Podcast: Download (Duration: 7:04 — 5.0MB)
PANALANGIN NG BAYAN
Ikasiyam na Linggo sa Karaniwang Panahon
Sabado
Mayroon tayong iisang Ama sa lahat, at iisang Guro, ang kanyang bugtong na Anak. Dumulog tayo sa ating Ama para sa lahat ng kanyang mga anak sa mundo.
Panginoon, dinggin mo ang aming panalangin.
o kaya
Ama ng mga dukha, pakinggan mo ang aming panalangin.
Ang mga tumatanggap ng sakramento ng orden para sa banal na paglilingkod nawa’y maging tapat at totoo sa kanilang pagtatalaga ng sarili sa Diyos at sa Simbahan, manalangin tayo sa Panginoon.
Ang mga naglilingkod sa bayan nawa’y maibigay ang mabuti at magaling na serbisyo sa tao at hindi unahin at paglingkuran ang kanilang sariling kapakanan, manalangin tayo sa Panginoon.
Ang kababaang-loob ni Kristo nawa’y pumigil at magpasuko sa kapalaluan at pagkukunwari ng mga taong may matayog na pagtingin sa sarili, manalangin tayo sa Panginoon.
Tayo nawa’y tumanggap ng banal na pagbubunyag bilang mensahe ng Diyos sa bisa ng kanyang kapangyarihan at hindi ayon sa kaisipan lamang ng tao, manalangin tayo sa Panginoon.
Ang mga yumao nawa’y makatagpo ng kapayapaan sa Muling Nabuhay na Tagapagligtas, manalangin tayo sa Panginoon.
Diyos at Ama ng lahat ng sangkatauhan, itinataas namin sa iyo ang mga panalangin ng mga sumasampalataya sa iyo, gayundin ang mga hindi pa nakaririnig ng iyong banal na ngalan. Hinihiling namin ito sa pamamagitan ni Kristong aming Panginoon. Amen.
Pages: 1 2
« Biyernes, Hunyo 9, 2023
Linggo, Hunyo 11, 2023 »
{ 5 comments… read them below or add one }
PAGNINILAY: Ang mga biyuda sa Israel noong kapanahunan ng Panginoong Hesus ay itinuturing na “’di matutulungan” sapagkat tingin nila na malas ang nangyari sa kanila. Kung namatayan ng asawa ang isang babae, maaaring magmula sa isa sa mga anak na lalaki ang pagpapala para sa pamilya. Kung kapwang nawala sa kanya, parang sinasabi ng mga Hudyo na hindi na siyang tutulungan ng Diyos. Kaya itong pagkasaradong pag-iisip ang nagiging hadlang upang kilalanin nila ang Panginoong dumidinig sa mga hinahing ng mga biyudad at ulila.
Isang biyuda ang ipinakilala sa Ebanghelyo na hindi katulad ng mga mayayamang taong naghandog ng malalaking salapi, siya’y naghandog ng dalawang kusing lamang. At siguro ang mga taong nakakita dito ay nag-iisip ng sama ng loob dahil sa liit na handog niya. Sa puntong iyon, pinuri ni Hesus ang disposiyon ng babaeng balo na kahit ang 2 kusing na mayroon siya na dapat gamitin niya sa kanyang mabuting kalagayan, inialay niya ito sa Diyos nang may buong puso. Kaya nga itinuturo dito sa Ebanghelyo ang pagbibigay na galing sa puso. Taliwas dito sa pag-uugali ng mga pinunong tumutuligsa kay Hesus katulad ng mga eskriba na nagpapakita ng kabaitan at kabanalan na akalain sila’y mas kalugud-lugod sa harap ng napakaraming tao.
Kaya nga ang hamon sa atin na katulad ng Diyos na dakila sa kanyang awa at habag sa atin sa kabila ng ating mga kahinaan, tayo rin ay maging mga mabuting taong nagpapahayag ng pagmamahal at habag sa ibang tao, lalung-lalo na ang mga mahihirap. Kapag tayo ay nagbibigay, gawin natin ito nang taos puso at hindi yung parang napipilitan upang makita natin ang kahalagahan ng pagbibigay. At nawa’y tularan din natin ang 2 balo na patuloy tayong magtitiwala at maglilingkod sa Panginoon sa kabila ng mga problema at paghihirap natin sa buhay.
