Podcast: Download (Duration: 8:18 — 5.9MB)
Dakilang Kapistahan ng Pagpapakita ng Panginoon
Isaias 60, 1-6
Salmo 71, 2. 7-8. 10-11. 12-13
Poon, maglilingkod sa ‘yo,
tanang bansa nitong mundo.
Efeso 3, 2-3a. 5-6
Mateo 2, 1-12
Subscribe to Awit at Papuri Communications YouTube Channel
Solemnity of the Epiphany of the Lord (White)
UNANG PAGBASA
Isaias 60, 1-6
Pagbasa mula sa aklat ni propeta Isaias
Bumagon ka, Jerusalem,
at magliwanag na tulad ng araw.
Nililiwanagan ka ng kaningningan ng Panginoon.
Mababalot ng dilim ang ibang mga bansa;
ngunit ikaw ay liliwanagan ng Panginoon
sa pamamagitan ng kanyang kaningningan.
Sa ningning ng iyong taglay na liwanag,
yaong mga bansa, sampu ng mga hari’y lalapit na kusa.
Tumingin ka sa paligid
at tingnan mo ang nagaganap.
Ang mga anak mo’y nagtitipon na upang umuwi.
Ang mga lalaki’y magmumula sa malayo,
ang mga babae’y kargang tila mga bata,
ang tanawing ito kung iyong mamalas, ikaw ay sisigla,
sa iyong damdami’y pawang kagalakan yaong madarama;
pagkat ang yaman
niyong karagata’y iyong matatamo,
at ang kayamanan ng maraming bansa
ay makakamtan mo.
Maraming pangkat na nakasakay
sa kamelyo ang darating mula sa Madian at Efa.
At sa Seba nama’y darating silang
may taglay na mga ginto at kamanyang.
Ihahayag ng mga tao ang magandang balita
tungkol sa ginawa ng Diyos.
Ang Salita ng Diyos.
SALMONG TUGUNAN
Salmo 71, 2. 7-8. 10-11. 12-13
Poon, maglilingkod sa ‘yo
tanang bansa nitong mundo.
Turuan mo yaong haring humatol ng katuwiran,
sa taglay mong katarungan, O Diyos, siya’y bahaginan;
upang siya’y maging tapat mamahala sa ‘yong bayan,
at pati sa mahihirap maging tapat siyang tunay.
Poon, maglilingkod sa ‘yo
tanang bansa nitong mundo.
Yaong buhay na mat’wid sa kanyang kapanahunan,
madama ng bansa niya at umunlad habang buhay.
Yaong kanyang kaharian ay palawak nang palawak,
mula sa Ilog Eufrates, sa daigdig ay kakalat.
Poon, maglilingkod sa ‘yo
tanang bansa nitong mundo.
Mga haring nasa pulo at naroon sa Espanya,
maghahandog ng kaloob, ihahain din sa kanya
pati yaong mga hari ng Arabia at Etiopia,
may mga kaloob ding taglay nilang alaala.
Ang lahat ng mga hari, gagalang sa harap niya,
mga bansa’y magpupuri’t maglilingkod sa tuwina.
Poon, maglilingkod sa ‘yo,
tanang bansa nitong mundo.
Kanya namang ililigtas ang sinumang tumatawag,
lalo yaong nalimot nang mga taong mahihirap;
sa ganitong mga tao siya’y lubhang nahahabag
sa kanila tumutulong, upang sila ay maligtas.
Poon, maglilingkod sa ‘yo,
tanang bansa nitong mundo.
IKALAWANG PAGBASA
Efeso 3, 2-3a. 5-6
Pagbasa mula sa sulat ni Apostol San Pablo sa mga taga-Efeso
Mga kapatid:
Marahil naman, nabalitaan na ninyong dahil sa kagandahang-loob ng Diyos ay ipinagkatiwala niya sa akin ang tungkuling ito para sa inyong kapakinabangan. Ipinahayag sa akin ng Diyos ang kanyang lihim na panukala. Ang hiwagang ito’y hindi ipinaalam sa mga tao noong mga nakaraang panahon, ngunit inihayag ngayon ng Diyos, sa pamamagitan ng Espiritu, sa kanyang mga banal na apostol at mga propeta. At ito ang lihim: sa pamamagitan ng Mabuting Balita, ang mga Hentil, tulad din ng mga Judio, ay may bahagi sa mga pagpapalang mula sa Diyos; mga bahagi rin sila ng iisang katawan at kahati sa pangako ng Diyos dahil kay Kristo Hesus.
