Podcast: Download (Duration: 7:08 — 8.9MB)
Lunes ng Ikatlong Linggo sa Karaniwang Panahon (II)
o kaya Paggunita kay San Vicente, diyakono at martir
2 Samuel 5, 1-7. 10
Salmo 88, 20. 21-22. 25-26
Pag-ibig ko’t pagtatapat
ay ibibigay kong ganap.
Marcos 3, 22-30
Subscribe to Awit at Papuri Communications YouTube Channel
Monday of the Third Week in Ordinary Time (Green)
or Optional Memorial of St. Vincent, Deacon and Martyr (Red)
UNANG PAGBASA
2 Samuel 5, 1-7. 10
Pagbasa mula sa ikalawang aklat ni Samuel
Noong mga araw na iyon, nagkaisa ang lahat ng angkan ng Israel na pumunta sa Hebron upang makipagkita kay David. Sinabi nila, “Kami’y laman ng iyong laman at dugo ng iyong dugo. Nang si Saul ang hari namin, nanguna ka sa mga kawal ng Israel sa pakikipagdigma. Ipinangako sa iyo ng Panginoon na gagawin ka niyang hari upang mamuno sa kanyang bayan.” Lahat ng matatanda ng Israel ay nagpunta nga sa Hebron at doo’y nakipagkasundo sa kanya sa harapan ng Panginoon. Pinahiran nila ng langis si David at kinilalang hari sa Israel. Noo’y tatlumpung taon na si David at naghari siyang apatnapung taon. Sa Hebron, pitong taon at kalahati siyang namahala sa Juda. Sa Jerusalem naman ay tatlumpu’t tatlong taon siyang naghari sa buong Israel at Juda.
Nang siya’y maging hari, pinangunahan niya ang kanyang mga kawal upang lusubin ang mga Jebuseo na nasa Jerusalem. Sinabi nila kay David, “Hindi ka makapapasok dito kahit mga bulag at lumpo lamang ang magtanggol dito.” Ngunit nakuha ni David ang kuta ng Sion na tinawag na Lungsod ni David hanggang ngayon.
Habang lumalaon ay lalong nagiging makapangyarihan si David pagkat sumasakanya ang Panginoon, ang Diyos na Makapangyarihan.
Ang Salita ng Diyos.
SALMONG TUGUNAN
Salmo 88, 20. 21-22. 25-26
Pag-ibig ko’t pagtatapat
ay ibibigay kong ganap.
Ika’y nagsalita noon pa mang una
sa mga lingkod mo, at ipinakita
yaong pangitain, at ito ang badya:
“Aking pinutungan ang isang dakila,
na aking pinili sa gitna ng madla.
Pag-ibig ko’t pagtatapat
ay ibibigay kong ganap.
Ang piniling lingkod na ito’y si David,
aking pinahiran ng banal na langis.
Kaya’t palagi ko siyang aakbayan
at siya’y lalakas sa aking patnubay.
Pag-ibig ko’t pagtatapat
ay ibibigay kong ganap.
Ang pagtatapat ko’t pag-ibig na wagas,
ay iuukol ko’t aking igagawad,
at magtatagumpay siya oras-oras.
Mga kaharia’y kanyang masasakop,
dagat na malawak at malaking ilog.”
Pag-ibig ko’t pagtatapat
ay ibibigay kong ganap.
ALELUYA
2 Timoteo 1, 10
Aleluya! Aleluya!
Si Kristo ay nagtagumpay
nalupig ang kamatayan
nagningning ang pagkabuhay.
Aleluya! Aleluya!
MABUTING BALITA
Marcos 3, 22-30
Ang Mabuting Balita ng Panginoon ayon kay San Marcos
Noong panahong iyon, sinabi ng mga eskribang dumating mula sa Jerusalem, “Inaalihan siya ni Beelzebul, ang prinsipe ng mga demonyo. Ito ang nagbigay sa kanya ng kapangyarihang magpalayas ng mga demonyo!” Kaya’t pinalapit ni Hesus ang mga tao at sinabi sa kanila ang ilang talinghaga: “Paano mangyayaring palayasin ni Satanas si Satanas?” Kapag naglaban-laban ang nasasakupan ng isang kaharian, hindi mananatili ang kahariang iyon. At kapag naglaban-laban ang magkakasambahay, hindi mananatili ang sambahayang iyon. Gayun din naman, kapag naghimagsik si Satanas laban sa kanyang sarili at naglaban-laban ang kanyang nasasakupan, hindi magtatagal at darating ang kanyang wakas.
