Podcast: Download (Duration: 5:43 — 4.1MB)
PANALANGIN NG BAYAN
Ikalawang Linggo ng Pasko ng Pagkabuhay
Martes
Manalangin tayo sa Diyos Ama, na sa pamamagitan ng kanyang Espiritu, ay muling nabuhay si Kristo at siya ring magbibigay ng buhay sa ating mga mortal na katawan.
Panginoon, dinggin Mo ang aming panalangin.
o kaya
Panginoon ng langit at lupa, pagpalain Mo kami.
Ang mga ginawaran ng katungkulan nawa’y pukawin ng Espiritu sa pagtupad ng kanilang pamumuno ayon sa diwa ng pag-ibig at paglilingkod, manalangin tayo sa Panginoon.
Atin nawang patuloy na panibaguhin sa Espiritu ang ating mga sarili at lumago tungo sa kaganapan ng pag-ibig ni Kristo, manalangin tayo sa Panginoon.
Sa lahat ng nakikiisa sa pagdiriwang ng Eukaristiyang ito, nawa’y matulungan natin ang isa’t isa nang may pag-ibig na nagpapahayag sa Santatlo, manalangin tayo sa Panginoon.
Ang mga maysakit nawa’y maipagamot at mabigyan ng lunas sa pamamagitan ng kabutihang-loob ng kanilang pamilya at mga kaibigan, manalangin tayo sa Panginoon.
Ang mga namayapa nawa’y magdiwang sa maluwalhating Muling Pagkabuhay ni Kristo, manalangin tayo sa Panginoon.
Panginoon, ibuhos mo ang iyong Espiritu sa aming mga puso upang baguhin ang aming buhay sa pamamagitan ng buhay na kaloob sa amin ng Muling Pagkabuhay ni Kristo. Hinihiling namin ito sa pamamagitan ni Kristo na aming Panginoon. Amen.
Pages: 1 2
« Lunes, Abril 17, 2023
Miyerkules, Abril 19, 2023 »
{ 2 comments… read them below or add one }
Pagninilay: Ang Panahon ng Pasko ng Pagkabuhay ay pagsasariwa ng kaligtasang dulot ng Pagpapakasakit at Pagkamatay ni Hesus, na nagkaroon ng kabuluhan nang siya’y muling nabuhay mula sa libingan at nanaig ang kamatayan at kasalanan. Ang Ebanghelyo ngayon ay ang patuloy na diskurso ng ating Panginoong Hesukristo kay Nicodemo, isang Pariseong nais makinig at matuto mula sa kanya. Kahapon ay narinig natin kung paanong makakamit natin ang buhay na walang hanggan. Ngayon ay patuloy si Hesus sa pagsasabing kailangan nating ipagsilang na muli sa binyag. Hindi naunawaan ni Nicodemo ang pahayag na ito na akala niya’y papasok pa ang tao sa sinapupunan ng ina. Dito pinaunawaan ni Hesus na walang nakapunta ng langit kundi ang Anak ng Tao. At sinipi ni Hesus ang kwento ng Bilang 21:4-9 kung saan itinaas ni Moises ang isang ahas na tanso sa isang poste, ganun din ang pagtataas sa Anak na Tao upang magkaroon ng buhay na walang hanggan ang mga sumasampalataya. Makikita natin ang planong pangkaligtasan ng Diyos na natupad sa pamamagitan ni Hesus. At nangyari nga ang pangyayaring ito nang gunitain natin ang kanyang Pagpapakasakit at Pagkamatay sa Krus noong Semana Santa. Ayon kay San Juan, si Nicodemo na kahit Pariseo ay naging malapit na kaibigan ni Hesus, kaya siya’y dumala ng mga pampalasa upang pahiran ang Katawan ng Panginoon. At makalipas ang ilang taon, sinasabi na si Nicodemo ay napabilang sa Ang Daan (sa Antiqouia silang tinawag na mga “Kristiyano”). Ang Unang Pagbasa ay isang magandang paalala na kinalulugdan ng Panginoong Diyos sa kanyang Sambayanan. Makikita natin ito sa sinaunang Simbahan na patuloy na lumalago dahil sa pangangaral at pagbibigay-saksi ng mga Apostol para kay Kristo. Kaya sila’y nagkaisa sa ilalim ng iisang pananampalataya sa Ama at sa Anak. Ang pagkakaisa ay mahalaga upang makamit natin ang buhay na walang hanggan. Sa pamamagitan ng pakiisa, nawa’y sikapin natin magpakatao para sa iba sa pamamagitan ng paggawa ng mabuti at talikdan ang mga masasama.
Please LIKE & SHARE.
“SAINTSPOT” on Youtube & Facebook
https://youtu.be/hjNviN_xAfc
GOSPEL REFLECTION:
Nagtanong si Nicodemo kay Hesus: “Paano pong mangyayari ito?” Ang tanong niya’y tugon sa sinabi ni Hesus na ang daan patungo sa Langit ay “ipanganak mula sa itaas.”
Siguradong ang pagtugon ni Hesus ay isang banayad ngunit direktang hamon kay Nicodemo upang ilipat siya mula sa kanyang mga tanong tungo sa pananampalataya. At iyon ang susi. Si Nicodemo ay hindi lumapit kay Hesus para Siya’y hulihin at hatulan na tulad ng ginawa ng ibang mga Pariseo. Dumating si Nicodemo dahil nalilito siya. At malamang, nataranta siya dahil nakaramdam siya ng matinding panggigipit ng kapwa niya Pariseo para hatulan si Hesus.
Alam ni Hesus na bukas si Nicodemo at malaki ang tiyansa na siya’y mapagtagumpayan at makasunod kay Hesus. Ngunit alam din ni Hesus na si Nicodemo ay kailangan ng kaunting “banal na paghamon” upang makapasok sa kaloob ng pananampalataya. At ganoon nga ang nangyari kay Nicodemo na tuluyang lumalim sa pananampalataya dahil hindi siya tumigil na kilalanin si Hesus.
Pagnilayan, ngayon, sa anumang paraan kung saan kailangan mo rin ng “banal na paghamon” mula sa ating Panginoon. Anong uri ng panggigipit ang nararanasan mo sa buhay? Ang mga kaibigan, kapitbahay, kapamilya o katrabaho ba ay tinutuligsa ka at iginigipit dahil sa iyong pananampalataya? Kung gayon, sundan mo ang katapangan ni Nicodemo. Nawa ang kaniyang patotoo ay magbigay ng inspirasyon sa iyo at hayaan ang ating Panginoon Diyos na hamunin ka kung saan mo ito kailangan nang sa gayon ay matanggap mo rin ang “banal na paghamon” upang maging mas tapat ka na tagasunod ni Hesus.
Panginoon ng lahat ng lakas, hindi ka natitinag sa Iyong determinasyon na hamunin ako sa mga panahon na higit kong kailangan. Tulungan Mo akong tanggapin ang Iyong malumanay na mapagmahal na pagsaway kapag ako ay mahina upang magkaroon ako ng lakas ng loob na kailangan ko upang maging isang tapat na tagasunod Mo. Bigyan mo ako ng kalinawagan at pang-unawa, mahal na Panginoon, at tulungan mo akong madaig ang mga mapanlinlang na panggigipit ng mundo. Hesus, nagtitiwala ako sa Iyo.