Podcast: Download (Duration: 6:05 — 4.4MB)
Biyernes kasunod ng Miyerkules ng Abo
Isaias 58, 1-9a
Salmo 50, 3-4. 5-6a. 18-19
D’yos ko, iyong tinatanggap
pakumbaba’t pusong tapat.
Mateo 9, 14-15
Subscribe to Awit at Papuri Communications YouTube Channel
Friday after Ash Wednesday (Violet)
UNANG PAGBASA
Isaias 58, 1-9a
Pagbasa mula sa aklat ni propeta Isaias
Ito ang sinasabi ng Panginoon:
“Ikaw ay sumigaw nang ubos-lakas,
ang sala ng bayan ko sa kanila’y ihayag.
Sinasamba ako,
kunwa’y hinahanap, sinusundan-sundan,
parang natutuwang ang kalooban ko’y kanilang malaman;
ibig palabasin na ang gawain nila ay matuwid,
at di lumilihis sa mga tuntuning aking ibinigay.
Wari’y natutuwang sa aki’y sumamba.
At ang hinihingi’y hatol na matuwid.”
Ang tanong ng mga tao, “Bakit ang pag-aayuno nati’y
di pansin ng Panginoon?
Nagugutom lang tayo ngunit walang kabuluhan.”
ang sagot ng Panginoon,
“Pansariling kapakanan pa rin
ang pangunang layunin sa pag-aayuno,
habang ang nag-aayuno’y patuloy na inaapi ang mahihirap.
Ang pag-aayuno ninyo’y
humahantong lamang sa alitan
hanggang kayu-kayo’y nag-aaway-away.
Kung ang pag-aayunong ginagawa ninyo
ay gayun din lamang,
ang inyong pagtawag
ay tiyak na hindi ko pakikinggan.
Sa inyong pag-aayuno
pinahihirapan ninyo ang inyong sarili.
Yumuyuko kayong parang damong hinihipan ng hangin.
Nagdaramit kayo ng sako at nahihiga sa abo,
pag-aayuno na ba iyan?
Akala ba ninyo’y nasisiyahan ako riyan?
Ito ang gusto kong gawin ninyo:
tigilan na ninyo ang pang-aalipin;
sa halip ay pairalin ang katarungan;
ang mga api’y palayain ninyo at tulungan.
Ang mga nagugutom ay inyong pakanin,
patuluyin sa inyong tahanan ang walang tirahan,
yaong mga tao
na halos hubad na ay inyong paramtan,
ang inyong pagtulong
sa mga kasama ay huwag tatalikdan.
At kung magkagayon,
matutulad kayo sa bukang-liwayway.
hindi maglalao’t
gagaling ang inyong sugat sa katawan,
ako’y laging sasainyo,
ililigtas kayo at iingatan kahit saang lugar.
Sa araw na iyon,
diringgin ng Panginoon ang dalangin ninyo,
pag kayo’y tumawag,
ako’y tutugon agad.”
Ang Salita ng Diyos.
SALMONG TUGUNAN
Salmo 50, 3-4. 5-6a. 18-19
D’yos ko, iyong tinatanggap
pakumbaba’t pusong tapat.
Ako’y kaawaan, O, mahal kong Diyos,
sang-ayon sa iyong kagandahang-loob
mga kasalanan ko’y iyong pawiin,
ayon din sa iyong pag-ibig sa akin!
Hugasan mo sana ang aking karumhan
dalisayin mo ang aking kasalanan!
D’yos ko, iyong tinatanggap
pakumbaba’t pusong tapat.
Ang pagsalansang ko ay kinikilala,
laging nasa isip ko at alaala.
Sa iyo lang ako nagkasalang tunay,
at ang nagawa ko’y di mo nagustuhan.
D’yos ko, iyong tinatanggap
pakumbaba’t pusong tapat.
Hindi mo na nais ang mga panghandog;
sa haing sinunog di ka nalulugod.
Ang handog ko, O Diyos, na karapat-dapat
ay ang pakumbaba’t pusong mapagtapat.
D’yos ko, iyong tinatanggap
pakumbaba’t pusong tapat.
AWIT PAMBUNGAD SA MABUTING BALITA
Amos 5, 14
Matuwid ang dapat gawin,
masama’y iwasan natin,
at tayo ay bubuhayin;
ang Diyos ay sasaatin,
atin s’yang makakapiling.
MABUTING BALITA
Mateo 9, 14-15
Ang Mabuting Balita ng Panginoon ayon kay San Mateo
Noong Panahong iyon, lumapit kay Hesus ang mga alagad ni Juan Bautista at ang wika, “Malimit kaming mag-ayuno, gayun din ang mga Pariseo. Bakit po hindi nag-aayuno ang inyong mga alagad?” Sumagot siya, “Maaari bang magdalamhati ang mga panauhin sa kasalan habang kasama nila ang lalaking ikinasal? Kapag wala na siya, saka pa lamang sila mag-aayuno.”
Ang Mabuting Balita ng Panginoon.
Pages: 1 2
« Huwebes, Marso 6, 2025
Sabado, Marso 8, 2025 »
{ 4 comments… read them below or add one }
Please SHARE & SUBSCRIBE
https://youtube.com/watch?v=AaZQ-XFoZLE&si=EnSIkaIECMiOmarE
GOSPEL REFLECTION:
Ang ating mga makamundong pagnanasa o pita ng laman ay madaling nagpapahina sa atin na pigilan ang ating pakikipag-relasyon sa Diyos. Upang mapagtagumpayan ito, kailangang tanggihan at iwasan ang mga ito sa pamamagitan ng pag-aayuno. Noong panahon na kasama pa ng mga alagad si Hesus, napagtatagumpayan nila dahil sapat na ang presensya ni Hesus para mapigilan ang mga kahinaan nila.
