Podcast: Download (Duration: 7:43 — 5.5MB)
Martes ng Ika-15 Linggo sa Karaniwang Panahon (I)
Exodo 2, 1-15a
Salmo 68, 3. 14. 30-31. 33-34
Dumulog tayo sa Diyos
upang mabuhay nang lubos.
Mateo 11, 20-24
Subscribe to Awit at Papuri Communications YouTube Channel
Tuesday of the Fifteenth Week in Ordinary Time (Green)
UNANG PAGBASA
Exodo 2, 1-15a
Pagbasa mula sa aklat ng Exodo
Noong mga araw na iyon, may mag-asawang buhat sa lipi ni Levi na nagkaanak ng lalaki. Napakaganda ng bata kaya’t tatlong buwang itinago ng ina. Nang hindi na ito maaaring itago pa, kumuha siya ng isang basket na yari sa tangkay ng tambo at pinahiran ng alkitran. Pagkatapos, isinilid niya rito ang bata at inilagay sa talahiban sa gilid ng ilog. Ang ate naman ng bata ay lumagay sa di kalayuan upang tingnan kung ano ang mangyayari.
Maliligo noon sa ilog ang anak na babae ng Faraon. Natanaw niya ang basket kaya’t ito’y ipinakuha sa kanyang katulong na naglalakad-lakad naman sa tabing ilog. Nang maiabot sa kanya ang basket, inalis niya ang takip nito at nakita ang batang umiiyak. Naawa siya at kanyang nasabi, “Ito’y anak ng isang Hebrea.”
Ang kapatid naman ng bata ay lumapit sa prinsesa at kanyang sinabi, “Kung ibig po ninyo, ihahanap ko kayo ng isang Hebreang mag-aalaga sa batang iyan.”
“Sige, ihanap mo ako,” sagot ng prinsesa.
Umalis ang batang babae at tinawag ang kanyang ina. Nang dumating ito, sinabi ng prinsesa, “Alagaan mo ang batang ito at uupahan kita.” Kinuha ng ina ang bata at inalagaan. Nang malaki na ang bata, dinala siya ng kanyang ina sa prinsesa, at siya’y itinuring na anak nito. Sinabi niya, “Napulot ko siya sa tubig, kaya Moises ang ipapangalan ko sa kanya.”
Nang binata na si Moises, dinalaw niya ang kanyang mga kababayan at nakita ang hirap na tinitiis ng mga ito dahil sa mabibigat na gawain. Nakita pa niyang sinasaktan ng isang Egipcio ang isang Hebreo. Luminga-linga siya. Nang walang makitang tao, pinatay niya ang Egipcio at ibinaon sa buhangin. Nagbalik siya kinabukasan at may nakita siyang dalawang Hebreong nag-aaway. Tinanong niya ang may kasalanan, “Bakit mo sinasaktan ang kapwa mo Hebreo?”
“Sino ang nagbigay sa iyo ng kapangyarihang mangasiwa at humatol sa amin? Papatayin mo rin ba ako, tulad ng ginawa mo sa Egipcio?” ganting tanong nito sa kanya. Natakot si Moises nang marinig niya ito at noon niya nalaman na may nakakita pala sa ginawa niya sa Egipcio. Nakarating ang balita kay Faraon kaya ibig niyang ipapatay si Moises, ngunit ito’y nakatakas at nakarating sa Madian.
Ang Salita ng Diyos.
SALMONG TUGUNAN
Salmo 68, 3. 14. 30-31. 33-34
Dumulog tayo sa Diyos
upang mabuhay nang lubos.
Lumulubog ako sa burak at putik,
at sa malaking along nagngangalit.
Dumulog tayo sa Diyos
upang mabuhay nang lubos.
At sa ganang akin, ako’y dadalangin
sa iyo, O Poon, sana’y iyong dinggin
sa mga panahon na iyong ibigin;
dahil sa dakilang pag-ibig sa akin,
ang iyong pangakong pagtubos ay sundin.
Dumulog tayo sa Diyos
upang mabuhay nang lubos.
Naghihirap ako’t mahapdi ang sugat,
O Diyos, itayo mo, ako ay iligtas.
Pupurihin ang diyos, aking aawitan,
dadakilain ko’t pasasalamatan.
Dumulog tayo sa Diyos
upang mabuhay nang lubos.
Kung makita ito niyong mga dukha,
sila ay sasamba sa laki ng tuwa.
Dinirinig ng Diyos ang may kailangan,
Lingkod na bilanggo’y di nalilimutan.
Dumulog tayo sa Diyos
upang mabuhay nang lubos.
ALELUYA
Salmo 94, 8ab
Aleluya! Aleluya!
Dinggin ninyong lahat ngayon
ang tinig ng Panginoon
sa loob na mahinahon.
Aleluya! Aleluya!
