Podcast: Download (Duration: 7:34 — 5.4MB)
Ika-16 na Linggo sa Karaniwang Panahon (B)
Jeremias 23, 1-6
Salmo 22, 1-3a. 3b-4. 5. 6
Pastol ko’y Panginoong D’yos,
hindi ako magdarahop.
Efeso 2, 13-18
Marcos 6, 30-34
Subscribe to Awit at Papuri Communications YouTube Channel
Sixteenth Sunday in Ordinary Time (Green)
UNANG PAGBASA
Jeremias 23, 1-6
Pagbasa mula sa aklat ni propeta Jeremias
Parurusahan ng Panginoon ang mga namumunong walang malasakit sa kanilang mga nasasakupan at pinababayaang ang mga ito’y mangalat at mamatay. Ito ang sabi ng Panginoon, ang Diyos ng Israel, tungkol sa mga tagapanguna ng kanyang bayan: “Pinapangalat ninyo at pinabayaan ang aking kawan. Hindi ninyo sila binantayan kaya’t kayo’y parurusahan ko dahil sa inyong ginawang ito. Ako na ang magtitipon sa nalabi sa aking mga tupa mula sa lahat ng lupaing pinagtapunan ko sa kanila. Ibabalik ko sila sa kanilang tinubuang lupa, at sila’y muling darami. Hihirang ako ng mga pastol na magmamalasakit at mangangalaga sa kanila. Hindi na sila muli pang daranas ng takot at agam-agam, at wala nang maliligaw kahit isa. Akong Panginoon ang may sabi nito.”
“Nalalapit na ang araw,” sabi ng Panginoon, “na pasisibulin ko mula sa lahi ni David ang isang sangang matuwid, isang hari na buong karunungang maghahari. Paiiralin niya sa buong lupain ang batas at katarungan. Magiging matiwasay ang Juda sa panahon ng kanyang pamamahala, at ang Israel ay mapayapang mamumuhay. Ito ang pangalang itatawag sa kaniya: ‘Ang Panginoon ay Matuwid.’”
Ang Salita ng Diyos.
SALMONG TUGUNAN
Salmo 22, 1-3a. 3b-4. 5. 6
Pastol ko’y Panginoong D’yos,
hindi ako magdarahop.
Panginoo’y aking Pastol, hindi ako magkukulang.
Ako’y pinahihimlay sa mainam na pastulan,
at inaakay niya ako sa tahimik na batisan,
binibigyan niya ako niyong bagong kalakasan.
Pastol ko’y Panginoong D’yos,
hindi ako magdarahop.
At sang-ayon sa pangako na kaniyang binitiwan
sa matuwid na landasi’y doon ako inaakay.
Kahit na ang daang iyo’y tumatahak sa karimlan,
hindi ako matatakot pagkat ika’y kaagapay;
ang tungkod mo at pamalo ang gabay ko at sanggalang.
Pastol ko’y Panginoong D’yos, hindi ako magdarahop.
Sa harapan ng lingkod mo, ikaw ay may handang dulang,
ito’y iyong ginagawang nakikita ng kaaway;
nalulugod ka sa akin na ulo ko ay langisan
at pati na ang kalis ko ay iyong pinaaapaw.
Pastol ko’y Panginoong D’yos,
hindi ako magdarahop.
Tunay na ang pag-ibig mo at ang iyong kabutihan,
sasaaki’t tataglayin habang ako’y nabubuhay;
doon ako sa templo lalagi at mananahan.
Pastol ko’y Panginoong D’yos,
hindi ako magdarahop.
IKALAWANG PAGBASA
Efeso 2, 13-18
Pagbasa mula sa sulat ni Apostol San Pablo sa mga taga-Efeso
Mga kapatid, ngayon, dahil sa inyong pakikipag-isa kay Kristo Hesus, kayong dating nasa malayo ay nailapit sa pamamagitan ng kanyang kamatayan. Pinagkasundo niya tayo. Kaming mga Judio at kayong mga Hentil ay kanyang pinag-isa. Sa pamamagitan ng kanyang katawan, pinawi niya ang alitan na parang pader na naghihiwalay sa atin. Pinawalang bisa niya ang Kautusang pawang mga utos at tuntunin upang pag-isahin sa kanya ang dalawang bayan at maghari ang kapayapaan. Sa pamamagitan ng kanyang kamatayan sa krus, winakasan niya ang alitan ng dalawang bayan, kapwa pinapanumbalik sa Diyos at pinagbuklod sa iisang katawan. Naparito si Kristo at ipinangaral sa lahat ang Mabuting Balita ng kapayapaan — sa inyong mga Hentil na malayo sa Diyos, at sa mga Judio na malapit sa kanya. Dahil kay Kristo, tayo’y kapwa makalalapit sa Ama sa pamamagitan ng Espiritu.