Kaya’t noong umalis si Hesus, minabuti niyang mag-iiwan ng kahalili niya na siyang magpapalakas sa kanila, ang Banal na Espiritu Santo. Ang kanilang relasyon ay nagbago sa ibang dimension, hindi na nila nakakaharap at nahahawakan ang Diyos ng pisikal. At sa kadahilanang iyon, kailangan ng mga alagad na kontrolin ang kanilang mga hilig sa laman sa tulong ng Banal na Espiritu.
Ikaw at ako ay inaatasang sumunod kay Kristo na maging instrumento niya. Kailangan natin ang kapangyarihan ng Banal na Espiritu sa ating buhay upang mapagtagumpayan ang ating mga kahinaan.
Pagnilayan, ngayon, ang kahalagahan ng pag-aayuno dahil ito’y susi para palakasin ang ating espiritu sa tulong ng Banal na Espiritu Santo. Pagnagkagayo’y nako-kontrol natin ang anumang kahinaan at napapatigil ang anumang kasalanan na pabalik-balik.
Mahal kong Panginoon, nagpapasalamat ako dahil binibigyan mo ako ng pagkakataon na maging instrument mo upang maibahagi ang iyong pag-ibig. Bigyan mo ako ng biyayang makasunod sa iyo at ma-disiplina ang aking sarili upang Ikaw at Ikaw lamang ang ganap na magkontrola ng aking buhay. Nawa’y maging bukas ako sa kaloob ng pag-aayuno at makatulong ito sa aking pagbabagong buhay. Hesus, nagtitiwala ako sa Iyo.
Thank you Lord for another day..pra ikaw ay makapiling mula sa araw na ito sa aking pg ninilay ng iyong mga salita na ng bibigay ng kalakasan para harapin ang hamon ng buhay na my saya at kagalaksn sa aking puso…Praise to you Lord Jesus Christ..??
Salamat po Panginoon sa panibagong araw, panibagong buhay, panibagong pag asa…. loobin mo po na makasunod ako sa iyong kalooban, makapaglingkod sa mga kapatid, tulungan mo po akong maging mabuting anak mo., loobin mong wag akong makagawa ng ikakalumbay mo., Amen?
PAGNINILAY:
Sa Ebanghelyo ipinapakita ni Hesus na ang pag-aayuno ay hindi lamang isang panlabas na ritwal kundi isang espiritwal na paghahanda. Habang kasama ng mga alagad si Hesus, ang tunay na dahilan ng kanilang kagalakan, hindi nila kailangang magluksa. Ngunit darating ang panahon ng Kanyang pagpapakasakit at kamatayan, at doon nila mararamdaman ang pangangailangan ng pag-aayuno bilang tanda ng kanilang pananabik sa Kanya na Siya ay makasama nilang muli sa Pasko ng Pagkabuhay.
Ang tunay na kahalagahan ng pag-aayuno ay hindi lang ang pagliban sa pagkain kundi ang mas malalim na relasyon sa Diyos. Sa pamamagitan nito, natututo tayong kontrolin ang ating makamundong pagnanasa at ituon ang ating puso sa Kanya.
Sa Lumang Tipan, madalas na ginagawa ang pag-aayuno bilang tanda ng pagsisisi. Gayundin, tayo ay tinatawagan ni Kristo na gamitin ang pag-aayuno upang linisin ang ating puso mula sa kasalanan at lumapit nang may kababaang-loob sa Kanya.
Sa Unang Pagbasa ay nagpapaala na ang pag-aayuno na may kasamang paggawa ng mabuti. Hindi sapat na umiwas lamang sa pagkain o sa ibang bagay, kundi ang pagtanggi, at pagliban sa mga dating gawi na naglalayo sa atin sa Diyos bagkus dapat itong samahan ng mabuting gawa. Tulad ng sinasabi sa Isaias 58:6-7, ang tunay na pag-aayuno ay ang pagpapalaya sa mga naaapi, pagbibigay sa nangangailangan, at pagpapakita ng pagmamahal sa kapwa.
Ngayong panahon ng Kuwaresma, tayo ay hinahamon na hindi lamang mag-ayuno sa pagkain kundi mag-ayuno rin sa masasamang ugali, pagkakasala, at pagiging makasarili. Ang tamang pag-aayuno ay dapat magdulot ng pagbabago sa ating buhay—isang pusong busog sa pag-ibig ng Diyos at handang maglingkod sa iba.
Pagnilayan natin: Paano ko maisasabuhay ang tamang pag-aayuno sa aking pang-araw-araw na buhay?
Manalangin tayo. Panginoong Diyos, Ikaw ang tunay na nagbibigay-buhay. Turuan Mo akong mag-ayuno hindi lamang sa pagkain, kundi sa masasamang pag-uugali at kasalanan. Nawa’y ang aking pag-aayuno ay magbunga ng mas malalim na pananampalataya, mas matibay na pagtitiwala sa Iyo, at mas taos-pusong paglilingkod sa aking kapwa.
Palakasin Mo ako upang manatiling tapat sa Iyo, at gawin kong layunin hindi lamang ang pagsasakripisyo, kundi ang mas mapalapit sa Iyong banal na kalooban.
Sa pamamagitan ni Hesukristong aming Panginoon. Amen. ?