Podcast: Download (Duration: 6:42 — 4.8MB)
Biyernes sa Unang Linggo ng Apatnapung Araw na Paghahanda
Ezekiel 18, 21-28
Salmo 129, 1-2. 3-4ab. 4k-6. 7-8
Hiling nami’y ‘yong limutin
tanang kasalanan namin.
Mateo 5, 20-26
Subscribe to Awit at Papuri Communications YouTube Channel
Friday of the First Week of Lent (Violet)
UNANG PAGBASA
Ezekiel 18, 21-28
Pagbasa mula sa aklat ni propeta Ezekiel
Sinasabi ng Panginoon: “Kung ang isang taong masama ay tumalikod sa kanyang kasamaan, sumunod sa aking mga tuntunin, at gumawa ng mabuti, siya ay mabubuhay. Kakalimutan na ang lahat ng nagawa niyang kasalanan at mabubuhay siya dahil sa kabutihang ginawa niya sa bandang huli. Hindi ko ikasisiya ang kamatayan ng masama,” sabi pa ng Panginoon. “Ang ibig ko nga, siya’y magsisi at magbagong buhay. Ngunit kung ang isang taong matuwid ay magpakasama at gumawa ng mga kasuklam-suklam na gawain, hindi siya mabubuhay. Mamamatay siya dahil sa kanyang pagtataksil at sa kasalanang nagawa. Mawawalan ng kabuluhan ang lahat ng kabutihang ginawa niya noong una.
“Marahil ay sasabihin ninyong hindi tama itong ginagawa ko. Makinig kayo, mga Israelita: Matuwid ang aking tuntunin, ang pamantayan ninyo ang baluktot. Kapag ang isang taong matuwid ay nagpakasama, mamamatay siya dahil sa kasamaang ginawa niya. At ang masamang nagpakabuti at gumawa ng mga bagay na matuwid ay mabubuhay. Dahil sa pagtalikod sa nagawa niyang kasamaan noong una, mabubuhay siya, hindi mamamatay.”
Ang Salita ng Diyos.
SALMONG TUGUNAN
Salmo 129, 1-2. 3-4ab. 4k-6. 7-8
Hiling nami’y ‘yong limutin
tanang kasalanan namin.
Sa gitna ng paghihirap, tinawag ko’y Panginoon,
Panginoon, ako’y dinggin pagkat ako’y tumataghoy,
dinggin mo ang pagtawag ko’t paghingi ng iyong tulong.
Hiling nami’y ‘yong limutin
tanang kasalanan namin.
Kung ikaw ay may talaan nitong aming kasalanan,
lahat kami ay tatanggap ng hatol mong nakalaan.
Ngunit iyong pinatawad, kasalanan ay nilimot,
pinatawad mo nga kami upang sa ‘yo ay matakot.
Hiling nami’y ‘yong limutin
tanang kasalanan namin.
Sabik akong naghihintay sa tulong mo, Panginoon,
pagkat ako’y may tiwala sa pangako mong pagtulong.
Yaring aking pananabik, Panginoon, ay higit pa,
sa serenong naghihintay ng pagsapit ng umaga.
Hiling nami’y ‘yong limutin
tanang kasalanan namin.
Magtiwala ka, Israel, magtiwala sa iyong Diyos,
matatag at di kukupas ang pag-ibig niyang dulot,
lagi siyang nahahandang sa sinuman ay tumubos.
Ililigtas ang Israel, yaong kanyang mga hirang,
ililigtas niya sila sa kanilang kasalanan.
Hiling nami’y ‘yong limutin
tanang kasalanan namin.
AWIT-PAMBUNGAD SA MABUTING BALITA
Ezekiel 18, 31
Sinabi ng Poong mahal:
“Kasamaan ay layuan,
kasalana’y pagsisihan;
kayo ay magbagong-buhay,
magbalik-loob na tunay.”
MABUTING BALITA
Mateo 5, 20-26
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa kanyang mga alagad, “Sinasabi ko sa inyo: kung ang pagsunod ninyo sa kalooban ng Diyos ay tulad lamang ng pagsunod ng mga eskriba at mga Pariseo, hindi kayo makapapasok sa kaharian ng Diyos.”
“Narinig ninyo na noong una’y iniutos sa mga tao, ‘Huwag kang papatay; ang sinumang makamatay ay mananagot sa hukuman.’ Ngunit ngayo’y sinasabi ko sa inyo: ang mapoot sa kanyang kapatid ay mananagot sa hukuman; ang humamak sa kanyang kapatid ay mananagot sa Sanedrin, at sinumang magsabi sa kanyang kapatid ‘Ulol ka!’ ay mapapasaapoy ng impiyerno. Kaya’t kung naghahandog ka sa Diyos, at maalaala mo na may sama ng loob sa iyo ang kapatid mo, iwan mo muna ang iyong handog sa harap ng dambana at makipagkasundo ka sa kanya. Saka ka magbalik at maghandog sa Diyos.
