Podcast: Download (Duration: 6:07 — 8.0MB)
PANALANGIN NG BAYAN
Ika-25 Linggo sa Karaniwang Panahon
Huwebes
Alam natin na napakaraming kasamaan sa mundo. Sa pamamagitan ng Kamatayan at Muling Pagkabuhay, nagapi ni Jesus ang kasamaan. Manalangin tayo sa Ama upang magwagi ang kabutihan.
Panginoon, dinggin Mo ang aming panalangin.
o kaya
Sinagan nawa kami ng Iyong liwanag, O Panginoon.
Ang Simbahang naglalakbay nawa’y magbigay ng liwanag sa mga tao para baguhin ang kanilang pamumuhay sa pamamagitan ng tapat na pagsaksi kay Kristo sa kanilang salita at gawa, manalangin tayo sa Panginoon.
Ang mga bansa nawa’y isuko ang walang saysay na pagkakaroon ng makapangyarihan at mapanirang gamit pandigmaan at sa halip mamuhay sila nang sama-sama, mapayapa at nagkakasundo, manalangin tayo sa Panginoon.
Ang mga inuusig dahil sa kanilang paniniwala nawa’y magtagumpay na makamit ang kanilang kalayaan, manalangin tayo sa Panginoon.
Ang mga maysakit at may kapansanan nawa’y tumangaap ng kalinga ng pag-ibig ng Diyos mula sa mga nag-aaruga sa kanila, manalangin tayo sa Panginoon.
Ang mga yumao nawa’y makalaya na sa mga kaguluhan ng mundong ito at magkamit ng walang hanggang kapayapaan, manalangin tayo sa Panginoon.
Ama naming Diyos, patuloy mo kaming hilumin sa lahat ng kasamaan at hayaan mo na ang iyong kabutihan ang patuloy na magliwanag sa amin sa kapangyarihan ni Jesu-Kristo na aming Panginoon. Amen.
Pages: 1 2
« Miyerkules, Setyembre 23, 2026
Biyernes, Setyembre 25, 2026 »
{ 2 comments… read them below or add one }
PAGNINILAY: Ang Ebanghelyo ngayon ay isang pagkakaduda ni Haring Herodes Antipas tungkol kay Hesus. Matapos niyang pinugutan ng ulo si San Juan Bautista, marami siyang nababalitaang kababalaghang nagawa ng isang lalaking nangangalang Hesus. Isang usapan din ang kanyang narinig na binuhay niya raw ito ang kanyang pinsan na si Juan. Kaya biglang nagkaroon ng interes ang hari kay Hesus, matapos niyang pinahintulot ang pagpapatay kay Juan. Kaya’t tinawag siya ng Panginoon na “soro” dahil sa ugali niyang mapilyo. At nang siya’y ibinigay ni Pilato sa hari para sa hatol nito dahil narinig na si Hesus na kinondena ng Sanhedrin ay taga-Galilea, pinagtawanan lamang ni Herodes ang Panginoon at sinuotan ng isang lilang damit na panghari. Kaya’t nagkabati sina Herodes at Pilato sapagkat nagkasundo sila na walang salang mahanap sa Panginoon, ngunit ang mga sumusunod na pangyayari ay bahagi na ng kasaysayan.
Makikita natin ang plastik na ugali ng Haring Herodes Antipas. Magkaiba siya sa kanyang tatay na si Haring Herodes Magnus na ipinaslang nito ang napakaraming sanggol sa Bethlehem, maliban kay Hesus (Cf. Mateo 2:16-18). Kaya itong si Herodes ay parang naaliw sa pangangaral ni San Juan Bautistang nakakulong sa selda ng palasyo, kahit pinagsabihan siya ni Juan na nakikiapid kay Reynang Herodias, ang dating asawa ng kanyang kapatid na si Felipe. Subalit nang hilingin ng kanyang balaeng si Salome ang ulo ni San Juan Bautista, dito siya’y napagbigay kahit alam niya ang katuwiran ng Diyos na mayroon ang propetang iyan, at pinugutan ito ng ulo. Tapos nang iniharap sa kanya ng mga punong saserdote, Pariseo, at esrikba si Hesus, ibinalik ito kay Pilato na isakdal nito ang kaso sapagkat wala siyang nakikitang kasalanan sa inaakusa. Mayroong kontradiksyon sa pang-uugali ni Herodes na minsan nagiging plastik ang pagpapakita ng kabutihan sa ibang tao.
Kaya nga ang Mangangaral na si Kohelet sa Unang Pagbasa ay nagsasabi na walang kabuluhan ang buhay na ito, ang buhay kung saan masyadong kapit ang tao sa mga makamundong bagay. Minsan tayo rin ay nagigipit sa ganyan klaseng pamumuhay dahil ang mga makamundong bagay ay hindi natin ginagamit nang wasto upang iako ang ating kapwa sa kanilang pangangailangan, pisikal man o espirituwal. Pilit nating umaasenso para sa sariling kapakanan, ngunit minsa’y nakakalimutan natin ang ating pagkaroon ng awa sa ibang tao, lalung-lalo na ang mga nasa mababang estado. Kaya itong hamon sa atin na isabuhay natin nang husto ang ating pananampalataya sa Panginoon sa isip, salita, at gawa. Huwag nating tularan ang mga Herodes na akalaing mayaman ang kabanalan, ngunit nagpapakataas laban sa ibang tao.
Sa ating mga pagbasa makikita natin na ayon rin sa kasulatan na walang permanente. Lahat naglalaho, lahat nawawala ngunit may isa lamang na hindi nawawala at naglalaho yan ay walang iba kundi ang ating Diyos. Sa ating unang pagbasa narinig natin na walang mahalang bagay, walang permanente lahat ay pansamantala lang. Nawa sa ating pagninilay ngayon ay magkaroon tayo ng realisasyon sa mga bagay na dapat na nating bitawan, na dapat na nating tanggapin na pansamantala lang at hindi permanente. Sa mundo walang permanente ngunit sa Diyos mayroon, permanenteng pagmamahal sa bawat isa sa atin at permanenteng pagiging mapagmahal at maawin. Nawa tayo rin ay maging mga permanenteng mapagmahal sa ating kapwa ng sa gayon ay permanenteng manahan sa ating puso gayundin sa ating kapwa ang ating Panginoong si Jesus. AMEN