Podcast: Download (Duration: 9:13 — 10.8MB)
PANALANGIN NG BAYAN
Ika-4 na Linggo ng Adbiyento
Patnubay sa Misa
Kasama ni Maria, ang bukas-palad na lingkod ng Diyos, pagtuunan natin ang kalooban ng Diyos, at hilingin sa Kanya ang biyayang kinakailangan natin. Manalangin tayo:
Diyos naming tapat, dinggin Mo kami!
Nawa’y higit na pahalagahan ng Simbahan at kanyang mga pinuno ang pagtatayo ng matatatag na pamayanan ng pananampalataya at paggawa. Manalangin tayo!
Nawa’y alalahanin ng lahat ng pinunong pambayan na mauuwi sa wala ang kanilang mga balakin kung hindi rin lamang ito alin-sunod sa kalooban ng Diyos. Manalangin tayo!
Nawa’y pahalagahan ng mga naghahanda sa Pasko ang kanilang mga pangangailangang espiritwal nang higit sa mga pangangailangang materyal. Manalangin tayo!
Nawa’y ang lahat ng di pa sumasampalataya kay Hesus bilang tagapagligtas ay magbukas na ng kanilang mga puso sa pahayag ng salita ng Diyos nang ito’y magbunga sa kanilang buhay. Manalangin tayo!
Nawa’y gugulin natin ang araw na ito ng pamaskong Nobena nang may disposisyong tulad ng kay Mariang Kabanal-banalan nang hinihintay niya ang pagsilang ni Hesus. Manalangin tayo!
Para sa mga taong may pisikal na kapansanan: Maging tampulan nawa sila ng atensyon at kalinga ng pamayanang maka-Diyos. Manalangin tayo!
Diyos ng katapatan, tulutan nawang ang aming kilos at asal ay maging laging alinsunod sa Ebanghelyo at maging saksi kami ni Hesus, na tanging Tagapagligtas ng sanlibutan na nabubuhay at naghahari magpasa walang hanggan. Amen!
Pages: 1 2
« Linggo, Disyembre 24, 2023
Lunes, Disyembre 25, 2023 »
{ 4 comments… read them below or add one }
Pagninilay: Ang Ikaapat na Linggo ng Adbiyento ay isang masayang pananabik dahil tayo ay talagang nalalapit na sa pagdiriwang ng Pasko ng Pagsilang ng ating Panginoong Hesukristo. At ang Linggo ring ito ay bahagi ng tinatawag na “Late Advent Weekdays”, na kung saan ang mga Pagbasa, lalung-lalo na ang mga Ebanghelyo, ay mas nagpapahayag tungkol sa Unang Pagdating ng Panginoon.
Ang Ebanghelyo ngayon ay ang sikat na kwento tungkol sa Pagbabalita ni San Gabriel Arkanghel sa Mahal na Birheng Maria (“Annunciation”). Sinasabi ng ilang eksperto ng Bibliya na maaring si Maria ay nasa edad 12-15, at sinasabi rin ng ilan na siya’y nananalangin. Makikita natin dito ang pagtupad ng propesiya ni Isaias [kb. 7, br. 14] na si Maria ay ang dalagang maglilihi sa batang sanggol na Emanuel. At mula sa pagbati ng anghel na siya ay “napupuno ng grasya”, makikita natin ang kanyang kalinis-linisang paglilihi, na minarapat na Diyos sa siya’y ipaglihing walang bahid na kasalanan upang magkaroon ng nararapat na tahanan para sa Pagsilang ng Mesiyas. Bagamat nabagabag si Maria tungkol sa kanyang paglilihi kay Hesus, sinabi ni San Gabriel na walang imposible para sa Diyos, kaya ganun din ang pagpapala ng Diyos kay Sta. Isabel na pinsan ng dalaga. At sa huli, tumalima ang Mahal na Birhen sa kalooban ng Diyos sa pagpahayag ng kanyang “fiat” (mangyari nawa sa akin). Makikita dito ang kanyang pananampalataya, kababaang-loob, at pagkamasunurin na tuparin ang kalooban ng Ama para sa katuparan ng kaligtasan ng sangkatauhan na dala ng Panginoong Hesukristo.
Mga kapatid, ilang tulog na lang, at Pasko na. Bagamat may mga bagay na hindi natin magagawa ngayong Kapaskuhan dahil sa mga ‘di kanais-nais na sitwasyon na ating hinaharap, gagawa at gagawa pa rin ang Panginoon ng kabutihan at pagpapala upang masaya nating ipagdiwang ang taung-taong selebrasyon ng Pagkakatawang-tao niya sa pamamagitan ng kanyang Anak. At siguro ang hamon sa atin ay tularan ang ating Mahal na Inang si Maria na sa kabila ng lahat ng nangyayari sa ating buhay, maganda man o pangit, patuloy tayong magtiwala na walang imposible para sa Panginoon. At tayo rinay patuloy na tumalima sa kanyang kalooban, at maging instrumento rin ng pagpapahayag ng kanyang pagmamahal sa atin.
