Podcast: Download (Duration: 5:24 — 5.4MB)
Kapistahan ni Apostol San Juan,
Manunulat ng Mabuting Balita
1 Juan 1, 1-4
Salmo 96, 1-2. 5-6. 11-12
Sa Panginoo’y magalak
ang masunuri’t matapat.
Juan 20, 2-8
Subscribe to Awit at Papuri Communications YouTube Channel
Feast of Saint John, Apostle and Evangelist (White)
UNANG PAGBASA
1 Juan 1, 1-4
Ang simula ng unang sulat ni Apostol San Juan
Mga pinakamamahal, sumusulat kami sa inyo tungkol sa kanya na sa simula pa’y siya na, ang Salita na nagbibigay-buhay. Narinig namin siya at nakita, napagmasdan at nahipo ng aming mga kamay. Nahayag ang Buhay. Nakita namin siya at pinatotohanan sa inyo. At ipinangangaral namin sa inyo ang Buhay na walang hanggan na kasama ng Ama, at nahayag sa amin. Ipinahahayag nga namin sa inyo ang aming nakita’t narinig, upang makasama namin kayo sa pakikiisa sa Ama at sa kanyang Anak na si Hesukristo. Sinusulat namin ito upang malubos ang ating kagalakan.
Ang Salita ng Diyos.
SALMONG TUGUNAN
Salmo 96, 1-2. 5-6. 11-12
Sa Panginoo’y magalak
ang masunuri’t matapat.
Ang Poon ay maghahari, magalak ang kalupaan!
Lahat kayong mga pulo ay magsaya at magdiwang!
Ang paligid niya’y ulap na lipos ng kadiliman,
kaharian niya’y tapat at salig sa katarungan.
Sa Panginoo’y magalak
ang masunuri’t matapat.
Yaong mga kabunduka’y natutunaw, parang pagkit,
sa harapan ng dakilang Panginoon ng daigdig.
Sa langit ay nahahayag yaong kanyang katuwiran,
sa lupa ay makikita ang kanyang kadakilaan.
Sa Panginoo’y magalak
ang masunuri’t matapat.
Sa tapat ang pamumuhay ay sisinag ang liwayway,
sa dalisay namang puso maghahari’y kagalakan.
Ang matuwid ang gawain ay galak ang masusumpong,
sa maraming kabutihang ginawa ng Panginoon;
ang ginawa niyang ito’y dapat nating gunitain,
at sa Poon ay iukol ang papuring walang maliw!
Sa Panginoo’y magalak
ang masunuri’t matapat.
ALELUYA
Aleluya! Aleluya!
Mga tapat na apostol
ay nagpupuri sa Poon
sa langit habang panahon.
Aleluya! Aleluya!
MABUTING BALITA
Juan 20, 2-8
Ang Mabuting Balita ng Panginoon ayon kay San Juan
Madilim-dilim pa nang araw ng Linggo, patakbong pumunta si Maria Magdalena kay Simon Pedro at sa alagad na mahal ni Hesus, at sinabi sa kanila, “Kinuha sa libingan ang Panginoon at hindi namin alam kung saan dinala!” Kaya’t si Pedro at ang nasabing alagad ay nagpunta sa libingan. Kapwa sila tumakbo ngunit si Pedro’y naunahan ng kasamang alagad. Yumuko ito at sumilip sa loob. Nakita niyang nakalagay ang mga kayong lino, ngunit hindi siya pumasok. Kasunod niyang dumating si Simon Pedro at tuluy-tuloy itong pumasok sa libingan. Nakita niya ang mga kayong lino, at ang panyong ibinalot sa ulo. Hindi ito kasama ng mga kayong lino, kundi hiwalay na nakatiklop sa isang tabi. Pumasok din ang alagad na naunang dumating; nakita niya ito at siya’y naniwala.
Ang Mabuting Balita ng Panginoon.
Pages: 1 2
« Biyernes, Disyembre 26, 2025
Linggo, Disyembre 28, 2025 »
{ 6 comments… read them below or add one }
PAGNINILAY: Ipinagdiriwang natin ang Kapistahan ng San Juan, ang isa sa mga Ebanghelista at kilala bilang “minamahal na Apostol” ni Hesus. Kung ang ibang mga Apostol ay napatay alang-alang kay Kristo, si San Juan rin ay namatay bilang saksi ni Kristo. Subalit ang kanyang kamatayan ay naganap sa kanyang katandaan sa Isla ng Patmos matapos niyang isulat ang Aklat ng Apocalypsis (Pahayag). Siya rin ang nagsulat ng 3 sulat na hinihikayat niya ang Sambayanang Kristiyano na magmahal katulad ng pagmamahal ng Diyos sa atin. At higit sa lahat, siya ang manunulat ng Ikaapaat na Ebanghelyo sa Bagong Tipan.
