Podcast: Download (Duration: 6:11 — 4.4MB)
Miyerkules sa
Unang Linggo ng Apatnapung Araw na Paghahanda
Jonas 3, 1-10
Salmo 50, 3-4. 12-13. 18-19
D’yos ko, iyong tinatanggap
pakumbaba’t pusong tapat.
Lucas 11, 29-32
Subscribe to Awit at Papuri Communications YouTube Channel
Wednesday of the First Week of Lent (Violet)
UNANG PAGBASA
Jonas 3, 1-10
Pagbasa mula sa aklat ni propeta Jonas
Sinabi ng Panginoon kay Jonas: “Pumunta ka sa Lungsod ng Ninive at ipahayag mo ang mga ipinasasabi ko sa iyo.” Nagpunta nga si Jonas sa Ninive. Malaki ang lungsod na ito. Aabutin ng tatlong araw kung lalakaring pabagtas. Siya’y pumasok sa lungsod.
Pagkaraan ng maghapong paglalakad, malakas niyang ipinahayag, “Gugunawin ang Ninive pagkaraan ng apatnapung araw!” Naniwala ang mga tagaroon sa pahayag na ito mula sa Diyos. Kaya, nag-ayuno sila at nagdamit ng sako bilang tanda ng lubos na pagsisisi at pagtalikod sa kanilang mga kasalanan.
Nang mabalitaan ito ng hari ng Ninive, bumaba siya sa kanyang trono, naghubad ng balabal, nagdamit din ng sako, at naupo sa abo. At ipinasabi niya sa mga taga-Ninive: “Ito’y utos ng hari at ng kanyang mga pinuno. Walang kakain isa man. Wala ring iinom, maging tao o hayop. Lahat ng tao at hayop ay magdamit ng sako. Taimtim na manalangin sa Diyos ang bawat isa. Pagsisihan ng lahat ang nagawa nilang kasalanan at talikdan ang masamang pamumuhay. Baka sa paraang ito’y mapawi ang galit ng Diyos, magbago siya ng kanyang pasiya at hindi na ituloy ang balak na paglipol sa atin.”
Nakita ng Diyos ang kanilang pagtalikod sa kasamaan kaya hindi na itinuloy ang paggunaw sa Ninive.
Ang Salita ng Diyos.
SALMONG TUGUNAN
Salmo 50, 3-4. 12-13. 18-19
D’yos ko, iyong tinatanggap
pakumbaba’t pusong tapat.
Ako’y kaawaan, O mahal kong Diyos,
sang-ayon sa iyong kagandahang-loob
mga kasalanan ko’y iyong pawiin,
ayon din sa iyong pag-ibig sa akin!
Hugasan mo sana ang aking karumhan
dalisayin mo ang aking kasalanan!
D’yos ko, iyong tinatanggap
pakumbaba’t pusong tapat.
Isang pusong tapat sa aki’y likhain,
bigyan mo, O Diyos, ng bagong damdamin.
Sa iyong harapa’y h’wag akong alisin;
ang Espiritu mo ang papaghariin.
D’yos ko, iyong tinatanggap
pakumbaba’t pusong tapat.
Hindi mo na nais ang mga panghandog;
sa haing sinunog di ka nalulugod.
Ang handog ko, O Diyos, na karapat-dapat
ay ang pakumbaba’t pusong mapagtapat.
D’yos ko, iyong tinatanggap
pakumbaba’t pusong tapat.
AWIT-PAMBUNGAD SA MABUTING BALITA
Joel 2, 12-13
Magsisi tayong mataos,
halinang magbalik-loob
sa mapagpatawad na D’yos;
sa kanya tayo’y dumulog
at manumbalik na lubos.
MABUTING BALITA
Lucas 11, 29-32
Ang Mabuting Balita ng Panginoon ayon kay San Lucas
Noong panahong iyon, samantalang dumaragsa ang mga tao, sinabi ni Hesus, “Napakasama ng lahing ito! Naghahanap sila ng palatandaan mula sa langit, subalit walang ipapakita sa kanila maliban sa palatandaang inilalarawan ng nangyari kay Jonas. Kung paanong naging isang palatandaan si Jonas sa mga taga-Ninive, gayun din naman, magiging isang palatandaan sa lahing tao ang Anak ng Tao. Sa Araw ng Paghuhukom, titindig ang Reyna ng Timog laban sa lahing ito at sila’y hahatulan niya ng kaparusahan. Sapagkat nanggaling siya sa dulo ng daigdig upang pakinggan ang karunungan ni Solomon; ngunit higit na di-hamak kay Solomon ang naririto! Sa Araw ng Paghuhukom ay titindig ang mga taga-Ninive laban sa lahing ito at hahatulan ng kaparusahan, sapagkat nagsisi sila dahil sa pangangaral ni Jonas; ngunit higit na di-hamak kay Jonas ang naririto!”
Ang Mabuting Balita ng Panginoon.
Pages: 1 2
« Martes, Pebrero 28, 2023
Huwebes, Marso 2, 2023 »
{ 5 comments… read them below or add one }
PAGNINILAY: Sa ating Unang Pagbasa (Jonas 3:1-10), narinig natin ang pagpropesiya ni Jonas sa bayan ni Nineve. Matatandaang ito ang pangalawang utos ng Diyos sa kanya, dahil sa unang beses niyang narinig ay nagtangkang tumakas papuntang Tarsis. At alam natin nagkaroon ng bagyo, at iniutos ni Jonas sa mga manlalakbay na itaboy siya sa dagat. Ngunit kinain siya ng isang malalking isda, at nanatili siya sa loob ng tiyan nito sa loob ng tatlong araw at tatlong gabi. At nang nakalaya nito, agad sinunod ni Jonas ang utos ng Diyos na magbabala sa posibleng pagwasak ng siyudad ng Nineve dahil sa matinding pagkakasala ng mga tao. Kaya dininig ito ng mga tao at nag-ayuno habang nakahilata sa sahig ng mga abo, na suot ang isang sako. Maski ang hari man ang nag-utos ng ang kanyang kababayan ay magsisi. Kaya hindi naituloy ng Diyos ang kanyang balak na wasakin ang isang bayang nagsisi at nagbalik-loob sa kanya.