GOOD NEWS
Ilang araw nalang at magtatapos na ang taong 2023. Marahil ay sumasaging muli sa ating mga isipan ang mga lungkot, pagkabigo, pagbangon, at kagalakang ating pinagdaanan. Marahil ay may ilang mga natanggap sa trabaho, napromote sa trabaho, gumaling ang sakit, naiayos ang pamilya, napaganda ang buhay, nakapagpatayo ng bahay, pumasa sa board exam, nagkaroon ng kasintahan, o nakatanggap ng maagang bonus at 13th month pay! Hindi ba’t ang lahat ng ito ay pawang mga MAGANDANG BALITA?
Sa ebanghelyo natin ngayong ikaapat na linggo sa panahon ng adbiyento, si Maria ay tumanggap rin ng magandang balita ng sabihin sa kanya ng anghel Gabriel na “MATUWA KA! IKAW AY KALUGOD-LUGOD SA DIYOS.” Hindi naman lahat ng tao ay nalulugod, natutuwa at sumasang-ayon sa atin subalit sobrang nakakataba ng puso kung malaman nating tayo’y isa pala sa kinalulugdan ng Diyos. At kapag nalugod sa atin, siguradong bibigyan nya tayo ng isang napakalaking MISYON.
Sa paglalakbay sa mundong ito, unti-unti nating nakikita ang mga misyon na ipinagkakaloob at pinagkakatiwala sa atin ng Diyos. Walang misyon ang madaling gawain, sundin at isakatuparan lalo na kung ang ating misyon ay maging kabahagi ni Kristo sa pagpapasan ng Krus ng pasakit sa mundong ito. Ang lahat ng hirap at sakit na mararanasan ni Maria sa misyong maging Ina ng Manunubos ay batid ng anghel kung kaya pinayapa niya ang loob ni Maria at sinabing “HUWAG KANG MATAKOT, MARIA, SAPAGKAT KINALULUGDAN KA NG DIYOS.”
Dalawang beses na binanggit ng anghel kung gaano lubos na si Maria’y naging kalugod-lugod sa paningin ng Diyos. Sana’y pagsumikapan rin nawa nating maging kalugod-lugod sa paningin ng Diyos. Marami mang sinasabi ang mga tao sa mga kabutihang iyong ginagawa, magpatuloy ka lang! Hindi ka man kalugod-lugod sa mga taong walang ginawa kundi manira at manakit ng damdamin ng kapwa, magpatuloy ka! Hindi ka man pinaniniwalaan at sinusuportahan ng ilan, magpatuloy ka pa rin kung mabuti ang iyong hangarin!
Hindi man laging mabuting balita ang natanggap natin sa taon na ito, sana’y matuto pa rin tayong ngumiti habang hinihintay ang GOOD NEWS mula sa Diyos.
Bilang hamon at pangwakas, nawa’y lagi nating tanggapin ng may kapakumbabaan ang mga misyong sa atin ay nakaatang. Tularan natin si Maria na hindi tumangging maging Ina ng Manunubos at tulad niya ay masambit rin natin…
“AKO’Y ALIPIN NG PANGINOON. MANGYARI SA AKIN ANG IYONG SINABI.”
(Pagninilay sa ika-4 na Linggo sa Panahon ng Adbiyento | Taon B – Lucas 1, 26-38 )
salamat,.panginoon!
PAGNINILAY
Ngayong huling Linggo bago ang Pasko, itinuon ng Liturhiya ang ating pansin sa pangunahing tauhan ng yugto ng Adbiyento, ang Birheng Maria, sapagkat walang sinumang mas naghanda para sa pagsilang ni Hesus ng mas masinsinan at malapit sa kanya. Sa harap ng lahat ng kanyang mga alalahanin, inilagay niya ang kanyang buhay sa mga kamay ng Diyos. Si Maria ay tinanggap ang lukso ng pananampalataya sa pagtanggap sa mensahe ng anghel. Sa ating buhay din ay may mga pagbabagong punto kung saan maaari tayong makaranas ng isang paanyaya na yakapin ang isang bagay na mahirap sa halip na iwaksi ito. Isang bagay na makasisira sa ating pangarap para sa ating sarili o para sa ating mga mahal sa buhay. Si Maria ang pinakamataas na halimbawa ng pagsunod sa kalooban ng Diyos. Buo at responsableng tinanggap niya ang salita ng Diyos. Ang pangunahing kahulugan ng bawat araw ng ating buhay ay ang sabihing kasama niya, “Narito ako, ang lingkod ng Panginoon; mangyari nawa sa akin ang ayon sa iyong salita.” Tulad ni Maria, nawa’y lubos tayong magtiwala sa Diyos.
Mahal na Ina, ipanalangin mo na lagi kaming mamuhay kasama ng iyong Anak na si Hesus. Amen.
***