Podcast: Download (Duration: 8:37 — 6.1MB)
Martes sa Ika-4 na Linggo
ng Apatnapung Araw na Paghahanda
Ezekiel 47, 1-9. 12
Salmo 45, 2-3. 5-6. 8-9
D’yos na makapangyariha’y
kapiling nating kanlungan.
Juan 5, 1-16
Subscribe to Awit at Papuri Communications YouTube Channel
Tuesday of the Fourth Week of Lent (Violet)
UNANG PAGBASA
Ezekiel 47, 1-9. 12
Pagbasa mula sa aklat ni propeta Ezekiel
Bumalik kami sa pintuan ng templo. Sa ilalim nito’y may agos ng tubig papunta sa silangan. Ang templo’y paharap sa silangan. Ito’y nagmumula sa gawing timog na bahagi ng templo, sa gawing timog ng altar. Lumabas kami sa pintuan sa gawing hilaga at iniligid niya ako papalabas sa pintuan sa gawing silangan. Doon ay may mahinang agos ng tubig mula sa gawing timog ng hagdanan.
Nagtuloy kami sa gawing silangan; may hawak siyang panukat. Sumukat siya ng limandaang metro. Pagkatapos, lumusong kami sa tubig na hanggang bukung-bukong. Sumukat uli siya ng limandaang metro at nang lumusong kami sa tubig, ito’y hanggang baywang. Sumukat uli siya ng limandaang metro ngunit yaon ay isa nang ilog at hindi na ako makalusong. Malalim ang tubig at kailangang languyin upang matawid. Sinabi niya sa akin, “Tao, tandaan mo ang lugar na ito.”
Naglakad kami sa pampang ng nasabing ilog. Nang ako’y pabalik na, nakita ko ang makapal na puno sa magkabilang pampang ng ilog. Sinabi niya sa akin, “Ang tubig na ito ay papunta sa dakong silangan, hanggang Dagat na Patay. Pag-abot nito sa Dagat na Patay, malilinis ang tubig nito. Lahat ng lugar na maagusan nito ay magkakaroon ng lahat ng uri ng hayop at isda. Pagdating ng agos na ito sa Dagat na Patay, magiging tabang ang tubig ng dagat. Lahat ng lugar na abutin nito ay magkakaroon ng buhay. Sa magkabilang pampang ng ilog ay tutubo ang sari-saring punongkahoy na makakain ang bunga. Hindi malalanta ang mga dahon nito ni mawawalan ng bunga pagkat ang didilig dito ay ang tubig na umaagos mula sa templo; ito ay patuloy na mamumunga sa buong taon. Ang bunga nito ay pagkain, at gamot naman ang mga dahon.”
Ang Salita ng Diyos.
SALMONG TUGUNAN
Salmo 45, 2-3. 5-6. 8-9
D’yos na makapangyariha’y
kapiling nating kanlungan.
Ang Diyos ang lakas natin at kanlungan,
at handang saklolo kung may kaguluhan;
di dapat matakot, mundo’y mayanig man,
kahit na sa dagat ang bundok mabuwal.
D’yos na makapangyariha’y
kapiling nating kanlungan.
May ilog ng galak sa bayan ng Diyos,
sa banal na templo’y ligaya ang dulot.
Ang tahanang-lungsod ay di masisira;
ito ang tahanan ng Diyos na Dakila,
mula sa umaga ay kanyang alaga.
D’yos na makapangyariha’y
kapiling nating kanlungan.
Nasa atin ang Diyos Makapangyarihan,
ang Diyos ni Jacob na ating kanlungan.
Anuman ang kanyang ginawa sa lupa,
sapat nang pagmasdan at ika’y hahanga!
D’yos na makapangyariha’y
kapiling nating kanlungan.
AWIT-PAMBUNGAD SA MABUTING BALITA
Salmo 50, 12a. 14a
D’yos ko, sa aki’y igawad
loobing tunay na tapat;
puso ko’y gawin mong wagas
nang manauli ang galak
bunga ng ‘yong pagliligtas.