Ang Salita ng Diyos.
ALELUYA
Juan 10, 27
Aleluya! Aleluya!
Ang tinig ko’y pakikinggan
ng kabilang sa ‘king kawan,
ako’y kanilang susundan.
Aleluya! Aleluya!
MABUTING BALITA
Marcos 6, 30-34
Ang Mabuting Balita ng Panginoon ayon kay San Marcos
Noong panahong iyon, bumalik kay Hesus ang mga apostol at iniulat ang lahat ng kanilang naisagawa at naituro. Napakaraming taong dumarating at umaalis, anupat hindi na makuhang kumain ni Hesus at ng kanyang mga alagad. Kaya’t sinabi niya sa mga ito, “Magtungo kayo sa isang ilang na pook upang malayo sa karamihan at makapagpahinga kayo nang kaunti.” Umalis silang lulan ng bangka, at nagpunta nga sa isang ilang na dako.
Ngunit maraming nakakita sa kanilang pag-alis at nakilala sila. Kaya’t mula sa lahat ng bayan, ang mga tao’y patakbong tumungo sa dakong pupuntahan nina Hesus at nauna pang dumating doon kaysa kanila. Paglunsad ni Hesus, nakita niya ang napakaraming tao; nahabag siya sa kanila sapagkat para silang mga tupang walang pastol. At sila’y tinuruan niya ng maraming bagay.
Ang Mabuting Balita ng Panginoon.
Pages: 1 2
« Linggo, Hulyo 14, 2024
Miyerkules, Hulyo 24, 2024 »
{ 5 comments… read them below or add one }
PAGNINILAY: Sa bawat misyon ng bawat Kristiyano, may kakayahang tugunan ng isang tao ang tawag ng Panginoon upang ipahayag ang Mabuting Balita tungkol sa Paghahari ng Diyos.
Ang ating Ebanghelyo ay nagsisilbing paalala kung paano tayo magiging matapat sa ating misyon. Pagkatapos nilang tuparin ang misyon ng pagpapakilala sa tao tungkol sa Paghahari ng Diyos (ang Ebanghelyo noong nakaraang Linggo), nakabalik ang 12 Apostol kay Hesus at ibinalita ang kanilang mga ginawa sa mga nayon at bayan ng Israel. Pagkatapos ay inutusan sila ni Hesus na magpahinga at pumunta sa isang ilang. Kaya’t namasdan sila ng napakaraming tao sa bangkang papunta sa lugar na iyan, at sinundan nila si Hesus at ang 12 Apostol. Makikita natin dito yung maawaing pagtingin ng Panginoon sa napakaraming tao na tila para silang mga tupa na walang pastol. At sila’y kanyang tinuruan at gumawa rin ng mga kababalaghan.
Ang mahalagang pagtuunan ng pansin ay ang tungkulin ng isang taong may misyon. Binabala ni Propetang Jeremias sa Unang Pagbasa ang mga bulaan at tiwaling pastol na sa labas ay nakikiakit, ngunit sa loob ay nagpapaligaw sa mga tupa ng Panginoon. Ganito ang paglalarawan sa mga iilang hari at prinsipe ng Israel at Juda na naghuhudyat ng pagkakasala ng mga tao ng mga bansang iyon. At sa ating kasalukuyang konteksto, may mga itinuring mga pastol na hindi inaalagaan ang mga kawang kanilang ipinamamahala. Kaya tayo’y tinawag ng Diyos na bilang kanyang kawan na nakikinig sa tinig ng kanyang Anak, tayo’y maging mga pastol upang tugunan ang mga pisikal at espirituwal na pangangailangan ng mga tao.
At ayon kay San Pablo sa Ikalawang Pagbasa, tayo’y maging mga saksi para sa kapayapaang ipinapagkaloob sa atin ng Panginoon: ang kapayapaang pinagkasundo ni Kristo dahil sa kanyang Pagkamatay sa Krus at Muling Pagkabuhay. At katulad ni Hesus, nawa’y mahabag tayo at magmalasakit na ipahayag ang Mabuting Balita tungkol sa Paghahari ng Diyos na dulot ay pagmamahal, kagalakan, at kapayapaan.
