Podcast: Download (Duration: 7:17 — 7.1MB)
Ika-7 Araw ng Pagdiriwang sa Pasko ng Pagsilang
o kaya Paggunita kay San Silvestre I, papa
1 Juan 2, 18-21
Salmo 95, 1-2. 11-12. 13
Magalak ang kalangitan
at daigdig ay magdiwang.
Juan 1, 1-18
Subscribe to Awit at Papuri Communications YouTube Channel
The Seventh Day in the Octave of Christmas (White)
or Optional of St. Sylvester I, Pope (White)
UNANG PAGBASA
1 Juan 2, 18-21
Pagbasa mula sa unang sulat ni Apostol San Juan
Mga anak, malapit na ang wakas! Tulad ng narinig ninyo, darating ang anti-Kristo. Ngayon nga’y marami nang lumitaw na mga anti-Kristo, kaya’t alam natin na malapit na ang wakas. Bagamat sila’y dating kasamahan natin, hindi natin tunay na kaisa ang mga taong iyon. Sapagkat kung sila’y tunay na atin, nanatili sana silang kasama natin. Ngunit umalis sila, kaya’t maliwanag na silang lahat ay di tunay na atin.
Ngunit ipinagkaloob sa inyo ang Espiritu, at dahil dito, kayong lahat ay may pagkaunawa. Sumusulat ako sa inyo, hindi dahil sa di ninyo alam ang katotohanan. Alam ninyo ito, at alam din ninyo na walang kasinungalingang nagmumula sa katotohanan.
Ang Salita ng Diyos.
SALMONG TUGUNAN
Salmo 95, 1-2. 11-12. 13
Magalak ang kalangitan
at daigdig ay magdiwang.
Purihin ang Panginoon, awitan ng bagong awit;
Panginoo’y papurihan nitong lahat sa daigdig!
Awitan ang Panginoon, ngalan niya ay purihin;
araw-araw ang ginawang pagliligtas ay banggitin.
Magalak ang kalangitan
at daigdig ay magdiwang.
Lupa’t langit ay magsaya, umugong ang kalaliman,
lahat kayo na nilikhang nasa tubig ay magdiwang.
Ang bukirin at ang lahat ng naroon ay sumigaw,
pati mga punongkahoy sa galak ay mag-awitan.
Magalak ang kalangitan
at daigdig ay magdiwang.
Panginoo’y pupurihin, pagkat siya ay daratal,
paparito sa daigdig, upang lahat ay hatulan.
Tapat siya kung humatol at lahat ay pantay-pantay.
Magalak ang kalangitan
at daigdig ay magdiwang.
ALELUYA
Juan 1, 14a. 12a
Aleluya! Aleluya!
Naging anak ng D’yos tayo
sa Salitang naging tao
na nanirahan sa mundo.
Aleluya! Aleluya!
MABUTING BALITA
Juan 1, 1-18
Ang simula ng Mabuting Balita ng Panginoon ayon kay San Juan
Sa pasimula pa’y naroon na ang Salita. Kasama ng Diyos ang Salita at ang Salita ay Diyos. Kasama na siya ng Diyos sa pasimula pa. Sa pamamagitan niya nilikha ang lahat ng bagay, at walang anumang nalikha nang hindi sa pamamagitan niya. Mula sa kanya ang buhay, at ang buhay ay siyang ilaw ng sangkatauhan. Nagliliwanag sa kadiliman ang ilaw, at hindi ito kailanman nagapi ng kadiliman.
Sinugo ng Diyos ang isang tao na nagngangalang Juan. Naparito siya upang magpatotoo tungkol sa ilaw at manalig sa ilaw ang lahat dahil sa patotoo niya. Hindi siya ang ilaw kundi naparito siya upang magpatotoo tungkol sa ilaw. Ang tunay na ilaw na tumatanglaw sa lahat ng tao ay dumarating sa sanlibutan.
