Podcast: Download (Duration: 7:13 — 9.0MB)
Martes ng Ika-22 Linggo sa Karaniwang Panahon (II)
1 Corinto 2, 10b-16
Salmo 144, 8-9. 10-11. 12-13ab. 13kd-14
Mat’wid ang Poong dakila
sa lahat ng kanyang gawa.
Lucas 4, 31-37
o kaya
Misa para sa Pangangalaga sa Sangnilikha
Subscribe to Awit at Papuri Communications YouTube Channel
Tuesday of the Twenty-second Week in Ordinary Time (Green)
Ipagdiriwang ang Misa para sa Pangangalaga sa Sangnilikha sa Linggo, Setyembre 6, 2026 bilang pagsunod sa CBCP Pastoral Letter about Creation Day General Instruction. Kung nais pa ring gamitin ang itinakdang pagbasa sa ORDO 2026 ngayon, tingnan ang pahina para sa Misa para sa Pangangalaga sa Sangnilikha. Sumangguni sa inyong lokal na patakaran para sa angkop na pagbasa.
UNANG PAGBASA
1 Corinto 2, 10b-16
Pagbasa mula sa unang sulat ni Apostol San Pablo sa mga taga-Corinto
Mga kapatid, nasasaliksik ng Espiritu ang lahat ng bagay, maging ang pinakamalalim na panukala ng Diyos. Walang nakaaalam sa iniisip ng isang tao maliban sa kanyang sariling espiritu. Gayun din naman, walang nakaaalam sa mga iniisip ng Diyos maliban sa Espiritu ng Diyos. Hindi ang espiritu ng sanlibutan kundi ang espiritu ng Diyos ang tinanggap natin upang ating maunawaan ang mga kaloob niya sa atin.
Sa mga nagtataglay ng Espiritu, ang ipinaliliwanag nami’y mga katotohanang espirituwal; mga pananalitang turo ng Espiritu at hindi ayon sa karunungan ng tao ang ginagamit namin. Sapagkat ang taong di nagtataglay ng Espiritu ay ayaw tumanggap ng mga kaloob mula sa Espiritu ng Diyos. Para sa kanila, kahangalan ang mga iyon at di nila mauunawaan, sapagkat ang mga bagay na espirituwal ay mauunawaan lamang sa paraang espirituwal. Nauunawaan ng taong nagtataglay ng Espiritu ang kahalagahan ng bawat bagay, ngunit walang nakauunawa sa kanya. Ganito ang nasasaad sa Kasulatan,
“Sino ang nakaaalam ng pag-iisip ng Panginoon?
Sino ang makapagpapayo sa kanya?”
Ngunit ang pag-iisip ni Kristo’y taglay natin.
Ang Salita ng Diyos.
SALMONG TUGUNAN
Salmo 144, 8-9. 10-11. 12-13ab. 13kd-14
Mat’wid ang Poong dakila
sa lahat ng kanyang gawa.
Ang Panginoong D’yos ay puspos ng pag-ibig at lipos ng habag,
banayad magalit, ang pag-ibig niya’y hindi kumukupas.
Siya ay mabuti at kahit kanino’y hindi nagtatangi;
sa kanyang nilikha, ang pagtingin niya ay mamamalagi.
Mat’wid ang Poong dakila
sa lahat ng kanyang gawa.
Magpupuring lahat sa iyo, O Panginoon, ang iyong nilalang;
lahat mong nilikha ay pupurihin ka’t pasasalamatan.
Babanggitin nilang tunay na dakila ang ‘yong kaharian,
at ibabalitang tunay kang dakila’t makapangyarihan.
Mat’wid ang Poong dakila
sa lahat ng kanyang gawa.
Dakila mong gawa’y upang matalastas ng lahat ng tao,
mababatid nila ang kadakilaan ng paghahari mo.
Ang paghahari mo’y sadyang walang hanggan, hindi magbabago.
Mat’wid ang Poong dakila
sa lahat ng kanyang gawa.
Di ka bibiguin sa mga pangako pagkat ang Diyos ay tapat,
ang kanyang ginawa kahit ano ito ay mabuting lahat,
Siya’y tumutulong sa lahat ng tao na may suliranin;
yaong inaapi’y inaalis niya sa pagkagupiling.
Mat’wid ang Poong dakila
sa lahat ng kanyang gawa.
ALELUYA
Lucas 7, 16
Aleluya! Aleluya!
Narito at dumating na
isang dakilang propeta
sugo ng Diyos sa bayan n’ya
Aleluya! Aleluya!
