Podcast: Download (Duration: 7:45 — 9.5MB)
Paggunita sa Lahat ng mga Pumanaw na Kristiyano
Mga Pagbasa para sa Unang Misa
2 Macabeo 12, 43-46
Salmo 103, 8 at 10. 13-14. 15-16. 17-18.
Panginoo’y nagmamahal
at maawain sa tanan.
Roma 8, 31b-35. 37-39
Juan 14, 1-6
Subscribe to Awit at Papuri Communications YouTube Channel
Commemoration of All the Faithful Departed (All Soul’s Day) (Violet or White)
UNANG PAGBASA
2 Macabeo 12, 43-46
Pagbasa mula sa ikalawang aklat ng Macabeo
Noong mga araw na iyon, nagpalikom si Judas, ang pinuno ng Israel, ng mga kaloob na umabot sa halagang apat na librang pilak at ipinadala sa Jerusalem upang ihandog na pantubos sa kasalanan. Ginawa ito ni Judas sapagkat naniniwala siya sa muling pagkabuhay ng mga patay. Kung hindi’y magiging kahangalan lamang ang ipanalangin pa ang mga namatay na. Dahil buo ang kanyang paniniwala na ang lahat ng namamatay na nanatiling tapat ay tatanggap ng dakilang gantimpala, ginawa niya ang paghahandog na iyon upang ang pagkakasala ng mga namatay na ito ay patawarin.
Ang Salita ng Diyos.
SALMONG TUGUNAN
Salmo 103, 8 at 10. 13-14. 15-16. 17-18.
Panginoo’y nagmamahal
at maawain sa tanan.
Kay ganda ng kalooban, mahabagin itong Diyos,
kung magalit ay banayad, kung umibig nama’y lubos.
Kung siya ay magparusa, di katumbas ng pagsuway;
di na tayo sinisingil sa nagawang kasalanan.
Panginoo’y nagmamahal
at maawain sa tanan.
Kung paano nahahabag ang ama sa anak niya
gayun siya nahahabag sa may takot sa kaniya.
Alam niya na alabok, yaong ating pinagmulan,
alam niyang babalik din sa alabok kung mamatay.
Panginoo’y nagmamahal
at maawain sa tanan.
Ang buhay ng mga tao’y parang damo ang katulad,
sa parang ay lumalago na animo ay bulaklak;
kapag ito’y nahanginan, nawawala’t nalalagas,
nawawala mandin ito at hindi na namamalas.
Panginoo’y nagmamahal
at maawain sa tanan.
Ngunit ang pag-ibig ng Diyos ay tunay na walang hanggan,
sa sinuman sa kanya’y may takot at pagmamahal;
ang matuwid niyang gawa ay wala ring katapusan.
Yaong magtatamo nito’y ang tapat sa kanyang tipan,
at tapat na sumusunod sa bigay na kautusan.
Panginoo’y nagmamahal
at maawain sa tanan.
IKALAWANG PAGBASA
Roma 8, 31b-35. 37-39
Pagbasa mula sa sulat ni Apostol San Pablo sa mga taga-Roma
Mga kapatid:
Kung ang Diyos ay panig sa atin, sino ang laban sa atin? Hindi niya ipinagkait ang sarili niyang Anak kundi ibinigay para sa ating lahat. Kung naipagkaloob niya sa atin ang kanyang Anak, hindi ba niya ipagkakaloob sa atin ang lahat ng bagay, kasama ng kanyang Anak? Sino ang maghaharap ng sakdal laban sa mga hinihirang ng Diyos, gayong ang Diyos ang nagpapawalang-sala sa kanila? Sino nga ang hahatol ng kaparusahan? Si Kristo Hesus bang nasa kanan ng Diyos? Siya pa nga ang namatay at muling binuhay, at ngayo’y namamagitan para sa atin. Sino ang makapaghihiwalay sa atin sa pagmamahal ni Kristo? Ang paghihirap ba, ang kapighatian, ang pag-uusig, ang gutom, ang kahubaran, ang panganib, o ang tabak? Hindi! Ang lahat ng ito’y kayang-kaya nating pagtagumpayan sa pamamagitan niya na nagmamahal sa atin. Sapagkat natitiyak kong ang kamatayan, ang buhay, ang mga anghel, ang mga pamunuan, ang mga bagay sa kasalukuyan, ang mga bagay na darating, ang mga kapangyarihan, ang kataasan, ang kalaliman, o ang alinmang nilalang ay hindi makapaghihiwalay sa atin sa pag-ibig ng Diyos – pag-ibig na ipinadama niya sa atin sa pamamagitan ni Kristo Hesus na ating Panginoon.
