Podcast: Download (8.0MB)
PANALANGIN NG BAYAN
Sabado ng Ika-10 Linggo sa Karaniwang Panahon
Nangangailangan ng ganap na pagbabago ng puso at pag-uugali ang wagas na pagtalikod sa kasalanan. Isama natin sa ating mga panalangin ngayon ang ating pagnanais na isabuhay ang ating pananampalataya.
Panginoon, dinggin mo ang aming panalangin.
o kaya
Panginoon, tulungan mo kaming maging tapat.
Ang mga lingkod ng Simbahan nawa’y maipakita nila ang kanilang katapatan at pagsasabuhay ng kanilang banal na mga tungkulin, manalangin tayo sa Panginoon.
Bilang isang komunidad, nawa’y itugma natin ang ating buhay sa pag-ibig at pagiging mahabagin ni Jesus at hindi sa pagpapakitantao at pagkukunwari, manalangin tayo sa Panginoon.
Sa ating sariling buhay, tayo nawa’y maging tunay at tapat na laging handang tumalima sa kalooban ng Diyos nang walang pag-aalinlangan, manalangin tayo sa Panginoon.
Ang mga maysakit at mga bigo nawa’y makaranas ng pag-ibig at habag ni Jesus mula sa mga nag-aaruga sa kanila, manalangin tayo sa Panginoon.
Ang mga namatay nawa’y tumanggap ng walang hanggang kaligayahan sa Kaharian ng Diyos, manalangin tayo sa Panginoon.
Ama naming nasa Langit, higit mong pagyamanin ang biyayang ipinagkaloob mo sa amin. Tulungan mo kaming tuparin ang aming pangako nang buong puso. Hinihiling namin ito sa pamamagitan ni Kristong aming Panginoon. Amen.
Pages: 1 2
« Biyernes, Hunyo 14, 2024
Linggo, Hunyo 16, 2024 »
{ 2 comments… read them below or add one }
PAGNINILAY: Ang mga pagbasa ngayon ay nagbibigay ng hamon tungo sa pagtugon sa tawag ng Diyos at pagsunod sa kanyang mga utos. Ang Unang Pagbasa ay ang pagkatawag ni Eliseo sa ministeryo ng pagiging propeta ng Diyos. Matatandaan nakilala ni Elias sa Bundok ng Horeb ang Panginoon sa pamamagitan ng isang munting tinig. Siya’y nagsipunta sa isang ilang, at dito pinahiran niya ng langis ang magiging susunod na hari ng Israel. At dito rin pinahiran ni Elias ang kanyang halili sa paglilingkod sa Panginoon: si Eliseo. Nang si Eliseong nag-aararo sa kanyang bukid ay tinawag ni Elias, ito’y nakiusap muna na paglutuan niya muna ang kanyang pamilya at sambahayan ng 12 pares ng toro, pati na ang pares na kaagapay nito. At nang magpaalam na siya sa kanyang ina at ama, sumunod siya kay Elias. Makikita natin ang pagiging kahalili ng Eliseo kay Elias upang ipagpatuloy ang misyon ng Panginoong Diyos.
Ang Ebanghelyo ngayon ay bahagi pa rin sa Pangangaral ni Hesus sa Bundok. Ayon kay San Mateo, nais ipakilala sa atin si Hesus bilang katuparan ng Kautusan at ng mga propeta. Sinasabi sa lumang batas na hindi dapat gumawa ng tao ng isang sumpa na hindi naman nila tutuparin. Ngunit ito’y pinagpanibago ni Hesus sa pamamagitan ng pagiging makapagtotoo. Alam natin na sa mundo ngayon, may mga nagaganap na panunumpa sa larangan ng pulitika, opisina, buhay-estudyante, at pati na rin sa Simbahan. Kaya ang nais na ipahayag ni Kristo ay ang pagiging totoo ng tao sa kanilang sarili. Ang kanilang ‘Oo’ ay dapat ginagamit sa pagsang-ayon sa mabubuti, at ang kanilang ‘Hindi’ ay dapat ginagamit sa pagtanggi sa mali. Ito yung panawagan tungo sa katapatan at katotohanan, na ang pagkabaliktot nito ay gawa ng Masama. At sa ating pang-araw-araw na buhay, mahilig tayong mangako sa harap ng ibang tao na tutuparin natin ang isang mabuting bagay. Kadalasan ay nais nating bumawi sa mga taong nagsakripisyo ng kanilang oras, talento, at yaman para tayo’y tulungan. Kaya naman sa mga sitwasyon sila naman ang nangangailangan, tayo rin ay nangangakong gagawa tayo ng kabutihan sa kanila, At nawa’y maging mapagtotoo tayo sa bawat kilos na ating ginagawa, na siyang sumasalamin sa ating pagsunod sa dakilang kalooban ng Ama nating Diyos.
PAGNINILAY
Gaano kadali para sa atin na mahulog sa mga tularan ng pananalita na hindi talaga tunay ang kanilang sinasabi. Habang sinusubukan nating bigyang-pansin kung paano tayo nakikipag-usap, nalaman natin kung paano natin kailangang hilingin sa Diyos na gawin ang nasa ating puso. Ang pag-iwas sa pananalita na nakakasugat o nakakasakit ay isang bagay, ang pagiging taos-puso at nakikita kung ano ang nasa puso ay iba! Si Hesus ay nananawagan ng katapatan, pagiging simple at paggalang sa ating sinasabi o ipinangako. Alam natin na may mga pangako tayo sa nakaraan at aminin natin na maaaring hindi natin palaging natutupad ang mga pangakong ito. Nais ng Diyos na tumugon tayo sa hinihingi sa atin ng walang kundisyon ngunit simpleng “Oo.” Hindi natin kailangang bigyang-diin ang ating tugon sa pamamagitan ng pagsumpa. Ang ating “Oo” ay dapat na “Oo.” Nawa’y maging tapat tayo sa iba, sa ating sarili, sa Diyos.
Banal na Espiritu, punuin Mo kami ng lakas ng loob na magsalita ng katotohanan sa lahat ng pagkakataon. Amen
***