MABUTING BALITA
Lucas 4, 31-37
Ang Mabuting Balita ng Panginoon ayon kay San Lucas
Noong panahong iyon, nagpunta si Hesus sa Capernaum, Galilea. Nagturo siya sa mga tao nang Araw ng Pamamahinga at nagtaka sila sa kanyang pagtuturo, sapagkat may kapangyarihan kung siya’y magsalita. Naroon sa sinagoga ang isang lalaking inaalihan ng demonyo o isang masamang espiritu. Sumigaw siya nang malakas: “Ano ang pakialam mo sa amin, Hesus na taga-Nazaret? Naparito ka ba upang puksain kami? Alam ko kung sino ka ikaw ang Banal ng Diyos.” Subalit pinagwikaan siya ni Hesus, “Tumahimik ka! Lumayas ka sa taong iyan!” At sa harapan ng lahat, ang tao’y inilugmok ng demonyo at iniwan nang hindi man lamang sinaktan. Nanggilalas silang lahat at nasabi sa isa’t isa, “Anong uri ng pangungusap ito? Makapangyarihan at mabisa! Pinalalayas niya ang masasamang espiritu, at sumusunod naman sila!” At kumalat ang balita tungkol kay Hesus sa buong lupaing iyon.
Ang Mabuting Balita ng Panginoon.
Pages: 1 2
« Lunes, Agosto 31, 2026
Miyerkules, Setyembre 2, 2026 »
{ 5 comments… read them below or add one }
PAGNINILAY: Maraming mga impluwensiya at kapangyarihan ang napapalibot sa ating mundo ngayon. Ang tao nais magkaroon ng pagkakilanlan sa karamihan upang ipakita na siya’y namumuno sa isang grupo. Ganun rin ang nakikita natin sa mga bansa na anumang sistema ng gobyerno ay ang mga nasa pinakamataas na posisyon ang kinikilala na may panunungkulan sa pagtatakbo ng isang bansa.
Ngunit sa ating Ebanghelyo (Lucas 4:31-37), si Hesus ay kilala sa kanyang ikalawang tahanan, Capernaum, bilang isang propeta, hindi katulad ng pagtanggi sa kanya ng mga kababayan sa Nazaret (Ebanghelyo kahapon). Sa Araw ng Pamamahinga, pumunta siya sa isang sinagoga at diyan ay nagturo tungkol sa Paghahari ng Diyos. At may isang lalaking inaalihan ng masasamang espiritu ang lumapit kay Hesus, at nakilala agad ng demonyo na itong si Hesus ay ang Anak ng Diyos, kaya siya’y natakot at malakas na tinanong kung ano ang gagawin niya sa kanya. At siya’y pinalayas ng Panginoon mula sa taong iyon, at ang lahat ay namangha sapagkat hindi lang siya mayroong higit pang awtoridad kaysa sa mga eskriba, kundi ang kanyang mga mabubuting gawain ay tunay na dakila.
Makikita natin dito kung paano kinikilala ng mga taga-Capernaum si Hesus bilang propeta at sa iba bilang tunay na Mesiyas, ang Anak ng Diyos. Ganun rin sa ating buhay na kung tayo’y nananalig kay Kristo, matatagumpayan natin ang mga tukso at kasamaan na taliwas sa kalooban ng Diyos Ama. At kung tayo rin ay gagawa ng kabutihan nang may kababaang-loob at dalisay na puso, mananaig rin ang kabutihan sa ibang tao upang magkaroon pa ng mga biyaya at higit sa lahat ang pangako ng buhay na walang hanggan sa Kaharian ng Langit.
At sa Unang Pagbasa (1 Corinto 2:10b-16), tayo’y hinihikayat ni San Pablo na tanggapin ang Espiritu Santo na siyang gumagabay sa atin upang makilala natin ang mga bagay na mula sa Panginoon at sundin ang kanyang kalooban.
MAGNILAY: Kaya nagwawagi ang demonyo sa atin ay dahil pinapakita nating takot tayo sa kaniya. Kapag may tuksong dumating nanginginig agad ang tuhod natin. Pinapahalata nating wala tayong kompiyansa. Pinapahiwatig din nating interesado tayo na patukso. Bagama’t alam natin na mali pero hindi agad natin tinatakwil. Nagpapatumpik-tumpik pa tayo. Binibigyan pa natin ng puwang ang demonyo para makatukso pa. Nakikipaglaro pa tayo sa kanya. Kaya naman madalas mahulog tayo sa kanyang patibong. Tinatawanan lang tayo ng demonyo tuwing pinapakita nating wala tayong buto, walang paninindigan, walang determinasyon.
