Podcast: Download (Duration: 6:29 — 4.6MB)
Lunes sa Ika-2 Linggo ng Pasko ng Pagkabuhay
Mga Gawa 4, 23-31
Salmo 2, 1-3. 4-6. 7-9
Mapalad ang may tiwala
sa Panginoong Dakila.
Juan 3, 1-8
Subscribe to Awit at Papuri Communications YouTube Channel
Monday of the Second Week of Easter (White)
UNANG PAGBASA
Mga Gawa 4, 23-31
Pagbasa mula sa aklat ng Mga Gawa ng Apostol
Noong mga araw na iyon, nang mapalaya na sina Pedro at Juan, sila’y nagpunta sa mga kasamahan nila at ibinalita ang sinabi ng mga punong saserdote at ng matatanda ng bayan. Nang marinig ito, sama-sama silang nanalangin sa Diyos. Sinabi nila, “Kayo po ang lumikha ng langit, ng lupa, ng dagat at ng lahat ng nasa mga ito! Kayo po ang nagsalita sa pamamagitan ng aming nunong si David na inyong lingkod nang sabihin niya, sa patnubay ng Espiritu Santo:
‘Bakit galit na galit ang mga Hentil,
at ang mga tao’y nagbabalak nang walang kabuluhan?
Nahahandang lumaban ang mga hari sa lupa,
at nagtitipon ang mga pinuno
laban sa Panginoon at sa kanyang Hinirang.’
“Nagkatipon sa lungsod na ito sina Herodes at Poncio Pilato, kasama ang mga Hentil at ang buong Israel, laban sa iyong banal na Lingkod na si Hesus, ang iyong Hinirang. Isinagawa nila ang lahat ng bagay na dapat mangyari na itinakda mo noon pa. At ngayon, Panginoon, pinagbabantaan nila kami. Tulungan mo ang iyong mga alipin na mapaingaral nang buong tapang ang iyong Salita. Iunat mo ang iyong kamay upang magpagaling, at loobin mo na sa pangalan ng iyong banal na Lingkod na si Hesus ay makagawa kami ng mga kababalaghan.” Pagkatapos nilang manalangin, nayanig ang pinagtitipunan nila. Silang lahat ay napuspos ng Espiritu Santo at buong tapang na nangaral ng Salita ng Diyos.
Ang Salita ng Diyos.
SALMONG TUGUNAN
Salmo 2, 1-3. 4-6. 7-9
Mapalad ang may tiwala
sa Panginoong Dakila.
o kaya: Aleluya!
Bakit nagbabalak itong mga bansa na sila’y mag-alsa?
Anong kabuluhan ng lahat ng itong binabalak nila?
Mga hari nila ay naghihimagsik at nagkakaisa,
na ang Panginoon at ang kanyang hirang ay bakahin nila.
“Pagsikapan nating tayo ay lumaya sa pagkaalipin,
at ating igupo ang pamahalaang sumakop sa atin.”
Mapalad ang may tiwala
sa Panginoong Dakila.
Sa trono ng langit, nagtawa ang Poon nang iyo’y sabihin,
at sila’y kinutya sa kanilang balak na mahirap gawin.
Sa galit ng Diyos, sila’y buong bagsik na pinangusapan,
sa tindi ng poot, yaong mga hari ay nahintakutan;
at tungkol sa akin ay kanyang sinabi:
“Sa bundok kong mahal, sa tuktok ng Sion,
aking iniluklok ang haring marangal.”
Mapalad ang may tiwala
sa Panginoong Dakila.
Ganito ang sabi ng lingkod ng Poon na hari sa Sion:
“Aking ihahayag ang ipinag-utos nitong Panginoon,
‘Ikaw ang anak kong pinakamamahal, at magmula ngayon,
Ako namang ito ang giliw mong ama sa habang panahon.
Hingin mo sa akin ang lahat ng bansa, at ibibigay ko,
anumang narito sa buong daigdig ay magiging iyo;
pamahalaan mo ng kamay na bakal ang lahat ng ito,
tulad ng palayok, durugin mo sila sa mga kamay mo.’”
Mapalad ang may tiwala
sa Panginoong Dakila.
ALELUYA
Colosas 3, 1
Aleluya! Aleluya!
Kayong kay Kristo nabuhay
ay sa langit nakalaan
upang kay Kristo pumisan.
Aleluya! Aleluya!
