Podcast: Download (Duration: 6:05 — 4.4MB)
Huwebes sa Unang Linggo ng Apatnapung Araw na Paghahanda
Ester 4, 17 n. p-r. aa-bb. gg-hh
Salmo 137, 1-2a. 2bk-3. 7k-8
Noong ako ay tumawag,
tugon mo’y aking tinanggap.
Mateo 7, 7-12
Subscribe to Awit at Papuri Communications YouTube Channel
Thursday of the First Week of Lent (Violet)
UNANG PAGBASA
Ester 4, 17 n. p-r. aa-bb. gg-hh
Pagbasa mula sa aklat ni Ester
Noong mga araw na iyon, labis na nabagabag si Reyna Ester. Dumulog siya sa Panginoon. Ganito ang daing niya sa Panginoong Diyos ng Israel:
“Panginoon ko, tanging ikaw ang Hari namin. Tulungan mo ako na ngayo’y nag-iisa at walang ibang maaasahang tutulong kundi ikaw lamang. Haharap ako sa napakalaking panganib. Mula pa sa aking pagkabata, narinig ko na sa liping kinabibilangan ng aking angkan na ikaw, Panginoon, ang humirang sa Israel mula sa dinami-rami ng mga bansa, at ikaw din ang sa panahong iyon ay pumili sa aming mga magulang upang maging iyong bayan magpakailanman. Tinupad mo ang lahat ng iyong ipinangako sa kanila.
“Alalahanin mo kami, Panginoon. Ipadama mo sa amin ang iyong paglingap sa sandaling ito ng kagipitan. Bigyan mo ako ng lakas ng loob, Hari ng lahat ng mga dinidiyos at Pinuno ng lahat ng kapangyarihan sa lupa. Bigyan mo ako ng kakayahang magsalita sa harap ng leong si Asuero, upang maakit ang kanyang puso na mamuhi sa taong kumakalaban sa amin at sa gayo’y mapahamak siya kasama ng mga nakikipagsabwatan sa kanya. Iligtas mo kami, Panginoon. Tulungan mo ako na ngayo’y nag-iisa at walang ibang maaasahang tutulong kundi ikaw lamang.
“Ganap mong nababatid ang lahat.”
Ang Salita ng Diyos.
SALMONG TUGUNAN
Salmo 137, 1-2a. 2bk-3. 7k-8
Noong ako ay tumawag,
tugon mo’y aking tinanggap.
Ako, Poon, buong pusong aawit ng pasalamat,
sa harap ng mga anghel, pupurihin kitang ganap.
Sa harap ng iyong templo ay yuyuko at gagalang,
pupurihin kita roon, pupurihin ang ‘yong ngalan.
Noong ako ay tumawag,
tugon mo’y aking tinanggap.
Dahilan sa pag-ibig mo at sa iyong katapatan,
Ikaw’y tunay na dakila, pati iyong kautusan.
Noong ako ay tumawag, tinanggap ko ang tugon mo,
sa lakas mong itinulong ay lumakas agad ako.
Noong ako ay tumawag,
tugon mo’y aking tinanggap.
Naghahandang harapin mo mapupusok kong kaaway,
ligtas ako sa piling mo, sa takas na iyong taglay.
Yaong mga pangako mo ay handa mong tupding lahat,
ang dahilan nito Poon, pag-ibig mo’y di kukupas,
at ang mga sinimulang gawain mo’y magaganap.
Noong ako ay tumawag,
tugon mo’y aking tinanggap.
AWIT-PAMBUNGAD SA MABUTING BALITA
Salmo 50, 12a. 14a
D’yos ko, sa aki’y igawad
loobing tunay na tapat;
puso ko’y gawin mong wagas
nang manauli ang galak
bunga ng ‘yong pagliligtas.
MABUTING BALITA
Mateo 7, 7-12
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa kanyang mga alagad, “Humingi kayo, at kayo’y bibigyan; humanap kayo, at kayo’y makasusumpong; kumatok kayo, at ang pinto’y bubuksan para sa inyo. Sapagkat tumatanggap ang bawat humihingi, nakasusumpong ang bawat humahanap, at binubuksan ang pinto sa bawat kumakatok. Bibigyan ba ninyo ng bato ang inyong anak kung humihingi ng tinapay? Bibigyan ba ninyo siya ng ahas kung humihingi ng isda? Kung kayo na masasama, ay marunong magbigay ng mabubuting bagay sa inyong mga anak, gaano pa kaya ang inyong Amang nasa langit? Ibibigay niya ang mabubuting bagay sa mga humihingi sa kanya!
“Kaya gawin ninyo sa inyong kapwa ang ibig ninyong gawin nila sa inyo. Ito ang kahulugan ng Kautusan ni Moises at ng turo ng mga propeta.”
