Podcast: Download (5.0MB)
PANALANGIN NG BAYAN
Ikawalong Linggo sa Karaniwang Panahon
Huwebes
Hilingin natin sa ating Diyos Ama na buksan ang ating mga mata upang makasunod tayo sa kanya nang buong puso.
Panginoon, dinggin mo ang aming panalangin.
o kaya
Guro, buksan mo ang aming mga mata.
Ang ating Simbahan nawa’y maging tanglaw ng liwanag na nagpapahayag ng mensahe ni Kristo sa lahat ng tao, manalangin tayo sa Panginoon.
Bilang gawain ng kabutihang-loob, nawa’y lagi nating kalingain ang mga itinakwil, tinanggihan, at hindi minamahal sa ating lipunan, manalangin tayo sa Panginoon.
Katulad ni Bartimeo, tayo nawa’y magkaroon ng matatag na pananalig kay Jesus at sumunod sa kanya sa daan ng buhay, manalangin tayo sa Panginoon.
Ang mga maysakit at mga nagdurusa nawa’y magkaroon ng lakas ng loob na maiugnay ang kanilang mga dinaranas sa mga paghihirap ni Kristo upang makihati sila sa kanyang kaluwalhatian, manalangin tayo sa Panginoon.
Ang mga pumanaw nating mga kamag-anak at mga kaibigan nawa’y humimlay sa makalangit na kapayapaan ng Diyos, manalangin tayo sa Panginoon.
Ama sa Langit, punuin mo kami ng iyong pag-ibig at pawiin mo ang kadiliman sa aming buhay upang makapamuhay kami sa liwanag ng iyong Anak. Hinihiling namin ito sa pamamagitan ni Kristong aming Panginoon. Amen.
Pages: 1 2
« Lunes, Mayo 27, 2024
Biyernes, Mayo 31, 2024 »
{ 3 comments… read them below or add one }
PAGNINILAY: Tayo ay binibiyaan ng Panginoon ng mga pagpapala sa ating araw-araw ng Panginoon. Higit sa lahat, tayo ay binibigyan niya ng paningin hindi lang sa pisikal, kundi pati na rin sa espirituwal na aspeto, upang makita natin ang kalagayan ng ating komunidad/lipunan at ang mga pangangailangan ng ibang tao.
Sa ating Ebanghelyo (Marcos 10:46-52), binibigyang-pansin ni San Marcos ang isang pagtatagpo ni Hesus sa isang bulag na nagmamalimos sa tabi ng daan, at ang lalaking ito ay si “Bartimeo” na mula sa wikang Hebreo ay isinasalin bilang “Anak [Bar] ni Timeo”. Nang marinig niya si Hesus ay nasa tabing daan ng Jerico papuntang Jerusalem, sumigaw siya ng panawagan na kaawaan siya ng Anak ni David. Para kay Bartimeo, naniniwala siya na si Hesus na mula sa lahi ni Haring David ay ang Mesiyas na magbibigay hindi lang ng kaligtasan, kundi pati na rin ng kaganapan ng pangangailangan ng mga tao. Kahit siya’y pinapatahimik ng tao, patuloy lang siya sa pagsisigaw hanggang sa pinalapitan siya kay Hesus. At dito tinanong sa kanya ng Panginoon kung anong gusto niya, at isa lang ang ninanais ni Bartimaeo, na makakita muli. At dahil sa tindi ng kanyang pananampalataya, nabiyayaan siya ng paningin at sumunod sa mga yapak ni Hesus.
Tayo’y mga binyagan na kabilang sa pamilya ng Diyos ay nakikibahagi sa misyon ng pagpapalaganap ng Mabuting Balita tungkol sa Paghahari ng Diyos. Aang biyaya ng pananamapalataya ay ang ating espirituwal na paningin upang makilala natin ang tunay na kaligayahan ng ating buhay na mismong Panginoon lamang ang maibibigay. Ngunit tayo rin ay parang si Bartimeo na hindi namang pisikal na bulag, kundi hindi pa rin nakikita ang ibang realidad ng ating buhay. At minsan ang mga realidad na ito ay masakit sa punto na naroroon pa rin mga problemang hinaharap ng iba’t ibang tao. Kaya sa pagkakataon ito, tularan natin ang tamang dispisyon ni Bartimeo na tayo’y mamulat sa mga kaganapan ng ating buhay at ng buhay mayroon dito sa mundong ito. At nawa’y tularan din natin higit sa lahat si Hesus na maging maawain at mapagmalasakit sa pisikal at espirituwal na pangangailangan ng ibang tao.
PAGNINILAY
Isang lalaking bulag na nagngangalang Bartimeo ang tumawag para sa pagpapagaling habang dumaraan si Hesus. Sa kabila ng maraming tao na nagsisikap na patahimikin siya, nagpatuloy si Bartimeo at huminto si Hesus upang pagalingin siya, na pinanumbalik ang kanyang paningin. Ito ay isang makapangyarihang paalala ng kahalagahan ng pananampalataya at pagtitiyaga sa ating kaugnayan sa Diyos. Madali sanang sumuko si Bartimeo nang sinubukan siyang patahimikin ng mga tao, ngunit patuloy siyang tumawag kay Hesus, sa paniniwalang siya ay gagaling. Ang kanyang pananampalataya ay ginantimpalaan, at siya ay muling nakakita. Maaari tayong makaugnay kay Bartimeo sa maraming paraan. May mga pagkakataon sa ating buhay na nadama nating nawala tayo at nangangailangan ng pagpapagaling, pareho sa pisikal at espirituwal. Tulad ni Bartimeo, tumawag tayo kay Hesus ng may pananampalataya, nagtitiwala na didinggin Niya ang ating mga panalangin at ibibigay ang ating mga pangangailangan.
Nawa’y ipaalala sa atin na gaano man kawalang pag-asa ang isang sitwasyon, maaari tayong laging humingi ng tulong kay Hesus. Sa pamamagitan ng pananampalataya at pagtitiyaga, mararanasan natin ang pagpapagaling at pagpapanumbalik na Siya lamang ang makapagbibigay.
Panginoong Hesus, buksan Mo ang aming mga mata sa Iyong presensya sa aming paligid.
Amen.
***
Maraming salamat sa Website pong ito. sobrang laking tulong lalo na sa mga katulad kong nasa ibang bansa. maraming maraming salamat po.