Sa huli, huwag nating kalimutan ang “ilang” na kung saan pahalagahan natin ang buhay-panalangin upang idulog natin sa Panginoon na sa kabila ng lahat na nangyayari at mangyayari, matutupad pa rin natin ang kanyang dakilang kalooban.
Ang mabuting Pastol, paano natin tutularan si Hesus sa pangkasalukuyang panahon? Umpisahan mo ito sa loob ng iyong tahanan, maging mabuting halimbawa tayo sa asawa at sa mga anak, pasanin natin ang krus sa mga darating na problema at pagsubok, Sa labas ng ating tahanan ay ang mga kapwa natin na nangangailangan ng tulong, maglingkod tayo katulad ng mabuting pastol. Sinabi sa unang pagbasa na ang pangalawang itatawag natin sa Diyos at “Panginoon na matuwid. Sikapin nating matularan si Hesus sa pgihing matuwid. Ang daan ay two way, kailangan lamang nating maimilli kung dadaan tayo sa baluktot na daan na puro kasarapan sa buhay subalit puro pagsisis ang ating mararamdaman dahil sa parusang matatano galing sa langit. O ang matuwid na daan na masikip at maraming kapighatian pero pagdating sa dulo ay puro katarungan, kapayapaan, pag ibig, at wagas na kaligayahan.
PAGNINILAY:
Kung sa nakaraang Linggo ay sinugo ng Panginoong Hesus ang labindalawa sa pagmimisyon na ipalaganap ang Mabuting Balita ng Kaligtasan, pagpapalayas ng mga inaalihan ng demonyo, at pagpapagaling sa mga may sakit, sa Linggong ito ay ang pagbabalik ng mga sinugo upang mag-ulat sa nangyari tungkol sa kanilang pagmimisyon partikyular na ang pangangaral sa Salita ng paghahari ng Diyos. Dahilan sa kapangyarihan ng kanilang mga itinuro dumami ang naging tagasunod ni Hesus na halos hindi na sila makakain o makapagpahinga kaya nagsalita ang Panginoon na pumunta sa ilang na pook pero mas nauna pa ang mga tao sa lugar na kanilang pupuntahan. Ang tagpo ay nagdala ng awa’t habag kay Hesus na naihambing Niya ang mga tao sa mga tupang walang nagpapastol.
Sa unang Pagbasa sa aklat ni propeta Jeremias sila ang mga taong pinabayaan ng mga namumunong walang malasakit sa mamayan na hinayaang magsikalat at walang masulingan kaya nagalit ang Diyos at babawiin sa mga hari ang natirirang mamayan at muli Niya ito pararamihi’t aarugain. Dito makikita ang pagkakaiba ng mga bayarang pastol dahil kulang sila sa malasakit at hinahayaang nila mailigaw ang mga tupang pinapastol nila. Ang Panginoon Hesukristo ay ang mabuting pastol na ang bawat tupa ay mahalaga na kahit isa ma’y mawala ay kanyang hahanapin at hindi Niyang pahihintulutang mawalay sa kanya. Sinasabi dito na kung ang buhay ng tao ay nasa Panginoong Hesus makakamit ang payapang buhay at magkakaroon ng kasaganahan at iiral ang katarungan. Na sinasabi naman sa Salmo, “Pastol ko’y ang Panginoong Diyos, hindi ako magdarahop”.
Sa piling ni Kristo Hesus ay pagkakasunduin Niya ang lahat ng tao mabuti man o masama walang itatangi katulad ng sinabi ni San Pablo sa komunidad ng Efeso. Napakahalaga na makipag-kaisa at makipagkasundo sa Panginoong Hesukristo habang may panahon pa. Sa ating mga buhay isa sa atas sa atin na hanapin ang mga nawawala sa pamamagitan ng pagpapahayag ng mga Salita ng Kaligtasan sa ating kapwa lalo na yung mga nawawala, mga walang nagaaruga, at ang mga nawawalan na ng pagasa. Tayo din ay hinirang na mga pastol at magiging makabuluhan lamang ang mga buhay natin sa mundong ito kung sa araw araw nating paglalakbay marami tayong madadala sa kaharian ng Diyos na ipinangako Niya sa mga sumusunod sa kanyang mga panukala.