Tulad ng Panginoon sa harap ng demonyo utusan agad natin itong lumayas! Sa unang sandali pa lang ng tukso may kombiksyon agad nating palayasin ang demonyo. Huwag nang makipaglaro pa. Mga anak tayo ng Diyos kay Kristo Hesus. Templo tayo ng Espiritu Santo. May awtoridad tayong palayasin ang demonyo. Utusan natin siya at hindi tayo ang uutusan. Palayasin agad natin siya upang hindi na makasulong pa ng panunukso sa atin. Kung hindi natin ito gagawin nang may paninindigan paglalaruan lang niya tayo. Magiging sa kanya ang huling halakhak.
Itigil na natin ang kasasabi na mahina lang tayo bilang tao. Huwag na nating ikatwiran na hindi natin kaya. Marupok tayo. Pinapalala lang natin ang kawalan natin ng kompiyansa. Pinalakas na tayo ng Diyos kay Hesuskristo. Mga binyagan na tayo at nakumpilan pa. Nagkokomunyon tayo lagi. Ang mga dasal natin ay pawang lakas na baon natin laban sa tukso at demonyo. Maniwala kang kaya mo. Manalig kang malakas ka. Huwag lalampa-lampa. Huwag kakaba-kaba. Buong tapang mong utusan siya: Lumayas ka!
MANALANGIN: Panginoon, dagdagan mo ang aking tapang labanan ang demonyo at ang kanyang panunukso.
GAWIN: Mag-ipon ng lakas laban sa tukso sa pamamagitan ng walang patid na pananalangin, pagninilay ng salita ng Diyos at pagtanggap ng mga Sakramento.
Nakapagbahagi ka na ba ng isang bagay na kapanapanabik bago mo talaga ito naisip?
Nabubuhay tayo sa isang mundong mabilis ang takbo. Ang balita ay kumakalat sa loob ng ilang segundo, at palagi tayong hinihikayat na tumugon. Ngunit ang pananampalataya ay lumalago sa ibang bilis.
Sa Ebanghelyo ngayon, ang mga tao ay namangha kay Hesus dahil nagtuturo Siya nang may awtoridad. Mabilis na kumakalat ang balita tungkol sa Kanya, ngunit si Hesus ay hindi lamang naparito upang humanga sa mga tao. Naparito Siya upang akayin sila sa pananampalataya.
Minsan ang pinakamahalagang bagay na magagawa natin ay hindi ang mabilis na tumugon, kundi ang huminto, magnilay-nilay, at makinig sa sinasabi ng Diyos.
Ang pananampalataya ay lumalago sa mga tahimik na sandali kapag hinahayaan nating mag-ugat ang Salita ng Diyos sa ating mga puso.
PAGNINILAY
Lucas 4, 31-37
“Makapangyarihan at mabisa ang kanyang pangungusap!”
Sa Ebanghelyo ngayon, namangha ang mga tao kay Hesus sapagkat may kapangyarihan ang Kanyang Salita. Hindi lamang Siya nagsasalita upang magturo; ang Kanyang Salita ay kumilos, nagpalaya, at nagwawasak sa kapangyarihan ng kasamaan. Sa isang utos lamang—“Tumahimik ka! Lumayas ka!”—napilitang umalis ang masamang espiritu.
Dito natin nakikita na ang Salita ng Diyos ay hindi simpleng mga salita lamang. Ito ay Salitang may kapangyarihang lumikha, magpagaling, magtuwid, magpalaya at magbigay-buhay. Kapag tunay na tinanggap sa puso, ang Salita ng Diyos ay nagiging liwanag na nagpapalayas sa anumang kadiliman.
Hindi maaaring sabay na mamayani sa puso ang Diyos at ang kasamaan. Kung saan tunay na naghahari ang Diyos, walang puwang ang kasamaan; at kung sadyang binibigyan natin ng puwang ang kasamaan, unti-unti nating itinataboy ang Diyos sa ating buhay. Hindi maaaring pagsabayin ang liwanag at kadiliman, katotohanan at kasinungalingan, pag-ibig at poot, pagpapatawad at paghihiganti.
Ngunit mahalagang maunawaan: ang pakikipaglaban sa kasamaan ay hindi nangangahulugang pakikipaglaban sa taong nagkamali. Ang Diyos ay nagmamahal sa tao ngunit kinasusuklaman ang kasalanan. Kaya ang tunay na Kristiyano ay hindi dapat maging instrumento ng galit, paghuhusga o pagkamuhi, kundi instrumento ng Salita, katotohanan at pag-ibig ni Kristo.