“Kung may magsakdal laban sa iyo sa hukuman, makipag-ayos ka sa kanya habang may panahon, bago ka niya iharap sa hukom. At kung hindi’y ibibigay ka niya sa hukom, na magbibigay naman sa iyo ng tanod, at ikaw ay mabibilanggo. Sinasabi ko sa iyo: hindi ka makalalabas doon hangga’t hindi mo nababayaran ang kahuli-hulihang kusing.”
Ang Mabuting Balita ng Panginoon.
Pages: 1 2
« Huwebes, Marso 13, 2025
Sabado, Marso 15, 2025 »
{ 3 comments… read them below or add one }
PAGNINILAY: Ang Kuwaresma ay panahon ng ating pakikipag-isa sa pag-ibig ng Diyos, upang ipadama rin natin ito sa ibang tao. Ang Ebanghelyo ngayon ay tungkol sa turo ni Hesus ukol sa pag-ibig. Binaggit ng Panginoon ang sanay na batas na kung tawagin ay ‘lex tallionis’. Sa madaling salita, ito yung tanyag na kasabihan na: “Mata sa mata, at ngipin sa ngipin.” Ito’y nagmula sa kodigo na binuo ni Hammurabi, kaya makikita rin ito sa Lumang Tipan ng Bibliya, lalung-lalo na sa Aklat ng Exodo 21:24 at Aklat ng Levitico 24:20. Ang kasabihang ito ay nangangahulugang kung ang isa ay nagkasala sa iyo, may karapatan kang bunutin ang kanyang ngipin at pitasin ang kanyang ngipin. At kapag paulit-ulit siyang gumagawa ng ikapapamahak mo, sinasabi ng Kodigo ni Hammurabi na gawin lang ang kasabihang iyon, kahit ang iyong kaaway ay maging bulag at bungal. Sa madaling salita, parang tinutulak ka na maghiganti sa mga taong gumagawa ng masasamang bagay laban sa iyo. Subalit para kay Hesus, hindi sagot ang kalupitan upang sugpuin ang kasamaan ng isang tao.
Makikita natin na ang mga pangangaral ng Panginoon ay nakasentro sa pag-ibig at kabutihan. Kaya ang mga pahayag ni Hesus sa Ebanghelyong ito ay hindi dapat kinukuha sa literal na interpretasyon, kundi dapat mas tignan nito nang malalim. Ang pananampal sa kabilang pisgni ng sinumang sumampal sa iyo ay nangangahulugang na ituwid sa maayos na paraan ang pagkakamali ng isang tao. Ang pagpasan ng dalang bigat sa isa pang kilometro ay nagpapahiwatig na tayo ay tinatawag na tulungan ang iba sa punto na nagiging mabuting halimbawa tayo sa kanila. Ang pagsakdal ng isang tao sa iyo para sa iyong ari-arian ay isang paalala na ay ibigay ang hinihingi hindi dahil ika’y sumusuko sa laban, kundi para ang taong iyon ay magbago ang kanyang puso. At ang pagbibigay sa mga humihingi at hindi tumatalikod sa mga nanghihiram ay isang tanda na dapat tayo ay maging bukas palad sa pagbibigay, at ang pagbibigay nga ay walang inaasahang kapalit.
Mga kapatid, ang turo ni Hesus ngayon ay isang paalala na kapag dumating sa punto na nakapaligid sa atin ang kasamaan, labanan natin ito sa pamamagitan ng kabutihan. Hindi dahil tayo ay naduduwag o kaya sumusuko na tayo sa ating mga kalaban, kundi upang sa takdang panahon ay makilala nila ang kabutihan ng Diyos sa ating mga puso. Kapag inuulit natin ang pag-iiral ng pagmamahal at kabutihan, lalo nila masisilayan ang ating awa at malasakit upang sumunod sila sa ating halimbawa. Kaya ito ay parang hamon sa ating buhay-Kristiyano na hindi kailanma’y malutas ang karahasan sa pamamagitan ng karahasan. Ganun din sa ating buhay sa pamilya, paaralan, komunidad, at bansa, mayroon tayong tanyag na kasabihang Filipino: “Hindi maitatama ang isang pagkakamali ng isa pang pagkakamali.” Kaya nawa’y isabuhay natin ang ating pagkakilanlan bilang mga Kristiyano sa pamamagitan ng pag-ibig. At sa bawat pagkakamali at pag-aalipusta na ating nakikita, nararanasan, o nababasa, nawa’y salungatin natin ito sa pamamagitan ng pag-ibig, habag, malasakit, kabutihan ng loob, katarungan, at kapayapaan.
