Podcast: Download (Duration: 7:52 — 5.6MB)
Martes ng Ika-20 Linggo sa Karaniwang Panahon (I)
Mga Hukom 6, 11-24a
Salmo 84, 9. 11-12. 13-14
Ang Poo’y nagsasalita
na bayan n’ya’y papayapa.
Mateo 19, 23-30
Subscribe to Awit at Papuri Communications YouTube Channel
Tuesday of the Twentieth Week in Ordinary Time (Green)
UNANG PAGBASA
Mga Hukom 6, 11-24a
Pagbasa mula sa aklat ng mga Hukom
Noong mga araw na iyon, dumating sa Ofra ang anghel ng Panginoon at naupo sa ilalim ng puno ng encina ni Joas na kabilang sa lipi ni Abiezer. Si Gedeon na anak ni Joas ay kasalukuyang gumigiik noon ng trigo sa pisaan ng ubas. Patago ang kanyang paggiik at baka siya makita ng mga Madianita.
Nilapitan siya ng anghel ng Panginoon at sinabi sa kanya, “Sumasaiyo ang Panginoon, matapang na bayani.”
Sumagot si Gedeon, “Bakit ganito ang pamumuhay namin kung sumasaamin ang Panginoon? Bakit wala siyang ginagawang kababalaghan ngayon, tulad noong ialis niya sa Egipto ang aming mga ninuno, ayon na rin sa kuwento nila sa amin? Kami’y pinabayaan na ng Panginoon. Kung hindi ay bakit natitiis niya kaming pahirapan ng mga Madianitang ito?”
Sinabi sa kanya ng Panginoon, “Lumakad ka at gamitin mo ang buong lakas mo sa pagliligtas sa Israel.”
Sumagot si Gedeon, “Paano ko maililigtas ang Israel? Ang aming sambahayan ang pinakamaliit sa lipi ni Manases, at ako naman ang pinakamahina sa amin.”
Sinabi sa kanya Panginoon, “Maililigtas mo ang Israel pagkat tutulungan kita. Lulupigin mo ang mga Madianitang ito na para ka lang pumatay ng isang tao.”
Sumagot si Gedeon, “Kung ako, Panginoon, ay talagang kalugud-lugod sa inyo, bigyan ninyo ako ng palatandaang kayo nga ang nag-uutos sa akin. Huwag muna kayong umalis at hahainan ko kayo ng pagkaing handog.”
“Hihintayin kita,” sagot ng Panginoon.
Lumakad na nga si Gedeon. Nagluto siya ng isang batang kambing at isang takal na harinang walang lebadura. Pagkaluto, inilagay niya ito sa basket at naglagay ng sabaw sa isang palayok. Inihain niya ito sa anghel ng Panginoon sa ilalim ng punong encina. Sinabi sa kanya ng anghel, “Ipatong mo sa malaking batong iyan ang karne at ang tinapay. Pagkatapos, busan mo ng sabaw.” Gayun nga ang ginawa ni Gedeon. Ang pagkain ay sinaling ng anghel sa pamamagitan ng tungkod. Nagkaroon ng apoy at nasunog ang handog. At biglang nawala ang anghel.
Noon naniwala si Gedeon na ang anghel nga ng Panginoon ang nakausap niya. Dahil dito, kinilabutan siya sa takot at nanginginig na nagsalita, “Diyos ko, nakita ko nang mukhaan ang anghel ng Panginoon!”
Ngunit sinabi sa kanya ng Panginoon, “Huwag kang matakot. Hindi ka maaano.”
At si Gedeon ay nagtayo roon ng isang altar na tinawag niyang Ang Panginoon ay Kapayapaan, Panginoon — Salom.
Ang Salita ng Diyos.
SALMONG TUGUNAN
Salmo 84, 9. 11-12. 13-14
Ang Poo’y nagsasalita
na bayan n’ya’y papayapa.
Aking naririnig magmula sa Poon ang sinasalita;
sinasabi niyang ang mga lingkod n’ya’y magiging payapa,
kung mangagsisisi at di na babalik sa gawang masama.
Ang Poo’y nagsasalita
na bayan n’ya’y papayapa.
Ang pagtatapatan at pag-iibiga’y magdadaup-palad,
ang kapayapaan at ang katwira’y magsasamang ganap.
Sa balat ng lupa’y pawang maghahari yaong pagtatapat,
at ang katarungan nama’y maghahari mula sa itaas.
Ang Poo’y nagsasalita
na bayan n’ya’y papayapa.
Gagawing maunlad ng Panginoong Diyos itong ating buhay,
ang mga halaman sa ating lupai’y bubungang mainam;
sa harapan niya yaong maghahari’y pawang katarungan,
magiging payapa’t susunod ang madla sa kanyang daan.
Ang Poo’y nagsasalita
na bayan n’ya’y papayapa.
ALELUYA
2 Corinto 8, 9
Aleluya! Aleluya!
Si Kristo ay naging dukha
upang tayo’y managana
sa bigay n’yang pagpapala.
Aleluya! Aleluya!