MABUTING BALITA
Juan 5, 1-16
Ang Mabuting Balita ng Panginoon ayon kay San Juan
Nang dumating ang pagdiriwang ng pista ng mga Judio, pumunta si Hesus sa Jerusalem. Sa lungsod na ito, malapit sa Pintuan ng mga Tupa, ay may malaking deposito ng tubig na may limang portiko. Kung tawagin ito sa wikang Hebreo ay Betesda. Natitipon dito ang maraming maysakit —— mga bulag, mga pilay, at mga paralitiko. Hinihintay nilang gumalaw ang tubig, sapagkat may panahong bumababa ang isang anghel ng Panginoon at kinakalawkaw ang tubig. Ang maunang lumusong pagkatapos makalawkaw ang tubig ay gumagaling, anuman ang kanyang karamdaman. Doo’y may isang lalaking tatlumpu’t walong taon nang may sakit, at siya’y nakita ni Hesus. Alam nitong matagal nang may sakit ang lalaki. Tinanong siya ni Hesus, “Ibig mo bang gumaling?” Sumagot ang maysakit, “Ginoo, wala pong maglusong sa akin kapag nakalawkaw na ang tubig; patungo pa lamang ako roon ay may nauuna na sa akin.” Sinabi sa kanya ni Hesus, “Tumindig ka, dalhin mo ang iyong higaan, at lumakad ka.” At pagdaka’y gumaling ang lalaki, dinala ang kanyang higaan, at lumakad.
Noo’y Araw ng Pamamahinga. Kaya’t sinabi ng mga Judio sa lalaking pinagaling, “Araw ng Pamamahinga ngayon! Labag sa Kautusan na dalhin mo ang iyong higaan.” Ngunit sumagot siya, “Ang nagpagaling sa akin ang nagsabing dalhin ko ang aking higaan at lumakad ako.” At siya’y tinanong nila, “Sino ang nagsabi sa iyo na dalhin mo ang iyong higaan at lumakad ka?” Ngunit hindi nakilala ng lalaki kung sino ang nagpagaling sa kanya, sapagkat nawala na si Hesus sa karamihan ng tao.
Pagkatapos, nakita ni Hesus sa loob ng templo ang lalaki at sinabihan, “Magaling ka na ngayon! Huwag ka nang magkakasala at baka may mangyari sa iyo na lalo pang masama.” Umalis ang lalaki at sinabi sa mga Judio na si Hesus ang nagpagaling sa kanya. Dahil dito, si Hesus ay sinimulang usigin ng mga Judio sapagkat nagpagaling siya sa Araw ng Pamamahinga.
Ang Mabuting Balita ng Panginoon.
Pages: 1 2
« Lunes, March 11, 2024
Miyerkules, Marso 13, 2024 »
{ 8 comments… read them below or add one }
PAGNINILAY: Ang Kuwaresma ay panahon ng paggunita sa kagandahang-loob ng Diyos sa ating buhay.
Ang Unang Pagbasa ay isang pangitain ni Propeta Ezekiel tungkol sa tubig na dumadaloy mula sa kanang tagilid ng templo, at ito ay tanda na dadaloy ang tubig sa iba’t ibang dako, lalung-lalo ang mga naninirahan sa patay. Kaya ang mga punongkahoy at mga puno ay tutubo nang masagana. Ang propesiya nito ay simbolo ng buhay na ipinagkaloob ng Diyos sa pamamagitan ng kanyang Anak, ang ating Panginoong Hesukristo.
Isinalaysay ni San Juan na matapos itagubilin ni Kristo ang kanyang buhay sa Krus, isinaksak ng isang sundalo ang sibat nito sa kanyang kanang tagiliran, na kung saan dumaloy ang tubig at dugo. Kaya itong pangyayari ay tanda na ang Simbahang ating kinabibilangan ay patuloy na inaalala ang buhay na ipinagkaloob sa atin ng Diyos sa pamamagitan ng ating pagtupad ng mga pangako ng binyag at ang ating pakikiisa sa Banal na Eukaristiya.