Ang Mabuting Balita ng Panginoon.
Pages: 1 2
« Miyerkules, Marso 12, 2025
Biyernes, Marso 14, 2025 »
{ 4 comments… read them below or add one }
PAGNINILAY: Ang panalangin ay isa sa mga mahalagang gawain na ating isinasabuhay ngayong Panahon ng Kuwaresma. Subalit ang tanong dito ay hanggang kailan natin kailangang magtiis upang ipagkaloob ng Panginoon ang ating mga panalangin?
Sa ating Unang Pagbasa (Ester 4:17 n. p-r. aa-bb. gg-hh), nagdasal si Reyna Ester nang buong pagtitiwala sa Diyos dahil sa nakahandang balak laban sa kanyang mga kababayang Hudyo. Ito ang madilim na balak ni Haman kung bakit ito’y naging personal na kalihim ni Hari Ahasuero. Kaya si Ester ay nabigla at nag-aalala sa kanila, lalung-lalo sa kanyang kapatid na si Ahasuero. At sa kanyang panalangin, hiniling niya sa Panginoon ng gabay at proteksyon para sa kanyang mga kababayan. At dahil sa kagandahang-loob ng Diyos, ibinunyag ni Reyna Ester sa kanyang asawa ang balak ni Haman, at hindi hinayaan ni Ahasuero na saktan ni Haman ang mga kababayan ni Ester.
Sa ating Ebanghelyo (Mateo 7:7-12), nagbigay si Hesus ng magandang paalala kung paano tayo dapat manalangin. Kung noong nakaraang Martes ay narinig natin ang pagtuturo ng Ama Namin, ngayon naman ay nagbibigay siya ng mga praktikal na halimbawa ng kahalagahan ng dasal. Kung may taong naghihingi ng tinapay, bibigyan ba natin ito ng bato? O kaya may naghihingi ng isda, bibigyan ba natin ito ng ahas? Kaya ipinapakita dito na kung tayo’y nagbibigay sa ating mga anak na kanilang hinihingi, ang ating Diyos Ama ang nagbibigay ng mga bagay sa mga humihingi mula sa kanya. At ito’y mangyayari ayon sa kanyang kagustuhan at kalooban sapagkat ang ninanais niya ang kabutihan at kagandahang-loob ng isa.
At sa huli ay winika ni Kristo ang Ginintuang Patakaran na gawin natin ang tama at mabuti upang iyan din ang ibabalik sa atin ng ating kapwa. Kaya ang buhay-panalangin ay kailangang may kaakibat na mabuting aksyon.
Ang ating Diyos, ay hindi bulag, pipi at bingi sa ating mga hinihingi sa Kanya. Sa totoo’y handa Niyang ibigay ang ating pangangailangan. Sabi nga sa kasabihan, “Nasa Diyos ang awa, nasa tao ang gawa.” Kaya ang panalanging walang kasamang pagkilos ay bale wala. Kailangan nating gumawa ng paraan at ang Diyos ang magpapala sa ating ginagawang pagsusumikap.Ayaw NIya na tayo ay hindi kuntento sa ating buhay. Kaya nga hilingin na natin sa Diyos ang ating pangangailangan at ipagkakaloob Niya ito. Lalo na kung ito ay makakabuti sa ating kaluluwa.
PAGNINILAY:
“Pananampalataya at Pagtitiwala”
“Humingi kayo, at kayo’y bibigyan; humanap kayo, at kayo’y makakatagpo; kumatok kayo, at kayo’y pagbubuksan.” (Mateo 7:7)
Ang Ebanghelyo ngayon ay isang paalala sa atin ng walang hanggang kabutihan at katapatan ng Diyos. Inaanyayahan tayo ni Hesus na lumapit sa Diyos nang may buong pagtitiwala. Ang tatlong pagkilos—humingi, humanap, at kumatok—ay nagpapahayag ng ating patuloy na pakikipag-ugnayan sa Diyos sa pamamagitan ng panalangin.
Ang bahagi ng Ebanghelyo sa araw na ito Mateo 7:7 (“Humingi kayo, at kayo’y bibigyan; humanap kayo, at kayo’y makakatagpo; kumatok kayo, at kayo’y pagbubuksan.”) ay may kaugnayan sa Novena ni Padre Pio sa Kamahal-mahalang Puso ni Hesus.
Ang panalanging ito ni San Padre Pio ay kilala bilang “Efficacious Novena to the Sacred Heart of Jesus,” at ito ay batay mismo sa Mateo 7:7. Paulit-ulit niyang binibigkas ang panalanging ito at itinuro sa iba bilang isang makapangyarihang paraan ng pananalangin na may pananampalataya at pagtitiwala sa Panginoon.