Hilingin natin sa Panginoon ngayong Panahon ng Kuwaresma, katulad ng kanyang patuloy na pagkakahabag at pagpapatawad sa atin sa panahon na tayo ay nagkakasala, ganun din sana ang gawin natin sa maayos na paraan at puno ng pag-ibig upang ituwid ang maling kinagasanan ng ating kapwa.
Ang ating Panginoong Hesus ang tunay na guro ng batas. May mga batas sa lumang tipan na kanyang ginawan ng pagbabago. Ito ay para sa lalong ikabubuti ng mga tao. Hindi ito kayang abutin ng kaisipan ng mga eskriba at mga Pariseo. Hangga’t maaari ayon sa ating Panginoong Hesus, wala sanang magkakagalit. Lahat sana ng tao ay magkakasundo. Ang ating pinagmulan ay Diyos ng Pag-ibig. Kaya’t kabaliktaran nito ang galit, poot na humahantong sa pagpatay. kaya nga maghari nawa ang pag-ibig, kapayapaan, pang-unawa at pagpapatawad sa bawat isa.
PAGNINILAY:
“Ang pag-ibig ang katuparan ng Kautusan.”
Sa Ebanghelyong ito (Mateo 5, 20-26) ipinapakita na mas mahalaga ang pag-ibig kaysa sa simpleng pagsunod sa batas. Itinuturo ni Hesus na ang katuwiran ng isang tao ay dapat lumampas sa makitid at panlabas na pagsunod sa batas, tulad ng ginagawa ng mga eskriba at Pariseo.
Ipinapakita ng Ebanghelyo na mas mahalaga ang pag-ibig kaysa sa pagsunod sa alin mang batas.
Una, ang galit ay matuturing katumbas ng pagpatay (Mateo 5:21-22), sinabi ni Hesus na ang taong nagagalit sa kanyang kapwa ay maituturing ding may kasalanan tulad ng isang pumatay. Dito, pinapalalim Niya ang utos na “Huwag kang papatay” (Exodo 20:13), na hindi lamang tungkol sa literal at pisikal na pagpatay kundi pati na rin sa galit, paghamak, at pagtatanim ng sama ng loob sa kapwa. Ipinapakita nito na ang batas ng Diyos ay hindi lamang tungkol sa panlabas na pagsunod kundi lalo higit pa dito. Ito ay makikita sa tunay na pagmamahal at respeto sa kapwa.
Pangalawa, pinaalalahanan tayo ng Ebanghelyo na ang tunay na pagsamba sa Diyos ay nagpapakita ng kapayapaan sa kapwa (Mateo 5:23-24). Kaya naman tinuturuan tayo ni Hesus na bago tayo mag-alay sa Diyos, tiyakin muna nating maayos ang ating relasyon sa kapwa. Kung may sama ng loob tayo sa iba, mas mahalagang ayusin muna ito bago maghandog. Ipinapakita nito na ang tunay na kabanalan ay hindi lamang sa pagsunod sa ritwal o batas kundi sa pagiging maibigin sa kapayapaan.
Sa panghuli, tinuturuan tayo na bigyang halaga ang pakikipagsundo bago humantong sa mas malalim na hidwaan na hahantong sa paghahatol ng hukuman(Mateo 5:25-26). Hinimok tayo ni Hesus na makipagkasundo agad sa ating kapwa bago pa humantong sa mas magbigat na hatol ng batas. Ipinapakita nito na ang pag-ibig at kapayapaan ay dapat manaig sa ating ugnayan sa bawat isa, sapagkat hindi tayo magkakaroon ng tunay na kapayapaan kung hindi nananahan ang pag-ibig sa ating puso. Ang pinatutungkulan nito na magbalik loob sa Diyos humingi ng kapatawaran bago pa man sapitin ang paghuhusga at ng hindi malirip na kaparusahan.
Sa lahat ng ito, makikita natin ang kahalagahan ng pagpapairal ng batas ng may pag-ibig. Ang tunay na katuwiran sa harapan ng Diyos ay hindi lamang pagsunod sa mga panlabas na kautusan kundi isang pusong puno ng pagmamahal, pagpapatawad, at pagkakasundo. Tulad ng sinabi ni San Pablo: “Ang pag-ibig ang katuparan ng Kautusan.” (Roma 13:10)
Magaganap lamang natin ang batas ng Diyos sa pamamagitan ng pagkakaroon ng isang pusong umiibig nang tunay.