MABUTING BALITA
Juan 3, 1-8
Ang Mabuting Balita ng Panginoon ayon kay San Juan
May isang Pariseo at pinuno ng mga Judio, na nagngangalang Nicodemo. Isang gabi, siya’y nagsadya kay Hesus. “Rabi,” sabi niya, “nalalaman po naming kayo’y isang gurong mula sa Diyos, sapagkat walang makagagawa ng mga kababalaghang ginagawa ninyong malibang sumasakanya ang Diyos.” Sumagot si Hesus, “Sinasabi ko sa inyo: maliban na ipanganak na muli ang isang tao, hindi siya paghaharian ng Diyos.” “Paano pong maipapanganak na muli ang isang tao kung matanda na siya? Makapapasok pa ba siya sa tiyan ng kanyang ina para ipanganak uli?” tanong ni Nicodemo. “Sinasabi ko sa inyo,” ani Hesus, “maliban na ang tao’y ipanganak sa tubig at sa Espiritu, hindi siya paghaharian ng Diyos. Ang ipinanganak sa laman ay laman, at ang ipinanganak sa Espiritu ay espiritu. Huwag kayong magtaka sa sinabi ko sa inyo, ‘Lahat ay kailangang ipanganak na muli.’ Umiihip ang hangin kung saan ibig at naririnig ninyo ang ugong nito, ngunit hindi ninyo alam kung saan nanggagaling at kung saan naparoroon. Gayun din ang bawat ipinanganak sa Espiritu.
Ang Mabuting Balita ng Panginoon.
Pages: 1 2
« Linggo, Abril 16, 2023
Martes, Abril 18, 2023 »
{ 2 comments… read them below or add one }
Pagninilay: Ang Muling Pagkabuhay ng ating Panginoong Hesukristo ay ang pinakaugat ng ating pananampalataya bilang mga Kristiyano. Tayo ay suamsampalataya sa Diyos dahil sa biyaya ng buhay na inialay ni Kristo sa Krus at iniwasto niya ito nang siya’y muling mabuhay. Ito yung naging lakas at katatagan ng mga Apostol sa Unang Pagbasa na nawa’y patuloy sila sa pangangaral ng Banal na Salita sa kabila ng mga banta ng mga nais pumatay sa kanila. Dito inaalala nila ang sinapit ni Hesus nang siya’y pagtulungan nina Haring Herodes, Poncio Pilato, mga Romano, mga pinuno ng mga Hudyo, at iba pang mga taga-Israel na humiling na ipako siya sa Krus. Subalit sa huli ay nagtagumpay siya sa pamamagitan ng kanyang Muling Pagkabuhay, at ito’y tanda na ang mga Apostol ay binigyang kakayahan upang ipangaral ang Mabuting Balita. Kaya makikita natin na dahil si Kristo nga’y tunay na nabuhay na mag-uli, hindi dapat manaig ang anumang masamang bagay na nagdudulot ng kasamaan at kasalanan.
Ang Muling Pagkabuhay ni Hesukristo ay tanda rin ng ating pagiging marapat na tawaging mga “anak ng Diyos”. Narinig natin sa Ebanghelyo ang pagdidiskurso ni Hesus sa isang Pariseong si Nicodemo. Hindi katulad ng kanyang mga kasamahan sa grupo, mas bukas ang isipan ni Nicodemo na pakinggan ang mga pahayag ng Panginoon. Kaya nang bisitahin niya siya noong isang gabi, dito idineklara ng Pariseo na si Hesus ay isang guro na galing sa Diyos, at wala siyang ipapangaral kung hindi ito’y iniutos ng Diyos. At ang tugon naman ni Hesus ay isang pagpapatibay ng pananampalataya ni Nicodemo, na ang sinumang nais makamtan ang paghahari ng Diyos ay kailangang muling ipanganak. Hindi ito unang naunawaan ni Nicodemo sapagkat inakala niya’y ang isang tao’y kailangan pumasok muli sa sinapupunan ng ina upang ito’y lumabas muli. Subalit ang tinutukoy dito ni Kristo ay ang panganganak sa pamamagitan ng tubig at ng Espiritu. Samakatuwid, ito’y tumutukoy sa Sakramento ng Binyag, ang pinutan tungo sa ating paglalakbay sa pananampalataya. At ayon sa ating Katesismo, ang Binyag ay kinakailangan upang makamtan natin ang kaligtasan. Sa pamamagitan ng Sakramentong ito, dalawang bagay ang ating nakakamtan: (1) ang paglilinis ng ating orihinal na kasalanan, at (2) ang pagiging marapat na tawaging mga anak ng Diyos sa pamamagitan ng ating pagbibilang sa kanyang Simbahan. At dahil tayo’y mga miyembro ng Katawan ni Kristo, ang Simbahan, tayo’y may tungkuling ipagtupad ang ating misyon katulad ng ginawa niya: Pangpari (mga sakrispisyo at panalangin), Pangpropeta (ang kabutihan at katuwiran na ipahayag at gawin), at Panghari (paglilingkod na walang inaasahang kapalit). At ang pagtanggap ng binyag ay paalala sa atin ni San Pablo sa kanyang sulat sa mga taga-Roma (kb. 6, vv. 3-11) na ang ating pagbibinyag ay isang espirituwal paraan ng ating pagkamatay sa kasalanan at muling pagkabuhay para sa Diyos Ama sa pamamagitan ng Diyos Anak na ating Panginoong Hesukristo. Kaya noong Bihilya at Araw ng Pasko ng Pagkabuhay, isinariwa natin ang ating pangako sa Binyag upang talikdan natin ang mga masasamang bagay at sumampalataya sa Diyos at sa kanyang ginawa para sa ating kaligtasan. At dito nawa tayo’y tunay na mabuhay para sa ating Panginoon sa pamamagitan ng pagtupad ng ating mga pangako na ating sinariwa noong tayo’y bininyagan upang ipadala natin ang pagmamahal at awa ng Diyos sa ibang tao.