“Walang makapapasok sa bahay ng isang taong malakas at makaaagaw ng kanyang ari-arian, malibang gapusin muna niya ang taong iyon. Saka pa lamang niya malolooban ang bahay na iyon.
“Tandaan ninyo ito: maaaring ipatawad sa mga tao ang lahat ng kasalanan at panlalait nila sa Diyos, ngunit ang sinumang lumait sa Espiritu Santo ay hindi mapatatawad. Ang kanyang kasalanan ay hindi mapapawi kailanman.” Sinabi ito ni Hesus sapagkat ang sabi ng ilan, “Inaalihan siya ng masamang espiritu.”
Ang Mabuting Balita ng Panginoon.
Pages: 1 2
« Linggo, Enero 21, 2024
Martes, Enero 23, 2024 »
{ 4 comments… read them below or add one }
PAGNINILAY: Ang Unang Pagbasa ngayon ay nagpapahayag ng paghirang ng mga tribo kay David bilang Hari ng Israel. At kasunod nito ay ang matagumpay niyang pagsakop sa Jerusalem bilang kabisera ng bansa. Ito’y umpisa ng pagiging matapat ni Haring David sa pagtupad sa mga utos ng Panginoong Diyos. Hindi natuwa si Hesus sa ating Ebanghelyo na paratangin siyang nagpapalayas ng mga demonyo sa ngalan ni Beelzebul, ang prinsipe ng mga demonyo. Tinanong niya ang mga eskriba kuny paanong mananatiling matatag ang bahay kung ito’y ginawa nang pansarili lamang. Ganun din sa isang nakikidigmang kaharian na hindi ito’y matatagumpay.
Ang sinasabi dito ni Hesus na nagmula ang kanyang kapangyarihan mula sa Ama, at hindi kay Satanas. Sa pamamagitan ng mga kababalaghan at pagpaparangal ng Mabuting Balita, ipinakita niya ang mabubuting gawain na ibigay ang pisikal at espirituwal na pangangailangan ng tao. Sa kanyang Pagpapakasakit at Pagkamatay sa Krus, inialay niya ang kanyang buhay upang tayo’y mailigtas mula sa ating pagsusuway sa kalooban ng Diyos.
Nawa’y tunay na makita natin ang kabutihan ng Panginoon at ipalaganap ito sa ating araw-araw na pamumuhay.
Sa ating pangkasalakuyang buhay, mayroon ba kayong nakakasalamuha na nilalait ang Diyos, o binabastos ang Diyos, o ginagawang katatawanan ang Diyos, o minumura ang Diyos o di kaya nman sinusubok ang Diyos?
Hindi natin maiiwasan na may makasalamuha tayo na mga ganyang tao, yan ang mga tao na hindi natin dapat kaibiganin. Sinabi ni Hesus sa ebanghelyo na ang mga kasalanan natin ay maaaring mapatawad ng Diyos pero ang laitin mo ang espiritu o ang Panginoon ay isang kalapastanganan na hindi mapaptawad magpakailanman.
Noong isang linggo lamanh ay mayroon akong nakaharap na tao na aking nakadebate tungkol dito. Hindi sya naniniwala sa Diyos, at sinabi pa sakin na sabihin ko daw sa Diyos ko na pagalawin ang baso na nasa harap namin upang maniwala sya. Ang nasabi ko na lamang ay huwag mong subukin ang Diyos at ako ay natatakot para sa iyo. Pinagdasal konna lamang sya na balang araw eh makilala nya si Hesus at manampalataya.
Mapalad ang mga naniniwala kahit hindi nakikita ang Diyos. Ibigin natin si Hesus ng buong puso’t kaluluwa, manalig, manampalatay at igalang.
Pagninilay sa Mabuting Balita ni Jess C. Gregorio:
Ang Panginoon ay nasa mabuting pananalita at gawa. Wala siya sa magkasalungat na gawi. Karaniwang walang kapangyarihan ang mga nagpapanggap at isinasa demonyo mga kababalaghang dala ng Banal na Espiritu. Mag ingat. Ito ang kasalanang walang kapatawaran.
Ang tao ay walang alam. Salat tayo sa karunungan. Mahina. Walang lakas. Puno ng takot at pangamba. Maligalig. Sablay sa maraming bagay. Bagama’t may yaman at katayuan sa lipunan ay malungkot at nangangailangan. Kailangan natin ng Tamang Daan, Katotohanan, at Totoong Buhay. Tangapin natin si Hesus sa Komunyon ng Banal na Misa. Maging kaisa tayo Niya. Bisitahin, pagmasdan, sambahin, at kausapin natin siya sa Adoration Chapel. Ang Kanyang Presensiya ay mananatili hanggang sa wakas ng panahon. Hindi na natin siya kailangan hanapin. Matagal na siyang naghihintay sa atin.
