Podcast: Download (Duration: 31:02 — 30.8MB)
PANALANGIN NG BAYAN
Ang Magdamagang Pagdiriwang sa Pasko ng Muling Pagkabuhay (B)
Patnubay sa Misa
Pinalakas ng pananatili ng Panginoon sa piling natin at binibig- yang-sigla ng kanyang napakalaking pag-ibig para sa ating lahat, lubos na pagtitiwalang idulog natin sa kanya ang ating mga kahilingan para sa pangangailangan ng sangkatauhan sa ating panalanging:
Panginoon, dinggin Mo kami!
Upang ang buong Simbahan ay magtamo ng tunay na muling pagkabuhay at paglaya sa lahat ng mga nagdaang pagkatalo, kapintasan at pagtalikod, manalangin tayo!
Upang ang Santo Papa at lahat ng mga pinunong espirituwal ay palakasin ng pagkabuhay na muli ni Hesus at bigyan ng kasiyahan sa kanilang dinaranas na kahirapan, manalangin tayo!
Upang ang lahat ng bagong binyag ay manatiling tapat sa kanilang pangakong itakwil ang masama at mamuhay ayon sa Ebanghelyo, manalangin tayo!
Upang ang lahat ng taong nasalanta ng digmaan at sakuna ng kalikasan ay makalasap ng kapayapaan at ng kagalakan ng muling pagkabuhay, manalangin tayo!
Upang matagpuan ng mga nasa bingit ng kamatayan, sa muling pagkabuhay ng Panginoon, ang kanilang bukal ng pag-asa at katiwasayan sa paglisan nila sa buhay na ito, manalangin tayo!
Upang lahat ng nagsusuong ng sarili sa panganib dahil sa pagpapalaganap ng Ebanghelyo ay magawang mapagningas ang lahat ng misyonero sa katapatan at tapang sa kanilang gawaing maka-Diyos. Manalangin tayo!
Panginoong Diyos, nawa’y punuin ng kaningningan ng muling pagkabuhay ni Kristo ang aming mga araw, palakasin kami sa mga pagsubok at dalhin kami sa walang hanggang Pagkabuhay na Muli sa langit kung saan Ikaw ay nabubu- hay at naghahari magpasawalang hanggan.
Amen!
Pages: 1 2
« Biyernes, Marso 29, 2024
Linggo, Marso 31, 2024 »
{ 5 comments… read them below or add one }
PAGNINILAY: Ngayon ay ating ipinagdiriwang ang dakilang gabi ng ating kaligtasan. Ito ay tinatawag ni San Agustin na “ina ng lahat ng mga bihilya”. Sa gabing ito ay ipinagdiriwang natin ang pinakadakilang kapistahan ng ating Simbahan: ang Pasko ng Muling Pagkabuhay. Kaya ang Magdamagang Pagdiriwang na ito bagamat mahaba ay napakagandang makiisa. Makikita natin sa simula ang presensiya ng kadiliman. Sa kadilimang iyon ay inaalala natin ang Kamatayan sa Krus at Paglibing ni Hesus. Subalit mayroong isang apoy at ang Paschal candle na nagsasabi sa atin na may sumikat na liwanag sa dilim. Kaya’t iyan ang nais ipahayag ng Exsultet na tunay ngang si Kristo ay nabuhay, at siya ang ating liwanag na nagdulot sa atin ng kaligtasan.
Ang mga mahahabang pagbasa at mga salmo ay nagsasalaysay sa kwento ng kaligtasan ng Diyos mula sa pagkalikha ng sangkatauhan hanggang sa Muling Pagkabuhay ng Panginoon. Ito’y isang paalala na katulad ni Hesus na tumawid mula sa kamatayan patungo sa buhay, tayo rin ay inaayahang tumawid mula sa kasalanan patungo sa grasya ng Diyos Ama. Kaya ang ikatlong bahagi ay paalala na tayo’y ginawang banal ng tubig ng binyag bilang kaisa ng Kamatayan at Pagkabuhay ni Kristo.
Sinasariwain natin muli ang ating mga pangako sa binyag upang talikdan natin ang mga gawaing masama at tangkilikin natin ang mga dakila at mabuting gawain ng Diyos. Dahil natupad nga ang ating kaligtasan sa pamamagitan ng Misteryong Paskwal, tayong lahat ay nakiisa sa piging ng kanyang Katawan at Dugo upang pagsaluhan ang kanyang “sacramental presence” na nawa’y manahan ang kanyang liwanag sa ating buhay.
