Podcast: Download (Duration: 4:14 — 2.5MB)
Huwebes ng Ika-29 na Linggo sa Karaniwang Panahon (II)
Efeso 3, 14-21
Salmo 32, 1-2. 4-5. 11-12. 18-19
Awa’t pag-ibig ng Diyos
sa sangkalupaa’y lubos.
Lucas 12, 49-53
Subscribe to Awit at Papuri Communications YouTube Channel
Thursday of the Twenty-ninth Week in Ordinary Time (Green)
UNANG PAGBASA
Efeso 3, 14-21
Pagbasa mula sa sulat ni Apostol San Pablo sa mga taga-Efeso
Mga kapatid, ako’y naninikluhod sa Ama, na siyang pinagtutularan ng pagkaama sa bawat sambahayan sa langit at sa lupa. Hinihiling ko, ayon sa kanyang kayamanan at kadakilaan, na palakasin niya ang inyong buhay espirituwal sa pamamagitan ng kanyang Espiritu. Nawa’y manahan si Kristo sa inyong puso sa pamamagitan ng inyong pananalig sa kanya upang sa inyong pag-uugat at pagiging matatag sa pag-ibig, maunawaan ninyo, kasama ng mga hinirang, kung gaano kadakila ang pag-ibig ni Kristo. At nawa’y makilala ninyo ang di matingkalang pag-ibig na ito upang mapuspos kayo ng kapuspusan ng Diyos.
Sa Diyos na makagagawa nang higit kaysa lahat ng maaari nating hilingin at isipin, sa pamamagitan ng kanyang kapangyarihang naghahari sa atin – sumakanya ang kapurihan sa pamamagitan ng simbahan at ni Kristo Hesus magpakailanman! Amen.
Ang Salita ng Diyos.
SALMONG TUGUNAN
Salmo 32, 1-2. 4-5. 11-12. 18-19
Awa’t pag-ibig ng Diyos
sa sangkalupaa’y lubos.
Lahat ng matuwid dapat na magsaya
dahil sa ginawa ng Diyos sa kanila;
Kayong masunuri’y magpuri sa kanya!
Ang Panginoong Diyos ay pasalamatan,
tugtugin ang alpa’t awit ay saliwan.
Awa’t pag-ibig ng Diyos
sa sangkalupaa’y lubos.
Panginoo’y tapat sa kanyang salita,
at maaasahan ang kanyang ginawa.
Minamahal niya ang gawang matapat,
ang pag-ibig niya sa mundo’y laganap.
Awa’t pag-ibig ng Diyos
sa sangkalupaa’y lubos.
Ngunit ang mga panukala ng Diyos,
ay mamamalagi’t walang pagkatapos.
Mapalad ang bansang Panginoo’y Diyos,
mapalad ang bayang kanyang ibinukod.
Awa’t pag-ibig ng Diyos
sa sangkalupaa’y lubos.
Ang may takot sa Diyos, at nagtitiwala
sa kanyang pag-ibig, ay kinakalinga.
Hindi babayaang sila ay mamatay,
kahit magtaggutom sila’y binubuhay.
Awa’t pag-ibig ng Diyos
sa sangkalupaa’y lubos.
ALELUYA
Filipos 3, 8-9
Aleluya! Aleluya!
Tana’y aking tatalikdan
upang si Kristo’y makamtan
bilang tanging pakinabang.
Aleluya! Aleluya!
MABUTING BALITA
Lucas 12, 49-53
Ang Mabuting Balita ng Panginoon ayon kay San Lucas
Noong panahong iyon, sinabi ni Hesus sa kanyang mga alagad, “Naparito ako upang magdala ng apoy sa lupa – at sana’y napagningas na ito! May isang binyag pa na dapat kong tanggapin, at nababagabag ako hangga’t hindi natutupad ito! Akala ba ninyo’y pumarito ako upang magdala ng kapayapaan sa lupa? Sinasabi ko sa inyo: hindi kapayapaan kundi pagkakabaha-bahagi. Mula ngayon, ang limang katao sa isang sambahayan ay mababahagi: tatlo laban sa dalawa at dalawa laban sa tatlo.
Maglalaban-laban ang ama at ang anak na lalaki,
Ang ina at ang anak na babae,
At gayun din ang biyenang babae, at manugang na babae.”
Ang Mabuting Balita ng Panginoon.
