Podcast: Download (Duration: 5:15 — 3.8MB)
PANALANGIN NG BAYAN
Dakilang Kapistahan ng Pagkahari ng Panginoong Hesukristo sa Sanlibutan (B)
Patnubay sa Misa
Hangad nating mapagharian tayo ni Hesus na hinirang ng Ama bilang Hari ng Sanlibutan. Tigib ng pananalig at pagmamahal sa Amang Makapangyarihan, ating sambitin:
Makapangyarihan at maluwalhating Diyos, dinggin mo ang aming panalangin!
Para sa mga namumuno sa Simbahan, upang mapagsikapan nila nang buong sigasig na mapaghari si Hesus saanman at kailanman, manalangin tayo sa Panginoon!
Para sa lahat ng mga pari at mga namanata sa Diyos, upang maging tunay ang kanilang pagsisikap na mapaghari si Hesus sa kanilang mga sarili at sa lahat ng taong kanilang pinaglilingkuran, manalangin tayo sa Panginoon!
Para sa mga namumuno sa ating bansa, upang mabatid nilang ang kanilang pagsisikap na maayos at mapaunlad ang daigdig na ito ay isang paghahanda para sa paghahari ni Hesus sa sanlibutan sa wakas ng panahon, manalangin tayo sa Panginoon!
Para sa mga taong nag-aalinlangan sa paghahari ni Kristo, upang kanilang matantong siya ang itinalaga ng Ama para mapag-isa ang lahat ng nilalang sa Kaharian ng Diyos, manalangin tayo sa
Panginoon!
Para sa ating lahat na nagkakatipon sa huling Linggong ito ng Taon ng Simbahan, upang hayaan
nating maghari si Hesus sa ating buhay, sa ating mag-anak, saanman at kailanman, manalangin tayo sa Panginoon!
Para sa mga magulang na nagluluksa sa pagkamatay ng kanilang anak: nawa’y makatagpo sila ng suporta mula sa kanilang pamayanan at makatanggap ng kapayapaan at katiwasayan mula sa Espiritu Santo Manalangin tayo!
Ama naming maluwalhati at makapangyarihan, ginawa mo si Kristo bilang Hari ng Sanlibutan. Isugo mo sa amin ang iyong Banal na Espiritu upang kami ay sumampalatayang matibay at makasama sa paghahari magpakailanman ng iyong Anak, na si Hesukristong aming Panginoon. Amen!
Pages: 1 2
« Sabado, Nobyembre 23, 2024
Lunes, Nobyembre 25, 2024 »
{ 2 comments… read them below or add one }
PAGNINILAY: Ipinagdiriwang ngayon ng buong Simbahan ang huling Linggo ng Taong Pangliturhiya sa Dakilang Kapistahan ng Pagkahari ni Hesukristo sa Sanlibutan. Ito’y itinatag ni Papa Pio XI noong 1925 bilang tugon sa mga umuusbong na ideolohiya katulad ng sekularismo, kapitalismo, komunismo, sosyalismo, atbp. Ito’y pagpapahayag na sa kabila ng mga naghahari-harian sa pulitika, ekonomiya, at iba pang mga komunidad, si Hesus ay mananatiling tunay na Hari na ang kanyang kaharian, ang Kaharian ng Diyos Ama, ay mabubuhay kailanman. Dati ay ipinagdiriwang ang Kapistahan ni Kristong Hari tuwing huling Linggo ng Oktubre. Subalit nang sumapit ang Ikalawang Konseho ng Vatikano, inilipat ang pagdiriwang sa huling Linggo ng Kalendaryo ng Simbahan bilang pagpaparangal kay Kristo na Hari matapos pagnilayan ang kanyang buhay mula Adbiyento hanggang Karaniwang Panahon.
Kaya makikita natin sa liturhiya ngayon ang paghahari ng ating Panginoong Hesukristo na ibinigay sa kanya ng Ama dahil sa kanyang pagiging masunurin sa dakilang kalooban. Ang Una at Ikalawang Pagbasa, pati na rin ang Salmo, ay nagsasabi na ang Kristong Hari ay maluwalhati, nakadamit na parang maharlika ang dating, at nakapiling ang mga anghel sa langit. Ang Ebanghelyo ay nagsasaad na si Kristo ay Hari ng Katotohanan. Katotohanan ay naging dahilan ng pagbibigay-saksi niya sa Mabuting Balita, na bagamat siya ay pinagbintangan ng mga pinuno ng mga Hudyo at idinala kay Poncio Pilato, siya pa rin ay may dalang katotohanan na ang kanyang Kaharian ay hindi nasa lupa, kundi ito ay nasa langit. Kaya mahalaga dito sa pagkilos ng Panginoon ang pagiging masunurin sa kalooban ng Ama kahit siya’y namatay sa Krus. Dahil sa kanyang kababang-loob, siya’y idinakila ng Diyos at ginawang Hari ng lahat ng mga bansa at lahat ng mga nilalang.
Kaya ang ating buhay bilang mga Kristiyano ay napapabilang sa kaharian niya. Nang siya’y nabubuhay pa, nagkuwento siya ng mga talinghaga tungkol sa paglalago ng Kaharian ng Diyos. Sabi ni Hesus na ito’y katulad ng isang butil na mustasa na bagamat pinakamaliit ay nagbunga sa pinakamalaking punongkahoy ng paninirahan ng mga ibon. At marami pa ibang imahe na ginamit si Hesus upang ilarawan ang paglaganap ng kanyang Paghahari, na siya mismong Paghahari ng Diyos. Kaya ang hamon sa atin sa Dakilang Kapistahan ito na tanggapin natin si Hesukristo bilang Hari ng ating buhay. Tanggapin din natin ang ating Diyos Ama at ang kanyang kaharian sa pamamagitan ng pakikibahagi sa paglalago nito. Kung nasaan ang pag-ibig, katarungan, at kapayapaan, naroroon ang paghahari ng Panginoon dito sa lupa, at ito sana’y balang araw makikita natin sa langit. Hesus aming Hari, Guro’t Pari, maghari ka nawa sa aming mga puso.
Viva Cristo Rey!!
Ipinagdiriwang ngayon ng buong sangkatoliko ang Kristong Hari.
Tuwing tayo ay nagdarasal ng Ama Namin ipinapanalangin natin na “Mapasaamin nawa amg kaharian, sundin ang loob mo dito sa lupa para ng sa langit”. Dinadalangin natin na nawa’y maghari sa atin ang Panginoon. Pero sa atin bang mga ikinikilos, sinasabi at iniisip ay nakikita ni Hesus na nais nating maghari sya sa buhay natin. “Sundin ang loob mo”, sinusunod ba natin ang kanayang kalooban, amg mga kautusan? Baka nman dasal tayo ng dasal ng Ama Namin pero taliwas ito sa ating gawain. Baka nman hanggang ngayon ay hindi mo napapatawad ang iyong kapatid, ipinagdarasal mo na may mangyaring masama sa iyong kapwa, hindi mo tinutulungang ang mga aba, nakikiapid ka at matakaw sa pita ng laman, chismosa at magilig pag usapan at husgahan ang iba, mandaraya at sinungaling. Ngayong Kristong Hari ay paghariin mo sa puso mo si Hesus, samantalahin mo ang parating na Adviento upang paghandaan ang kanyang pagdating. Magsisi, humingi ng kapatawaran at sikaping matalikuran na ang kasamaan.
Viva Cristo Rey!!!