Podcast: Download (Duration: 8:24 — 6.7MB)
Ika-19 ng Disyembre
(Simbang Gabi)
Mga Hukom 13, 2-7. 24-25a
Salmo 70, 3-4a. 5-6ab. 16-17
Lagi kong papupurihan
ang iyong kapangyarihan.
Lucas 1, 5-25
Subscribe to Awit at Papuri Communications YouTube Channel
19th of December (Aguinaldo Mass) (Violet)
UNANG PAGBASA
Mga Hukom 13, 2-7. 24-25a
Pagbasa mula sa aklat ng Mga Hukom
Noong mga araw na iyon, sa bayan ng Zora ay may isang lalaking Manoa ang pangalan, kabilang sa lipi ni Dan. Ang asawa niya ay hindi magkaanak. Minsan, napakita sa babae ang anghel ng Panginoon, at sinabi, “Hanggang ngayo’y wala kang anak. Ngunit hindi magtatagal, maglilihi ka at manganganak. Mula ngayon at huwag kang iinom ng anumang uri ng alak ni titikim ng anumang bawal na pagkain. Kung maipanganak mo na siya, huwag mong papuputulan ng buhok pagkat mula pa sa kanyang pagsilang ay itatalaga ng siya sa Diyos. Siya ang magsisimulang magligtas sa Israel mula sa mga Filisteo.”
Ang babaeng lumapit sa kanyang asawa at kanyang sinabi, “Napakita sa akin ang isang propeta ng Diyos, parang anghel. Kinikilabutan ako! Hindi ko tinanong kung tagasaan siya at hindi naman niya sinabi kung sino siya. Huwag daw akong iinom ng alak ni titikim ng anumang bawal na pagkain pagkat ang sanggol na isisilang ko’y itatalaga sa Diyos.”
Dumating ang araw at nanganak ang asawa ni Manoa. Lalaki ang sanggol at pinangalanan nilang Samson. Lumaki ang bata na patuloy na pinagpapala ng Panginoon. Ang Espiritu ng Panginoon ay lumukob kay Samson.
Ang Salita ng Diyos.
SALMONG TUGUNAN
Salmo 70, 3-4a. 5-6ab. 16-17
Lagi kong papupurihan
ang iyong kapangyarihan.
Ikaw nawa ang muog ko at ligtas na kakanlungan,
matatag na kublihan ko at matibay na sanggalang.
Sa lahat ng masasama, O Diyos, ako’y ipaglaban.
Lagi kong papupurihan
ang iyong kapangyarihan.
Panginoon, sa iyo ko inilagak ang pag-asa,
maliit pang bata ako, sa iyo’y may tiwala na;
sa simula at mula pa wala akong inasahang
mag-iingat sa sarili, kundi tanging ikaw lamang.
Lagi kong papupurihan
ang iyong kapangyarihan.
Pagkat ikaw, Panginoon, ay malakas at dakila,
ang taglay mong katangia’y ihahayag ko sa madla.
Sapul pa sa pagkabata ako’y iyong tinuruan,
hanggang ngayo’y sinasambit ang gawa mong hinangaan.
Lagi kong papupurihan
ang iyong kapangyarihan.
ALELUYA
Aleluya! Aleluya!
Sanga kang ugat ni Jesse,
taga-akay ng marami,
halina’t tubusin kami.
Aleluya! Aleluya!
MABUTING BALITA
Lucas 1, 5-25
Ang Mabuting Balita ng Panginoon ayon kay San Lucas
Noong si Herodes ang hari ng Judea, may isang saserdote na ang ngala’y Zacarias, sa pangkat ni Abias. At mula rin sa lipi ni Aaron ang kanyang asawang si Elisabet. Kapwa sila kalugud-lugod sa paningin ng Diyos, namumuhay nang ayon sa mga utos at tuntuning mula sa Panginoon. Wala silang anak sapagkat baog si Elisabet, at sila’y matanda na.
