Podcast: Download (Duration: 6:48 — 8.6MB)
Sabado ng Ika-7 Linggo sa Karaniwang Panahon (I)
o kaya Paggunita sa Mahal na Birheng Maria tuwing Sabado
Sirak 17, 1-13
Salmo 102, 13-14. 15-16. 17-18a
Pag-ibig mo’y walang hanggan sa bayan mong nagmamahal.
Marcos 10, 13-16
Subscribe to Awit at Papuri Communications YouTube Channel
Saturday of the Seventh Week in Ordinary Time (Green)
UNANG PAGBASA
Sirak 17, 1-13
Pagbasa mula sa aklat ni Sirak
Nilikha ng Panginoon ang tao mula sa alabok,
at ito’y sa alabok din uuwi.
Binigyan niya ang tao ng takdang haba ng buhay,
ngunit ipinailalim sa kanyang kapangyarihan ang lahat ng bagay sa ibabaw ng lupa.
Pinagkalooban niya sila ng kalakasang tulad ng sa kanya,
at ginawa silang kawangis niya.
Inibig ng Panginoon na ang lahat ng may buhay ay matakot sa tao,
at maghari ito sa mga hayop sa lupa at ibon sa himpapawid.
Binigyan sila ng Panginoon ng limang pandamdam,
at binigyan pa rin ng pang-anim – katalinuhan, at pampito – isip;
sa pamamagitan nito, nabibigyan nila ng kahulugan ang nagdaraan sa pandamdam.
Binigyan niya ang tao ng dila, mga mata at tainga,
at kapangyarihang mag-isip at magpasiya.
Pinuspos pa niya ng kaalaman at karunungan,
at tinuruang kumilala ng mabuti at masama.
Pinaliwanag ng Panginoon ang isipan ng mga tao,
at ipinakilala sa kanila ang karilagan ng kanyang nilalang,
at ipinahintulot niya ang ipagkapuri nila magpakailanman ang kanyang mga kahanga-hangang ginawa.
Upang papurihan nila ang kanyang pangalan
at ipahayag ang kadakilaan ng kanyang mga gawa.
Ibinigay niya sa tao ang kanyang mga aral,
at ipinamana sa kanila ang Kautusan na nagbibigay-buhay.
Nakipagtipan siya sa mga tao magpakailanman,
at ipinahayag sa kanila ang kanyang mga kautusan.
Ipinakita sa kanila ang kanyang di matingkalang kamahalan,
at ipinarinig sa kanila ang kanyang bathalang tinig.
Sinabi niya sa kanila: “Huwag kayong gagawa ng masama;”
at ibinatas sa kanila ang tungkulin ng bawat isa sa kanyang kapwa.
Nakikita ng Panginoon ang lahat ng ginagawa ng tao,
at walang nalilingid sa kanya na anuman.
Ang Salita ng Diyos.
SALMONG TUGUNAN
Salmo 102, 13-14. 15-16. 17-18a
Pag-ibig mo’y walang hanggan sa bayan mong nagmamahal.
Kung paano nahahabag ang ama sa anak niya
gayun siya nahahabag sa may takot sa kanya.
Alam niya na alabok, yaong ating pinagmulan,
alam niyang babalik din sa alabok kung mamatay.
Pag-ibig mo’y walang hanggan sa bayan mong nagmamahal.
Ang buhay ng mga tao’y parang damo ang katulad,
Sa parang ay lumalago na animo ay bulaklak;
kapag ito ay nahanginan, nawawala’t nalalagas,
nawawala man din ito at hindi na namamalas.
Pag-ibig mo’y walang hanggan sa bayan mong nagmamahal.
Ngunit ang pag-ibig ng Diyos ay tunay na walang hanggan
sa sinuman sa kanya’y may takot at pagmamahal;
Ang matuwid niyang gawa ay wala ring katapusan.
yaong magtatamo nito’y ang tapat sa kanyang tipan.
Pag-ibig mo’y walang hanggan sa bayan mong nagmamahal.
ALELUYA
Mateo 11, 25
Aleluya! Aleluya!
Papuri sa Diyos Ama
pagkat ipinahayag n’ya
Hari s’ya ng mga aba.
Aleluya! Aleluya!
MABUTING BALITA
Marcos 10, 13-16
Ang Mabuting Balita ng Panginoon ayon kay San Marcos
Noong panahong iyon, may nagdala ng mga bata kay Hesus upang hilinging ipatong niya sa mga ito ang kanyang kamay; ngunit pinagwikaan sila ng mga alagad. Nagalit si Hesus nang makita ito, at sinabi sa kanila, “Pabayaan ninyong lumapit sa akin ang mga bata, huwag ninyo silang sawayin, sapagkat sa mga katulad nila naghahari ang Diyos. Ito ang tandaan ninyo: ang sinumang hindi tumatanggap sa paghahari ng Diyos tulad ng isang maliit na bata ay hindi mapapabilang sa mga pinaghaharian niya.” At kinalong ni Hesus ang mga bata, ipinatong ang kanyang mga kamay sa kanila at pinagpala sila.
Ang Mabuting Balita ng Panginoon.