Ang Ebanghelyo ngayon ay isang kababalaghan ni Hesus sa Betesda, na kung saan mayroon isang deposito ng tubig na napapaligiran ng 5 portico. Ang mga tao ay nagpapalubog dahil nais nilang gumaling. Naroon sa tabing iyon ang isang pilay na lalaking hindi makalakad sa loob ng 38 taon. Kaya siya’y pinaggaling ni Hesus kahit matagal nang wala siyang tagaakbay papunta ng deposito. Subalit nangyari ang kababalaghang iyon sa Araw ng Pamamahinga, na kung saan ito ay itinuturing na trabahong hindi ipinapahintulot ng Kautusan. At hindi rin ipinapahintulot ang pagkabuhat ng higaan, kaya napansin ito ng mga eskriba at Pariseo sa lalaki. Tugon naman ng lalaki na siya’y pinag-utusan ng isang ginoo, ngunit hindi pa niya natunghayan si Hesus. Kaya nang matagpo niya si Hesus na nagppaalala sa kanya na huwag magkasala, ibinalita ng lalaki sa mga pinuno ng Hudyo na si Hesus ang nagpagaling sa kanya.
Ipinapakita dito na ang kagandahang-loob ng Diyos ay patuloy na umaapaw at patuloy na magaganap sa kabila ng mga nakasanayang pamumuhay at tradisyon. Kahit maraming restriksyon sa buhay, kailangan manaig pa rin ang paggawa ng kabutihan sa kapwa dahil ito ang pagpapamalas ng pag-ibig ng Panginoon na para sa lahat.
Ngayong Kuwaresma, nawa’y sikapin natin maging mga tapagpagdala ng kabutihan sa iba’t ibang taong ating nakakatagpo araw-araw.
“Magaling ka na ngayon! Huwag ka nang magkakasala at baka may mangyari sa iyo na lalo pang masama.
Ang mga katagang ito ni Hesus ang dapat nating pakatandaan sa ating Mabuting Balita ngayon.
Ang Kwaresma ay ang pagsisi sa ating mga kasalanan, paghingi ng kapatawaran at ang pagbabalik loob natin sa Diyos sa pamamagitan na pagsisikap na matalikuran na ang mga gawang baluktot at hindi naaayos sa kalooban bg Diyos.
Kapag tayo tinanggap na muli ni Hesus ay huwag na tayong babalik sa dati nating gawa na kalapastangan sa mga kautusan ng Diyos. Sapagkat mas malala pa ang mamgyayari sa atin. Masarap ang magkaroon ng relasyon sa Diyos, tahimik na pamumuhay, tunay na kaligayahan, kapayapaan ng isip at walang pangamba sapagkat alam nating kakampi natin ang Diyos at hinding hindi nya tayo pababayaan anuman ang dumating na hamon sa ating buhay.
Samatalahin natin magbago sa banal na panahong ito ng Kwaresma at sikaping wag nang bumalik sa kadiliman
PAGNINILAY
Higit pa sa pagbabago ng puso ang kailangan para makapagbago. Kailangan ng isang gawa ng pananampalataya upang magbago, at isang pagnanais na magbago para sa kabutihan. Ang tanong ni Hesus ay itinatanong pa rin Niya hanggang ngayon. Nais ba nating gumaling? Tanging si Hesus lamang ang makaaabot sa atin at makapagpapagaling sa atin mula sa itim na butas kung saan tayo ay nakalubog. Siya lamang ang makakagawa nito, at sa ating pahintulot lamang. Maaari tayong maligtas at ito ay magsisimula kapag hinayaan natin ang Diyos na pumasok sa ating buhay at pahintulutan Siya na itaas tayo. Nawa’y naisin natin na maging maayos, magbago, naising tunay na maging mas mahusay. Nawa’y maging handa tayong gumawa ng mga kinakailangang hakbang upang mabago ang ating buhay.
Panginoong Hesus, patawarin Mo kami sa lahat ng aming mga kasalanan. Pagalingin Mo kami sa lahat ng bagay na nagpapahina sa amin at hindi makalakad sa Iyong biyaya. Amen.