Ang kanyang pokus ay ipahayag na si Hesukristo ay totoong Diyos at totoong Tao dahil ang Kristo ay ang Salita ng Diyos na nagkatawang-tao. At sa kanyang sariling salaysay ay tinawag niya ang kanyang sarili bilang “beloved Apostle” sapagkat minahal siya ni Hesus dahil sa katapatan niya. Katunayan nga ang Ebanghelyo ngayon ay nagpapahayag kung paano niya nakita ang bato ng libingan ng Muling Nabuhay na Panginoon ay nalulon at ang lampin ay nakahilata sa pinaghigaan ng katawan ni Hesus. Kaya si San Juan nang makita ito ay naniwalang muling nabuhay ang ating Panginoon.
Ang kanyang paanyaya ngayong Pasko ay patuloy na sumampalataya sa Salitang nagkatawang-tao at tanggapin ito sa ating buhay. Nawa’t tulungan tayo ni San Juan na mas kilalanin natin ang Emmanuel sa ating buhay sa paggawa ng katuwiran at kabutihan sa ibang tao.
Maligayang Pasko ulit mga kapatid!
Ang ebanghelyo ngayon ay matatawag ding Pasko, hindi ng pagsilang ni Hesus kundi Pasko ng Pagkabuhay. Ano ang aral ata hamon sa atin ng Mabuting Balita ngayon?
Pananalig, pagtiwala at pananampalataya. Ang buhay ng isang tao ay walang saysay at walang direksyon kung wala syang Diyos na pinaniniwalaang may gawa ng langit at lupa at lahat ng ating nakikita naririnig at nararamdaman. Kung wala ang Diyos sa puso ng tao ay wala ang pag-ibig, at ang mangyayari sa mundo ay puro alitan, gyera, kamunduhan, pagiging makasarili ng lahat, patayan, pangangalunya at pakikiapid, at walang pagmamahalan. Kung hindi maniniwala ang tao sa Diyos ay wala tayong silbi sa mundo, para lamang tayong mga hayop sa mapanglaw na gubat na naghihintay ng ating kamatayan.
May Diyos. Walang kahit sinong tao ang kayang gumawa ng mga nilalang ng Diyos maging ang siyensya. May Diyos. May Diyos na magmamahal sa atin ng lubos kahit na tayo ay naging makasalanan. May Diyos, may Diyos na naghihintay lamang ng iyong pagbabalik, ng iyong pagsisisi, ng iyong paghingi ng kapatawaran, ng iyong pagtalikof sa kasamaan. At kapg nangyari iyon, mawawala na ang iyong pangamba, mabubuhay ka na puro kaligayahan dahil alam mong lagi natin syang kapiling.
Kaya’t piliin natin ang mapayapang buhay kapiling ni Hesus, sikapin na na nating matalikuran ang kasamaaan habang may panahon pa.
PAGNINILAY
Minsan nakatutukso na kumapit sa ningning ng Pasko. Habang pinahahalagahan natin ang regalo ng panahong ito, ang eksena sa Pasko ng Pagkabuhay ay nagpapaalala sa atin na ang pananampalataya ay tumatawag sa atin upang magpatuloy, upang hanapin ang nabuhay na mag-uli na Panginoon. Si San Juan, ang alagad na minamahal ni Hesus, ay nakasentro ang buong buhay kay Hesus hanggang sa Kalbaryo at pagkatapos ay inalagaan pa ang Inang Maria. Minahal ni Juan si Hesus ng buong puso.
Sino ang mamahalin ng Panginoon? Kung nararanasan natin si Hesus
gaya ng naranasan ni Juan, malalaman natin ang tunay na kalikasan ng Panginoon. Iibigin ni Hesus ang isang taong dalisay ang puso, na sumusunod sa mga utos ng Diyos. Iibigin ni Hesus ang mapagpakumbaba at maamo dahil karapat-dapat silang magmana ng kaharian ng Diyos. Mamahalin ni Hesus ang taong magpapakita ng dakilang pagmamahal sa Kanya. Ito ang ilan sa mga katangian na nagpapangyari kay Juan, ang minamahal na alagad. Mayroon bang anumang katangian sa loob natin na maaaring maging minamahal na alagad ni Hesus?
Panginoong Hesus, tulungan Mo kaming makilala at ibahagi na Ikaw ay buhay sa aming buhay. Amen.
***
Pagninilay ni Jess C. Gregorio sa Mabuting Balita:
Marami na tayong narinig. Marami na tayong nakita. Humangos tayo ng buong tulin papunta sa Kanya. Tayo kaya ay si Juan. Ang apostoles na mahal ng Panginoon. O kaya ay tayo si Magdalena na sinisi mga kumuha raw sa Kanya sa libingan. Naglalaro sa isipan niyang gagawa ng issue mga hindi naniniwala at sila ang sisisihin. O baka naman tayo ay si Pedro bagama’t tumakbo ay may naglalarong bagay sa isipan natin, paano, baka, sana, maraming iniisip patungo kay Kristo. Nakita niya pero tuliro siya at malamang nagtatalo ang isip sa mga nangyayari. Pero sino ba talaga tayo sa tatlo? Si Magdalena, si Pedro, o si Juan?