Ang Salita ng Diyos.
ALELUYA
Mateo 2, 2
Aleluya! Aleluya!
Ang tala’y aming nakita
kaya’t kami’y nagsipunta
upang sa Poon sumamba.
Aleluya! Aleluya!
MABUTING BALITA
Mateo 2, 1-12
Ang Mabuting Balita ng Panginoon ayon kay San Mateo
Si Hesus ay ipinanganak sa Betlehem ng Judea noong kapanahunan ni Haring Herodes. Dumating naman sa Jerusalem ang ilang Pantas mula sa Silangan at nagtanung-tanong doon: “Nasaan ang ipinanganak na Hari ng mga Judio? Nakita namin sa Silangan ang kanyang tala at naparito kami upang sambahin siya.”
Nang mabalitaan ito ni Haring Herodes, siya’y naligalig, gayun din ang buong Jerusalem. Kaya’t tinipon niya ang lahat ng punong saserdote at mga eskriba sa Israel at itinanong sa kanila kung saan ipinanganak ang Mesiyas. “Sa Betlehem po ng Judea,” tugon nila. “Ganito ang sinulat ng propeta:
‘At ikaw, Betlehem, sa lupain ng Juda,
ay hindi nga huli sa mga pangunahing bayan ng Juda.
Sapagkat sa iyo lilitaw ang isang pinuno
na mamamahala sa aking bayang Israel.’”
Nang mabatid ito, lihim na ipinatawag ni Herodes ang mga Pantas at itinanong kung kailan lumitaw ang mga tala. At pinalakad niya sila patungong Betlehem matapos pabilinan ng ganito: “Humayo kayo at inyong hanaping mabuti ang sanggol. Kapag inyong natagpuan, ibalita agad ninyo sa akin upang ako may makasamba sa kanya.” At lumakad na nga ang mga Pantas. Muli silang pinangunahan ng talang nakita nila sa silangan hanggang sa sumapit ito sa tapat ng kinaroroonan ng bata. Gayun na lamang ang galak ng mga Pantas nang makita ang tala! Pagpasok sa bahay, nakita nila ang bata sa piling ng kanyang inang si Maria. Lumapit sila at nagpatirapa at sinamba ang bata. Binuksan nila ang kanilang mga sisidlan at inihandog sa kanya ang dala nilang ginto, kamanyang at mira.
Nang sila’y pabalik na, sinabi sa kanila ng Diyos sa pamamagitan ng panaginip na huwag na silang babalik kay Herodes. Kaya, nag-iba na sila ng daan pauwi.
Ang Mabuting Balita ng Panginoon.
Pages: 1 2
« Sabado, Enero 4, 2025
Sabado, Enero 6, 2025 »
{ 3 comments… read them below or add one }
PAGNINILAY: ANG DIYOS NA NAGPAPAHAYAG
Ipinagdiriwang ngayon ng ating Simbahan ang isa sa mga pinakaluma at pinakamagandang kapistahan. Ang tawag dito sa kapistahan ito ay “epipanya,” isang salita na nagmula sa wikang Griyego na nangangahulugang “pagpapakita” o “pagpapahayag”. Kaya ang pormal na tawag sa pagdiriwang na ito ay “Dakilang Kapistahan ng Pagpapakita ng Panginoon”.
Ipinapahayag sa atin ng liturhiya ngayon ang pagpapakilala ng kaligtasan ng Diyos sa sangkatauhan, hindi lang sa mga Hudyo, kundi kasama na rito ang mga Hentil. Ito ang ipinapahayag sa atin ni San Pablo sa Ikalawang Pagbasa nang tayong lahat ay hinirang ni Kristo na makibahagi sa kanyang misyon ng pagpapadala ng Mabuting Balita. Ito’y tanda na ang ating misyon ay pakikibahagi sa kalasapan ng kaluwalhatian ng buhay na walang hanggan sa langit. Kaya dati pa sa Lumang Tipan ipinahayag na ang planong pangkaligtasan ng Diyos ay para sa lahat. Sa katunayan, ipinahayag ni Propeta Isaias ang liwanag ng Panginoon na magniningning mula Jerusalem patungo sa lahat ng mga bansa, at magmumula raw sa mga iyon ang mga taong nakasakay sa mga kamelyo na dadalaw sa silayan ng liwanag.
