Podcast: Download (Duration: 5:01 — 3.6MB)
Martes sa Unang Linggo ng Apatnapung Araw na Paghahanda
Isaias 55, 10-11
Salmo 33, 4-5. 6-7. 16-17. 18-19
Mat’wid ay tinutulungan
sa lahat ng kagipitan.
Mateo 6, 7-15
Subscribe to Awit at Papuri Communications YouTube Channel
Tuesday of the First Week of Lent (Violet)
UNANG PAGBASA
Isaias 55, 10-11
Pagbasa mula sa aklat ni propeta Isaias
Sinasabi ng Panginoon:
“Ang ulan at niyebe
paglagpak sa lupa’y di na nagbabalik,
aagos na ito sa balat ng lupa’t nagiging pandilig,
kaya may pagkai’t butil na panghasik.
Ganyan din ang aking mga salita,
magaganap nito ang lahat kong nasa.”
Ang Salita ng Diyos.
SALMONG TUGUNAN
Salmo 33, 4-5. 6-7. 16-17. 18-19
Mat’wid ay tinutulungan
sa lahat ng kagipitan.
Ang kadakilaan ng Diyos ay ihayag
at ang ngalan niya’y purihin ng lahat!
Ang aking dalangi’y dininig ng Diyos,
nawala sa akin ang lahat kong takot.
Mat’wid ay tinutulungan
sa lahat ng kagipitan.
Nagalak ang aping umasa sa kanya,
pagkat di nabigo ang pag-asa nila.
Tumatawag sa Diyos ang walang pag-asa,
sila’y iniligtas sa hirap at dusa.
Mat’wid ay tinutulungan
sa lahat ng kagipitan.
Kinukupkop ng Diyos ang mga matuwid
at ang taghoy nila’y kanyang dinirinig.
Nililipol niya yaong masasama
hanggang sa mapawi sa isip ng madla.
Mat’wid ay tinutulungan
sa lahat ng kagipitan.
Agad dinirinig daing ng matuwid
inililigtas sila sa mga panganib.
Tumutulong siya sa nasisiphayo
ang walang pag-asa’y hindi binibigo.
Mat’wid ay tinutulungan
sa lahat ng kagipitan.
AWIT-PAMBUNGAD SA MABUTING BALITA
Mateo 4, 4b
Ang tao ay nabubuhay
hindi lamang sa tinapay
kundi sa Salitang mahal
mula sa bibig na banal
ng Ama nating Maykapal
MABUTING BALITA
Mateo 6, 7-15
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa kanyang mga alagad, “Sa pananalangin ninyo’y huwag kayong gagamit ng napakaraming salita, gaya ng ginagawa ng mga Hentil. Ang akala nila’y pakikinggan sila ng Diyos dahil sa dami ng kanilang salita. Huwag ninyo silang tutularan. Sapagkat alam na ng inyong Ama ang inyong kinakailangan bago pa ninyo hingin sa kanya. Ganito kayo mananalangin:
‘Ama naming nasa langit,
sambahin nawa ang pangalan mo.
Ikaw nawa ang maghari sa amin,
sundin nawa ang iyong kalooban
dito sa lupa tulad ng sa langit.
Bigyan mo kami ng pagkaing kailangan namin sa araw na ito;
at patawarin mo kami sa aming mga kasalanan,
tulad ng aming pagpapatawad sa mga nagkakasala sa amin.
At huwag mo kaming iharap sa mahigpit na pagsubok,
kundi ilayo mo kami sa masama!
Sapagkat iyo ang kaharian at ang
kapangyarihan at ang kapurihan,
magpakailanman! Amen.
Sapagkat kung pinatatawad ninyo ang mga nagkakasala sa inyo, patatawarin din kayo ng inyong Amang nasa langit. Ngunit kung hindi ninyo pinatatawad ang mga nagkakasala sa inyo, hindi rin kayo patatawarin ng inyong Ama.”
Ang Mabuting Balita ng Panginoon.
Pages: 1 2
« Lunes, Pebrero 27, 2023
Miyerkules, Marso 1, 2023 »
{ 5 comments… read them below or add one }
Patawarin mo po kami sa aming kasalanan at lagi mo po kaming iligtas sa ano pa mang kapahamakan at sa lahat ng masama . Sapagkat sa iyo ang kaharian,kapangyarihan at kapurihan mag pa sa walang hanggan. Amen.
PAGNINILAY: Isang gawain na ipinapaalala sa atin ngayong Kuwaresma ay ang Panalangin. Ang panalangin ay ang ating personal na pakikipag-ugnayan sa Diyos. Maraming paraan tayong nagdadasal, kahit mula sa mga “prayer book” o kaya personal. Minsan nagdadasal tayong nag-iisa lamang o kasama ang grupo ng mga tao/buong komunidad. Subalit ang nais ipaalala sa atin ngayong Kuwaresma at sa lahat ng mga pagkakataon ang isang epektibong paraan ng panalangin.