Nasa sanlibutan ang Salita. Nilikha ang sanlibutan sa pamamagitan niya ngunit hindi siya nakilala ng sanlibutan. Naparito siya sa kanyang bayan ngunit hindi siya tinanggap ng kanyang mga kababayan. Ngunit ang lahat ng tumanggap at nanalig sa kanya ay pinagkalooban niya ng karapatang maging anak ng Diyos. Sila nga’y naging anak ng Diyos, hindi dahil sa isinilang sila ayon sa kalikasan, ni sa pita ng laman o sa kagagawan ng tao. Ang pagiging anak nila ay buhat sa Diyos.
Naging tao ang Salita at siya’y nanirahan sa piling natin. Nakita namin ang kanyang kapangyarihan at kadakilaan, puspos ng pag-ibig at katapatan. Tinanggap niya mula sa Ama ang kapangyarihan at kadakilaang ito bilang bugtong na Anak.
Nagpatotoo si Juan tungkol sa kanya. At ganito ang kanyang sigaw, “Siya ang tinutukoy ko nang aking sabihin, ‘Ang darating na kasunod ko’y higit sa akin, sapagkat siya’y siya na bago pa ako ipanganak.’”
Dahil sa siya’y puspos ng pag-ibig, tayong lahat ay tumanggap mula sa kanya ng abut-abot na kaloob. Sapagkat ibinibigay ang Kautusan sa pamamagitan ni Moises ngunit ang pag-ibig at ang katotohanan ay dumating sa pamamagitan ni Hesukristo. Kailanma’y walang nakakita sa Diyos, subalit ipinakilala siya ng bugtong na Anak – siya’y Diyos – na lubos na minamahal ng Ama.
Ang Mabuting Balita ng Panginoon.
Pages: 1 2
« Martes, Disyembre 30, 2025
Huwebes, Enero 1, 2026 »
{ 7 comments… read them below or add one }
Kamusta ka? Tapos na naman ang taon, ano ang nagawa mo? Ano ang mga hindi mo nagawa? Kapaki pakinabang ba ang iyong taon? Makabuluhan ba ang 2021 mo?
Ngayong huling ng taon ay magmuni muni tayo, huminto sandali at suriin ang ating mga sarili. Tayo ba ay may natulungang tao? Napatawad ko na ba ang aking kapatid at mga kaaway? Amg mga inatupag ko ba ay makabuluhan o pag-aaksaya lamang ng oras. Minahal ko ba ang aking kapwa at lalo na ang Diyos?
O puro pagdaramot ang ginawa ko sa aking kapwa, o inubos ko ang aking panahon sa pakikipag tsismisan, paninirang puri, paggawa ng kwento ng kasinungalingan , ginugol ko ang taon sa katakawan sa pita ng laman, pakiki-apid, pangangalunya at pagnanasa sa hindi ko pag aari.
Kung sa palagay mo ay hindi ka naging kalugod lugod sa Diyos sa mga pinag gagawa mo ngayong taon ay magsisi ka, ihingi mo ng kapatawaran ang buong taong kapalaluan, at umpisahan ang darating na taon ng may pagbabago, bagong taon at bagong pag asa na makapagsimula ulit tayo na sumusunod sa kalooban ng Diyos. At huwag kalimutang magpasalamat sa lahat ng biyayang natanggap ng taong ito.
PAGNINILAY: Tayong lahat ay nasa Ikapitong Araw ng Oktaba ng Pasko ng Pagsilang, at ito rin ay ang huling araw ng taong 2022. Habang binabalikan natin ang mga alaala nitong taong ito, tayo rin ay naghihintay sa pagsapit ng bagong taon sa ating kalendaryong sibil (2023).
