Podcast: Download (Duration: 8:38 — 10.3MB)
PANALANGIN NG BAYAN
Dakilang Kapistahan ng Pag-akyat sa Langit ng Panginoon
Patnubay sa Misa
Ipinaaalaala sa atin ng pag-akyat ng Panginoon di lamang ang kanyang kaluwalhatian sa langit, kundi pati na rin ang ating tungkuling maging tagapagpahayag ng kanyang Mabuting Balita sa ating lipunan. Batid ang ating mga kahinaan, manalangin tayo sa Panginoon:
Panginoon, tulungan mo kaming magmahal!
Para sa buong Simbahan: Maihatid niya nawa ang ilaw ng Ebanghelyo sa lahat ng bansa at kultura sa pamamagitan ng malikhaing paggamit ng mga komunikasyong panlipunan. Manalangin tayo!
Para sa Santo Papa, mga Obispo, at lahat ng ating mga pinunong espirituwal: Magpatuloy nawa silang maging mabuting halimbawa sa pagtataguyod ng kabihasnan ng pagmamahal at buhay. Manalangin tayo!
Para sa lahat ng nahuhumaling sa kamunduhan at nakalilimot sa makalangit na pagpapahalaga: Nawa maganyak sila ng ating mabuting halimbawa upang maitaas nila ang kanilang mithiin. Manalangin tayo!
Para sa lahat ng umabot na sa sukdulan ng pagkapariwara: Nawa magbalik-loob na sila at mag- punyagi sa paggawa ng mabuti. Manalangin tayo!
Para sa lahat ng may kinalaman sa mga komunikasyong panlipu- nan: Lagi nawa nilang alalahanin ang dakila nilang pananagutang magtampok ng mga tunay na pagpapahalaga at magpairal ng pagkakabuklod ng lahat ng tao. Manalangin tayo!
Para sa mga naglilingkod sa “media”: Mabisa nawa silang makatulong sa pagkakaisa at pagkalinga ng katotohanan sa ating bayan. Manalangin tayo!
Tahimik nating ipanalangin ang ating sariling mga kahilingan. (Tumigil sandali.) Manalangin tayo!
Panginoong Diyos, patuloy Mong pagpalain ang mga pagsisikap ng Iyong Simbahan na ihatid ang Iyong Mabuting Balita sa mga bansa sa pamamagitan ng mga komunikasyong panlipunan. Malasap nawa namin ang mga bunga ng Kahariang itinatag ng Iyong Anak na si Hesus na nabubuhay at naghaharing kasama Mo at ng Banal na Espiritu, iisang Diyos magpakailanman. Amen!
Pages: 1 2
« Sabado, Mayo 20, 2023
Lunes, Mayo 22, 2023 »
{ 2 comments… read them below or add one }
Pagninilay: Ipinagdiriwang natin ngayong Linggo ang Dakilang Kapistahan ng Pag-akyat sa Langit ng Panginoon. Ang itinuturing na Ika-2 Misteryo ng Luwalhati sa Santo Rosaryo ay naganap 40 araw matapos ang Muling Pagkabuhay ng Panginoon. Makikita natin sa panunulat ni San Lucas sa Unang Pagbasa na matapos muling mabuhay si Hesus at magpakita sa kanyang mga alagad ay nagpakilala siya at gumawa ng mga iilang kababalaghan sa loob ng 40 araw. Makikita natin dito na kahit patapos na ang kanyang misyon sa lupa, patuloy pa rin ang misyong ito upang ipalaganap sa buong mundo. Kaya ito ang pagkakataong isusugo niya ang mga Apostol upang ipahayag ang Mabuting Balita sa lahat ng mga bansa mula Jerusalem hanggang sa Palestina at Israel. At aabot din ang mensahe ng Diyos hanggang sa pinakahuling dako ng mundo. Ang salaysay ni San Mateo ay ang pagsusugo sa mga Apostol na humayo at maging mga alagad sa lahat ng bansa. Ito yung magiging misyon nila na patuloy ang pag-iiral ng pag-ibig ng Diyos sa pamamagitan ng kanyang sambayanang ibinukod, ang Simbahan na kanyang kinalulugdan.
Ngayong Kapistahan ng Pag-akyat ay tinatawag ding Pandaigdigang Araw ng mga Komunikasyon. Ipinapanalangin ng Simbahan na ang bawat larangan ng media ay maging tapat sa pamamahayag ng totoong balita, at hindi magkalat ng “fake news” upang manira ng kapwa tao. Sa kabila ng mga balita ng kaguluhan, karahasan, kalungkutan, at hidwaan, patuloy pa rin ang pagpapalaganap ng Mabuting Balita. At kahit anumang mangyari sa ating buhay, magiging totoo ang pangako ni Hesus na sasamahan niya tayo hanggang sa katapusan ng panahon. Kaya ang kanyang maluwalhating pag-akyat ay tanda na gaya ng pagpunta ng Ulo patungo sa kanyang Kaharian, ang Katawang kumatawan sa atin ay susunod sa kanya upang makamtan ang lugar na pinaghandaan niya sa atin. Kaya nawa’y magkaroon tayo ng pag-asa na makakamit natin balang araw ang buhay na walang hanggan sa patuloy na pagiging saksi ng Mabuting Balita tungkol sa Paghahari ng Diyos sa ating pang-araw-araw na pamumuhay.
Sharing from the Sunday Readings Matthew 28:
“Go!” Mula pagkabata hanggang sa ating pagtanda babalik at babalik tayo sa salitang go o humayo na nasa ating mga pagbasa (1st reading and Gospel). Isang salita ng ating Panginoong Jesus nang pagtitiwala na kaya nating humakbang at maglakad ng malaya tulad nang tayo’y nagsisimula pa lamang sa paglalakad. Go Lang anak! Kaya mo Yan! Mga salitang naglalaro sa aking isipan habang malayo sa aking mga mahal na Magulang. Sa paglipas ng maraming taon ako naman ang magsasabi nito, sige humayo ka na ng mapayapa. May kirot at lungkot ang bawat paglisan pero isang simula Ito ng bagong paglalakbay at ipagpatuloy ang sinimulan ng ating Panginoong Jesus at kanyang mga unang alagad. Sa gitna nang Pandemya, tayo’y magpatuloy at magtiwala sa Panginoon na may bagong bukas para sa ating lahat. Gawin natin nang may galak ang paggawa nang kabutihan sa pagtulong sa mga nangangailangan na Kapatid sa loob at labas ng ating pananampalataya sa ngalan ng Ama, Anak, at Ispiritu Santo. Amen