At makikita natin dito sa Ebanghelyo nang ituro sa atin ng ating Panginoong Hesukristo ang Pater Noster, o mas kilala bilang “Ama Namin”. Dati sa kultura ng mga Hudyo, dapat igalang ang pangalan ng Panginoong Diyos ayon sa nasasaad sa Ika-2 Utos. Ngayon nang dumating si Hesus, itinuro niya sa atin na tawagin natin ang Diyos bilang “Ama” sapagkat katulad ng isang tatay na nagsisikap sa isang pamilya, ang ating Panginoon ay tunay na nagbibigay sa atin ng ating mga kahilingan ayon sa kanyang kagustuhan at kalooban. Ang Ama Namin ay isang magandang panalangin upang gawin natin sa ating personal na dasal ang ACTS: Adoration, Contrition, Thanksgiving, and Supplication.
Pinupuri natin ang Diyos dahil sa kanyang dakilang presensiya sa atin, at nagpapasalamat din tayo sa mga biyayang ipinagkalooob niya sa atin at sa ibang tao. Kahit tayo ay nagkasala, tayo ay patuloy na humihingi ng kapatawaran sa kanya at ang grasyang matutong patawarin ang pagkakasala ng ibang tao laban sa atin. At sa huli ay humihiling tayo sa Panginoon ng patuloy na patnubay sa atin at ang ibang tao rin. Ganito ang isang epektibong paraan ng panalangin sa Diyos. Kaya matindi ng babala ni Hesus na huwag nating tularan ang mga pagano na kapag nagdadasal, marami tayong sinasabi at paulit-ulit.
Ang tunay na panalangin ay dapat magmula sa ating mga puso. Sapagkat ang kagandahang-loob ng Panginoong Diyos ayon kay Propeta Isaias sa Unang Pagbasa ay katulad ng pagkakaroon ng mga kasaganaan ng iba’t ibang panahon sa ating klima. Nawa’y manahan ang kanyang salita sa ating buhay.
Hello po, Salamat po.
Pinupuri ka nami
n Panginoong
HesuKristo.
PLEASE SHARE AND SUBSCRIBE
“SAINTSPOT” on Youtube
Ano sa palagay mo kapatid? pag-aawayan pa ba nating mga Kristiyano ang simpleng sagot?
Sa ebanghelyo ngayon, maririnig natin na umalis si Hesus para magdamag na manalangin. Di bat napakahaba yata ng kanyang dasal? binigyan niya tayo ng isang halimbawa na pwede nating tularan. At hindi lang iyon, tinuruan din tayo kung ano ang inaasahan niyang laman sa ating mga panalangin. Sigurado namang alam niya ang ating mga pangangailangan bago pa tayo nagdasal pero parang gusto ni Lord na makita kung alin ang mahalaga sa iyo at kung sino siya para sayo.
Una, dapat purihin natin muna ang Diyos dahil sa kanyang dakilang presensiya sa atin, magpasalamat din tayo sa mga biyayang ipinagkalooob niya sa atin at sa ibang tao. Dahil sa ating mga kasalanan, nararapat lamang na aminin at humihingi ng kapatawaran sa kanya at kung napatawad niya tayo e dapat marunong din tayong magpatawad. At sa huli, tsaka lang tayo humiling lalo na ang patnubay niya sa atin at sa bang tao.
Matindi ng babala ni Hesus na huwag nating tularan ang mga pagano na kapag nagdadasal, marami silang sinasabi at paulit-ulit na walang kabuluhan, ibig sabihin wala sa puso.
Ang tunay na panalangin ay dapat nagmumula sa ating mga puso at ito’y mabisa na tayo ay nababago nito. Ang haba ng dasal ay nakadepende sa relasyon mo sa Diyos. Kung close kayo ni Lord at mahal mo siya, siguradong hindi ka magsasawa na kausapin at pakinggan siya.
Inirerekomenda ni San Ignatius ng Loyola na pagnilayan ang bawat salita sa ating mga panalangin. Dapat ninanamnam, nauunawaan, nararamdaman at napapalalim ang ating pagmamahal sa Diyos.
Manalangin tayo.
‘Ama naming nasa langit,
sambahin nawa ang pangalan mo.
Ikaw nawa ang maghari sa amin,
sundin nawa ang iyong kalooban
dito sa lupa tulad ng sa langit.
Bigyan mo kami ng pagkaing kailangan namin sa araw na ito;
at patawarin mo kami sa aming mga kasalanan,
tulad ng aming pagpapatawad sa mga nagkakasala sa amin.
At huwag mo kaming iharap sa mahigpit na pagsubok,
kundi ilayo mo kami sa masama!
Sapagkat iyo ang kaharian at ang
kapangyarihan at ang kapurihan,
magpakailanman! Amen.Hesus, nagtitiwala ako sa Iyo.