Podcast: Download (Duration: 7:04 — 8.9MB)
Martes ng Ika-17 Linggo sa Karaniwang Panahon (II)
Jeremias 14, 17-22
Salmo 78, 8. 9. 11 at 13
Dahil sa ngalan mo,
Poon, iligtas mo kami ngayon.
Mateo 13, 36-43
Subscribe to Awit at Papuri Communications YouTube Channel
Tuesday of the Seventeenth Week in Ordinary Time (Green)
UNANG PAGBASA
Jeremias 14, 17-22
Pagbasa mula sa aklat ni propeta Jeremias
“Jeremias, ipaalam mo sa bayan ang inyong kalungkutan;
sabihin mo, ‘Araw-gabi’y hindi na ako titigil ng pag-iyak;
sapagkat malalim ang sugat ng aking bayan, sila’y malubhang nasaktan.
Pag lumabas ako ng parang, nakikita ko ang mga nasawi sa digmaan;
pag ako’y pumunta sa mga bayan,
naroon naman ang mga taong namamatay ng gutom.
Patuloy sa paggala ang mga propeta at mga saserdote,
subalit hindi nila alam kung ano ang kanilang ginagawa.'”
Panginoon, lubusan mo na bang itinakwil ang Juda?
Napoot ka ba sa mga taga-Sion?
Bakit ganito kalubha ang parusa sa amin
anupat wala na kaming pag-asang gumaling?
Ang hanap nami’y kapayapaan ngunit nabigo kami;
inasam naming gumaling ngunit katatakutan ang dumating.
Panginoon, kinikilala namin ang aming kasamaan,
at ang pagtataksil ng aming mga magulang;
kaming lahat ay nagkasala sa iyo.
Huwag mo kaming itakwil, alang-alang sa iyong pangalan;
huwag mong itulot na mapahiya ang Jerusalem,
ang kinalalagyan ng marangal mong luklukan.
Alalahanin mo ang iyong tipan; huwag mo sana itong sirain.
Hindi makagagawa ng ulan ang diyus-diyusan ng alinmang bansa;
hindi makapagpapaambon man lamang ang sinuman sa kanila.
Panginoon, nasa iyo ang aming pag-asa sapagkat ikaw lamang ang makagagawa ng mga bagay na ito.
Ang Salita ng Diyos.
SALMONG TUGUNAN
Salmo 78, 8. 9. 11 at 13
Dahil sa ngalan mo, Poon,
iligtas mo kami ngayon.
Huwag mong parusahan
kaming mga anak, sa pagkakasala ng aming magulang,
ikaw ay mahabag sa mga lingkod mong pag-asa’y pumanaw.
Dahil sa ngalan mo, Poon,
iligtas mo kami ngayon.
Mahabag ka sana,
kami ay tulungan, Panginoong Diyos na Tagapagligtas,
dahil sa ngalan mo, kaming nagkasala’y patawaring ganap
at ang pagpupuri sa iyo ng madla’y hindi maglilikat.
Dahil sa ngalan mo, Poon,
iligtas mo kami ngayon.
Iyong kahabagan
ang mga bilanggong kanilang hinuli, dinggin mo ang daing,
sa taglay mong lakas, iligtas mo silang takdang papatayin.
Kaming iyong lingkod,
lingkod mo kaming parang mga tupa sa iyong pastulan,
magpupuring lagi’t magpapasalamat sa iyong pangalan!
Dahil sa ngalan mo, Poon,
iligtas mo kami ngayon.
ALELUYA
Aleluya! Aleluya!
Salita ng D’yos ang buto
na tanim ni Hesukristo
upang tumubo sa tao.
Aleluya! Aleluya!