Please LIKE & SHARE.
“SAINTSPOT” on Youtube & Facebook
https://youtu.be/T9eCZwI2Klc
GOSPEL REFLECTION:
Si Nicodemo ay nanindigan laban sa iba pang mga lider ng relihiyon noong panahong iyon upang ipagtanggol si Hesus at ipakita ang suporta para sa Kanya. Nangangailangan ito ng lakas ng loob. Siya ay kinutya at nanganganib na layuan ng iba. Ngunit alam ni Nicodemus na may kakaiba kay Hesus, at nagtiyaga siya sa pagsunod sa inspirasyong iyon.
Sa maraming paraan, si Nicodemo ay isang magandang halimbawa para sa atin ngayon sa ating modernong mundo. Parami nang parami, sa karamihan ng mga sekular na kultura sa daigdig, ang pagiging tagasunod ni Hesus ay minamaliit. Ito ay totoo lalo na kung pipiliin mong ipamuhay ang iyong pananampalataya nang hayagan at maniwala sa lahat ng itinuturo ng mga Ebanghelyo. At gaya ni Nicodemo, marami ang mas madaling lumapit kay Hesus “sa gabi,” ibig sabihin, sa isang tagong paraan. At kahit na nagsimula si Nicodemo sa ganitong paraan, sa kalaunan ay nagsalita siya nang hayagan bilang pagtatanggol kay Hesus sa harapan ng kanyang mga kapwa Pariseo na, ayon sa ilang tradisyon, ay umusig sa kanya at itinaboy siya.
Pagnilayan, ngayon, kay Nicodemus na ngayon ay santo sa ating simbahan. Hinayaan niyang lumago ang kanyang pananampalataya habang nakikinig Siya kay Hesus, nakipaglaban sa panggigipit ng kanyang mga kasamahan, ngunit sa huli ay hayagang ipinahayag ang kanyang pananampalataya kay Kristo. At kahit na nasaktan nito ang kanyang makalupang posisyon ng karangalan sa loob ng Sanhedrin at sa mga makalupang pinuno, ito ay nakakuha kay Nicodemus ng walang hanggang karangalan sa Langit. Pagnilayan ang lakas ng loob na dapat niyang harapin ang panggigipit ng kanyang mga kasamahan sa pamamagitan ng pagpayag sa pananampalatayang natagpuan niya kay Kristo na lumago at punuin ang kanyang buhay ng liwanag ng Katotohanan. Sikaping tularan ang mabuting taong ito at hayaan ang iyong sarili na mabigyang inspirasyon ng kanyang katapangan upang ikaw din ay makatanggap ng parehong walang hanggang kaluwalhatiang tinatamasa niya ngayon sa Langit.
Panginoon ng liwanag at katotohanan, inihahayag Mo ang Iyong sarili sa mga lumalapit sa Iyo nang may pananampalataya. Tulungan mo akong sundin ang halimbawa ni Nicodemo upang ang lahat ng kalituhan at kadiliman ay mapawi ng liwanag ng Iyong katotohanan. Bigyan mo ako ng lakas ng loob, mahal na Panginoon, na sumunod sa Iyo at ituon ang aking puso sa lahat ng Iyong inihayag. Hesus, nagtitiwala ako sa Iyo.