Podcast: Download (Duration: 6:47 — 4.8MB)
PANALANGIN NG BAYAN
Ikalawang Linggo ng Pasko ng Pagkabuhay
Miyerkules
Taglay ang pagtitiwala, ilapit natin ang ating mga alalahanin sa Diyos Ama na labis na nagmahal sa mundo kaya’t ibinigay ang kanyang bugtong na Anak upang hindi na mawala ang mga naniwala sa kanya, bagkus ay magkaroon ng buhay na walang hanggan.
Panginoon, dinggin Mo ang aming panalangin.
o kaya
Sa ngalan ni Jesus, basbasan Mo kami.
Ang Simbahan nawa’y laging maging buhay na tanda ng pag-ibig at habag ng Diyos sa mga panahon ng kadiliman at kawalan ng pag-asa, manalangin tayo sa Panginoon.
Sa ating pamumuhay, nawa’y maipadama natin sa kapwa ang pag-ibig ng Diyos sa pamamagitan ng ating mga ginagawa, manalangin tayo sa Panginoon.
Ang pag-ibig ng Diyos nawa’y maghatid ng kapayapaan sa ating mga puso at pagkakasundo ng lahat, manalangin tayo sa Panginoon.
Ang mga maysakit at mga nagdurusa nawa’y makaunawa na mahal sila ng Diyos sa pamamagitan ng pangangalaga at pagkalinga ng kanilang pamilya at mga kaibigan, manalangin tayo sa Panginoon.
Ang mga mahal natin sa buhay na namayapa nawa’y makabahagi sa kaluwalhatian ng Muling Pagkabuhay, manalangin tayo sa Panginoon.
Ama naming nasa Langit, tunghayan mo nang may pag-ibig ang iyong mga anak at patnubayan mo kami sa aming paglalakbay patungo sa kaligtasan. Hinihiling namin ito sa pamamagitan ni Kristo na aming Panginoon. Amen.
Pages: 1 2
« Martes, Abril 18, 2023
Huwebes, Abril 20, 2023 »
{ 2 comments… read them below or add one }
Pagninilay: Noong 1995, idinaos sa Maynila ang ikasampung pagdiriwang ng Pandaigdigang Araw ng mga Kabataan. Kasabay nito ang ikalawang pagbista ng pinakamamahal na Papa San Juan Pablo II sa ating bansa. Ang tema ng pagdiriwang ng WYD na ito ay “Kung paanong sinugo ako ng Ama, isinusugo ko rin kayo.” At kasabay nito ay ang pag-aawit ng inilikhang kanta ni Trina Belamide na “Tell the World of His Love”. Ang nasabing kanta ay hango sa ating Ebanghelyo ngayon. Ang ating pinapaboritong bersikulo sa Bibliya ay isang magandang pahayag ni San Juan tungkol sa pag-ibig ng Diyos. At alam natin na ang buod ng Banal na Kasulatan ay nakasentro sa ating Panginoong Diyos Ama bilang Diyos ng Pag-ibig. Ang paglikha niya sa atin ay ayon sa pag-ibig dahil ang kanyang ginawa ay puno ng kabutihan. Subalit dahil sa kasamaan ng tao, nawalay ang ating relasyon sa kanya. Ngunit sa kabila ng ating mga kahinaan dulot ng pagkakasala at pagkukulang, isinugo ng Ama sa napakatakdang araw ang kanyang Bugtong na Anak, ang ating Panginoong Hesukristo. Bagamat siya ay Diyos, si Kristo ay nagkatawang-tao upang maranasan niya ang ating katauhan maliban sa gumawa ng kasalanan. Niyakap niya tayo upang tayo ay kanyang iangat patungo sa isang mabuting pakikipag-ugnayan sa Diyos nating Ama. Ginawa niya ang lahat alinsunod sa dakilang kalooban kahit hanggang sa bingit ng kamatayan sa Krus, kaya idinakila nang siya’y nabuhay na mag-uli. At ang tugon natin ay pananampalataya upang makamtan natin ang buhay na walang hanggan. Ito ang kanyang pangako hindi sa mundo ngayon, kundi sa kabilang banda, ang kalangitan. Kaya ito’y paalala sa atin na ang Diyos na mapagmahal ay inaanyayahan tayong yakapin nang buong-buo ang kanyang pagmamahal upang ipadama natin ito sa ibang tao. At ang pag-ibig na iyan ay dapat kaakibat ng pagtutuwid ng mga masasamang bagay at patuloy na paggawa ng kabutihan. Nang sa gayon, tayo nawa ay magdadala ng liwanag ni Kristong Muling Nabuhay at Niluwalhati sa lahat, lalung-lalo na sa mga taong nabubuhay sa mga “kadiliman” ng kanilang mga buhay.
Please LIKE & SHARE.
“SAINTSPOT” on Youtube & Facebook
https://youtu.be/VBotUP9vPQs
GOSPEL REFLECTION:
Ang talatang ito na binanggit sa itaas ay bunga sa matiyang pagtatanong ni Nicodemo kay Hesus. Ang maikling pagtuturong ito ay maaaring hatiin sa limang mahahalagang katotohanan.
Una, ang pag-ibig ng Ama sa sangkatauhan ay isang pag-ibig na napakalalim na walang paraan upang ito’y lubos na mauunawaan.
Pangalawa, ang pag-ibig na ito ng Ama para sa atin ang nagtulak sa Kanya na ibigay sa atin ang pinakadakilang regalo sa atin: ang Kanyang sariling bugtong na Anak. Dapat nating pag-isipan nang may panalangin para maunawaan ang mas malalim na kahulugan sa walang hanggang pagkabukas-palad ng Ama.
Ikatlo, habang tayo ay nanalangin, ang tanging angkop na tugon natin ay pananampalataya. Dapat tayong “manampalataya sa Kanya.” At dapat lumalim ang ating paniniwala tulad ng paglalim ng ating pang-unawa.
Ikaapat, dapat nating matanto na ang walang hanggang kamatayan ay laging posible. Posible na tayo ay “mapahamak” magpakailanman. Ngunit dito natin malalaman na ang unang tungkulin ng Anak ay iligtas tayo mula sa walang hanggang pagkahiwalay sa Ama.
Panghuli, ang kaloob ng Anak mula sa Ama ay hindi lamang para iligtas tayo kundi para ihatid din tayo sa Langit, sa “buhay na walang hanggan” na puno ng kaluwalhatian at katuparan.
Pagnilayan, ngayon, ang buod na ito ng buong Ebanghelyo. Subukang tingnan ang iyong sarili bilang si Nicodemo, isang mabuting tao na nagsisikap na maunawaan at makilala si Hesus at ang Kanyang mga turo nang mas malinaw. Kung makikinig ka sa mga salitang ito kasama si Nicodemo at matatanggap ang mga ito nang malalim nang may pananampalataya, ikaw rin, ay makakabahagi sa walang hanggang kaluwalhatian na ipinangako ng mga salitang ito.
Aking maluwalhating Panginoon, Ikaw ay dumating sa amin bilang isang pinakadakilang Regalo na kailanma’y hindi namin lubos na maisip. Kayo ang kaloob ng Ama sa Langit. Ipinadala ka dahil sa pag-ibig para sa layuning iligtas kami at dalhin kami sa kaluwalhatian ng kawalang-hanggan. Tulungan akong maunawaan at maniwala sa lahat kung sino ka at tanggapin Ka bilang isang Regalo na tagapagligtas para sa Walang Hanggan. Hesus, nagtitiwala ako sa Iyo.