At sa pagbabalik-tanaw ng mga pangyayari nitong 2022, ang Ebanghelyo ngayon na ating binasa noong Araw ng Kapaskuhan (Disyembre 25) ay siyang nagpapaalala sa atin na ang simula ng mga bagay ay palaging nakaukol sa Panginoong Diyos. Sa katunayan, ang pokus ni San Juan sa kanyang pagsasalaysay ay upang ipahayag si Hesukristo bilang totoong Tao at totoong Diyos. Kaya nga ipinakita dito na si Hesus ay ang Salita ng Diyos na nabuhay pa bago nilalang ng Ama ang mundo. At sa kaganapan ng panahon ay nagkatawang-tao ang Salitang ito at nakipamuhay sa atin.
Kaya nga si Hesus ay piniling maging katulad ng tao nang walang pagkakasala upang iakay ang ating abang katauhan na nabulok ng kasalanan sa pangako ng kaluwalhatian sa langit kapiling ang ating Diyos Ama. Kaya nga ang buhay at halimbawa ni Kristo sa mga Ebanghelyo ay isang balik-tanaw, lalung-lalo ngayong Panahon ng Pasko ng Pagsilang ang kanyang Pagkatawang-tao bilang pagpapakumbaba at pagiging masunurin sa plano ng Diyos.
At ipinapaalala rin sa atin ni San Juan sa Unang Pagbasa na sa pagtatapos ng taon ay mag-ingat po tayo sa mga lumalabas na “Kristo raw”, pero sa totoo ay sila ay anti-Kristo. Hindi po dapat tayo malinglang sa mga nagsasabing mabuti ang kanilang paglalakad, pero ang patakaran ay mapagligaw ng iba sa maling landas. Kaya hilingin natin sa Panginoon ngayong pagsapit ng Bagong Taon na patuloy tayong lumakad sa daan ng kaliwanagan sa paggawa ng katuwiran at kabutihan.
Sa ating unang pagbasa wakas ang tinalakay ata sa ating Ebanghelyo naman ay ang pagsisimula. Magandang bigyang pansin natin ito na sinasabi sa tin ngayon ng Diyos na sa tuwing may natatapos palaging may bagong paparating. Inaalis ng Diyos ang mga luma at pinapalitan ng bago, ngayon ay huling araw ng taon at bukas bagong taon na. Sa ating mga pagbasa nais ng Diyos ipagbigay alam sa atin na sa tuwing may natatapos mayroon siyang bagong ibibigay sa atin. Ngayong taon ay Hubileyo ng Pag-asa nais ng Diyos na bigyan tayo ng bagong pag-asa at umasa tayo sa kaniyang kapangyarihan at mga pamamaraan. Baka may mga kahilingan pa tayo na hindi pa dinidinig ngayon ng Diyos, baka nawawalan na tayo ng pag-asa kung sasagutin ba niya ang mga ito. Pero ang ating tandaan na ang Diyos ang magbibigay sa atin ng pag-asa at lakas para harapin ang ating buhay, kasama natin siya sa paglalakbay na ito, umasa tayo na gagawa ang Diyos para solusyonan at bigyang kasagutan ang lahat ng nangyayari sa ating buhay at bigyang kasagutan angn ating mga panalangin at kahilingan. AMEN
wala po bang second reading?
PAGNINILAY:
“Sa simula pa’y naroon na ang Salita. Ang Salita ay kasama ng Diyos, at ang Salita ay Diyos.” Ang simula ng Ebanghelyo ni San Juan ay isang malalim na paanyaya sa atin upang pagnilayan ang misteryo ng Pagkatawang-tao ng Diyos. Ang Salita na naging tao ay si Hesus, ang Liwanag ng sanlibutan. Pinapaalala nito sa atin na ang Diyos ay hindi malayo o malabo; sa halip, Siya ay nagkatawang-tao upang makiisa sa ating kalagayan bilang tao.