Ang pangkat ni Zacariaas ang nanunungkulan noon, at siya’y naglilingkod sa harapan ng Diyos bilang saserdote. Nang sila’y magsapalaran, ayon sa kaugalian ng mga saserdote, siya ang nahirang na maghandog ng kamanyang. Kaya’t pumasok siya sa templo ng Panginoon sa oras ng pagsusunog ng kamanyang, samantalang nagkakatipon sa labas ang mga tao at nananalangin. Walang anu-ano’y napakita sa kanya ang isang anghel ng Panginoon, nakatayo sa gawing kanan ng dambanang sunugan ng kamanyang. Nagulat si Zacarias at sinidlan ng matinding takot nang makita ang anghel. Ngunit sinabi nito sa kanya, “Huwag kang matakot, Zacarias! Dininig ng Diyos ang panalangin mo. Kayo ni Elisabet ay magkakaanak ng isang lalaki, at Juan ang ipangangalan mo sa kanya. Ikaw ay matutuwa at magiging maligaya, at marami ang magagalak sa kanyang pagsilang sapagkat siya’y magiging dakila sa paningin ng Panginoon. Hindi siya iinom ng alak o anumang inuming nakalalasing. Sa sinapupunan pa lamang ng kanyang ina, mapupuspos na siya ng Espiritu Santo. Marami sa mga anak ng Israel ang panunumbalikin niya sa kanilang Panginoong Diyos. Mauuna siya sa Panginoon, taglay ang espiritu at kapangyarihan ni Elias, upang pagkasunduin ang mga ama at ang mga anak, at panumbalikin sa daan ng matuwid ang mga suwail. Sa gayon, ipaghahanda niya ng isang bayan ang Panginoon.”
Sinabi ni Zacarias sa anghel, “Paano ko po matitiyak na mangyayari ito? Sapagkat ako’y napakatanda na at gayon din ang aking asawa.” Sumagot ang anghel, “Ako si Gabriel na naglilingkod sa harapan ng Diyos. Sinugo ako upang ihatid sa iyo ang mabuting balitang sinabi ko na sa iyo. At ngayon, mabibingi ka’t hindi makapagsasalita hanggang sa araw na maganap ang mga bagay na ito, sapagkat hindi ka naniwala sa mga sinabi ko na matutupad pagdating ng takdang panahon.”
Samantala, naghihintay naman kay Zacarias ang mga tao. Nagtaka sila kung bakit nagtagal siya nang gayon sa loob ng templo. Paglabas niya ay hindi na siya makapagsalita, mga senyas na lamang ang ginagamit niya; kaya natanto nila na nakakita siya ng pangitain. At siya’y nanatiling pipi.
Nang matapos ang panahon ng kanyang paglilingkod ay umuwi na siya. Hindi nga nagtagal at naglihi si Elisabet, at hindi ito umalis ng bahay sa loob ng limang buwan. “Ngayo’y nilingap ako ng Panginoon,” wika ni Elisabet. “Ginawa niya ito upang alisin ang aking kadustaan sa harapan ng mga tao!”
Ang Mabuting Balita ng Panginoon.
Pages: 1 2
« Huwebes, Disyembre 18, 2025
Sabado, Disyembre 20, 2025 »
{ 5 comments… read them below or add one }
PAGNINILAY: Habang tayo’y naglalakbay sa daan ng Adbiyento tungo sa pagdiriwang ng Pagkatawang-tao ni Hesukristo sa Pasko ng Pagsilang, pinagninilayan natin ang mga pangyayari bago isilang ang ating Panginoon sa Bethlehem.
Ang Unang Pagbasa at Ebanghelyo ay dalawang pagbabalita sa iisang pangyayari, ang isang panganganak na sumisimbolo sa grasya ng Panginoon. Ang dalawang babae na mga asawa nina Manoa at Zacarias na si Elisabet ay kapwang baog, at ayon sa umiiral na kultura noon, ang pagiging baog ay tinuturing daw na disgrasya. Subalit mula sa 2 kwento, makikita natin na hindi nananatili ang isang disgrasyasa ganyan lamang, kundi ang grasya ng Panginoon ang magiging kapalit. At dito nga ibinalita ang magkahiwalay ngunit magkaugnay na pagsilang nina Samson at San Juan Bautista. Si Samson ay kilala sa kanyang kalakasan upang palayain ang Israel mula sa mga Filistia. At si San Juan Bautista naman ay kilala sa paghahanda ng daan para sa pagdating ng Panginoong Hesus.