THEOLOGICAL INSIGHT
Si Hesus ang Salitang naging tao. Ang Kanyang kapangyarihan ay kapangyarihan ng Diyos mismo. Sa Kanya, ipinakikita na ang kasamaan ay hindi kailanman kapantay ng Diyos. Sa harap ng kapangyarihan ni Kristo, ang kasamaan ay kailangang umatras.
PUSO NG EBANGHELYO
Kapag pinaghahari natin si Kristo sa ating puso, kailangang magkaroon ng lakas ng loob na paalisin ang anumang hindi mula sa Diyos.
ARAL KATEKISMO
Ang kasalanan ay hindi dapat paglaruan o pagbigyan. Ang tunay na kalayaan ay hindi paggawa ng lahat ng gusto natin, kundi pagpili sa mabuti at pagtanggi sa masama.
PAGSASABUHAY
Tanungin natin ang ating sarili: Ano ang patuloy kong binibigyan ng puwang na unti-unting nagpapalayo sa akin sa Diyos—galit, inggit, kasinungalingan, pride, paghihiganti, o kawalan ng pagpapatawad?
Ngayong araw, hayaan nating magsalita ang Salita ng Diyos sa ating buhay. Kung may bahagi ng ating puso na pinaghaharian ng kadiliman, buong pagpapakumbaba nating sabihin: “Panginoong Hesus, maghari Ka sa akin. Alisin Mo sa akin ang anumang hindi nagmumula sa Iyo.”
HAMON NG EBANGHELYO
Huwag lamang makinig sa Salita ng Diyos—hayaan itong magkaroon ng kapangyarihan sa ating buhay.
WORD OF THE DAY
KAPANGYARIHAN NG SALITA
Ang Salita ni Kristo ay hindi salita lamang na naririnig ng ating mga tainga. Ito ay Salitang may kapangyarihang kumilos sa ating puso at buhay—magbigay-liwanag sa gitna ng kadiliman, magpalakas sa gitna ng tukso, magtuwid sa ating maling landas, at magpalaya sa atin mula sa anumang hindi naaayon sa panukala ng Diyos.
PANALANGIN:
Panginoong Hesus,
hayaan Mong ang Iyong Salita ang maging liwanag sa aking kadiliman, lakas sa aking kahinaan, at gabay sa aking mga pagpapasya. Bigyan Mo ako ng tapang na talikuran ang masama at panindigan ang mabuti. Maghari Ka sa aking puso, sapagkat alam kong kung Ikaw ang naghahari, walang puwang ang kasamaan.
Amen.
Praise God! Alleluia! Amen!
To God be the highest glory now and forever. Amen.
Pagninilay:
Mapagpalang Martes sa ating lahat! Sa ating Ebanghelyo ngayon, ang pagpapalayas ni Hesus sa mga demonyo ay nagdulot na ang mga tao na nasa sinagoga ay namangha at nataka sa kapangyarihan at awtoridad na mayroon ang ating Panginoong Hesus sa pagpapalayas ng mga masasamang espiritu. Hindi lamang ito pagkamangha. Bagkus, matapos nilang makita ang mga himala ni Hesus, sila ay nagtanong, katulad ng “Ano na ang gagawin natin matapos makita ito?” Noong nakita ng mga tao ang banal na awtoridad na mayroon ang ating Panginoon, ang awtoridad na ito ay hindi lamang limitado sa Kanyang ginagawa. Sa halip, ito ay nagdudulot sa mga tao na makita ang kahalagahan ng pagsunod kay Hesus na kalooban ng Diyos sapagkat Siya’y nagmula sa itaas. Ang “exorcisms” na ginagawa ng ating Panginoong Hesus ay pagpapakita ng mensaheng dumating na ang Kaharian ng Diyos at Siya ay dumating upang iligtas tayo mula sa masama, sa demonyo na nagnanais na ilayo tayo sa Panginoon. Ayon sa Katekismo ng Simbahang Katolika, “Jesus’ exorcisms free some individuals from the domination of demons. They anticipate Jesus’ great victory over ‘the ruler of this world’” (CCC 550).
