siya lang ang puwedeng magpahayag ng salita ng Diyos dahil siya ang salita ng Diyos at una siyang nakinig at sumunod sa salita ng kanyang Ama. Gayunpaman, puwede rin nating ibahagi si Hesus kung siya’y nasa puso natin. Puwede rin nating ipahayag ang kanyang salita kung una natin itong pakikinggan at isasabuhay. Kaya nating umakay ng iba sa landas ng kabanalan kung una tayong tatahak dito.
MANALANGIN: Panginoong muling nabuhay, marapatin mong makaakay kami ng iba tungo sa landas ng kabanalan.
GAWIN: Mauna kang sumunod sa Panginoon bago mo pasunurin ang iba sa kanya.
REFLECTION: Ang Ebanghelyo ngayon ay isang magandang pahayag ni San Juan tungkol kay Hesus. Para sa Ebanghelista, ang pokus ng panunulat nito ng aklat ay upang kilalanin natin si Hesukristo na tunay na Tao at higit pa riyan tunay na Diyos. Sa mga nakaraang pahayag, nakita natin ang pagtatagpo ni Hesus kay Nicodemo, isang Pariseong naging malapit na tagasunod niya. Makikita natin na ipinakilala ni Kristo ang kanyang sarili na nanggaling mula sa langit. Tunay nga isinugo siya ng Diyos Ama upang tayo ay magkaroon ng buhay na walang hanggan.
Nitong nakaraang Semana Santa, ginunita natin ang Pagpapakasakit at Pagkamatay niya sa Krus upang iligtas tayo mula sa kasalanan. At ngayong panahong bumubuo ng 50 araw, patuloy natin inaalala ang kanyang Muling Pagkabuhay na nagtagumpay laban sa kamandag ng kamatayan at kasalanan. At ito rin ay pagkakataon na patuloy tayong sumampalataya sa kanya at maging kanyang mga saksi.
Kaya makikita natin sa Unang Pagbasa ang katatagan ng misyon ng mga Apostol na ipagpatuloy na ipahayag si Kristo sa bawat dako ng mundo. Kahit sila’y binantaan at binabalaan ng Sanhedrin na huwag mangaral sa pangalan ni Hesus, totoong sinabi ni Pedro na kailangan nilang sundin ang utos ng Diyos na higit pa sa utos ng tao. Hindi pa rin kilala ng mga pinuno ng mga Hudyo si Hesus bilang Mesiyas, subalit marami sa kanilang mga kababayan ay sumaanib na sa pananampalatayang ipinagkaloob ng Panginoon para ipamana rin ng Simbahan sa ating lahat.
Kaya nawa’y patuloy tayo sa pagbibigay-saksi sa Kristong namatay at muling nabuhay upang makilala ng lahat ang plano ng Diyos Ama at mapasailalim sa dakilang kalooban na ipadala ang kabutihan sa isa’t isa.