Ang Salita ng Diyos.
ALELUYA
Mateo 25, 34
Aleluya! Aleluya!
Halina at inyong kamtan
ang langit na kaharian
pamana ng Amang mahal.
Aleluya! Aleuya!
MABUTING BALITA
Juan 14, 1-6
Ang Mabuting Balita ng Panginoon ayon kay San Juan
Noong panahong iyon, sinabi ni Hesus sa kanyang mga alagad, “Huwag kayong mabalisa; manalig kayo sa Diyos at manalig din kayo sa akin. Sa bahay ng aking Ama ay maraming silid; kung hindi gayun, sinabi ko na sana sa inyo. At paroroon ako upang ipaghanda ko kayo ng matitirhan. Kapag naroroon na ako at naipaghanda na kayo ng matitirhan, babalik ako at isasama kayo sa kinaroroonan ko. At alam na ninyo ang daan patungo sa pupuntahan ko.” Sinabi sa kanya ni Tomas, “Panginoon, hindi po namin alam kung saan kayo pupunta, paano naming malalaman ang daan?” Sumagot si Hesus, “Ako ang daan, ang katotohanan, at ang buhay. Walang makapupunta sa Ama kundi sa pamamagitan ko.”
Ang Mabuting Balita ng Panginoon.
Pages: 1 2
« Sabado, Nobyembre 2, 2024
Linggo, Nobyembre 3, 2024 »
{ 4 comments… read them below or add one }
PAGNINILAY: Ang Buwan ng Nobyembre ay inilaan ng SImbahan upang gunitain ang mga mahal na yumaong sumakabilang-buhay. Subalit ngayong Ikalawang Araw ng buwang ito, naging katangi-tangi ang okayson sa Paggunita sa Lahat ng mga Pumanaw na Kristiyano, o mas kilala bilang Araw ng mga Kaluluwa. Matapos ipagdiwang ang Lahat ng mga Banal, ating inaalala ngayon ang lahat ng mga yumao at pumanaw mula sa daigdig na ito na may pananampalataya na hindi natatapos ang buhay sa Kamatayan, bagkus sa darating na buhay na walang hanggan.
Napakadaming mga Pagbasang maaring gamitin ng mga parokya na may kaugnayan sa pagdiriwang ngayon. Kaya maaring gamitin ang mga Pagbasang nakalagay sa itaas ng pahinang ito, o kaya ang iba pang pagbasang mahahanap sa Misa para sa mga Yumao. Gayunpaman, ang pinakaugat ng pagdiriwang ngayon ay tungkol sa ating paniniwala bilang mga Kristiyano hindi lang sa bagong buhay, kundi pati na rin sa pagkabuhay na mag-uli.
Hindi natatapos ang buhay sa kamatayan, kundi mayroon pag-asa ng bagong buhay hindi sa mundong ito, kundi sa kabilang banda, at iyan ay gagampanan sa pagkabuhay na mag-uli. Ayon nga sa ating Panginoong Hesukristo, ang mga mabubuti ay magkakaron ng walang hanggang buhay sa langit, at ang mga masasama naman ay magkakaroon ng walang hanggang buhay sa impiyerno. Kaya ang langit at impiyerno ay mga totoong realidad kung saan hahantong ang buhay ng tao batay sa kanyang mga gawain habang namumuhay pa. Subalit sa ating pananampalataya, naniniwala tayo na may mga taong hindi nakapagsisi sa iilang kasalanan, ngunit sila’y namuhay nang matapat. At iyan ang ating paniniwala sa Purgatoryo, na ang mga kaluluwang ito’y ating ipinapanalangin na makamtan nila ang langit balang araw sa patuloy na paglilinis.
Ang doktrina ng purgatoryo ay sinasabi raw ng ibang sekta na walang batayan sa Bibliya. Ngunit ang paglilinaw diyan ay ang salita mismo ay wala sa Banal na Kasulatan, subalit ang turo mismo ay nasa Bibliya, lalung-lalo sa 2 Macabeo 12:42-46 na kung saan niloob ng Diyos na magkaroon ng pagbabayad-puri sa mga buhay at mga patay upang sila’y mailigtas mula sa pagkakasala. Kaya mga kapatid, mahalaga na pahalagahan natin ang buhay na binigyan ng Diyos sa bawat isa. At nawa patuloy tayo sa paggawa ng tama at mabuti, lalung-lalo sa ating kapwa. Kung paano tayong nagpakita ng pagmamahal sa Diyos at sa kapwa, iyan ang magiging batayan ng pagkakamtan natin ng kaligayahan ng buhay na walang hanggan sa kalangitan.
