Podcast: Download (Duration: 6:23 — 3.4MB)
PANALANGIN NG BAYAN
Ika-24 Linggo sa Karaniwang Panahon
Lunes
May pananampalatayang kasingtatag ng sa senturyon, lumapit tayo sa Panginoon at manalangin para sa pangangailangan ng Simbahan at ng sandaigdigan.
Panginoon, dinggin Mo ang aming panalangin.
o kaya
Panginoon, basbasan Mo kaming mga hindi karapat-dapat.
Ang Simbahan nawa’y hindi ituring ang sinuman saanman bilang banyaga o waring hindi kasapi, manalangin tayo sa Panginoon.
Yaong mga namumuno sa ating buhay sibil nawa’y ituring ang bawat tao nang may katarungan at pagkakapantay-pantay, manalangin tayo sa Panginoon.
Ang mga taong kakaiba sa atin sa paniniwala, lahi o pinaglakhan nawa’y matutuhan nating unawain at tanggapin, manalangin tayo sa Panginoon.
Ang mga matatanda, mga nalulumbay, at mga maysakit nawa’y tumanggap ng kasiyahan ng pag-ibig ng Diyos sa kanilang paghihirap, manalangin tayo sa Panginoon.
Ang ating mga yumaong kapatid nawa’y tanggapin sa Kaharian ng buhay na walang hanggan, manalangin tayo sa Panginoon.
Ama ng lahat ng tao, tinanggap ng iyong Anak ang pananampalataya ng senturyon na lumapit sa kanya nang may pagtitiwala at pagpapakumbaba. Ipakita mo sa amin ang iyong kagandahang-loob ngayong nananalangin kami sa iyo sa pamamagitan ni Kristong aming Panginoon. Amen.
Pages: 1 2
« Linggo, Setyembre 11, 2022
Martes, Setyembre 13, 2022 »
{ 1 comment… read it below or add one }
Pagninilay: Ang Eukaristiya ay nagpapaalala sa atin tungkol sa pag-ibig ng Diyos na ipinamalas ni Hesukristo para sa ating kaligtasan. Sa Unang Pagbasa (1 Corinto 11:17-26, 33), isinalaysay ni San Pablo sa mga Corinto tungkol sa Hapunan ng Panginoon na kanyang pinagsasaluhan sa tuwing may pagtitipon. Tuwing tayo’y dumadalo sa Misa, ginugunita natin ang Misteryong Paskwal ng ating Panginoong Hesus: ang kanyang Pagpapakasakit, Pagkamatay, at Muling Pagkabuhay. At n’ung gabi bago ang Pasyon, ibinigay niya ang kanyang sarili sa anyo ng tinapay at alak. Ang 2 sangkap ay hindi lang mga ordinaryong simbolo, kundi ang mga ito ay ang kanyang totoong Katawan at Dugo. Kaya’t ipinapaalala sa atin ni Pablo na dapat magkaroon ng mga panlabas at panloob na disposiyon upang tayo’y maging ganap sa pagdiriwang ng Banal na Eukaristiya. Mahalaga rin sa pagdalo sa Eukaristiya ang matatag na pananampalataya sa Panginoon. Sa ating Ebanghelyo (Lucas 7:1-10), narinig natin ang kwento ng patatagpo ni Hesus sa pinuno ng kawal ng mga sundalong Romano (“centurion” sa wikang Ingles). Siya’y isang Hentil na tinaguriang mga nasa labas ng Judaismo na hindi makakamtan ang kaligtasan ng Diyos. Subalit ayon sa mga kaibigan, itong kapitan ay naging mabuti sa kanyang komunidad sa Capernaum. Siya ang nagtayo ng sinagoga sa bayang iyon. Ngayon ay mayroon siyang lingkod na nasa bingit ng kamatayan mula sa pagkasakit at nais niyang ipatong ni Hesus ang kamay nito upang gumaling. Nang sinabi ni Hesus na pupunta siya sa bahay, makikita natin sa mga wika ng kapitan ang dinadasal natin sa bawat Misa: “Panginoon, hindi ako karapat-dapat na magpatuloy sa iyo, ngunit sa isang salita mo lamang ay gagaling na ako.” Tuwing tinataas ng Pari ang Katawan ay Dugo ni Kristo, tayo’y inaanyayahan na masdan ang Kordero ng Diyos na nag-aalis ng mga kasalanan ng sanlibutan. At ang tugon natin na si Hesus nawa ay magpatuloy sa ating mga buhay bagamat tayo’y mga makasalanan. Subalit katulad ng kapitan, malaki rin ang ating pananalig sa Panginoon lalung-lalo na tuwing tayo’y dumadalo sa Eukaristiya. Katulad ng paggaling ng lingkod ng hepeng sundalo mula sa pagkasakit, tayo rin ay paggaling ni Hesus hindi lang sa mga pisikal na karamdaman, kundi pati na rin sa mga espirituwal na sakit na nagpapahina sa atin ng loob na sumampalataya sa Diyos. At nawa’y sa pagtanggap natin kay Hesus sa Banal na Pakikinabang, tayo nawa ay makinabang sa ipinamalas na pagmamahal ng Ama para sa ating kaligtasan. Busugin tayo nawa ni Hesus upang isabuhay natin ang pananampalataya sa pagsunod sa dakilang kalooban ng Diyos.