Kaya ang Ebanghelyo ay ang pagkilala kay Hesukristo sa pamamagitan ng mga Pantas/Mago. Kilala ang mga Pantas sa kulturang popular bilang “Tatlong Hari Mago,” subalit hindi naman nabanggit sa Ebanghelyo kung sila ba’y mga hari. Ni hindi rin natin kung ano ang propesyo nila kung sila’y mga pari ng isang matandang relihiyon o ang isa sa kanila ay isang Muslim. Hindi rin nabanggit kung tatlo nga ba sila, sapagkat ang numero ay itinaya sa tatlong handog nila: ang ginto, kamanyang, at mira. Maraming mga pag-aaral kung nasaan nga ba sila nagmula, siguro sa may bandang Kalagitnaang Silangan (Middle East). Ngunit ang mahalaga ay itong mga Mago na ito ay mga dalubhasang tila nga ba’y mataas ang kanilang antas sa lipunan.
Ipinahayag din sa kanila ang karunungan ng Diyos na ilarawan ang pagsikat ng mga bituin, at isa sa mga bagong tala ay tanda ng Pagsilang ng bagong Hari. Kaya lumakbay sila mula pa sa mga malalayong lugar upang ipagpasya kay Haring Herodes Magno tungkol sa nakita nila, na hindi nila nabatid noong una ang balak ni Herodes. At matapos nito ay sinundan nila ang tala hanggang natagpuan nila ang bahay na pinatitirahan nina Birheng Maria, San Jose, at ang Sanggol na Hesus. Ayon na nga sa Ebanghelyo ay sila’y sumamba sa paanan ng Sanggol at inialay ang kanilang mga handog. Kaya matapos ito, bumalik sila sa kanilang bansa nang malaman nila ang balak ni Herodes sa bata.
Mga kapatid, ang pagdiriwang natin ng Epipanya ay may kaugnayan sa ating pagdiriwang ng Kapaskuhan at Bagong Taon. Sa pagpasok natin sa 2023, tayo rin ay patuloy na nagninilay tungkol sa kadakilaan ng Diyos na ipinakita sa Pagkatawang-tao ni Hesus. Matapos itong pagdiriwang na ito ay hindi pa natatapos ang Pasko ng Pagsilang dahil sa linggong ito ay pagninilayan pa natin ang pagpapakilala ng Panginoon (epipanya). Kaya natatapos ang mga masayang pagdiriwang sa susunod na Linggo, ang Kapistahan ng Pagbibinyag sa Panginoon. At matapos ang Pasko ay babalik po tayo sa Karaniwang Panahon. Kaya nga nawa’y makilala natin ang presensiya ng Diyos sa dakilang panahong ito upang dalhin natin ang kanyang pangalan sa ating mga ordinaryong pamumuhay.
Sa ating ebanghelyo ang katanungan natin paano kaya kung bumalik pa sila kay Herodes para ituro kung nasaan si Jesus at hiindi sila sumunod sa sinabi ng Ama? Baka tayo ngayon ay wala at baka hindi nangyari ang mga kagustuhan ng Diyos. Sa ating mga tao nais rin ng Diyos na sabihin na huwag na tayong bumalik sa mga lugar kung saan tayo ang mapapahamak, sa lugar na tayo ay masasaktan at magkakasala, sa mga gawain na maaring makapagpalayo sa atin sa kaniya at sa mga gawaing maaaring maging dahilan ng hindi pagkaganap ng kaniyang mga balak para sa atin. Sa ating mga buhay marami tayong mga ipinagtataka o katanungan, baka sinasabi natin bakit hindi ito nangyari maganda pa naman sana to, sayang naman! Baka yung mga kahilingan natin na hindi ibinibigay ng Diyos sa atin hanggang ngayon baka yan ay makakapagpahamak sa atin kaya hindi niya ibinibigay, baka no ang sagot sa atin sa ngayon. Ang nais sabihin sa atin ng Diyos sa mga panalangin na hanggang ngayon hindi pa natin nakakamtan ay “NO!, No, not now o kaya naman YES! but not now”. Umasa tayo sakaniya na didinggin niya ang ating mga panalangin sa oras at panahon na kaniyang itinakda. AMEN
PAGNINILAY:
Ang Pang-apat na Pantas
Ngayong Kapistahan ng Epipanya, ipinagdiriwang natin ang pagpapakita ng Panginoong Hesus bilang liwanag ng sanlibutan, hindi lamang sa mga Judio, kundi sa lahat ng tao, gaya ng sinisimbolo ng mga Pantas na mula sa iba’t ibang bayan. Ang kanilang paglalakbay ay tanda ng pananabik ng sangkatauhan na makilala ang Diyos, habang ang bituin na kanilang sinundan ay kumakatawan sa patnubay ng Diyos sa mga naghahanap sa Kanya.
