Podcast: Download (Duration: 3:30 — 1.3MB)
PANALANGIN NG BAYAN
Ika-31 Linggo sa Karaniwang Panahon
Lunes
Manalangin tayo sa ating Ama sa Langit upang maging pagpapahayag ng malalim at tunay na pag-ibig ang kagandahang-loob at pagiging bukas ng ating puso para sa kapwa.
Panginoon, dinggin mo ang aming panalangin.
o kaya
Ama ng mga dukha, umunlad nawa kami sa iyong pamamaraan.
Ang Simbahan nawa’y maging higit na mulat sa materyal na pangangailangan ng mga dukha at mga napapabayaang mga tao at mabigyan din sila ng espiritwal na pangangalaga, manalangin tayo sa Panginoon.
Ang mga lingkod bayan nawa’y maging madaling lapitan ng lahat ng isaisip nila ang kabutihan ng kanilang nasasakupan, manalangin tayo sa Panginoon.
Ang mga taong may problema sa buhay nawa’y makatagpo ng kapwa na handang tumanggap at tunay na makikinig sa kanila, manalangin tayo sa Panginoon.
Yaong mga nagtalaga ng kanilang sarili sa pangangalaga ng mga maysakit, may kapansanan, at mga dukha nawa’y magkaroon ng tunay na diwa ng pag-ibig at paglilingkod, manalangin tayo sa Panginoon.
Ang mga yumao nawa’y tanggapin sa Kaharian ng Diyos, manalangin tayo sa Panginoon.
Panginoong Diyos, ibinibigay mo sa amin ang lahat ng mabuti. Tulungan mo kaming maibahagi ito sa iba lalo na sa mga nangangailangan ng aming kalinga at atensyon. Hinihiling namin ito sa pamamagitan ni Kristong aming Panginoon. Amen.
Pages: 1 2
« Linggo, Oktubre 30, 2022
Martes, Nobyembre 1, 2022 »
{ 4 comments… read them below or add one }
Ikinalulugod ng Diyos na ating mas bigyan ng pansin ang mga mahihirap dahil sila ang mas nangangailangan, wala man silang kakayahang magbayad ay Diyos naman ang kikilos para ibalik ang mas higit na biyaya sa taong tumutulong. Madalas ang tao ay tumutulong sa iba pag alam niyang may makukuha siyang kapalit o kabayaran sa anumang naitulong, ngunit hindi ganito ang gusto ng Diyos. God bless us all.
Pagninilay: Ipinapaalala ni Hesus sa atin ang tamang disposyon ng ating buhay bilang mga anak ng Diyos Ama. Sabi nga ni Hesus sa parabula na kapag tayo’y magkakaroon ng handaan, ating anyayahin hindi ang mga kaibigan, katropa, kabarkada, kundi ang mga mahihirap at nangangailangan lalung-lalo ang mga nasa laylayan ng ating lipunan. At sabi sa huling linya ng Ebanghelyo na mayroon tayong gantimpalang matatanggap sa langit dahil sa ating katapatan. Siguro mahirap itong gawin sapagkat bihira lang makita ang mga taong nag-iimbita ng mga ordinaryong tao sa kanilang handaan. Noong bumisita si Papa Francisco sa Pilipinas, nakikain siya sa mga nakaligtas sa pananalasa ng Super Bagyo na si Yolanda at ang lindol sa Bohol. Kahit kaunti ang kanyang oras doon dahil sa badya ng panahon, siya’y taos-pusong nakikinig sa mga mensahe ng mga taong nagkukwento sa kanya. Ang pinakapunto lamang ni Hesus ay ang ating kababang-loob at buong pagtanggap sa ibang tao sa bawat aspeto ng ating buhay. Ang kaligtasan ng Diyos ay inilaan para sa lahat upang sila’y patuloy na lumakad sa daan ng kabutihan. Kaya ito yung galak na nasa puso ni San Pablo sa Unang Pagbasa na ating ibahagi ang kagalakang iyon sa ibang tao sa paggawa ng tama at mabuti lalung-lalo sa ating kapwa. At tuwing dumadalo tayo sa Banal na Eukaristiya tayo ay pinapabusog ng Salita ng Diyos at ng Katawan ni Kristo upang pagkatapos ng bawat Misa ay tayo ay maghahayo upang mahalin at paglingkuran ang Diyos at ang ating kapwa. Nawa isapuso natin ang pagkakaroon ng kababang-loob na palaging bukas sa pagtanggap sa ibang taong ninanais na maranas ang pagmamahal ng Panginoon sa bawat isa.
Panginoon, nawa’y maisapuso ko ang pagkakaroon ng kababang-loob na palaging bukas sa pagtanggap sa ibang taong ninanais na maranas ang iyong pagmamahal sa bawat isa. Maibahagi ko ang kagalakang sa ibang tao sa paggawa ng tama at mabuti, maging intrumento ako ng pag-kakaisa at pagmamahalan ng awat tao upang samasama kaming tumahak sa daan ng kabutihan.
Amen.