MABUTING BALITA
Mateo 11, 20-24
Ang Mabuting Balita ng Panginoon ayon kay San Mateo
Noong panahong iyon, sinumbatan ni Hesus ang mga bayang ginawan niya ng maraming kababalaghan sapagkat hindi sila nagsisi’t tumalikod sa kanilang mga kasalanan. “Kawawa ka, Corazin! Kawawa ka, Betsaida! Sapagkat kung sa Tiro at Sidon ginawa ang mga kababalaghang ginawa sa inyo, malaon na sanang nagdaramit ng sako at nauupo sa abo ang mga tagaroon upang ipakilalang sila’y nagsisisi. Ngunit sinasabi ko sa inyo: sa Araw ng Paghuhukom ay higit na mabigat ang sasapitin ninyo kaysa sasapitin ng mga taga-Tiro at taga-Sidon. At ikaw, Capernaum, ibig mong mataas hanggang sa langit? Ibabagsak ka sa Hades! Sapagkat kung sa Sodoma ginawa ang mga kababalaghang ginawa rito sa inyo, sana’y nanatili pa ito hanggang ngayon. Ngunit sinasabi ko sa inyo, sa Araw ng Paghuhukom ay higit na mabigat ang ipaparusa sa inyo kaysa dinanas ng Sodoma.”
Ang Mabuting Balita ng Panginoon.
Pages: 1 2
« Lunes, Hulyo 17, 2023
Miyerkules, Hulyo 19, 2023 »
{ 6 comments… read them below or add one }
PAGNINILAY: Ang Unang Pagbasa ay ang patuloy na kwento ng pagdurusa ng mga Israelita sa mga malulupit na kamay nina Faraon at ng mga Egipcio. Naglabas ng utos ang Faraon na ang bawat isinilang na Hebreo ay dapat patayin. Kaya nang manganak si Yocheved ng isang Hebreong sanggol na lalaki, inilagay ang bata sa isang bakol. At pinalutang ito sa Ilog Nile. Sinasabi ang bakol ay yari sa papirus, na isa sa mga materyal na ayaw ng mga buwaya. At ang nakatagpo sa bakol na ito ay ang prinsesa ng Egipto, na anak ni Faraon. Nang makita niya ang sanggol sa loob, nagpasiya siya na palakihin ang bata bilang prinsipie ng Egipto, at nag-alok si Miriam na pangalagaan ni Yocheved ang batang isinilang nito. Ang bata ay tinawag na Moises, sapagkat binunot siya mula sa tubig.
Nakita natin ang paglaki ni Moises, at siya ay inatasang magbantay sa mga Hebreong alipin. At imbis na pagmalupitan sila, dahil siya rin ay isang Hebreo, nag-utos siya sa mga Egipcio na huwag silang saktan o pahirapan masyado. Kaya nang makita niya ang isang bantay ng Egipto na pinaglalatigo ang isang Hebreo, pinatigil niya ito, subalit hindi sinadyang patayin ang guwardiya. At nang makita niya ang pag-aaway ng dalawang Hebreo, pinatigil niya ang away at pinagsabihan ang dalawang lalaki. Subalit ang isa ay sumagot kung papatayin ba sila ni Moises, katulad nang pagpatay niya sa guwardiya ng Egipto. Natuntunan ni Faraon ang balitang ito, at tinangkang patayin si Moises. Ngunit si Moises ay nagsilikas at nagpunta sa disyerto ng Madian. Ang unang yugto ng buhay ni Moises ang siyang magpapatungo sa kanyang misyon na itinakda ng Diyos upang iligtas ang mga Israelita mula sa pagkaalipin sa Egipto. Katulad ng pagpulot sa kanya sa ilog, ganun rin ang nakatakdang tungkulin sa kanya ng Panginoon upang gabayan ang tao mula sa pagkaalipin sa Egipto patungo sa Lupang ipinangako sa mga patriarkiya, ang lupang bumubukal ng gatas at pulot.
Ang ating Ebanghelyo ay isang hinanakit ng ating Panginoong tungkol sa mga bayang hindi tinatalikuran ang kanilang mga kasalanan. Sinumbatan niya ang mga bayan ng Corazin at Betsaida sapagkat narinig nila ang mensahe niya, ngunit hindi ito’y pinanindiggan nang mabuti. Sinumbatan din niya ang kanyang itinuring na tahanan, ang Capernaum, sapagkat ito’y pilit na nagmamataas para sa sariling kapakapanan. Tila nga ba nakaktakot ang babala ni Hesus na mabigat na parusa ang haharapin ng mga bayan na ito sa Araw na Paghuhukom. Makikita natin dito yung awa at habag ng Panginoon na pagbigyan ng pagkakataon ang mga bayan ng Corazin, Betsaida, at Capernaum na sundin ang mga utos ng Panginoon. Sabi nga dun sa ating Aleluya Verse: “Dinggin ninyong lahat ngayon ang tinig ng Panginoon sa loob na mahinahon” (Salmo 94:8). Mahalaga rin dito na ang konsepto ng isang lipunan ay dapat nakikinabang sa tinatawag na “common good” ng lahat ng mga mamamayan. Ang paggawa ng mabuti sa kapwa at sa ibang tao ay ganyan din ang ginagawa natin kay Kristo.