Si Hesus ay dumating sa mundo upang magbigay-liwanag sa mga nasa kadiliman. Ang Kanyang presensya ay nagbibigay ng pag-asa at buhay sa mga nawawala at naliligaw. Sa kabila ng ating mga kasalanan at kahinaan, pinili Niyang makiisa sa atin upang ipakita ang Kanyang dakilang pagmamahal upang maligtas tayo sa kamatayan dulot ng kasalanan. Ang pagiging tao ni Hesus ay ang sagot ng Diyos sa ating pangangailangan para sa kaligtasan. Ipinakikita nito na ang Diyos ay handang magpakumbaba upang makiisa sa ating buhay, upang maipadama ang Kanyang pagmamahal at awa.
Sa ating mundo na puno ng hamon at pagsubok, ang pagsilang ni Hesus ay ang Liwanag na gumagabay sa atin. Sa bawat pagkakataong tayo ay nakadarama ng kawalan ng pag-asa, pinapaalala Niya na ang Kanyang liwanag ay hindi kailanman magagapi ng kadiliman. Sa pamamagitan ng ating pananampalataya at mabubuting gawa, tayo ay nagiging mga saksi ng liwanag na ito sa ating kapwa.
Bagamat ang Salita ay dumating sa Kanyang bayan, marami ang hindi tumanggap sa Kanya. Ito ay paalala na ang tunay na pananampalataya ay nangangailangan ng ating ganap na ugnayan at personal na pagtanggap kay Hesus bilang Panginoon at Tagapagligtas. Ang tumatanggap sa Kanya ay nagiging anak ng Diyos at nagkakamit ng bagong buhay. 24hrs nalang bagong taon na akma ang okasyong ito para harapin ang panibagong simula ng buhay na kasama si Kristo sa pamamagitan ng paglimot at pagtalikod sa mga bagay na nagiging hadlang sa magandang pakikipag-ugnayan natin sa Diyos.
Sa panghuli, ang Ebanghelyo ay paanyaya na makita si Hesus bilang Emmanuel, ang Diyos na sumasa-atin. Ang Kanyang pagiging tao ay paalala na ang ating buhay bilang tao ay mahalaga sa Diyos sapagkat Siya ay lagi nating kapiling. Gawin nating layunin ang makipag-ugnayan sa Kanya, ipamuhay ang Kanyang aral, at maging bahagi ng Kanyang kaluwalhatian.
“Sa Kanyang pagiging tao, tinawag tayong maging liwanag sa mundo, tapat na anak ng Diyos, at kabahagi ng Kanyang walang hanggang buhay.”
Manalangin tayo. Panginoong Hesus, Salita ng Diyos na nagkatawang-tao, salamat sa Iyong pagdating upang bigyang-liwanag ang aming buhay. Tulungan Mo kaming tanggapin Ka nang buong puso at maging liwanag din para sa iba. Gabayan Mo kami sa landas ng kabanalan at pagkakaisa sa Iyo. Amen.
salamat at marami akong natutunan sa mga nai share nila kaya malaking bagay s bawat pagninilay
“Everything will be okay in the end. If it’s not okay, it’s not the end.” ? John Lennon.
*5 Things to let go
**Let go of the old for something new.
**Let go of the pain that God healed from you.
**Let go of the things that are not working, useless and broken.
peace outside is a peaceful heart.
**Let go of toxic people
what you consumes, consumes you.
**Let go of anger and grudges in our life.
New heart is a new life.
If you do not let go you will never grow.
Hold on to God’s grace so that we will to finish the race.
God is not done writing our story, the beautiful story
God helps who helps themselves.
Nawa’y ang pagbabasbas na tinanggap natin ay maging pagbabasbas at regalo din sa ating kapwa.
Baguhin ng Diyos ang ating loob na maging instrumento at daan ng pagbabago ng mundo.
Salamat Panginoon, kami ay nagpupuri at nagpapasalamat na kami ay nakrating sa pagtatapos ng 2025.
At sa 2026 na padating patuloy nyo po kaming tulungan at basbasan.
Thank you 2025 & Blessed 2026.
Amen
God is good sobra sobra
Sobra sobra God is good
Thank you, Lord.
#GvWednesday
Blessed 2026 for us.