Pages: 1 2
« Biyernes, Pebrero 28, 2025
Linggo, Marso 2, 2025 »
{ 2 comments… read them below or add one }
PAGNINILAY: Sa ating Unang Pagbasa (Sirak 17:1-15), sinasabi ni Sirac na lahat tayo ay nilikha ayon sa kawangis at anyo ng Diyos. At sa paglikha sa atin na mamuhay sa lupa ay may kaakibat na tungkulin na tayo’y namamahala sa kanyang mga nilikha. Kaya’t sa mga duamting na panahon ay nagpahayag ang Diyos ng kanyang sarili sa pamamagitan ng pakikipagtipan sa kanyang bayan, na bilang sambyanan niya ay mas kilalanin siya bilang Diyos nila, at palaging sumusunod sa kanyang utos. Subalit nakita natin kung paano winawasak ng kasalanan ng ugnayan ng tao sa Diyos, na nagpapahiwalay sa kanya, at minsan nga ilang beses na sinasakupan ang bayang Israel. Ngunit sa kabila ng ilang ulit ng pagmamatigas at pagkukulang ng tao ay tapat pa rin ang Diyos sa kanyang mga plano para sa kaligtasan ng sangkatauhan. Kaya sa takdang panahon ay sinugo niya si Hesukristo para ipaalala sa atin na lahat tayo ay nilikha para makamit ang kalangitan, kaya’t ito sana ang maging pamantayan ng ating buhay.
Sa ating Ebanghelyo (Marcos 10:13-16), ito’y isang kwento kung paanong malapit ang puso ni Hesus sa mga bata. Pinalapit ng mga magulang ang kanilang mga anak kay Hesus upang hawakan niya ang mga ito, ngunit pinagbawalan sila ng mga alagad. Subalit inituos niya na hayaan lumapit ang mga bata sa kanya at huwag sila’y hadlangan sapagkat tinuturing sila ni Hesus bilang dakila sa Kaharian ng Langit. Sa paghahawak ni Kristo sa mga bata, inaanyayahan niya ang lahat na tanggapin ang Paghahari ng Diyos katulad ng isang bata.
Noong mga sinaunang panahon, ang mga bata ay tinataguring bilang walang kahalagahan sa lipunan kasama ang mga kababaihan. Sila’y umaasa sa mga kalalakihan upang magsumikap para sa kanilang mga pangangailangan sa buhay. Ngunit ipinapakita ni Hesus na ang mga bata ay tunay na kinalulugdan ng Diyos Ama sa Langit. Kaya’t bilang mga Kristiyano, tayo’y tinatawag na maging katulad ng mga bata (childlike), hindi literal na maging mga bata (childish). Ang “childish” ay parang isip at gawain ay bata kahit matanda na, subalit ang “childlike” ay pagsasabuhay ng mga mabubuting aral mula pagkabata hanggang sa pagkatanda.
Ang mga tanging katangian ng isang mabubuting bata ay mapagkumbaba at masunurin. Katulad ng pagsunod nila sa mga utos ng mga magulang, tayong lahat bilang mga Kristiyano ay kinakailangang tumalima sa dakilang kalooban ng Diyos. Sa pagkakaroon ng kababang-loob, tayo’y sigurado na lahat ng mga kapangyarihan at impluwensiya ay hindi kaya nating abutin sapagkat may mga kahinaahan tayo. Subalit mas dapat nating pahalagahan ang ating pananamapaltaya sa Panginoon.
PAGNINILAY:
Ang Ebanghelyo ay nagpapakita ng kahalagahan ng pagiging tulad ng katangian ng isang bata sa ating pananampalataya. Ipinapakita dito na ang Kaharian ng Diyos ay para sa mga may pusong, dalisay, mapagkumbaba, nagtitiwala, masunurin, at may simpleng pananampalataya, tulad ng mga bata. Hinihimok tayo ni Hesus na alisin ang ating kayabangan, pagdududa, at labis na umasa sa sarili upang tunay na matanggap ang Kanyang biyaya at pag-ibig.
Kadalasan, ang pagiging sobrang tiwala sa sarili ay nagdadala ito ng pag-aalinlangan, pagmamataas, at labis na pagtitiwala sa sarili(self sufficiency). Nakakalimutan nating umasa sa Diyos at maging masunurin sa Kanyang kalooban. Ang Ebanghelyo ay paalala ni Hesus na bumalik sa simpleng pananampalataya—isang pananampalatayang hindi nagdududa na may kababaang loob, at nagtitiwalang sumunod sa kalooban ng Diyos..
Sa Unang Pagbasa mula sa Aklat ni Sirak ay ipaalala sa atin ang ating pinagmulan at layunin bilang mga nilikha ng Diyos. Ipinapakita nito na ang tao ay hinubog mula sa alabok, subalit pinagkalooban ng Diyos ng talino, budhi, at kakayahang makilala Siya. Ipinapahayag din nito na ang Diyos ay nagbigay ng mga utos upang magabayan tayo sa matuwid na pamumuhay. Ang mensahe ng pagbasa ay isang paanyaya na gamitin natin ang ating buhay ayon sa kalooban ng Diyos, na may paggalang at pananampalataya sa Kanya.
Sa kabuuan, parehong tinuturo ng dalawang pagbasa ang tamang disposisyon ng puso sa harap ng Diyos—ang pagkilala sa ating mga limitasyon, mga kahinaan at ang ating pangangailangan sa Diyos at ang pagiging bukas sa Kanyang biyaya sa pamamagitan ng pananampalatayang may pagtitiwala at pagpapakumbaba.
Manalangin tayo. Panginoon, tulungan Mo akong magkaroon ng pusong tulad ng isang bata—mapagkumbaba, nagtitiwala, at masunurin sa Iyong kalooban. Nawa’y palagi akong lumapit sa Iyo nang may buong pananampalataya. Amen.