The battle has already been won! Napagtagumpayan na ito ni Hesus!
Ano ba ang napagtagumpayan ni Hesus? Kamatayan. Kasalanan. Ang unang taong hindi nagkasala mula sa Kanyang pagkakalihi hanggang sa Kanyang kamatayan. Ang Panginoong Hesus din ang unang taong nakapagtagumpay sa kamatayan at simula noon ay nabubuhay at naghahari Siya mula sa langit magpakailanman! Amen.
Tayo’y mga soldiers of Jesus Christ, who is our King, our Head. Ang tawag sa Kanyang battalion ay “Church”. At ang ating lakas sa panlaban ay ang Espiritu Santo na sumasaatin, kung tayo nga talaga’y tinatanggap ang paghahari ng Espiritu sa ating mga buhay. At ang ating pagsanggalang at panlaban ay ang Baluti ng Diyos o Armor of God (ayon nga kay San Pablo). “Kaya’t maging handa kayo. Ibigkis sa inyong baywang ang sinturon ng katotohanan, at isuot sa dibdib ang baluti ng katuwiran; 15 isuot ninyo ang sapatos ng pagiging handa sa pangangaral ng Magandang Balita ng kapayapaan. 16 Lagi ninyong gawing panangga ang pananampalataya, na siyang papatay sa lahat ng nagliliyab na palaso ng diyablo. 17 Isuot ninyo ang helmet ng kaligtasan, at gamitin ang tabak ng Espiritu, na walang iba kundi ang Salita ng Diyos.”
Ano ba ang ating nilalabanan natin dito sa mundo? Mga kaaway nating kapwa tao? Hindi! Ang ating nilalabanan ay ang diyablo. Mga diyablo na nagtetempt sa atin na huwag patawarin ang kapatid mo, na mainggit sa iba, binubulong sa atin na huwag nang magsimba, tinetempt tayo na kumain nang kumain at huwag magexercise, tinetempt tayo na mandaya sa business para mas malaki ang kita, tinetempt tayo na magshoplift sa department store kase maliit na item lang naman daw, nagpapasok sa isip natin na wala tayong kwentang tao, pinapasok sa isip ng ilang mga tao na magsuicide na lang kase mabigat ang kalooban. Mga kapatid, kung tayo’y nakakaisip ng mga ito, tayo muna’y huminto at manalangin sa Panginoon, sapagkat iniimpluwensiyahan ng diablo ang ating kaisipan.
Yan ang gustong gusto ng diablo mula sa atin. Ang mawala isa-isa ang mga pinaghaharian ng Diyos, ang mapatumba isa-isa ang mga anak ng Diyos. Sapagkat ang gusto niya’y magkaroon tayo ng unrest sa lupa at mawala ang ating koneksyon sa Panginoong Diyos. Ito ang mensahe ng Ebanghelyo. Si Hesus na ating Hari ay mismo kanilang inuudyokan at pinaparatangan na si Beelzebul daw, ang prinsipe ng mga demonyo. Ngunit kagaya nga ng sinabi ni Hesus, a kingdom divided against itself will not stand for long. Hindi naniwala ang mga Pariseong ito kay Hesus, pero naniwala sila sa udyok ng demonyo na si Hesus ay si Beelzebul. Noong time na yun, nacommit ng mga taong iyon ang kasalanang walang kapatawaran: ang panlalait sa Espiritu Santo. Ang Espiritu Santo na kay Hesus ang dahilan ng Kanyang kapangyarihang magpagaling, magpalayas ng demonyo, gumawa ng himala, magturo mula sa sariling salita ng Diyos Ama. The awe and wonder of the reality of the Holy Triune God!
Mga kapatid, si Hesus ang ating Hari, at bilang mga anak ng Diyos ay sumasaatin ang Espiritu Santo. Huwag nating ipagwalang bahala ang tinuturong pagtutuwid sa atin ng Espiritu Santo. Makinig at sumunod tayo sa Kanya, at labanan ang mga schemes ng enemy gamit ang lakas mula sa Espiritu. Tandaan ang Armor of God: belt of truth, breastplate of righteousness, shoes of readiness for sharing the Gospel, shield of faith, helmet of salvation and sword of the Spirit, which is the Word of God.
Nawa’y maisabuhay natin ang pagiging soldier of Christ, hindi lamang sa ating mga paggawa ng mabuti kundi pati na rin sa pag-iwas natin sa kasalanan. Amen.