Sa ating Ebanghelyo (Lucas 11:29-32), narinig natin ang isang pagsusubok ng mga Pariseo at eskriba ng isang tanda mula sa Panginoong Hesus. Kaya’t tinawag ni Hesus ang henerasyong iyon bilang napakasama sapagkat ito’y naghahanap ng isang palatandaan, at sinabi niya na walang tanda ang ibibigay kundi ang tungkol kay Propetang Jonas, na narinig natin sa Unang Pagbasa. Makikita dito na inihantulad ni Jesus ang pananatili ni Jonas sa kanyang magiging nakatakdang plano ng Diyos, ngunit ang mangyayari sa kanya ay higit pa sa nangyari sa propeta. Katulad ng pananatili ni Jonas sa loob ng isda ng 3 araw at 3 gabi, si Hesus ay ililibing matapos ang kanyang kamatayan sa Krus, ngunit siya’y muling mabubuhay makalipas ang 3 araw at 3 gabi. Kaya inilalarawan ni Hesus ang magiging kanyang Misteryong Paskwal upang tuparin ang plano ng Diyos na tayo’y mailigtas at gawing mga anak ng Diyos Ama. Kaya tayo’y tinatawagan na mamuhay nang marapat sa mundong ito habang hinihintay natin ang Araw ng Paghuhukom upang katulad ng Reyna ng Timog na dulaw upang makinig sa karunungan ni Haring Solomon, tayo rin ay matatagpuang handang panagutin ni Hesukristo sa kanyang muling pagpapario sa daigdig ayon sa ating pagpapamalas ng pag-ibig ng Diyos sa ating kapwa.
salamat po
Ang ating Panginoong Hesus ay higit kanino man, maging kay Jonas. Sana’y pinaniniwalaan nila si Hesus sa pamamagitan ng kanyang mga ginagawang panggagamot at mga milagro. Hindi minsan makita ng mga tao ang mga biyaya mula sa Diyos. Nakatingin sila sa ibang pagpapala at naikukumpara ang kanilang sarili. Sa panahon ng kwaresma, tulad ng Nineveh, nawa’y magbalik loob ang tao sa Diyos. Bigyang importansya ang Diyos at hindi ang materyal na bagay. Ang kabanalang yaman ay di mawawala magpakailan man. Subalit ang materyal na bagay, sa isang iglap lang maaring mawala. Kaya pahalagahan ang Diyos ng higit sa lahat.
Pagsisisi at pag aayuno. Dalawang bagay na gagawin ng tao na makakapagpabago ng pasya ng Diyos sa atin. Tunay nga na hindi mababaliwala ang ating ginagawa sapagkat ang Diyos ay alam ang lahat ng ating ginagawa at ang Kanyang awa ay hindi niya ipinagdadamot sa ating mga makasalanan. Katuwaan Niya at tagumpay Niya na tayo magsisi at sumunod sa Kanyang mga kagustuhan.
PLEASE SHARE AND SUBSCRIBE
“SAINTSPOT” on Youtube
https://youtube.com/watch?v=UZ7frcj4O_o&si=EnSIkaIECMiOmarE
Gospel Reflection, Luke 11: 29-32:
May mga taong buong pusong naniwala kay Hesus ngunit marami ang nagnanais ng tanda mula sa Langit, na katibayan kung sino si Hesus. Matapos gumawa ng maraming milagro si Hesus, hindi pa rin sapat sa mga tao para manampalataya. Kaya’t ang tugon ni Hesus, tanging tanda na kanilang matatanggap ay ang tanda ni Jonas na itinapon, nilamon ng isang balyena, at inuluwa sa pangatlong araw.
Ang aral para sa atin ay hindi tayo kukumbinsihin ng Diyos na manampalataya na parang isang hollywood actor. Sa halip, ang “tanda” na iniaalok sa atin ay isang paanyaya na mamatay kasama ni Kristo. Mamatay sa ating mga kasalanan upang magkaroon ng isang bagong buhay. Malimit kasi humihingi tayo ng sign o tanda kasi sigurista tayo sa Diyos. Bat hindi ka na lang magtiwala na may Diyos at kasama mo siya?
Pagnilayan, ngayon, imbes na magduda bat hindi mo na lang tignan ang krus, tingnan ang pagdurusa at kamatayan ni Jesus, at piliin na sundin Siya sa isang kamatayan sa lahat ng kasalanan at pagkamakasarili. Ang pagbabago natin sa kalooban ay isang tanda na buhay nga at merong Diyos.
Manalangin tayo.
Panginoong Hesus, tinitingnan ko ang iyong krus at nakikita ko ang isang dakilang pagmamahal. Bigyan mo ako ng biyayang kailangan ko upang makasunod sa Iyo sa libingan upang ang Iyong kamatayan ay magtatagumpay sa aking mga kasalanan. Habang ako’y naglalakbay ngayon panahon ng kwaresma, palayain mo ako, mahal na Panginoon upang ako ay ganap na makabahagi sa Iyong Muling Pagkabuhay. Hesus, nagtitiwala ako sa Iyo.