Nawa patuloy rin tayo sa ating pagsampalataya sa pagkabuhay na muli ng nangamatay ng tao at sa buhay na walang hanggang upang balang araw tayo rin kapag mamatay ay makakasigurado sa bagong buhay na inilaan sa atin ng Panginoon.
Panginoon maraming salamat sa mga salita ta gabay mo upang kami ay makarating at makasama mo sa iyong kaharian kong saan may buhay na walang hanggan.patuloy mo nawa kaming gabayan at ituro ang daan patungo sayo na ikaw ang may likha sa amin at nagbibigay buhay.nawa sa kabila ng ng aming mga nagagawang kasalanan ay humihingi kami ng kapatawaran.at nawa patuloy mo kaming gabayan sa lahat ng mga pagsubok na aming nararanasan.dito sa mundong aming ginagalawan.all this i pray i jesus name amen.
Sa ating Ebanghelyo at Unang Pagbasa mayroon tayong mapapansin sa unang pagbasa nakarinig tayo ng mga paghahandog at sa Ebanghelyo naman sinabi na walang hindi makapupunta sa langit ng hindi sa pamamagitan ng Anak na si Jesus. Magandang palala sa atin na kung mayroon man tayong inaasam na kahit ano man yan hindi mahalaga para sa Diyos ang kung ano ang inialay mo sakaniya, pera man yan o pagkain. Ang sinasabi sa atin ng Diyos ngayon na tayo ay magkaroon palagi ng tiwala sakaniya, ang pagtitiwala natin sakaniyang kapangyarihan ang magdadala sa atin sa kaniyang kaharian at hindi ang mga alay. Sa pamamaraan ng pamumuhay ni Jesus sana ito yung masundan nating yapak at sigurado kapag atin itong sinunod dahil ito nga ang daan patungo sa Kaharian ng Ama ay tiyak na makakapasok tayo sa kaniyang Kaharian.
Amen
Ang Nobyembre 02, ay itinalaqa ng ating Simbahan bilang Araw ng Paggunita sa lahat na Pumanaw na Kristyano o Paggunita sa mga Yumao o Paggunita sa mga Kaluluwa. Anuman ang itawag natin sa petsa ng Nobyembre 02, ito ay ang paggunita natin sa lahat ng ating mga mahal sa buhay na nauna na sa atin patungo sa kabilang buhay. Pag sinabing paggunita, ito ay ang patuloy natin pakikipag-ugnayan sa mga yumao na hindi nagtapos sa araw ng kanilang kamatayan. Kaya napakahalaga na dito palang sa lupa ay may itinanim na tayong magandang relasyon sa ating kapwa na magbubuklod sa atin ng magandang ugnayan sa isa’t isa na kawangis ng pakikipag-ugnayan sa atin ng Diyos- ang ugnayang ito ay ang mga Dakilang Utos ng Pag-ibig, una, ang pag-ibig sa Diyos at ikalawa, ang pag-ibig sa kapwa na siya naman ang tema ng ipagdidiriwang ng ating Simbahan bukas Nobyembre 03.
Sa ating araw araw na paglalakbay dito sa lupa, maaring pwedeng hindi madali ang bumuo ng isang magandang ugnayan sa isa’t isa dahil sa ating unique na mga personalidad na maaring naman nating gamitin ang pagkaka- iba-ibang ito bilang kalakasan at hindi upang maging hadlang sa ating paglago ng ating pananampalataya. Sa pamamagitan nito makakamit natin ang ugnayan na may pag-ibig tulad ng ipinangaral at ipinadama sa atin ni Hesus, na bagamat may mauuna sa atin sama-sama pa din tayong magkikita sa kabilang buhay. Sapagkat sinabi ni Hesus “Sa bahay ng aking Ama ay maraming silid; kung hindi gayun, sinabi ko na sana sa inyo. At paroroon ako upang ipaghanda ko kayo ng matitirhan. Kapag naroroon na ako at naipaghanda na kayo ng matitirhan, babalik ako at isasama kayo sa kinaroroonan ko. At alam na ninyo ang daan patungo sa pupuntahan ko.”