May asawa ka ba? May mga anak? Aba ay napakapalad mo, isa ka sa mga nabiyayaan at nakahihigit sa iba. Anong lungkot na lamang ng buhay ng mga hindi nakapag asawa, hindi naranasan ang kaligayahang dulot ng pagakakaroon ng anak. Ganun din ang mga byuda na maagang binawian ng makakatuwang sa buhay. Kaawaan natin sila. Ngunit hindi lamang nakasentro sa byuda o balo ang dapat nating bigyang pansin, katumbas din nito ang taong nagugutom, kaibigang maysakit at kakillalang nabilanggo at mga taong may kapansanan. Dalawin natin sila at tulungan, mapalad ka at hindi isa sa mga ganito ang naging palad mo sa lupa. Bilang ganti ay magpuri tayo at magpasalamat araw araw sa Diyos, suklian naman natin itong lahat ng kanyang kaloob ng pagsisi ng mga kasalanan at pagsisikap na magbalik loob sa Panginoon. Ipamahagi ang biyayang natatanggap at kung may pagkakataon ay mapagpatoo ka at ikalat ang salita ng Diyos. Sa paggawa ng mabuti at pagdarasal ay wag ipagsigawan para lamang puriin ng ibang tao, gawin ito ng palihim upang si Hesus sa langit ang magbigay ng gantimpala sayo.
Tumutulong ka ba o nagpapakitang tao? Kadalasan pag may nakatingin nagbabait-baitan, pag naman wala labas ang tunay na ugali. Lahat ng ating ginagawa at iniisip ay hayag sa Panginoon. Kung ano man ang motibo natin sa pagtulong. Ang Diyos ay hindi bulag, pipi at bingi. Kung akala natin ay di nakikita ang ginagawa nating kabutihan nagkakamali tayo. Dahil ang ating nagiging panuntunan ay tao. Ngunit ang Diyos lahat ay alam Niya. Kahit wala tayong parangal mula sa tao, ibang magparangal ang Diyos, siksik, liglig at umaapaw na biyaya.
MAGNILAY: Sinusukat ng Diyos ang ating kaloob hindi ayon sa dami kundi ayon sa ating kapasidad. Kung mas malaki ang naipagkaloob mo kumpara sa iba hindi ibig sabihin mas magaling ka sa kanila. Kahit mas malaki ang naipagkaloob mo kaysa iba maliit pa rin ito kung mas mababa ito sa kakayanan o kapasidad mong magkaloob. Gayundin naman, kahit mas maliit ang naipagkaloob mo kaysa iba malaki pa rin ito kung nasagad mo ang kakayanan o kapasidad mong magkaloob.
Naalala ko sa seminaryo may propesor kaming binabase ang grado namin ayon sa aming IQ. May kaklase kami na pinakamarami ang sagot sa pagsusulit. Pero nang ibigay ang grado mas mababa pa siya kaysa doon sa nakasagot ng mas kaunti. Mas marami man siyang nasagot pero mas marami pa sana kung nasagad niya ang kakayanan o kapasidad niyang sumagot sa pagsusulit. Mataas kasi ang kanyang IQ. Mas higit ang inaasahan sa kanya. Samantala, nagbubunyi ang nakasagot ng mas kaunti. Mas mataas kasi ang kanilang grado. Mas kaunti man ang nasagot nila pero mas nasagad nila ang kakayanan o kapasidad nilang sumagot. Mas mababa kasi ang IQ nila kaya mas mababa ang inaasahan sa kanila kumpara sa mas mataas ang IQ. Magiging kahanga-hanga ka kung nahigitan mo ang kakayanan o kapasidad mo. Kung ganito lang ang inaasahan sa iyo pero mas mataas ang nakuha mo ekselente kang estudyante. Nagawa mong higitan ang inaasahan lang sa iyo.