Kung ang ating bayan ay paninindigan ang katotohanan at kabutihan, tunay na pagpapalain tayo ng Panginoon habambuhay. Habang tayo’y namumuhay dito sa lupa, kailangan natin dinggin ang kanyang mga mensahe at isabuhay ang mga ito nang sa gayon ang ibang tao rin ay gagawa ng mabubuting bagay para sa ikararangal ng ating Poong Maykapal.
Tingnan mo ang iyong paligid, lubhang mapalad ka kumpara sa iba, napakaraming biyaya ang ininigay sayo ng Diyos kumpara sa iba. Kung ay may bahay natutuluyan, nakakain ng masarap at higit sa isang beses isang araw. May asawa at mga anak, may hanapbuhay. Ikaw ay mapalad at ipongakaloob sayo ito ni Hesus. Ano nman ang iginanti mo? Kung ikaw ay hindi magsisi sa iyong kasalanan at hindi tumalikod sa pagawa ng masama, kawawa ka sabi ni Hesus. Lahat ay pwede nyang bawiin sa isang iglap lamang kapag ninais nya. Sinabi rin sa ebanghelyo na wag kang maghangad na maging mataas dahil malalim ang iyong kababagsakan. Humility. Magpakababa tayo, isapuso ang salita ni Hesus na ang nagmamakataas ay ibinaba at ang nagmamakababa ay itinataas.
Magsisi sa kasalanan
Talikuran ang kasamaan
At Magpakababa
Yan ang mensahe ng Mabuting Balita.
ang pagpapala ni moises ay nakamit na nya ng sya ay sanggol p. gusto ng ina nya na iligtas sya at gumawa ng paraan upang hindi sya mapatay. sa kagandahang loob ng reyna na anak ng faraon nakita nya ang basket sa ilog at itoy kanyang kinuha at itinuring na anak at ang tunay nyang ina ang siyang naging tagapag- alaga nya..tunay na nalalantay sa dugo ni moises ang awa at malasakit nya sa kanyang mga kababayan na hebreo halos sya ay pumatay ng isang egipcio hanggang sya ay tumakas at nagtungo sa madian. sa ating ebanghelyo halos lahat na ng paraan ay ginawa na ni Hesus para magbago ang mga taga corazin at besaida ngunit hindi sila nagbago at nakinig sa kanya.tulad natin ayaw natin makinig at sumunod sa salita ng diyos nandun yung katigasan ng ating ulo mas gusto pa natin ang mapasama kesa makapiling nating ang diyos.sa araw ng paghuhukom nawa mabilang sana tayo sa kanyang kaharian. patuloy natin pakinggan ang kalooban ng diyos sa ating pang araw araw na buhay
describes the birth and early life of Moses. His mother defies the order to kill Hebrew boys and hides her son. Once he becomes too old to conceal, she places him in a basket on the Nile. Apparently, this was a deliberate attempt to have Moses adopted, as Moses’ older sister is stationed nearby, watching.
Matthew tells us that after saying these things that Jesus then began to denounce the cities in which most of His miracles were done. The reason He denounced them was because they did not accept His central teaching which was to repent [change their ways] for the Messiah has come and the kingdom of heaven is at hand.
Ang malaking katanungan sa ebenghelyo na dapat sagutin ay papano ba nating mga tao pinahahalagahan ang pagmamahal, biyaya at pagpapala ng Diyos na sa kabila ng kanyang kagandahang loob kalimitan sinusuklian ito ng paglabag sa mga natutunan ng mga pangaral. Dito sa pagbasa pinaririnig at pinapakita ng Diyos ang kanyang disappointment at panunumbat, at ipinahihiwatig na ang mas malaking aral na natanggap na bumalik sa luma’t makasalang buhay ay mas malaki ang kapurasahan kumpara doon sa maliit na nataniman ng Salita ng Diyos. Pero magka-ganun pa man patuloy na hinihimok tayo ng pagbasa na ang lahat sa mata ng Panginoon ay mahuhusgahan depende sa bigat ng pagkakasala na kung saan ang bawat isa ay binibigyan ng pagkakataon magpanibagong buhay at pahalagahan ang uri ng buhay na ninanais ng Diyos sa sangtinakpan.
siguro kung tayo pinarusahan nang ating Mahal na Panginoon noong ipako siya sa krus malamang tayo ay pinabayaan pero kabaligtaran ito bagkus kapayapaan ang kanyang ibabalik sa atin tunay na minamahal niya tayong lahat Minsan masasabi natin na nagkaroon nang bagyo, lindol, baha doon sa ibat ibang lugar ito yung pagsubok na sana ating harapin dahil sa kabila nang lahat nang pagparusa sa Sodom at Gomorrah Meron pa rin naliligtas sa kapamahakan ito rin ang sinapit ni Moses noong inilatag sa basket at palutang lutang sa ilog naiiligtas pa rin kahit lumakad sa disyerto na tanging walang makain at tubig lamang ang dala hindi pa rin tayo pinabayaan nang ating Mahal na Panginoon Hesus dahil sa kabila nang ating mga ginawa Meron pa rin kaginhawahan na ibabalik upang iligtas tayo sa kapamahakan.