Totoo nga naman ang salitang MALASAKIT. Nasasaktan ka na ngunit patuloy kang nagbibigay, nasasaktan ka na ngunit patuloy na tumutulong, at kahit masakit patuloy na umiibig.
Ipinapakita sa atin ng ebanghelyo sa linggong ito kung paanong si Hesus ay nagmalasakit sa mga dukha at nangangailangan. Siya’y nahabag sa kanila sapagkat sila’y parang mga tupang walang pastol. Pagod na si Hesus at ang mga alagad sa dami ng mga taong dumadagsa upang makinig sa kanyang mga aral, upang magpagaling ng mga maysakit, at upang makita ang mga himalang ginagawa niya.
Sa ating panahon, marami ring Hesus na may malasakit sa kanyang kapwa sa kabila ng pagod na kanilang nararamdaman. Pagod na ang tatay pag-uwi sa bahay galing sa trabaho subalit kailangan pa rin niyang magpakatatay sa kanyang mga anak. Pagod na ang nanay sa trabaho o marahil sa mga gawaing-bahay, subalit kailangan pa rin niyang magpakananay sa kanyang pamilya. Pagod na ang isang kaibigan dahil sa kanyang mga problema sa buhay subalit handa pa rin siyang makinig sa mga kaibigang nangangailangan ng kausap at kasama. Pagod na ang pari sa kanyang mga misa, subalit kailangan pa rin niyang makiisa sa lumbay ng mga namatayan, sa kagalakan ng mga ikinakasal at binibinyagan, at dumamay sa mga nangangailangan.
Minsan o kadalasan pagod na tayo, subalit mas pinipili nating magmalasakit para sa kapakanan ng ating kapwa. Minsan o kadalasan mas pinipili nating unahin ang ibang tao kaysa pansarili nating kapahingahan. Minsan kahit masakit, patuloy pa rin tayong nakikinig, patuloy pa rin tayong nakikisama, patuloy pa rin tayong nagmamahal, at patuloy pa rin nating pinipili na manatili. At ang mga bagay na ito ang tinatawag nating MALASAKIT.
Inaanyayahan tayo ng Panginoong Hesus na magkaroon tayo ng malasakit sa kabila ng mga balakid, sakit at pagod na ating nararanasan sa buhay. Sa panahong ito kinakailangang magmalasakit tayo sa dangal ng pamilya, at magmalasakit tayo para sa ating bansa. Ipanalangin nating tayo’y magkaroon ng pagmamalasakit tulad ng malasakit ni Kristo sa kanyang simbahan.
Piliin nawa nating maging tulad ni Hesus. Pagod ngunit may malasakit, Masakit ngunit may nagmamalasakit, masakit ngunit patuloy na umiibig, yan ang tunay na MALASAKIT!
-Pagninilay sa ika-16 na Linggo sa Karaniwang Panahon. Taon B (Marcos 6, 30-34)
PAGNINILAY
Gaano kadalas nabibigo ang bawat isa sa atin sa aspeto ng pagpapastol? Tayo na nasa anumang uri ng pamumuno: mga magulang, tagapagturo, amo, pinuno, atbp. ay natutukso na gamitin ang ating mga posisyon para sa ating sariling kapakanan. Ipinadala sa atin ng ating mapagmahal na Ama si Hesus upang tayo ay Kanyang mapangalagaan, gabayan, pakainin, pangalagaan, at mahalin. Naranasan nating lahat yaong mapagmahal na presensya sa ating buhay. Ang hamon na ipinapataw nito sa atin ay: tayo ay tinawag, kailangang abutin, ibahagi ang ating natanggap at isulong ang misyon ng ating Mabuting Pastol sa pamamagitan ng mahabaging pagpapastol sa mga inilagay ng Diyos sa ating buhay.? Nawa’y patuloy nating maranasan ang mapagmahal na pangangalaga ng Mabuting Pastol at nawa ang Banal na Espiritu ay mahikayat tayo na ibahagi ang mapagmahal na pag-aaruga sa mga taong ipinagkatiwala ng Diyos sa ating pangangalaga.
Panginoong Hesus, tulungan Mo kaming maging sensitibo sa mga pangangailangan ng mga pinaglilingkuran namin. Amen.
***