***
PAGNINILAY SA MABUTING BALITA ni Jess C. Gregorio:
Ang aba, mahina, at walang kakayahan ay malimit nahuhuli sa lahat ng labanan ng buhay. Mapa sistema man o mga pangyayari parating talo kasi walang kapangyarihan. Gustuhin man ay hindi maka ungos at maka galaw para baguhin ang kanyang buhay. Lalong lalo na kung nakaratay sa banig ng karamdaman. At dahil sa kahirapan at pabigat sa pamilya at lipunan, hinayaan na lang sa kanyang kapalaran. Ang Diyos ay hindi lamang nakatingin at nakikinig, pinupuntahan niya tayo kung saan nakalugmok at nakahandusay. Sa kawalan ng pag asa Siya ay tumutugon sa mga nais natin at panalangin. Wala na siyang hihilingin na pagdausdos at pangunguna sa tubig para gumaling ang sakit natin. Sa ating kawalan at kahirapan, hindi na siya hihingi pa ng kabayaran at kapalit. Hindi katulad ng mga Hudyo na ang lahat ng mabuti at banal ay may kaakibat na pagsunod, sinasabing kailangan tupdin para Diyos ay makalapit, pinabigat ang pamantayan, parang deposito ng tubig sa betesda na dapat languyin. At kung walang kakayahan, maghintay na lang ng kamatayan? May mahalagang aral ang Mabuting Balita sa araw na ito. Ang kabutihan ng Diyos ay wala ng ibang kailangan. Hindi na tayo obligado maghanap ng kayamanan o lakas na kailangan, libre ang grasyang ibinibigay sa lahat ng tao, libre rin kahit ang pagpapagaling ni Kristo, ang siste lang ang mundo ay pilit itong pinabibigat, Salita ng Diyos ay may kapalit bago marinig. Kung lalapit si Kristo sa atin, kanya lang sasabihin, “Rise, pick up your mat and walk!” Simple lang. Wala ng ibang kailangan. Dapat lang natin itanong sa ating mga sarili, ang libreng grasyang ibinigay sa atin ay libre rin ba nating ipinamamahagi? O di kaya lahat ay may katumbas na pagsunod at pahirap sa lahat ng nangangailangang, madinig, makita, makilala si Hesus sa pamamagitan natin? Kung may mga gagawin pa na pahirap o pagsunod na ipinag uutos, para na rin tayong deposito ng Betesda, kailangan may tumalon at mag swimming pa. Eh hindi na nga kaya. Buti na lang ang Tubig ng Buhay ang siyang lumalapit sa hindi makalapit. Pinupuno mga maling akala ng mga Hudyong nakapaligid. Sino tayo? Si Hesukristo ba na lumalapit para kapwa ay mapagaling o Hudyo na ang bawat kabutihang nagawa ay may kaakibat na pagsunod sa mga batas at alituntunin?
PAGNINILAY: Magandang Tanghali po, sa inyong lahat!
Higit pa sa pagbabago ng puso ang kailangan para makapagbago. Kailangan ng isang gawa ng pananampalataya upang magbago, at isang pagnanais na magbago para sa kabutihan. Ang tanong ni Hesus ay itinatanong pa rin Niya hanggang ngayon. Nais ba nating gumaling? Tanging si Hesus lamang ang makaaabot sa atin at makapagpapagaling sa atin mula sa itim na butas kung saan tayo ay nakalubog. Siya lamang ang makakagawa nito, at sa ating pahintulot lamang. Maaari tayong maligtas at ito ay magsisimula kapag hinayaan natin ang Diyos na pumasok sa ating buhay at pahintulutan Siya na itaas tayo. Nawa’y naisin natin na maging maayos, magbago, naising tunay na maging mas mahusay. Nawa’y maging handa tayong gumawa ng mga kinakailangang hakbang upang mabago ang ating buhay.
PANALANGIN: Panginoong Hesus, patawarin Mo kami sa lahat ng aming mga kasalanan. Pagalingin Mo kami sa lahat ng bagay na nagpapahina sa amin at hindi makalakad sa Iyong biyaya. Amen.
***
Sa gospel po natin ngayon ipinakilala ang lumpo na matagal nang may sakit at nag aabang lamang ng himala sa isang malaking deposito ng tubig na tinawag na Betesda. Subalit wala siyang kakayahang makatayo at makatubog sa tubig sapagkat nauunahan na sya ng iba rin may sakit.
Nang makita siya ni Hesus, tinanong siya kung gusto niyang gumaling, kung kaya naman sinabi niya ang kanyang suliranin kay Hesus.
Kung titingnan natin hindi po ba’t parang suntok sa buwan ang pananatili ng lumpo sa Betesda? Dahil maraming may sakit ang nagaabang doon na gustong magpagaling.