MABUTING BALITA
Mateo 13, 36-43
Ang Mabuting Balita ng Panginoon ayon kay San Mateo
Noong panahong iyon, iniwan ni Hesus ang mga tao at pumasok sa bahay. Lumapit ang kanyang mga alagad at sinabi sa kanya, “Ipaliwanag po ninyo sa amin ang talinghaga tungkol sa masasamang damo sa bukid.” Ito ang tugon ni Hesus, “Ang Anak ng Tao ang naghahasik ng mabuting binhi. Ang bukid ay ang sanlibutan. Ang mga taong pinaghaharian ng Diyos ang mabuting binhi at ang mga taong pinaghaharian ng diyablo ang masasamang damo. Ang kaaway na naghasik ng mga iyon ay walang iba kundi ang diyablo. Ang pag-aani ay ang katapusan ng daigdig, at ang mga anghel ang mga tagapag-ani. Kung paanong iniipon ang mga damo at sinusunog, gayun din ang mangyayari sa katapusan ng daigdig. Susuguin ng Anak ng Tao ang kanyang mga anghel, at iipunin nila mula sa kanyang pinaghaharian ang lahat ng nagiging sanhi ng pagkakasala at ang lahat ng gumagawa ng masama, at ihahagis sa maningas na pugon. Doo’y mananangis sila at magngangalit ang kanilang ngipin. At magliliwanag na parang araw ng mga matuwid sa kaharian ng kanilang Ama. Ang may pandinig ay makinig!”
Ang Mabuting Balita ng Panginoon.
Pages: 1 2
« Lunes, Hulyo 27, 2026
Miyerkules, Hulyo 29, 2026 »
{ 5 comments… read them below or add one }
Pagninilay: Ipinapakita ng ating mga Pagbasa na dakila ang awa at pagmamahal ng Panginoong Diyos sa atin lahat.
Isang panalangin ng panunumbat ang ipinahayag ni Propetang Jeremias sa Unang Pagbasa dahil sa matinding tagtuyot na nararanasan sa Juda. Dahil sa malaking pagkakasala ginawa ng mga tao laban sa Panginoon, tila nga ba pinabayaan niyang magdurusa ang kanyang bayan. Kaya’t siya’y nagdasal nang buong pagtitiwala na kaawaan ng Diyos ang mga taong kanyang hinirang bilang kanyang bayan. At sa kabila ng napakaraming kataksilan at kasamaang ginawa ng Israel at Juda, patuloy pa rin nahabag ang Panginoon sa pagloloob ng planong pangkaligtasan para sa ating lahat.
Ang Ebanghelyo ay ipinahahayag ang paliwanag ni Hesus tungkol sa Parabula ng mga Masasamang Damo at ang mga Trigo. Ipinaliwanag dito na katulad ng pagsusunog ng mga masasamang damo sa apoy at pag-iimbak ng mga trigo sa kamalig, ang katapusan ng sanlibutan ay ang Huling Paghuhukom ng Diyos sa mga tao. Dito tayo’y ihahatol niya hindi ayon sa mga katangian natin, kundi ayon sa mga kabutihan at pagmamahal natin sa kapwa-tao. Habang hindi pang nangyayaring iyon, may panahon pang mamuhay tayo nang masagana ayon sa paninigin, katapatan, at kalooban ng Diyos. Itinuturo niya na ang Ama ay matuwid at maawaain.
Ang Panginoon ay mapagtiiis sa atin mga pagkukulang at pagkakasala. Subalit habang tayo’y nabubuhay sa daigdig na ito, kailangan nating yakapaing buong higpit ang kanyang awa at pag-ibig sa atin upang maranasan natin ang tunay na pagbabago mula sa ating mga puso. At ganun din, kailangan natin iparamdam at ipakita ang kadakilaang iyon sa ating kapwa-tao, lalung-lalo sa mga nangangailangan at makasalanan.
Pinupuri at sinasamba kita Panginoon sa walang hanggang pagmamahal,pagkalinga at pagiingat mo sa amin ilayo mo po kami sa mga tukso na maiwas po kami sa pagkakasala pagtibayin mo po ang aming pananampalataya at pagasa upang maipagpatuloy manin ang aming gawain sa aming comunidad,pagalingin mo po ang lahat na may sakit at karamdaman upang makapaglingkod muli sila sayo Ama.Patawad po sa mga kasalanang aming nagawa sanhi ng aming pagkukulang at kahinaan.Ito ang samut hiling sa pamamagitan ni Kristo kasama ng Inang Maria at nn Espiritu Santo,A M E N ??????