MABUTING BALITA
Mateo 19, 23-30
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa kanyang mga alagad, “Sinasabi ko sa inyo: napakahirap mapabilang ang mayayaman sa mga pinaghaharian ng Diyos! At sinasabi ko rin sa inyo: madali pang makaraan ang kamelyo sa butas ng karayom kaysa pasakop sa paghahari ng Diyos ang isang mayaman.” Nagtaka ang mga alagad nang marinig ito, kaya’t naitanong nila. “Kung gayun, sino po ang maliligtas?” Tinitigan sila ni Hesus at sinabi, “Hindi ito magagawa ng tao, ngunit magagawa ng Diyos ang lahat ng bagay.”
At nagsalita si Pedro, “Tingnan po ninyo: iniwan namin ang lahat at kami’y sumunod sa inyo. Ano po naman ang para sa amin?” Sinabi sa kanila ni Hesus, “Tandaan ninyo ito: kapag nakaluklok na ang Anak ng Tao sa kanyang maringal na trono sa bagong daigdig, kayong sumunod sa akin ay luluklok din sa labindalawang trono upang hukuman ang labindalawang lipi ng Israel. At ang sinumang magtiis na iwan ang tahanan, mga kapatid na lalaki at babae, ama, ina, mga anak, o mga lupain alang-alang sa akin ay tatanggap ng makasandaang ibayo, at pagkakalooban ng buhay na walang hanggan. Ngunit maraming una na magiging huli, at maraming huli na magiging una.”
Ang Mabuting Balita ng Panginoon.
Pages: 1 2
« Linggo, Agosto 8, 2021
Huwebes, Agosto 19, 2021 »
{ 5 comments… read them below or add one }
PAGNINILAY: Ang ating Ebanghelyo ngayon ay pagpapatuloy sa ating narinig na pagpapahayag ni Hesus tungkol sa pagiging mayaman na nakita natin sa anyo ng mayamang binata (Ebanghelyo kahapon). Nakita natin kahapon kung paanong nilapitan si Hesus ng binatang ito at tinanong kung ano ang dapat gagawin upang makamit ang buhay na walang hanggan. Tugon sa kanya ni Hesus na kung tinupad ng lalaki ang mga Sampung Utos, ipamigay niya ang kanyang mga ari-arian at sumunod sa Panginoon, kaya’t malungkot na umalis siya. At dahil dito, nagsalita si Hesus na mahirap pumasok ang isang mayayamang tao sa Kaharian ng Langit, ngunit mas madali pang pumasok ang kamelyo sa butas ng karayom. Hindi po literal na makakapasok ang isang malalaking kamelyo sa maliit na butas ng karayom. Ito po ay tungkol sa paghahangad ng tao sa tunay na kaligayahan at kayamanang nakasalalay sa Kaharian ng Langit. Kaya’t ito’y panawagan sa pagsunod sa yapak ng Panginoon tungo sa buhay na walang hanggan. Ngunit ang magiging sakripisyo nito ay ang pagdaraan sa mga pagsubok ng buhay. At patuloy na nagsasalita si Hesus na kung sino man ang nag-iwan sa lupain, tahanan, at pati na mga kapamilya ay magkakamit ng kaligayahan sa kalangitan. Iyon nga ba ang gusto nating gantimpalaan kahit isasakrispiyo natin ang mga mahal natin sa buhay? Makikita natin dito na mahirap sundin ang panawagan ni Hesus, subalit ang nais niyang ipahayag ay ang katatagan ng ating pananampalataya sa kanya at sa Diyos Ama. Hindi naman minasama ni Hesus ang ating mga pamilya at tahanan, subalit ang nais niya ay siya’y unang prioridad sa tawag ng pagsunod sa kanya. Hindi naman kinakailangang ibenta natin ang lahat ng mayroon tayo dahil alam ng Diyos na pinaghirapan natin ang mga ito sa edukasyon at trabaho, subalit dapat manatili tayong simple at mababa ang loob sa kabila ng mga kayamanan natin sa buhay. At matuto din tayong magbahagi ng iilang-ilang ari-arian at pagpapala sa ibang tao, lalung-lalo na ang ating mga buhay sa espirituwal na pangangailangan nila.
Oh. God Almighty Father, give us the will to abide by thy will and follow all your commandments. Let us not dwell on material wealth but rather aim for the heavenly reward that awaits the one that follows you. In Jesus name, Amen.
Salamat sa Diyos!