Subalit matiyaga pa rin siyang nag aabang at nagbabakasakali ngunit WALANG maglusong sa kanya sa tubig.
Nang marinig ito ni Hesus: “Tumindig ka, dalhin mo ang iyong higaan, at lumakad ka.”
Batid naman po ni Hesus ang kalagayan ng lumpo at alam din niyang matagal na itong may sakit. Pero tinanong niya ito:
“Ibig mo bang gumaling?”
Madalas po, marami tayong gusto makamit at gustong mangyari sa buhay natin. Marami po tayong hinihiling sa Panginoon pero hindi natin matanggap o hindi natin ito makamtam sa tinagal-tagal ng ating paghiling. Kaya ang tanong ni Hesus “Gusto mo ba…?”
Ito po ay may mas malalim na kahulugan. Hindi lang ito ng basta “gusto” subalit ang mas malalim na salita sa ingles ay “desire” pagnanasa o pagnanais na makamtan ang bagay na ito.
“Tumindig ka, dalhin mo ang iyong higaan, at lumakad ka.”
Ito po ang sagot o response ni Hesus. Tumindig ka! Hindi Niya ito pinuhat at tinilungan tumayo bagkus binigyan niya ito ng direksyon o instruction para makamit niya ang kanyang ninanais, ang makatayo at makalakad.
Sa buhay po natin minsan naghihintay tayo ng sign, naghihintay tayo ng kongkretong tugon sa mga dinadalangin natin. At madalas nadidismaya po tayo dahil tila hindi na hahabag ang Diyos sa atin at sa suliranin na ating matagal nang pinapasan. Pero tayo ay nabibingi o kaya naman ay nagbibingi-bingihan sa sinasabi ni Hesus sa atin.
“Tumindig ka, dalhin mo ang iyong higaan, at lumakad ka.”
Bago pa man natin hilingin sa Diyos ang ating isinasamo ay alam na Niya ito. At sa pauli-ulit natin pagsamo ay paulit-ulit din niyang tinatanong sa atin “Gusto mo ba?” at baka nga “Gusto mo ba talaga?!”. Kasi kung gusto mo “Tumindig ka! Take action!” Sapagkat hindi po isusubo ng Panginoon ang mga hinihiling natin na sa isang iglap ay lalabas sa harap natin ang ating hinihiling.
Kung ito po ay itinaas na natin sa Kanya at hiniling na sa Kanya, Congrats! Dahil nalampasan mo na ang unang hakbang. Ang tanong ay ang pagpapatuloy! Bago pa natin ito hilingin ay tinanggap na natin ito sa pananalangin. Kung kaya’t ang susunod ay “paano?”. Kapag sinimulan natin ang unang kongkretong aksyon para maging ganap ito.
At kapag nasimulan na natin ay maniwal at manampalataya tayo na tayo ay Kanyang gagabayan sa pagsumpong sa ating ninanais.
Makikita rin naman po dito ang pananampalataya ng lumpo at ang kanyang pagnanais na makalakad. Nang marinig niyang sinabi ito ni Hesus ay agad siyang tumalima! Hindi na siya nagdahilan pa na hindi niya kaya, na matagal na siyang lumpo at di makalakad , atbp. Bagkus ay tumayo siya agad at buong pagtitiwala na sumunod sa utos Hesus.
Pero kapag po hindi natin magawa ang pagtindig at paglakad ay patuloy po tayong magiging lumpo sa kahihintay ng mga signs at ng instant himala.
At sa huling punto po. Ang awa at habag po ng Panginoon ay walang pinipiling oras. Ginawa Niya ito nang araw ng Pamamahinga. Na sa kanilang tradisyon ay bawal ang ginawa ni Hesus na magpagaling ng may sakit. Subalit mas nangibabaw ang habag ng Diyos sa isang taong mataggal nang pinahirapan ng kanyang karamdaman.
Ang awa at habag po ng Panginoon ay walang hanggan. Manalig po tayo sa Kanya, matutong makinig sa Kanyang direksyon at tumugon dito…Agad! Wala na pong pero pero, kundi buong pagtitiwala na gawin ang Kanyang ipinagagawa sa atin, maging ang mga impossible ay magiging possible kung si Hesus ang kasama natin sa ating paglalakbay.
