Podcast: Download (Duration: 5:29 — 5.4MB)
Dakilang Kapistahan ng Pasko ng Pagsilang ng Panginoon
(Pagmimisa sa Bukang-liwayway)
Isaias 62, 11-12
Salmo 96, 1 at 6. 11-12
Sumilang ang Panginoon,
liwanag sa atin ngayon.
Tito 3, 4-7
Lucas 2, 15-20
Subscribe to Awit at Papuri Communications YouTube Channel
The Nativity of the Lord (Christmas)
Mass at Dawn (White)
UNANG PAGBASA
Isaias 62, 11-12
Pagbasa mula sa aklat ni propeta Isaias
Sa buong daigdig, ipinasabi ng Panginoon:
“Ibalita sa mga taga-Jerusalem,
na darating ang Panginoon para sila ay iligtas.
Kasama niya ang lahat ng kanyang iniligtas.”
Ika’y tatawaging “Bayang Banal ng Diyos,”
‘Bayang iniligtas ng Panginoon.’
Ang Jerusalem ay tatawaging
“Lungsod na mahal ng Diyos,”
“Lungsod na Hindi Itinakwil ng Diyos.”
Ang Salita ng Diyos.
SALMONG TUGUNAN
Salmo 96, 1 at 6. 11-12
Sumilang ang Panginoon,
liwanag sa atin ngayon.
Ang Poon ay maghahari, magalak ang kalupaan!
Lahat kayong mga pulo ay magsaya at magdiwang!
Sa langit ay nahahayag yaong kanyang katuwiran,
sa lupa ay makikita ang kanyang kadakilaan.
Sumilang ang Panginoon,
liwanag sa atin ngayon.
Sa tapat ang pamumuhay ay sisinag ang liwayway,
sa dalisay namang puso maghahari’y kagalakan.
Ang matuwid ang gawain ay galak ang masusumpong,
sa maraming kabutihang ginawa ng Panginoon;
ang ginawa niyang ito’y dapat nating gunitain,
at sa Poon ay iukol ang papuring walang maliw!
Sumilang ang Panginoon,
liwanag sa atin ngayon.
IKALAWANG PAGBASA
Tito 3, 4-7
Pagbasa mula sa sulat ni Apostol San Pablo kay Tito
Pinakamamahal kong kapatid:
Noong mahayag ang kagandahang-loob at pag-ibig ng Diyos na ating Tagapagligtas, tayo’y iniligtas niya. Natamo natin ito hindi dahil sa ating mabubuting gawa, kundi dahil sa kanyang habag sa atin. Naligtas tayo at ipinanganak na muli sa Espiritu Santo na siyang luminis at nagbigay ng bagong buhay sa atin. Sa pamamagitan ng ating Tagapagligtas na si Hesukristo, ibinubuhos sa atin ng Diyos ang Espiritu Santo upang tayo’y pabanalin ng kanyang pag-ibig at kamtan natin ang buhay na ating inaasahan.
Ang Salita ng Diyos.
ALELUYA
Lucas 2, 14
Aleluya! Aleluya!
Purihin sa kalangitan
D’yos na kataas-taasan,
sa ati’y kapayapaan!
Aleluya! Aleluya!
MABUTING BALITA
Lucas 2, 15-20
Ang Mabuting Balita ng Panginoon ayon kay San Lucas
Noong makaalis na ang mga anghel, pabalik sa langit, ang mga pastol ay nag-usap-usap, “Tayo na sa Betlehem! Tingnan natin itong ibinalita sa atin ng Panginoon.” At nagmamadali silang lumakad, at nakita nila sina Maria at Jose, at ang sanggol na nakahiga sa sabsaban. Kaya’t isinaysay nila ang mga sinabi ng anghel tungkol sa sanggol na ito; at nagtaka ang lahat ng nakarinig sa sinabi ng mga pastol. Natanim sa isip ni Maria ang mga bagay na ito at kanyang pinagbulay-bulay. Umalis ang mga pastol na nagpupuri sa Diyos at nagpapahayag ng kanyang kadakilaan dahil sa lahat ng narinig nila at nakita na ayon sa ibinalita sa kanila ng anghel.
Ang Mabuting Balita ng Panginoon.
