Podcast: Download (Duration: 3:58 — 2.9MB)
Sabado ng Ika-22 Linggo sa Karaniwang Panahon (I)
o kaya Paggunita kay San Pedro Claver, pari
o kaya Paggunita sa Mahal na Birheng Maria tuwing Sabado
Colosas 1, 21-23
Salmo 53, 3-4. 6 at 8
Ang D’yos ang s’yang
tumutulong at sa aki’y nagtatangol.
Lucas 6, 1-5
Subscribe to Awit at Papuri Communications YouTube Channel
Saturday of the Twenty-second Week in Ordinary Time (Green)
or Optional Memorial of St. Peter Claver, Priest (White)
or Optional Memorial of the Blessed Virgin Mary on Saturday (White)
UNANG PAGBASA
Colosas 1, 21-23
Pagbasa mula sa sulat ni Apostol San Pablo sa mga taga-Colosas
Mga kapatid, dati, kayo’y malayo sa Diyos at naging kaaway niya dahil sa inyong kasamaan. Ngunit dahil sa kamatayan ni Kristo, ginawa niya kayong mga kaibigan upang makaharap sa kanya nang walang kapintasan, banal, at walang batik. Subalit kailangan kayong manatiling tapat at matatag sa inyong pananampalataya at huwag bayaang mawala ang pag-asang dulot ng Mabuting Balita na inyong narinig. Niloob ng Diyos na akong si Pablo ay maging tagapangaral ng Mabuting Balitang ito na ipinahayag sa lahat ng tao.
Ang Salita ng Diyos.
SALMONG TUGUNAN
Salmo 53, 3-4. 6 at 8
Ang D’yos ang s’yang
tumutulong at sa aki’y nagtatangol.
Makapangyarihang Diyos, ako ay iligtas,
ipagsanggalang mo ng iyong lakas;
dinggin mo, O Diyos, itong iyong anak,
sa aking dalanging ngayo’y binibigkas.
Ang D’yos ang s’yang
tumutulong at sa aki’y nagtatangol.
Batid kong ang Diyos ang aking katulong,
tagapagsanggalang ko ang Panginoon.
buong galak naman akong maghahandog
ng pasasalamat sa Panginoong Diyos,
dahilan sa kanyang mabuting kaloob.
Ang D’yos ang s’yang
tumutulong at sa aki’y nagtatangol.
ALELUYA
Juan 14, 6
Aleluya! Aleluya!
Ikaw, O Kristo, ang Daan,
ang Katotohana’t Buhay
patungo sa Amang mahal.
Aleluya! Aleluya!
MABUTING BALITA
Lucas 6, 1-5
Ang Mabuting Balita ng Panginoon ayon kay San Lucas
Isang Araw ng Pamamahinga, naparaan sina Hesus sa triguhan. Ang kanyang mga alagad ay nangitil ng uhay, at kanilang kinain ang mga butil matapos ligisin sa kanilang mga kamay. “Bakit ninyo ginagawa sa Araw ng Pamamahinga ang ipinagbabawal ng Kautusan?” tanong ng ilang Pariseo. Sinagot sila ni Hesus, “Hindi ba ninyo nabasa ang ginawa ni David nang magutom siya at kanyang mga kasama? Pumasok siya sa bahay ng Panginoon, kumuha ng tinapay na handog sa Diyos at kumain nito. Binigyan pa niya ang kanyang mga kasama, bagamat ayon sa Kautusan, ang mga saserdote lamang ang may karapatang kumain niyon.” At sinabi pa niya sa kanila, “Ang Araw ng Pamamahinga ay nasa ilalim ng kapangyarihan ng Anak ng Tao.”
Ang Mabuting Balita ng Panginoon.