ANG MABUTING BALITA NG PANGINOON
ayon kay San Juan 5, 1-16
PAGNINILAY
Pagnilayan natin ang mensahe ng ebanghelyo tungkol sa ating pagkaunawa sa araw ng Sabbath.
Sa Lumang Tipan ang araw ng Sabbath ay dapat mahigpit na sundin at isagawa ang nakasulat sa batas. Binibigyang-diin ang disiplina
at sa pag-uugali ng sangkatauhan.
Sa panahon ni ng Bagong Tipan, panahon ni Hesu-Kristo,
kahit sa Araw ng Pamamahinga dapat pa rin tayong magpakita
ng malalim na habag sa kapwa na siyang tunay na diwa
ng Pagmamahal ng Diyos.
Balikan natin ang mismong halimbawa ng ating Panginoong Hesu-Kristo.
Alalahanin natin ang ika-2 sa pinakadakilang utos ng Diyos…
“Mahalin ang ating kapwa gaya ng pagmamahal natin sa ating sarili.”
Maraming beses na tayo’y nagkakaproblema, dinadagukan ng mga challenges sa buhay, sa trabaho, career, sa pera, sa relationships, sa pisikal na pangangatawan… ngunit saan o kanino ba tayo kumakapit? Sa nepotism sa trabaho para matanggap? Sa pandaraya sa business para mawala ang tax? O sa karelasyon na morally wrong naman? Maraming beses na sa ating mga problema ay natutuklasan natin kung kanino o saan ba talaga tayo kumakapit. Sana ay hindi sa daan ng pagkakasala.
Sa ating Ebanghelyo, iniasa ng isang lalaking paralisado ang kanyang paggaling sa pool sa Betesda. Kahit kaharap na niya si Hesus at tinanong siya nito kung nais niyang gumaling, ay yung paraan na alam niya ang itinuro niyang paggaling kay Hesus—sa pool daw. Ayos lang kase hindi pa niya kilala si Hesus noon. Ngunit, nang siya’y inutusan ni Hesus na tumindig at lumakad, ginawa nga niya ito at tuluyan na siyang nakalakad. Faith is doing what the Lord says—in spite ng ating kahinaan, in spite of the setbacks of our lives.
Kung meron tayong gustong marating, kung may kahilingan tayo sa Panginoon, maniwala tayo sa paraang itinuturo ni Hesus at sundin ito. Bakit? Kase Siya ang katotohanan. Siya ang may hawak ng ating buhay. Siya ang nakakaalam ng best para sa atin. At Siya ang nakakaalam ng ikakapahamak natin.
Paano natin malalaman ang sinasabi ng Panginoon? Maging intune tayo with the Holy Spirit. Magsimba magbasa ng Bibliya. Manalangin. At pagkatapos ay sumunod—dito maraming nagfail. Alam lahat ng scripture, nagfail sa application. Alam na makapangyarihan si Hesus, pero nagfail na sundin ang Kanyang kalooban at pinagpatuloy pa rin ang masamang gawa. Hindi tuloy nakamtan ang hinihiling na pagpapala sa Panginoon. Yung iba naman pinanghihinaan ng loob. Ngunit lahat ng ating heroes of faith, they obeyed despite the impossibilities. Why? Because of faith. Natalo ni David si Goliath kase nagtitiwala siya sa Panginoon. Nahati ang Red Sea kase sumunod si Moses sa utos ng Diyos. Ang pananampalataya kay Kristo ay lumawig dahil sa faith ng mga unang Kristiyano kay Kristo. At si Kristo ay inialay ang buhay, namatay sa Krus at muling nabuhay dahil sa pagsunod sa Diyos Ama.
Ang sabi ng Diyos sa Revelation, “To those who conquer, I will give them the crown of life.” Nawa, sa ating mga pinagdadaanan, suriin natin kung kaninong boses tayo nakikinig, at nawa ay maging attune tayo sa boses ng Espiritu Santo. Nawa ay dagdagan ng Diyos ang ating pananampalataya nang ating makamtam hindi lang ang ating mga kahilingan kundi pati na rin ang crown of life na sinasabi ng ating Panginoon. Amen.