Podcast: Download (Duration: 7:54 — 5.6MB)
Sabado ng Ika-13 Linggo sa Karaniwang Panahon (I)
o kaya Paggunita sa Mahal na Birheng Maria tuwing Sabado
Genesis 27, 1-5. 15-29
Salmo 134, 1-2. 3-4. 5-6
Bigyan ang D’yos ng papuri
pagkat siya ay mabuti.
Mateo 9, 14-17
Subscribe to Awit at Papuri Communications YouTube Channel
Saturday of the Thirteenth Week in Ordinary Time (Green)
or Optional Memorial of the Blessed Virgin Mary on Saturday (White)
UNANG PAGBASA
Genesis 27, 1-5. 15-29
Pagbasa mula sa aklat ng Genesis
Si Isaac ay matanda na at halos di na makakita. Kaya ipinatawag niya si Esau, ang anak niyang panganay. Sianbi niya rito: “Anak, matanda na ako at malapit nang mamatay. Mabuti pa’y lumabas ka at mangaso. Ihuli mo ako ng usa at lutin ang putahing gusto ko. Pagkakain ko’y igagawad ko sa iyo ang aking basbas bago ako mamatay.”
Nakikinig pala si Rebecca samantalang kinakausap ni Isaac si Esau.
Binihisan ni Rebecca si Jacob ng pinakamagarang damit ni Esau na iniingatan niya. Ang mga braso at leeg ni Jacob na walang balahibo’y binalutan niya ng balat ng kambing. Pagkatapos, ipinadala sa anak ang putahe na may kasama pang tinapay na niluto rin niya.
Lumapit si Jacob kay Isaac. “Ama!” wika niya.
“Sino ka ba?” tanong nito.
“Ako po’y si Esau,” sagot ni Jacob. “Nagawa ko na po ang inyong iniuutos sa akin. Narito na po ang gusto ninyong pagkain; bumangon na kayo at kanin na ninyo ito nang ako’y mabasbasan pagkatapos.”
“Kadali mo naman! Saan ka nakahuli nito? tanong ni Isaac.
“Tinulungan po ako ng Panginoon na inyong Diyos,” sagot ni Jacob.
Nagtanong muli si Isaac, “Ikaw ba’y talagang si Esau? Lumapit ka nga rito nang malaman ko kung ikaw nga.” Lumapit naman si Jacob at siya’y hinipo ng ama. “Kay Jacob ang tinig ngunit ang bisig ay parang kay Esau!” pabulong na wika ni Isaac. Hindi niya nakilala si Jacob, sapagkat ang mga bisig nito’y mabalahibo ring tulad ng kay Esau. Babasbasan na sana ni Isaac si Jacob, ngunit muli pang nagtanong,
“Ikaw nga ba si Esau?”
“Ako nga po,” tugon ni Jacob.
Kaya’t sinabi ni Isaac, “Kung gayun, akin na nag pagkain at pagkakain ko’y babasbasan kita.” Inabot ni Jacob ang pagkain at binigyan pa niya ng alak. “Halika anak, at hagkan mo ako,” sabi ng ama. Niyakap ni Jacob ang ama at naamoy nito ang kanyang kasuutan, kaya’t siya’y binasbasan:
“Ang masamyong halimuyak ng anak ko ang katulad
ay samyo ng kabukirang ang Panginoon ang nagbasbas;
bigyan nawa ikaw ng Diyos ng hamog buhat sa itaas,
nang tumaba ang lupa mo’t ikaw nama’y makaranas
ng saganang pag-aani at alak na masasarap.
Bayaan ang mga bansa’y paalipin at gumalang,
kilanlin kang panginoon ng lahat mong mga angkan,
gumalang din ang lipi mo sa panig ng iyong inang
sila nawang sumusumpa sa iyo ay sumpain,
ngunit yaong nagpapala sa iyo ay pagpalain.”
Ang Salita ng Diyos.
SALMONG TUGUNAN
Salmo 134, 1-2. 3-4. 5-6
Bigyan ang D’yos ng papuri
pagkat siya ay mabuti.
Ngalan niya ay purihin noong kanyang mga lingkod,
ng lahat ng lingkod niyang sa templo ay pumapasok,
upang doon manambahan sa banal na bahay ng Diyos.
Bigyan ang D’yos ng papuri
pagkat siya ay mabuti.
Ang Poon ay papurihan pagkat siya ay mabuti,
ang taglay n’yang kabaitan ay marapat sa papuri.
Siya rin nga ang humirang kay Jacob na kanyang lingkod,
ang Israel nama’y bansang hinirang n’ya at kinupkop.
Bigyan ang D’yos ng papuri
pagkat siya ay mabuti.
Aking batid na ang Poon ay ang Diyos na dakila,
higit siya sa alinmang diyus-diyusang naglipana;
ang anumang hangad niya sa langit man o sa lupa,
at kahit sa karagatan, kung anumang kanyang nasa,
ginaganap niya ito, sa sariling pagkukusa.
Bigyan ang D’yos ng papuri
pagkat siya ay mabuti.
ALELUYA
Juan 10, 27
Aleluya! Aleluya!
Ang tinig ko’y pakikinggan
ng kabilang sa ‘king kawan,
ako’y kanilang susundan.
Aleluya! Aleluya!