PAGNINILAY: Ang Unang Pagbasa ay nagsasalaysay sa kwento ng paghuhukom ni Gedeon sa Israel. Alam nating nagkasala muli ang bayang Israel, kaya’t sinalakay sila ng mga Madianita. Ngunit patuloy pa rin ang pagkakalugod ng Diyos sa mga taong matapat katulad ng Gedeon, na itinakda upang iligtas ang Israel mula sa Madian. Subalit nag-alinlangan siya ng kaunti kung paano niyang gagawin iyon dahil sa kanyang mababang katayuan sa Meneses, at itinuturing din na walang kwenta sa kanyang pamilya. Kaya’t inaanyayahan ng Diyos si Gedeon na sumunod sa kanya, at naghanda nga ito ng isang batang kambing na naging laman, at hinalo sa harina. At nilagay niya ang laman sa batong itinuro ng Panginoon sa kanya, at nakita natin kung paanong tinanggap ng Diyos ang alay ni Gedeon nang nasunog ng apoy ang handog na iyon. Ito ang patunay sa lakas ni Gedeon, na makikita natin sa Aklat ng mga Hukom kung paano niyang namunuan ang 300 kawal ng Israel patungo sa tagumpay laban sa napakaraming kawal ng mga Madianita.
Ang ating Ebanghelyo ngayon ay pagpapatuloy sa ating narinig na pagpapahayag ni Hesus tungkol sa pagiging mayaman na nakita natin sa anyo ng mayamang binata (Ebanghelyo kahapon). Nakita natin kahapon kung paanong nilapitan si Hesus ng binatang ito at tinanong kung ano ang dapat gagawin upang makamit ang buhay na walang hanggan. Tugon sa kanya ni Hesus na kung tinupad ng lalaki ang mga Sampung Utos, ipamigay niya ang kanyang mga ari-arian at sumunod sa Panginoon, kaya’t malungkot na umalis siya. At dahil dito, nagsalita si Hesus na mahirap pumasok ang isang mayayamang tao sa Kaharian ng Langit, ngunit mas madali pang pumasok ang kamelyo sa butas ng karayom. Hindi po literal na makakapasok ang isang malalaking kamelyo sa maliit na butas ng karayom. Ito po ay tungkol sa paghahangad ng tao sa tunay na kaligayahan at kayamanang nakasalalay sa Kaharian ng Langit.
Kaya’t ito’y panawagan sa pagsunod sa yapak ng Panginoon tungo sa buhay na walang hanggan. Ngunit ang magiging sakripisyo nito ay ang pagdaraan sa mga pagsubok ng buhay. At patuloy na nagsasalita si Hesus na kung sino man ang nag-iwan sa lupain, tahanan, at pati na mga kapamilya ay magkakamit ng kaligayahan sa kalangitan. Iyon nga ba ang gusto nating gantimpalaan kahit isasakrispiyo natin ang mga mahal natin sa buhay? Makikita natin dito na mahirap sundin ang panawagan ni Hesus, subalit ang nais niyang ipahayag ay ang katatagan ng ating pananampalataya sa kanya at sa Diyos Ama. Hindi naman minasama ni Hesus ang ating mga pamilya at tahanan, subalit ang nais niya ay siya’y unang prioridad sa tawag ng pagsunod sa kanya. Hindi naman kinakailangang ibenta natin ang lahat ng mayroon tayo dahil alam ng Diyos na pinaghirapan natin ang mga ito sa edukasyon at trabaho, subalit dapat manatili tayong simple at mababa ang loob sa kabila ng mga kayamanan natin sa buhay. At matuto din tayong magbahagi ng iilang-ilang ari-arian at pagpapala sa ibang tao, lalung-lalo na ang ating mga buhay sa espirituwal na pangangailangan nila.
Marami ang nauuna na mahuhuli at maraming nahuhuli na mauuna. Mag kapatid, sa buhay natin dito sa lupa marahil nasasabi natin sa ating sarili na bakit hindi pantay pantay ang tao, bakit may mayayaman at ubod ng yaman, may mahihirap at ubod ng hirap. May mga tao pang nakapagsabi na hindi fair amg buhay. Maaaring totoo ito sa paningin mo, pero hindi natin alam kung ang mayayamang ito ay kasingsaya ng mga mahihirap, hindi natin ang alam ang mga pinagdadaanan ng bawat isa, hindi natin alam kung ang mayayamang ito ay may peace of mind o nakakatulog ng mahimbing, hindi rin natin alam kung buo ang kanilang pamilya at hindi nag aaway away. Ang ibig ko lang sabihin ay nasa tao ang pagiging masaya, kung ikaw at hindi mayaman subalit marunong kang magpasalamat at makuntento sa kung anong meron ay daig mo pa ang mayayaman, Kung ay mahirap subalit walang inaapakang tao o hindi nanlalalmang ikaw nakahihigit sa mayaman, kung grateful ka dahil isa ka binigyan ng Diyos ng buhay ay napakapalad mo. Kung sa kabila ng iyong kahirapan ay nakukuha mo pa ding tumulong ay kalulugadan ka ng Diyos at kakaibang kasiyahan ang mararamdaman. Huli ka man sa paningin ng tao ay una ka sa paningin ng Diyos at ang gantimpala mula sa langit ang naghihintay sayo. Kung ikaw nman ay makasalanan ay simulan mo ang pagbabago NGAYON! hindi pa huli ang lahat sa kahit sino sa atin. Magsisi, humingi ng kapatawaran at talikuran ang kasamaan at ang Poong Hesus na ang gagawa ng mga bagay na ikasisiya na hindi mabibili ng salapi.