PAGNINILAY:
Ang Ebanghelyo ngayon ay nagpapakita ng natatanging pananampalataya at pagmamahal ng alagad na minamahal ni Hesus—walang iba kundi si San Juan, ang may-akda ng Ebanghelyo. Sa simpleng pangyayaring ito ng pagtuklas sa walang lamang libingan, naipapahayag ang malalim na pananampalataya ng mga alagad. Ang kanilang reaksyon ay iba-iba—si Maria Magdalena ay nagmadali upang ibalita ang nakita niya, si Pedro ay pumasok upang siyasatin, at si Juan, bagamat hindi pumasok agad, ay naniwala matapos makita ang mga ebidensiya ng muling pagkabuhay.
Ang kwento ay nagpapakita ng kahalagahan ng pagiging bukas sa mga tanda ng Diyos sa ating buhay. Madalas, tulad ni San Juan, hindi natin kailangang makita ang lahat upang maniwala. Sa halip, ang simpleng pananampalataya at pagtitiwala sa Panginoon ang magdadala sa atin sa mas malalim na ugnayan sa Kanya.
Ang Kapistahan ni San Juan ay paggunita sa natatanging papel niya bilang manunulat ng Ebanghelyo at ang tagapagdala ng Mabuting Balita ng pag-ibig ni Kristo. Si San Juan ay kilala bilang “alagad na minamahal ni Jesus,” isang simbolo ng malapit na ugnayan kay Kristo. Ang kanyang Ebanghelyo ay puno ng mga tema ng pagmamahal, liwanag, at buhay, na nagpapakilala kay Hesus bilang ang Salita ng Diyos na naging tao.
Sa unang tingin, tila hindi ito direktang konektado sa Kapaskuhan, na nagdiriwang ng pagsilang ni Kristo. Subalit, ang malalim na koneksyon ay makikita kapag tiningnan natin ang kabuuan ng plano ng Diyos sa kaligtasan. Mula sa Pagsilang hanggang sa Muling Pagkabuhay. Ang Kapaskuhan ay paggunita sa pagdating ni Kristo bilang Emmanuel, “Diyos na sumasa atin.” Ang kanyang pagsilang sa mundo ay ang simula ng kanyang misyon upang magdala ng kaligtasan sa sangkatauhan. Sa Ebanghelyo ngayon, nasusulyapan natin ang katuparan ng misyon na ito sa Kanyang muling pagkabuhay, ang pinakasukdulan ng plano ng Diyos. Kaya, ang Kapaskuhan at Pasko ng Pagkabuhay ay magkaugnay—ang kapanganakan ni Kristo ay nagtuturo sa atin sa layunin ng Kanyang buhay, ang pagliligtas sa atin mula sa kasalanan at kamatayan.
Ang Kapaskuhan ay panahon ng liwanag—si Kristo ang Liwanag ng Sanlibutan na dumating upang pawiin ang dilim ng kasalanan. Sa Ebanghelyo, makikita rin natin ang liwanag ng pag-asa sa muling pagkabuhay ni Hesus. Ang walang lamang libingan ay tanda ng tagumpay ng Diyos laban sa kadiliman ng kamatayan. Ang parehong liwanag at pag-asa ay nagbibigay inspirasyon sa atin na ipagdiwang ang pagsilang ni Kristo na nagdala ng buhay na walang hanggan.
Sa parehong Kapaskuhan at Ebanghelyo ngayon, tinatawagan tayong tumugon sa mga tanda ng Diyos. Tulad nina San Pedro at San Juan na tumugon sa balita ng walang lamang libingan, tinatawagan din tayong magtiwala at manampalataya sa Diyos na dumating bilang isang sanggol sa sabsaban. Ang pananampalataya ng mga alagad sa muling pagkabuhay ni Hesus ay sumasalamin sa pananampalatayang hinihingi sa atin tuwing ipinagdiriwang natin ang Kapaskuhan.
Ang Kapaskuhan at Ebanghelyo ngayon ay nagdadala ng parehong mensahe: si Hesus ang kaganapan ng plano ng Diyos sa kaligtasan. Ang kanyang pagsilang ay tanda ng pag-ibig ng Diyos sa atin, at ang kanyang muling pagkabuhay ay ang patunay ng tagumpay ng pagmamahal na ito. Sa panahon ng Kapaskuhan, inaanyayahan tayong tularan ang pananampalataya nina San Juan at San Pedro, na nagtiwala at naniwala kahit sa gitna ng kawalan ng katiyakan.
Binhi ng Hamon:
1. Paano ko maipadadama ang liwanag ni Kristo sa aking pamilya at kapwa ngayong Kapaskuhan?
2. Naipapakita ko ba ang pananampalataya at pag-asa na dala ng pagsilang at muling pagkabuhay ni Cristo?
Manalangin tayo. San Juan, manunulat ng Mabuting Balita at alagad na minamahal ni Hesus, ipanalangin mo kami na maging tapat sa aming pananampalataya at matutong magbigay ng pag-ibig sa aming kapwa, gaya ng itinuro ng Panginoon. Amen.
Ipanalanagin natin lumalim pa ang saysay ng ating buhay na payapa at masaya.
Ang kabalanan ay kaibigan ng mahabang buhay.
Maging malapit kay Hesus.
Amen
God is good sobra sobra
Sobra sobra God is good
Thank you, Lord.
#GvSaturday