Ang biyuda na dalawang kusing lang ang naabuloy ay nagbigay nang mas higit kaysa mga nag-abuloy nang mas malaking halaga. Ang ibinigay niya ang buo niyang kabuhayan. Ibinigay niya ang buong kaya niyang ibigay. Samantala, yung iba ang laki nga ng naibigay pero barya lang ito kumpara sa kakayanan nilang mag-abuloy. Hindi tugma sa kapasidad nilang magbigay. Sa mata ng Diyos, mas maliit ang naibigay nila.
Hindi pantay-pantay ang inaasahan sa bawa’t-isa sa atin. May kanya-kanya tayong kapasidad. Mas malaking kapasidad mas malaki ang responsibilidad at pananagutan. Sa larangan, halimbawa, ng yaman, mas may responsibilidad at pananagutan ang mga mayayaman kaysa mahihirap sa larangan ng pagtulong pinansiyal. Minsan nga nakakahiya. Kung sino pa ang mahirap ay siya pang nagbibigay nang mas regular. Kung sino pa ang mayaman siya pang kuripot at tago nang tago. Sa larangan ng kabanalan, mas inaasahan ang mga tagapagturo o lider ng kabanalan. Ang pari, halimbawa, ay mas higit ang inaasahan sa pagsasabuhay ng pananampalataya at pananalangin. Pero nangyayari rin na kung sino pa ang ordinaryo lamang na mananampalataya ay mas masipag pag magdasal kaysa sa pari, o madre, o lider ng kabanalan. Kung sino pa ang mga nag-aral sa relihiyosong eskwelahan na natutunan ang mga turo at aral ng Panginoon tungkol sa moralidad ay sila pang mga mas kurakot sa gobyerno. Isa ito sa malaking iskandalo. Mas inaasahan sa kanila na maging mas tapat at wagas dahil nagkaroon sila ng oportunidad na mag-aral ng kabanalan. May pagkakataon pa na mas Kristiyano sa gawa ang mga hindi Kristiyano. Yun ang nakakahiya.
Alamin natin ang ating kapasidad. Sukatin natin ang mga oportunidad na meron tayo. Ibase natin doon ang paglilingkod na ipagkakaloob natin. Maging pantay nawa sa kapasidad natin ang ating ginagawa. Mas mabuti, higitan natin ang ating kakayanan o kapasidad. Patuloy tayong lumago sa paggawa ng mabuti.
MANALANGIN: Panginoon, magampanan ko nawa ang aking responsibilidad at pananagutan ayon sa m binigay mo sa aking kakayanan at kapasidad.
GAWIN: Lagi mong higitan sa araw na ito ang nagawa mong kabutihan kahapon. Maging mas banal ka ngayon kaysa kahapon.
Minsan tayong mga tao mahilig tayo magpasikat kahit donasyon man Malaki o maliit piktyor dito piktyor doon ipinapakita natin sa buong mundo Ang mga tulong at ipanagmayabang isipin natin Isang balo na nagbigay nang buo niyang handog sa simbahan kahit alam ya na walang Wala na sya pero buong puso niya pa rin inialay sa ating Panginoon Diyos ganun rin dapat tayo magbigay tayo nang palihim sa ating kapwa tumulong tayo Nang palihim dahil ang gantingpala nang ating Mahal na Panginoon ay mas Malaki higit sa kahit anung yaman Meron tayo dito sa sanlibutang ito huwag tayong magpakunwari na magara ang ating kasuootan ginagagalang sa mamahalin materyales alahas, bahay, kotse o anung Meron tayo pero kabaligtaran ito dahil hindi natin kaya paglingkoran Ang tao at Diyos sa kabila Ng ating minimithi at tinatamasa sa buhay huwag natin tularan Ang mga pariseo, saduseyo noong unang panahon dahil mahilig silang magpakunwari para kilalanin nang buong mamamayan.