PAGNINILAY: Sa ating unang pagbasa maririnig o mababasa natin na may mga tanong ang mga tao o character dito ss ating unang pagbasa na para bagang pag aalinlangan kung kasama pa ba nila ang Diyos o iniwan na sila nito. Ngunit, mababasa rin natin dito na hindi sila nawalan ng pag-asa sa Diyos bagkos mas lalong tumibay ang kanilang pananalig at pagtitiwala. Imbitasyon para sa atin ang pagbasang ito para maiapply natin rin ito sa ating buhay. Puno ka na ba ng problema at iba’t-ibang mga iniisip sa araw-araw?, tila ba di ka na tinitigil ng mga problema at pagsubok sa buhay? Nawawalan ka na ba ng pag-asa? Lumapit ka sa Diyos at sabihin mo sakaniya ang lahat ng iyong mga problema, sakaniya ka lang lumapit at lahat ng problema mo ay papawiin niya. Siya lamang ang tunay na Diyos na makapagbibigay lunas at kasagutan sa mga sakit at problema na ating dinaranas. Huwag ka nang mag sabi sa iba, kay Jesus mo sabihin lahat ng problema at mga pangangailangan mo. Tiyak yun ang mga iyan, ang mga kailangan mo ibibigay nya sa tamang panahon at kung ito’y alam niyang mas makabubuti para sa iyo. Sa atin namang Ebanghelyo ay patungkol naman sa paghahasik, sabi dito ay ang mabubuting tao ay ang pinaghaharian ng Diyos. Magandang tanungin natin ang ating mga sarili kung pinaghaharian ba tayo ng Diyos o kasamaan ang naghahari sa atin? Masasagot lamang natin ito na tayo ay pinaghaharian ng Diyos kung tayo ay nakasusunod sa mga utos at gawain niya na mabubuti at naibabahagi natin o naihahasik natin ito sa ating kapwa.
Tara na inaanyayahan tayo ni Jesus na maghasik ng kaniyang biyaya at pagpapala sa ating kapwa.
Pagpalain tayo ng Poong Maykapal
PAGNINILAY
Nabubuhay tayo sa isang mundo kung saan ang mabuti at masama ay magkakaugnay. Ipinaliwanag ni Hesus na ang mga damo ay mga anak ng masama. Nagbabala si Hesus na sa katapusan lamang ng panahon malulutas ang lahat. Hinahayaan ng Diyos na mangyari ang masama ngunit sa huli, sa panahon ng pag-aani, ang kabutihan ng Diyos ang mangingibabaw. Samantala, hindi tayo dapat mawalan ng pag-asa sa harap ng kasamaan, magtiwala na ang Diyos ay makapaglalabas ng mabuti mula sa kasamaan ng tao. Magkasala man tayo, naniniwala Siya na kaya nating magbago at magbunga ng mabubuting bunga. Napakasarap maghintay ng Diyos! Kahit na pakiramdam na pinahihintulutan Niyang magpatuloy ang kasamaan ng hindi napigilan, makikita natin ang Kanyang biyaya sa gitna nito, alang-alang sa atin na mahal Niya. Ang Diyos ang Siyang tumatanggap ng ating pagiging makasalanan at nagdiriwang ng ating kabutihan.
Panginoong Hesus, dalangin namin na Iyong bunutin ang mapait na damo sa aming buhay. Amen.
***
MAGNILAY: Tulad ng damo, may mga taong gusto nating mabunot at mawala agad sa buhay natin dahil nakakairita lamang sila. Halimbawa ay ang mga gumagawa sa atin ng masama. O ang mga bumubuyo sa ating gumawa ng kasalanan. Pati na rin mga kritiko na puro puna sa atin. Lahat sila gusto na nating maglaho pero nariyan sila. Ayaw man natin sa kanila pero sila ang nagtuturo sa ating magpakatatag, maging mapagpasensya at magmahal nang walang kondisyon. Hinahayaan sila ng Diyos hanggang sa huli upang turuan tayong maging mas banal. Sa wakas ng panahon tatanggapin natin ang hatol ng Diyos sa ating ginawang mabuti o masama.
MANALANGIN: Panginoon, lagi mo kaming patatagin sa gitna ng maraming pagsubok.
GAWIN: Pagtiyagaan mo ang kapwa mong tinuturing mong damo dahil ganun ka rin minsan. Pagsikapang walang mapariwara sa huli.