Pages: 1 2
« Biyernes, Setyembre 8, 2023
Linggo, Setyembre 10, 2023 »
{ 2 comments… read them below or add one }
PAGNINILAY: Ang Diyos ay Diyos ng pag-ibig. Siya’y nahahabag sa pinagdadaanan ng tao sa buhay. Kaya tayong mga Kristiyano ay tinatawag na mahalin ang kapwa-tao sa pagpapamalas ng kabutihan. Ang Ebanghelyo ngayon ay isang paghaharap ni Hesus sa mga eskriba at Pariseo sapagkat napansin nila ang mga Apostol ay nangingitil ng uhay sa Araw ng Pamamahinga. At ayon sa Kautusan ni Moises, labag sa utos tungkol sa sabat ang pagtratrabaho. Ngunit ang tugon ni Hesus ay ang kwento ni Haring David at ang kanyang mga kasamahan nang sila’y mamamatay na sa taggutom, at kinain nila ang tinapay mula sa altar na dapat ang mga pari katulad ni Ahimelech lang ang maaring hawakan ito. Kaya ito’y naging espesyal na pagkakataon sapagkat ginawa iyon ni David upang mapalusog sila. Ang naging aral ng salaysay ay nang sabihin ni Hesus na ang Araw ng Pamamahinga ay ginawa ng Diyos para sa tao, at hindi ang tao ang gumawa ng okasyong iyon. Bilang Anak ng Tao, si Kristo ay Panginoon ng Araw ng Pamamahinga.
Ang ikatlong utos ay nagsasaad sa paggalang at pagsamba sa Diyos na lumikha ng sandaigdigan sa loob ng 6 na araw at isinaalang-alang ang ika-7 bilang pamamahinga. Kaya sa ating mga Kristiyano, ang ating “sabbath” ay tumapat tuwing araw ng Linggo sapagkat inaaalala natin ang Muling Pagkabuhay ng ating Panginoon. Ang Pagkabuhay ng Panginoon ay itinuturing na “ikawalong araw” sapagkat ito’y tanda ng pagbubukang-liwaway ng bagong nilikha. Tayo ay minarapat na biyayaan ng karapatang maging mga anak ng Ama. Tinitignan niya ang puso ng bawat taong mapagkumbaba sa kabila ng mga abilidad at kakayahan.
Ito’y nagpapaalala sa atin na mahalaga ang batas para sa ating kaayusan at disiplina. Subalit ang diwa ng batas ay kailangan nating ipairal na dapat manaig sa ating mga puso ang paggawa ng mabuti sa kabila ng mga paghihigpit sa ating mga paligid. Kaya ang mahalaga dito na sa bawat araw, lalung-lalo na sa Linggo, maghari nawa ang ating pagmamahal sa Diyos at kapwa-tao sa kabila ng mga striktong pagsunod sa kautusan. Kung tayo ay itinuturo na gumawa ng tama at talikdan ang masama, gawin natin itong pagkakataon na gumawa ng mabuti, at kasama na diyan ay ang pagpapamalas ng ating awa at malasakit sa ibang tao.
Sa ating ebenghelyo ngayon, kinuwestyon ng ilang pariseo ang ginawa ng mga alagad ni Hesus. Mga pariseong mapag imbabaw, mga pariseong puro pakitang tao lamang, mga pariseong gusto na lagi sila ay purihin ng mga tao at lumabas na mga makaDiyos, mga pariseong puro puna sa mga gawain ni Hesus at ng mga alagad. Ngayon kapatid ano ang hamon sa atin ng Mabuting Balita? Suriin mo ang iyong sarili, ikaw ba ay mapagpuna sa mga maling ginagawa ng iyong kapwa sa iyong paligid. Ikaw ba ay namimintas ng kabulukan ng iba? Ikaw ba nagsisimba ng taimtim o nagsisimba lamang para sabihin ng kapitbahay na ikaw ay relihiyoso, ikaw ba ay tumutulong sa ibang tao upang hangaan o puriin, ikaw ba mapagmayabang ng iyong mga ari arian at mga natamong tagumpay sa buhay, ikaw ba pumupuna ng dungis ng iba ngunit ang sarili ay maya sarili ding kadungisan, ikaw ba ay nagpopost sa social media ng bible verses pero hindi mo nman makuhang patawarin ang iyong kaaway, sinasabi mo bang mahal mo Diyos pero hindi mo kayang mahalin o ipagdasal ang iyong kaaway, samakatuwid tayo ay maihahalintulad sa mga pariseo. Huwag natin silang tularan, sinabi mga sa sa isang awit na “bago mo linisin ang dungis ng iyong kapwa, hugasan mo muna ang iyong mukha. Ang lahat ng sasabihin mo ay dapat naayon sa tunay mong gawi at pagkatao. Isaisip at isapuso mo amg pagmamahal sa Diyos at pagmamahal sa kapwa gaya ng pagmamahal mo sa iyong sarili.