Dahil sa kapangyarihan ni Hesus at sa Kanyang pag-ibig matapos ialay ang Kanyang Sarili sa krus para sa ating kaligtasan, tayo ay nabiyayaan na matanggap ang Espiritu Santo, na nagmula sa itaas, hindi ang espiritu ng mundo. Kung tayo ay sumusunod sa yapak ni Hesus at sa Kanyang kalooban, ito ay nangangahulugang hinahayaan natin na ang ating buhay ay nakabase sa inspirasyon ng Espiritu ng Diyos at hindi sa tukso ng demonyo o kaya sa mga maling ideolohiya sa mundo. Ang mga nagpapadala sa espiritu ng mundo ay nagdudulot na hindi malaman ng mga tao ang katotohanan mula sa Diyos, na nagiging dahilan upang maligaw ang ilan sa plano ng Diyos para sa ating lahat. Sa kabila nito, nais ipaalala sa atin ni Kristo na kung tayo ay sumusunod sa Espiritu Santo bilang mga disipulo ni Hesus, mahalagang makita natin ang kahalagahan ng purong pananampalataya kung saan ginagawa natin ang tama dahil ito ang kalooban ng Diyos, hindi dahil sa “pleasure” na nakukuha natin sa paggawa ng tama. Tulad ng isang nanay na nag-aalaga sa isang anak, sa umpisa ay nakakatanggap ang sanggol ng gatas at buhat-buhat sa kanyang mga kamay, ngunit habang lumalaki ang bata, nagkakaroon na ito ng “maturity” at natututong maglakad at hindi na umaasa sa gatas.
Sa simula ng pagsunod natin kay Hesus, marahil makaranas tayo ng pagkamangha kay Hesus at makatanggap ng mga “consolations” o magagandang pakiramdam, ngunit hindi tayo dapat umasa rito. Darating ang panahon na sa pagsunod natin kay Hesus, hindi na tayo makakatanggap ng “consolations.” Darating ang panahon na makakaranas tayo ng mga problema at pagsubok na magdudulot sa atin na sagutin ang tanong, “Susunod lamang ba ako sa Diyos dahil masarap sa pakiramdam o susunod ba ako sa Kanya dahil ito ang tama kahit mahirap ito?” Mahalagang makita rin natin na ang presensya ng Diyos sa ating buhay at pagprotekta sa atin laban sa mga tukso ng demonyo ay hindi lamang sa malalaking bagay tulad ng kaligtasan at pag-iwas sa mabibigat na kasalanan. Ang pagsunod natin sa ating Panginoong Hesus ay nararapat na makita sa lahat ng aspeto ng ating buhay, kahit sa mga bagay na tila simple lamang, tulad ng pagiging masipag sa trabaho at sa pag-aaral. Ang pagiging masipag sa trabaho at sa pag-aaral ay paraan upang sa ating simpleng buhay ay sundin natin ang tinatahak ni Hesus na sakripisyo sapagkat dito ay naipapakita natin ang ating pagmamahal para sa mga taong dahilan kung bakit tayo nagtatrabaho at nag-aaral.
Sa simpleng pamamaraan ay ipinapakita natin na handa tayong maging instrumentong Diyos para sa pag-unlad ng ating pamilya at ng bayan, ngunit kung magpapadala tayo sa ninanais ng isipan na intensyonal na tamarin o hindi seryosohin ang ating ginagawa, marahil magbubukas ito ng oportunidad para sa mga demonyo na paunti-unti ay sirain ang relasyon sa pagitan ng mga magkakapamilya. Gayundin, tulad ng kung paanong ang pagpapalayas ni Hesus sa mga demonyo ay imbitasyon upang maging bukas ang mga tao sa konsensya kung ano ang gagawin nila, tayo rin ay tinatanong ni Hesus. Matapos Niyang baguhin ang ating buhay, handa na ba tayong ibigay ang buong sarili natin sa Kanya? Handa na ba tayong gawing Siya ang sentro ng ating buhay? Kung oo, agad tayong lumapit sa Kanya, lalo na sa Banal na Eukaristiya sa Adoration Chapel, hindi lamang upang tayo ay maproteksyunan mula sa demonyo, kundi upang maipakita natin sa Kanya ang ating pagmamahal dahil Siya ang unang nagmahal sa atin. Nawa’y palalimin natin ang ating paggalang sa Diyos habang kinikilala natin ang Kanyang katarungan at pagmamahal upang tayo ay laging ligtas sa pamamagitan ng mapagmahal na pangangalaga ng ating Panginoon. Amen. +
Pagninilay ni: CJTH
Pagbasa: Awit at Papuri Communications
What Catholics Believe:
https://www.catholic.com/tract/pillar-of-fire-pillar-of-truth
Ultimate Catholic Parents Guide:
https://youtube.com/watch?v=Ls6IcexZAls
Examination of Conscience and Guide to Confession:
https://mycatholic.life/catholic-prayers/examination-of-conscience/
Website of a Catholic Convert from atheism (Saint Beluga) on God and Catholic Miracles:
https://www.saintbeluga.org/