MABUTING BALITA
Mateo 9, 14-17
Ang Mabuting Balita ng Panginoon ayon kay San Mateo
Noong panahong iyon, lumapit kay Hesus ang mga alagad ni Juan Bautista at ang wika, “Malimit kaming mag-ayuno, gayun din ang mga Pariseo. Bakit po hindi nag-aayuno ang inyong mga alagad?” Sumagot siya, “Maaari bang magdalamhati ang mga panauhin sa kasalan habang kasama nila ang lalaking ikinasal? Kapag wala na siya, saka pa lamang sila mag-aayuno.
“Walang nagtatagpi ng bagong kayo sa isang lumang kasuutan; sapagkat mababatak nito ang tinagpian, at lalong lalaki ang punit. Wala ring nagsisilid ng bagong alak sa lumang sisidlang-balat. Kapag gayon ang ginawa, puputok ang balat, matatapon ang alak, at mawawasak ang sisidlan. Sa halip ay isinisilid ang bagong alak sa bagong sisidlang-balat, at sa gayo’y kapwa nagtatagal.”
Ang Mabuting Balita ng Panginoon.
Pages: 1 2
« Biyernes, Hulyo 7, 2023
Linggo, Hulyo 9, 2023 »
{ 3 comments… read them below or add one }
PAGNINILAY: Ang mga mas bata ay madalas paglilingkuran ang mga mas nakakatanda sa kanya. Ngunit may mga pagkakataong kahit ang mga mas matatanda ay dapat paglingkuran ang mas nakakabata sa kanya. Ang Unang Pagbasa ay ang sikat na kwento nina Jacob at Esau. Alam natin na sina Isaac at Rebecca ay pinag-isang dibdib ng Diyos, at sila’y nagkaroon ng dalawang anak na lalaki: ang panganay na si Esau, at ang bunsong si Jacob. Palaging pinaiinggitan ni Jacob ang pagkalugod ni Isaac sa panganay sapagkat si Esau ay itinuturing na pinagpapala ng ama nilang si Isaac, na siyang nag-uutos na mangaso ng usa at magluto ng karne nito. Kaya dumating sa puntong si Rebecca ay naghikayat sa bunsong si Jacob na isuot ang mga damit ng mas nakakatandang kapatid, upang akalain ng matandang Isaac na kaharap niya ang kanyang panganay, bagamat ang totoo ay ang humaharap sa kanya ay ang bunso. Kaya nga nakita natin kung paanong humarap si Jacob sa kanyang ama, na inakalang si Esau ay mabilis na bumalik dala ang usang lulutuin. Kaya kay Jacob napunta ang basbas ng Diyos na dala ni Isaac, kahit ang totoo ay hindi si Esau ang nakatayo sa harap ng kanyang mga mata na hinding makakita. At alam natin ang buong kwento kung paanong nagalit si Esau sa panlolokong ginawa ng kanyang kapatid, ngunit natunton ni Rebekka ang plano ng panganay na patayin ang bunsong nanloko. Kaya’t si Jacob ay agad nagsilikas at nanirahan sa Haran, sa bahay ng tiyuhin nitong si Laban. Subalit alam natin na sa huli, nagkasundo ang dalawang magkapatid, at gayunman ay napunta pa rin ang basbas ng Diyos kay Jacob.
Lubos na ipinapagalala ni Hesus sa Ebanghelyo tungkol sa mga bagay na lilipas at mga bagay na mabubuhay kailanman. Tinanong ng mga Pariseo at mga alagad ni San Juan Bautista kung bakit hindi nag-aayuno sina Hesus at ang mga Apostol. Kaya ang naging tugon ng Panginoon ay isang parabula tungkol sa piging ng isang kasalan, na kung saan ang mga panauhin ay hindi nag-aayuno hanggang nakapiling nila ang lalaking ikinasal. At kapag nakaalis na ang lalaking iyon ay saka sila maaring mag-ayuno. Ang talinghagang ito ay patungkol sa presensiya ni Hesus bilang Mesiyas ng Diyos na siyang isinugo upang tipunin ang tao sa iisang Simbahan, ang Sambayanan ng Diyos. Kaya ipinapaalala sa atin na sa Panginoo’y nagmumula ng mga bagong bagay, mga bagay na kinakailangan natin talaga sa buhay at hindi kailanma’y lilipas. Kaya nawa’y mapanibago ang ating puso’t isipan na maging matapat sa Diyos at sa kanyang dakilang kalooban.
Ipinakita ni Jesus ang radikal na paraan sa mga paninuwala ng mga Pariseo (tradisyon) since Jesus is the mediator of New Covenant dahil sa mga panahon na maraming nangyayari Hindi dapat pagiisip ng tao ay nakatuon sa lumang tradisyon kaya nga isinugo ng Diyos Ama Ang kanyang bugtong na Anak sa panahon ng Bagong Tipan upang baguhin Ang mga maling kinagisnan ng tao. Kay Jesus ay Hindi importante Ang religion what is matter most is yun kalooban ng iyong puso o kung paano gumagalaw Ang yun ispiritu.
kung sa handaan madalas masabi natin espesyal ikaw dahil inimbita tayo sa kainan pero di nangangahulugan na tapos na dahil meron pang panauhin katulad nang mga alagad nang ating Panginoon Hesus ang mga Apostoles niya kahit sa dalamhati ay kasama niya pa rin sa huling hapunan noong nagpakita sa kanila sa dalampasigan kung paano nila nahandaan ang ating Mahal na Panginoon nang makakain tunay na ito patotoo dahil kahit ibang taga lungsod kung my bisita tayo pinapatuloy natin at pinakakain dahil kaugalian na natin ito pero mas higit ang pagpapala nang diyos sa atin kung paano tayo magbigayan at magmahalan.