Pages: 1 2
« Huwebes, Disyembre 25, 2025
Huwebes, Disyembre 25, 2025 »
{ 1 comment… read it below or add one }
PAGNINILAY:
Ayon sa Ebanghelyo ni San Lucas (Lucas 2:8-14), habang ang mga pastol ay nagbabantay ng kanilang mga tupa sa parang, isang anghel ng Panginoon ang nagpakita sa kanila. Sinabi ng anghel: “Huwag kayong matakot! Ako’y may dalang magandang balita para sa inyo na magdudulot ng malaking kagalakan sa lahat ng tao. Isinilang ngayon sa bayan ni David ang inyong Tagapagligtas, ang Mesiyas, ang Panginoon. Ito ang inyong palatandaan: matatagpuan ninyo ang isang sanggol na nababalot ng lampin at nakahiga sa isang sabsaban.”
Pagkatapos, sumama ang isang napakaraming hukbo ng mga anghel na nagpuri sa Diyos, na nagsasabi: “Papuri sa Diyos sa kaitaasan, at sa lupa’y kapayapaan sa mga taong kinalulugdan niya!”
Dahil sa balitang ito, nagmadali ang mga pastol na pumunta sa Betlehem upang makita si Hesus, ang Mesiyas. Ang pagsilang ni Hesus ay isang pangyayari na nagbigay ng kagalakan sa buong sanlibutan, at ito’y unang ipinahayag sa mga taong itinuturing na mababa—ang mga pastol. Ang kwento ng mga pastol ay nagpapakita ng tugon ng tunay na pananampalataya: pagdalo, pagkilala, at pagbabahagi. Una, ang pagkilos ng mga pastol ay nagpapakita ng pananampalatayang hindi natutulog-ito ay buhay na buhay. Agad nilang nilisan ang kanilang mga gawain upang makita ang ipinangakong Mesiyas. Nang makita nila si Hesus, ibinahagi nila ang kanilang karanasan. Ang kanilang patotoo ay naging kasangkapan upang ang iba ay mapuno ng pagkamangha.
Binibigyan pansin sa Ebanghelyo si Maria na “iningatan sa kanyang puso ang lahat ng bagay.” Siya’y isang huwaran ng isang malalim ng pagninilay at pagpapasalamat sa kamangha-manghang biyaya natanggap. Sa gitna ng kasiyahan at misteryo ng kapanganakan ni Hesus, siya’y tumahimik at pinagbulay-bulayan ang mga nangyayari. Ito’y isang paalala na sa kabila ng ating pinagkakaabalahan sa ating mga buhay, kailangang maglaan tayo ng oras para manalangin, magnilay at magpasalamat sa mga biyayang natanggap natin mula sa Diyos.
Ang mga pastol, sa kanilang pagbabalik, ay punong-puno ng papuri sa Diyos. Ang kanilang kwento ay nagpapaalala sa atin na sa tuwing tayo nakikipag-isa sa Banal na Misa kung saan nakikipagtagpo tayo sa Panginoon inaasahan sa atin ang tunay na kahalagahan ng nating pagdalo, pasasalamat at pananampalataya, itong lahat ay nagbubunga ng masayang pagsamba sa Diyos. Ang bawat pagdalo natin ay biyaya na nagdudulot ng isa pang pagkakataong upang magpasalamat at magpuri sa Panginoon.
Binhi ng Pananampalataya:
Ang tanong, tayo ba’y gaya ng mga pastol na handang tumugon sa panawagan ng Diyos? Marunong ba tayong magpasalamat at magbahagi ng ating mga karanasan ng pananampalataya sa iba?
Manalangin tayo. Aming Panginoon, salamat sa iyong walang hanggang pag-ibig na ipinakita mo sa pamamagitan ng iyong Anak na si Hesus. Tulungan mo kaming magkaroon ng pusong mapagpasalamat tulad ng mga pastol, at tulad ni Maria, turuan mo kaming magnilay sa mga biyaya ng iyong pagmamahal. Nawa’y sa aming buhay, maipakita namin ang kagalakan at pananampalatayang nagmumula sa iyo. Sa Pasko ng Iyong Pagsilang nawa’y maisilang ka namin sa aming mga puso. Amen.