Ang grasya ng Diyos ay kinakamit ng bawat isa upang siya’y mapalakas pa na magtiwala sa kanya. Kahit nga si Zacarias sa Ebanghelyo ay nagduda at nawalan ng tinig sa kanyang boses, ginawa niya ang plano ng Diyos na pangalanan sa isang tableta ang isinilang na sanggol na “Juan,” isang pangalang nangangahulugang, “Ang Panginoon ay mapagbiyaya.”
Kaya ngayong Pasko, nawa’y makilala natin nang buong pagtitiwala at katapatan ang mga pagpapala ng ating Panginoon sa pagsunod sa kanyang dakilang kalooban.
Pagninilay ni Jess C. Gregorio:
Anuman raw ang ninanais nating biyaya na gustong matanggap, kung kalugod-lugod tayo sa paningin ng Diyos, hindi magtatapos ang ating buhay na hindi natin natatanggap iyun. Ito ay mangyayari gaano man kalaki ang dahilan kung bakit di na magkakagayun. Walang imposible sa Diyos. Maiksi lang ang ating paniniwala kung minsan. Tingnan natin si Elizabeth na baog at talaga namang di na magkaka anak. Bukod duon siya ay may idad na. Ngunit minabuti ng Panginoon biyayaan ng pinaka dakilang Propeta sa kasaysayan bilang anak niya- si Juan Bautista. Maging kalugod-lugod sa Paningin ng Diyos at ang lahat ng hihilingin natin ay ipagkakaloob nya.
PAGNINILAY
Si Kristo ang dahilan ng panahon…dahil tinuruan Niya tayong magbigay ng walang dahilan! Ito ang dakilang misteryo ng ating pananampalataya: ang mahalin ang isang tao ng walang dahilan. Gustung-gusto din ng Diyos ang mga sorpresa dahil mahilig Siyang magmahal. At ang pag-ibig ay laging may sorpresa. Ito ang nangyari kay Zacarias at kay Elizabeth. Hindi nila naisip na magkaroon ng isang sanggol sa kanilang katandaan!
Ngayon na ang oras para sorpresahin ang isang taong hindi tayo mahal, ang mga taong hindi umaasa sa atin. Sino to? Mag-isip ng matagal at mabuti. Kapamilya ba ito? Kamag-anak? Frenemy? in-law? Mga mahihirap na tao? Batang kalye? Mag-isip ng mahaba at malalim ngunit huwag mag-antala. Huwag hayaang mawala ang panibagong Araw ng Pasko. Huwag nating gawing nakakatamad ang Pasko sa pamamagitan ng pagbibigay ng may dahilan. Gawin itong kaakit-akit, kapana-panabik at nakakagulat sa pamamagitan ng pagbibigay ng walang dahilan.
Panginoong Hesus, gawing katulad Mo ang aming puso, handang magmahal, magsorpresa, magbigay ng hindi binibilang ang halaga at walang hinihintay na kapalit. Amen.
***
PAGNINILAY:
Ang Ebanghelyo ay patungkol kay Zacarias at Elisabet, na parehong matuwid sa harap ng Diyos ngunit walang anak dahil si Elisabet ay baog at sila’y matanda na. Sa kabila nito, nagpakita ang Anghel Gabriel kay Zacarias habang siya’y naglilingkod sa templo at ipinahayag na magkakaanak sila, at ang bata ay tatawaging Juan, na magiging tagapagpauna sa Panginoon. Nag-alinlangan si Zacarias kaya’t siya’y pansamantalang nawalan ng pananalita bilang tanda ng hindi niya paniniwala.
Si Zacarias at Elisabet ay matagal nang nananalangin para sa anak, ngunit tila imposible na ito dahil sa kanilang katandaan. Gayunpaman, ipinakita ng Diyos na walang imposible sa Kanya. Sa Kanyang tamang panahon, tinutupad Niya ang Kanyang mga pangako at nagbibigay ng sagot sa ating mga panalangin. Pagnilayan natin: Handa ba tayong maghintay sa sagot ng Diyos at magtiwala sa Kanyang takdang panahon?