Mga kapatid, ang kwento ng Misteryong Paskwal ni Hesus ay kwento rin ng ating buhay. Tunay ngang namatay ang Panginoon sa Krus upang tayo’y iligtas, subalit ang kanyang kamatayan ay nagsasabing hindi pa huli ang lahat. Ang kanyang sinapit na ito ay humantong sa kanyang Muling Pagkabuhay sa ikatlong araw, at siya’y nagtagumpay laban sa kasamaan at kamatayan. Dahil dito, tayo ay nagkaroon ng bagong buhay na nilikha tayo muli sa larawan at kaanyuan ng Ama. Kaya matapos nating gunitain ang mga Mahal na Araw, tayo ngayon ay pumapasok sa 50 araw ng Easter upang sariwain sa ating puso’t damdamin ang kanyang Pagkabuhay.
Nawa’y tunay na manahan siya sa ating mga buhay na dala ang balitang siya’y tunay na nagtagumpay at nagligtas sa ating lahat. Nawa’y maging matatag tayo sa ating pananampalataya sa kanya upang isabuhay natin si Kristo sa ating paggawa ng kabutihan at katuwiran sa kapwa.
MALIGAYANG PASKO NG PAGKABUHAY PO SA INYONG LAHAT! ????
Ang Panginoong Hesus ang tunay na Anak ng Diyos. Tulad ng Kanyang ipinangangaral, ang Kanyang muling pagkabuhay ay nangyari. Napagtagumpayan Niya ang kasalanan at kamatayan. Ang tagumpay Niya ay tagumpay ng sangkatauhan. Tunay na tayo’y natubos na sa pagkakasala, sa pamamagitan ng buhay ng ating Panginoong Hesukristo. Ganun Niya tayo kamahal. Kaya nga dapat namang suklian natin ng kabutihan ang ginawa Niya. Magbago na at umiwas sa mga kasalanan. Salamat po Panginoon sa inyong pagmamahal.
Binabati ko ang lahat ng nagbalik loob sa Panginoon simula pa noong Ash Wednesday. Napagtagumpayan natin ang banal na Cuarenta diaz ng pakikidalamhati natin kay Hesus. Kahapon ay namatay si Kristo kasama ng ating mga kasalanan. Sa pagkakalibing kay Hesus isama natin ang lahat ng ating kasamaan na mabaon sa hukay at masayang salubungin ang muli nyang pagkabuhay, Samanatalahin natin ang muli niyang pagkabuhay na tayo ay magsisi na sa mga nagawang gawing mali at sikaping wag ng bumalik sa kadiliman. Magbunyi tayong lahat bukas sa Pasko ng Pagkabuhay! Bagong buhay, bagong pag asa kasama Sya.
Binabati ko ang lahat ng nagbalik loob sa Panginoon simula pa noong Ash Wednesday. Napagtagumpayan natin ang banal na Cuarenta diaz ng pakikidalamhati natin kay Hesus. Kahapon ay namatay si Kristo kasama ng ating mga kasalanan. Sa pagkakalibing kay Hesus isama natin ang lahat ng ating kasamaan na mabaon sa hukay at masayang salubungin ang muli nyang pagkabuhay, Samanatalahin natin ang muli niyang pagkabuhay na tayo ay magsisi na sa mga nagawang gawing mali at sikaping wag ng bumalik sa kadiliman. Magbunyi tayong lahat bukas sa Pasko ng Pagkabuhay! Bagong buhay, bagong pag asa kasama Sya.
MALIGAYANG PASKO NG MULING PAGKABUHAY NI HESUS!!
********
Para sa araw
Walang Salita. Ang Salita ng Diyos ay tahimik sa libingan.
“Ngayon ay naghahari ang isang malaking katahimikan sa lupa… sapagkat ang Hari ay natutulog. Ang lupa ay nanginginig at nananatili pa rin dahil ang Diyos ay nakatulog sa laman at ibinangon niya ang lahat ng natulog mula pa nang magsimula ang mundo.” (Katekismo #635)
Sa sinaunang Apostle’s Creed, sinasabi nila sa atin na si Kristo ay “napako sa krus, namatay, at inilibing. SIYA AY NANAOG SA MGA PATAY. Sa ikatlong araw ay muling nabuhay”.
Ipagdasal natin ngayon ang mga patay na naglalakad kasama natin, kabilang ang ating sarili, na maaaring nakakulong pa rin sa kultura ng kamatayan at kailangang maniwala at maligtas sa pamamagitan ng Ebanghelyo ng Buhay. Manalangin tayo kasama ni Inang Maria at ng mga Banal habang hinihintay natin ang maluwalhating muling pagkabuhay ng ating Tagapagligtas.
Pagpalain ng Diyos ang ating Banal na Sabado!
***