Ang mga handog ng mga Pantas—ginto, kamanyang, at mira—ay may malalim na kahulugan:
1. Ginto – Simbolo ng pagka-hari ni Hesus. Siya ang Hari ng mga hari, ngunit ang Kanyang kaharian ay hindi makamundo, kundi espiritwal at walang hanggan.
2. Kamanyang – Simbolo ng Kanyang pagka-Diyos. Bilang Anak ng Diyos, Siya ang ating tagapagligtas na nagdudugtong sa atin sa Ama sa pamamagitan ng Kanyang panalangin at sakripisyo.
3. Mira – Simbolo ng Kanyang paghihirap at kamatayan. Ang mira ay ginagamit bilang pampahid sa mga bangkay, na nagpapahiwatig ng Kanyang misyon na magdusa at mamatay para sa kaligtasan ng sanlibutan.
Ang pagiging handang magbigay ng mga Pantas ng kanilang oras, kayamanan, at pananampalataya ay nagtuturo sa atin ng tunay na kahulugan ng pagsamba at pagbibigay ng ating sarili sa Diyos.
Ang Pang-apat na Pantas
Sa ating panahon, tayo ay ang pang-apat na pantas na patuloy na naglalakbay para hanapin ang Hari ng mga hari na walang iba kundi ang Panginoong Hesus. Sa misyon ng paghahanap kinakailangan na mayroon din tayong mga layunin at mga adhikain:
Una, sa Paghahanap sa Diyos – Tulad ng mga Pantas, sinisikap nating hanapin si Hesus sa ating pang-araw-araw na buhay. Sa ating mga panalangin, gawaing simbahan, at pagsisilbi sa kapwa, ipinapakita natin ang ating pananampalataya.
Paano ko hinahanap ang Diyos sa aking buhay? Ang mga Pantas ay naglakbay ng malayo at nagtiis ng hirap upang makita si Hesus. Tayo ba’y gumagawa ng paraan upang hanapin Siya sa ating pang-araw-araw na buhay, kahit ito’y nangangailangan ng sakripisyo?
Pangalawa, Pag-aalay ng Sarili – Ang ating mga alay ay hindi kailangang maging materyal. Maaari nating ialay ang ating mga talento, kabutihan, at sakripisyo para sa kaluwalhatian ng Diyos. Ano ang aking handog sa Diyos? Tulad ng mga Pantas, mayroon tayong maihahandog sa Panginoon: ang ating oras, talento, at kayamanan. Hindi mahalaga kung gaano ito kalaki; ang mahalaga ay mula ito sa ating pusong nagmamahal.
Sa panghuli ,Pagsunod sa Bituin – Ang “bituin” ay sumisimbolo sa patnubay ng Diyos. Ang ating pagsunod sa Kanyang kalooban, kahit mahirap ang landas, ay tanda ng ating pagiging tunay na pantas. Ang tanong, nagiging liwanag ba ako sa iba? Ang bituin ang nagbigay-gabay sa mga Pantas. Tayo, bilang tagasunod ni Kristo, ay tinatawag ding maging liwanag sa ating pamilya, komunidad, at lipunan, na nagpapakita ng pagmamahal ng Diyos sa iba.
Opo mga kapatid, maaari tayong matawag na “ika-apat na pantas” sa espiritwal na kahulugan. Ang pagiging pantas ay hindi lamang tungkol sa pagdadala ng mahalagang regalo tulad ng ginto, kamanyang, at mira. Sa ating buhay, maihahandog natin ang ating sarili, panahon, at pagmamahal bilang mga alay kay Hesus.
Bilang ika-apat na pantas, ang ating buhay mismo ang nagiging handog sa Diyos—isang patunay ng ating pag-ibig at pagsamba sa Kanya. Nawa’y ang ating paglalakbay sa pananampalataya ay maging tulad ng mga Pantas, puno ng pag-asa, pananampalataya, at kagalakan sa piling ni Kristo. Ngayong Epipanya, nawa’y matutunan nating tularan ang mga Pantas sa kanilang pananampalataya, pagsamba, at pagbibigay ng buong sarili sa Diyos.
Panalangin:
Panginoong Hesus, Ikaw ang Liwanag ng sanlibutan. Tulungan Mo kaming hanapin Ka sa aming buhay, sambahin Ka ng buong puso, at maging liwanag sa iba. Gabayan Mo kami sa tamang landas, gaya ng paggabay Mo sa mga Pantas. Amen.