Itinuturo sa Ebanghelyo na ang pananampalataya ay dapat laging mas higit sa pag-aalinlangan. Ang pag-aalinlangan ni Zacarias ay nagdulot sa kanya ng pansamantalang pagkakawala ng pananalita at pandinig, na nagtuturo sa atin na huwag mag-atubiling maniwala sa kapangyarihan ng Diyos. Kung minsan, ang ating limitadong pang-unawa ay nagiging hadlang sa pagtanggap ng mga biyaya ng Diyos. Paalala ito na ang pananampalataya ay hindi nakasalalay sa ating nakikita, kundi sa ating pagtitiwala sa Diyos.
Sa paningin ng tao, si Elisabet ay isang baog at wala nang pag-asa. Ngunit sa paningin ng Diyos, siya ay bahagi ng Kanyang dakilang plano. Sa parehong paraan, maaari rin tayong makaramdam ng kawalang-saysay o kahinaan, ngunit gamitin natin itong pagkakataon upang magtiwala na kaya ng Diyos na gawing biyaya ang ating mga limitasyon. Ang sinabi ni Elisabet na “kadustaan ko” ay tumutukoy sa kanyang naramdamang kahihiyan o mabigat na pasanin sa lipunan dahil sa kawalan niya ng anak. Sa kulturang Hudyo noong panahon nila, ang pagkakaroon ng anak ay itinuturing na malaking biyaya mula sa Diyos, at ang kawalan ng anak ay madalas na itinuturing na tanda ng sumpa o pagkukulang. Dahil dito, ang mga babaeng baog ay kadalasang nakararanas ng diskriminasyon, panlalait, at paghihirap sa lipunan.
Gayunpaman, ang kuwento ni Elisabet ay nagpapakita ng kagandahang-loob at kapangyarihan ng Diyos na nagbibigay ng pag-asa at pagbabago sa mga tila imposibleng sitwasyon. Sa kanyang pagtanggap ng biyaya ng pagbubuntis sa kabila ng kanyang katandaan, naging buhay siyang saksi sa kabutihan ng Diyos. Ang kanyang sinabi sa Lucas 1:25: “Ganito ang ginawa sa akin ng Panginoon nang ako’y Kanyang lingapin upang alisin ang aking kadustaan sa harap ng mga tao,”
ay nagpapakita ng kanyang pasasalamat at pagkilala na ang Diyos ang nag-aalis ng anumang kahihiyan o pasakit na dala ng tao. Ito rin ay paalala na sa kabila ng mga paghihirap, may plano ang Diyos na nagpapakita ng Kanyang awa at katapatan.
Binhi ng Kamalayan:
1. Patuloy ba akong nananalig kahit sa gitna ng mga tila imposibleng sitwasyon?
2. Paano ko mas higit na pagtitiwalaan ang Diyos sa kabila ng aking mga pagdududa?
Manalangin tayo mga kapatid na ang Diyos ay hindi nakakalimot. Kung paano Niya binigyang-buhay ang pananampalataya nina Zacarias at Elisabet, kaya rin Niyang gawing makabuluhan ang ating mga paghihintay. Magtiwala tayo at manalig sa Kanyang walang hanggang kabutihan. Amen.
Ang ating mga hiling ay bigyan ng panahon wag magmadali, yakapin ang pahihintay dahil mas may ihahain pa na mas masarap at maganda para sa atin ang Diyos.
Huwag titigil sa pananalig at darating ang panahon ipagkakaloob Ng Diyos ang ating hiling.
Mga dahilan bakit indi pa sinasagot Ng Diyos ang ating hiling-
No, good news protecting us. new opportunities.
Wait, paghahanda na mas mabuti ibibigay Ng Diyos.
Better for you,habang iniintay ang hiling become blessing to other people. God will bless us more.
Amen
God is good sobra sobra
sobra sobra God is good
#GvFriday
Thank you, Lord.