Pages: 1 2
« Miyerkules, Oktubre 19, 2022
Biyernes, Oktubre 21, 2022 »
{ 4 comments… read them below or add one }
Pagninilay: Ang Ebanghelyo ay isa sa mga kontrobersyal na pahayag ng ating Panginoong Hesukristo. Unang sinabi ni Hesus na naparito siya upang ipadala ang apoy ng lupa at ito’y magnangis na. Ang nais niyang ipahiwatig na ang apoy ay sumusimbolo sa pag-aalab na dala ng Espiritu Santo. Ito ang magpapaningning sa tao tungo sa liwanag ni Kristo. Kaya ang binyag na ninanais ni Hesus ay nagmumula sa Espiritung iyon. Minsan nga sinabi ni Santa Catalina ng Siena: “Be who God wants you to be, and you will set the world on fire.” Tayong mga Kristiyano ay inaanayayahang maging apoy hindi lang panariwain ang init ng pag-ibig ng Diyos, kundi pati na rin ipagdala ang kanyang liwanag sa lahat, lalung-lalo ang mga nasa kadiliman dulot ng kasalanan. Ikalawang pahayag ni Hesus ay hindi siya naparito upang magbigay ng kapayapaan, kundi ang pagkbaha-bahagi. Sinasabi rin dito sa Ebanghelyo ang hidwaan ng dalawa laban sa tatlo, ama laban sa anak na lalaki, ina laban sa anak na babae, at biyenan laban sa manugang. Hindi ito nangangahulugang si Hesus ay nagsasaya dahil sa pagkawatak-watak ng mga tao, kundi ito ay nagsisilbing babala sa atin tungkol sa mga pagkakataong hindi tanggap ng ilan ang mga mensahe ng Panginoon. Kahit pinipilit ng mga mananampalataya sa mga hindi naniniwala na ilagay ang pananampalataya sa Panginoon, marami pa rin ang ayaw makinig at minsan umaabot hanggang sa punto ng pagsasalungat. Sa kabuuan, ang gustong ipunto ng Panginoon na sa panahon ng mga ganitong pagsubok sa buhay, ang hindi matitinag ay ang pagmamhal ng Diyos sa ating lahat. Bagamat tayo’y mga tao lamang na may posibilidad na magkasala, patuloy tayong mamahalin ng Panginoon habambuhay upang tayo’y mas lumapit sa kanya. At ganun rin ang ating ituturing sa mga ibang taong nagsuway sa kanya na sana iakay natin sila sa pamamagitan ng pagmamahal tungo sa Panginoon na siyang dala ang apoy ng liwanag.
Nawa’y maging gabay sa aking buhay sa lahat ng oras ang liwanag at init ng apoy na dala mo dito sa lupa. Patawad Panginoon na may pagkakataon na nakakagawa ako ng mga bagay na di naaayon sa iyong mga ipinag-uutos, salamat Lord sa kabila ng mga ito ay andyan ka at ipinadarama mo pa rin ang Iyong pagmamahal at di mo ako pinababayaan sa aking mga pangangailangan. For all these Lord, I praise you and I thank you. Amen
Maraming salamat po o DIOS sa mensahi mo name nagbigay ng liwanag at Angie’s apoy ng iyong pag-ibig naway pag-alabin mo sa aking buhay upang lubusang mabago at lumakad sa kaliwanagan mula sayo. Ikaw lamang ang pag-asa at gabay.. Ang ningas ng apoy ay simbolo ng paghubog upang dalisayin ang mga pusong nagmatigas sumunod sa kaluoban ng DIOS. soya’y naparitu taglay ang kapangyarihang nagsasaad ng paglaban-laban ngunit ang katutuhanan ay labanan sa kabutihan ang lahat ng masamang layunin ng Diablo sa ating buhay. Binigyan tau ng awareness ng DIOS sa pamamagitan ng babala back ito. Upang hwag mahulog sa impiyerno ang ating kaluluwa. Don wala ng pag-asa sapagkat ang apoy na un ay walang katapusan. Kaya gumising tayo sa katutuhanan at tanggapin at sundin ang kaluoban ng Dios.. Pagsisihan at talikdan ang mga kasalanang nagawa.. Isuko sa Dios at mamuhay na kasama ang panginoong Hesukristo.. Amen
Panginoon Diyos namin, nawa’y patuloy po ninyong pag-alabin ang apoy na pinadala ninyo sa bawat puso ng mga anak mo at patuloy lang kaming lumaban at bumangon sa mga pagsubok na pinagdaraanan namin. Ganun rin para sa aming bansang Pilipinas, patnubayan at gabayan nawa ng iyong banal na Espiritu ang mga namumuno sa aming bansa at kapakanan ng bawat pilipino ang kanilang unahin at hindi ang kanilang pang sariling kapakanan. Ang lahat ng ito ay tinataas ko na po thru the intercession of our Blessed Mother Mary and in mighty Jesus name. Amen. ???