Malinaw na ang novena ay direktang humuhugot sa pangako ng Diyos sa Mateo 7:7—isang paalala na kapag tayo ay lumapit sa Panginoon nang may tunay na pananampalataya, hindi Niya tayo bibiguin.
Una, sa salitang “Humingi kayo, at kayo’y bibigyan”. Minsan, nag-aalangan tayong lumapit sa Diyos dahil pakiramdam natin ay hindi tayo karapat-dapat o baka hindi Niya tayo pakinggan. Ngunit malinaw ang pangako ni Hesus—ibibigay ng Diyos ang mabuti para sa atin. Hindi man natin agad makita ang kasagutan sa ating mga panalangin, makakaasa tayo na ibibigay Niya ang pinakaangkop sa ating buhay.
Pangalawa, “Humanap kayo, at kayo’y makakatagpo”. Ang paghahanap ay nangangailangan ng pagsisikap. Hindi lang tayo naghihintay kundi kumikilos din upang makita ang kalooban ng Diyos. Sa ating pagsusumikap na lumago sa pananampalataya, natutuklasan natin ang tunay na kalooban ng Diyos sa ating buhay.
Pangatlo, “Kumatok kayo, at kayo’y pagbubuksan”. Ang pagkakatok ay tanda ng ating pagtitiyaga sa pananalangin. Hindi laging agad-agad sumasagot ang Diyos pero ibinigay Niya sa atin ang susi ng pintuan ito ay sa pamamagitan ng walang humpay na pananalangin nang may pananampalataya.
Sa huling bahagi ng Ebanghelyo, ipinaalala rin sa atin ni Hesus ang Ginintuang Tuntunin: “Kaya’t gawin ninyo sa inyong kapwa ang ibig ninyong gawin nila sa inyo.” (Mateo 7:12) Ito ang buod ng Kautusan at ng mga Propeta—ang pagmamahal sa kapwa. Hindi lang tayo dapat humingi ng biyaya mula sa Diyos, kundi tayo rin ay dapat maging biyaya sa iba sa pamamagitan ng ating mabuting gawa. Dito makikita natin na ang kabutihang natatanggap natin mula sa Diyos ay dapat ding maibahagi sa iba. Kung tayo ay nakakaranas ng Kanyang awa, pag-ibig, at pagpapala, dapat din tayong maging kasangkapan ng kabutihang ito sa iba.
Ang tunay na pananalangin ay hindi lang humihingi ng biyaya kundi nagiging daan din upang magmahal tayo ng kapwa. Kapag tayo ay humihingi sa Diyos, natututo rin tayong maging mapagbigay. Halimbawa: Kung hinihiling natin sa Diyos ang paghilom at pagpapatawad, dapat din tayong magpatawad sa iba. Kung hinahangad natin ang kabutihan mula sa Diyos, dapat din natin itong ipakita sa ating kapwa. Sa madaling salita, gawin natin sa kapwa, ang gusto gawin nila sa atin.
Manalangin tayo. Panginoon, turuan Mo kaming manalangin nang may buong pagtitiwala. Bigyan Mo kami ng pusong handang humingi, humanap, at kumatok sa Iyong harapan. Nawa’y matuto rin kaming mahalin at paglingkuran ang aming kapwa ayon sa Iyong kalooban. Amen.
Tiwala at Pagsusumamo sa Diyos
Ang mga pagbasa ngayon ay nagtuturo ng isang mahalagang aral: ang Diyos ay laging nakikinig at tumutugon sa Kanyang mga anak. Tulad ni Reyna Ester, na buong pagpapakumbabang dumulog sa Diyos sa gitna ng panganib, tayo rin ay inaanyayahang lumapit sa Kanya nang may buong pagtitiwala. Ang Salmo 137 ay nagpapaalala na kahit sa gitna ng ating kalungkutan at paghihirap, hindi tayo nakakalimutan ng Diyos. Sa Ebanghelyo naman, itinuturo ni Hesus na huwag tayong matakot humingi, maghanap, at kumatok, sapagkat ang Diyos, bilang mapagmahal na Ama, ay laging handang magbigay ng mabubuting bagay sa atin.
Paano natin ito maisasabuhay? Una, gawin nating mas bukas ang ating puso sa pananalangin—hindi lang sa oras ng pangangailangan kundi sa araw-araw nating buhay. Ikalawa, magtiwala tayong ang Diyos ay may tamang tugon sa ating mga panalangin, kahit hindi ito laging ayon sa ating inaasahan. Panghuli, ipakita rin natin ang kabutihang-loob ng Diyos sa iba sa pamamagitan ng pagiging bukas-palad, mapagpatawad, at mapagmahal, sapagkat ito ang tunay na diwa ng Kanyang kautusan.