Podcast: Download (Duration: 8:59 — 7.0MB)
PANALANGIN NG BAYAN
San Pedro at San Pablo
Ilapit natin ang ating mga kahilingan sa Ama nang may pananampalatayang katulad ng kina San Pedro at San Pablo, ng pananampalatayang katulad ng sa mangingisda kung kanino itinatag ang Simbahan, at ng pananampalataya ng guro ng napakaraming bansa.
Panginoon, dinggin mo ang aming panalangin.
o kaya
Panginoon, maging bato ka nawa namin.
Ang Santo Papa Francisco, ang kahalili ni San Pedro, nawa’y hawakan ang mga susi ng Kaharian nang may karunungan at pag-ibig, manalangin tayo sa Panginoon.
Ang mga misyonero sa mga lupaing banyaga nawa’y magkaroon ng sigasig ni San Pablo sa paghahatid ng Mabuting Balita, manalangin tayo sa Panginoon.
Ang ating pananampalataya nawa’y mahalin natin at maging handang magbahagi nito sa iba, manalangin tayo sa Panginoon.
Ang mga nagdurusa dahil sa kanilang pananampalataya nawa’y makatagpo ng lakas sa dugong ibinuhos ng mga Apostol, manalangin tayo sa Panginoon.
Ang mga namayapang tapat sa Panginoon nawa’y gawing karapat-dapat sa korona ng kabanalan, manalangin tayo sa Panginoon.
Makapangyarihang Diyos at Ama, dinggin mo ang mga panalangin ng pamayanang ito na natitipon ayon sa pananampalataya ng mga Apostol at natutulungan ng kanilang pamamagitan. Hinihiling namin ito sa pamamagitan ni Kristo na aming Panginoon. Amen.
Pages: 1 2
« Linggo, Hunyo 28, 2026
Martes, Hunyo 30, 2026 »
{ 2 comments… read them below or add one }
PAGNINILAY: Ipinagdiriwang ngayon ng buong Simbahan ang Dakilang Kapistahan nina Apostol San Pedro at Apostol San Pablo. Sila ang itinuturing na “mga haligi ng Simbahan”. Ang Simbahang itinatag ni Kristo ay nakatayo sa kanilang mga ministeryo. Si San Pedro ay may hawak ng susi bilang kapangyarihan ng Simbahahan ng pagpapahintulot at pagbabawal ng mga kaluluwa. Si San Pablo ay may hawak na espada bilang awtoridad ng Salita ng Diyos na nahahayag sa bawat gawain ng Simbahan.
Kapwa silang inatasan ni Kristo upang maging mga pastol ng Simbahan: si Pedrong kumakatawan sa mga sumusunod na Santo Papang namumuno sa buong Simbahan, at si Pablong kumakatawan sa mga Obispong nakaatasang mamastol sa iba’t ibang teritoryong pang-Simbahan. At mula sa Santo Papa at mga Obispo naman ay humihirang sa mga Pari at Diyakono upang maglingkod at mamuno sa mga Kristiyanong komunidad. Makikita natin ang kahalagahan ng “Apostolic Sucession” na nagpapatunay sa isa sa apat na marka ng Simbahang itinatag ni Kristo: ang ‘Apostolika’.
Narinig natin sa mga Pagbasa ang naging buhay nina San Pedro at San Pablo para sa Simbahan, Lalung-lalo na sa Ebanghelyo, nang dahil sa matatag na pananampalataya ni San Pedro na si Hesus ay ang Kristo at Anak ng Diyos, ipinangako niya na itatayo niya ang Simbahan sa pundasyon ng bato. Ang batong ito ay nagbibigay-kahulugan sa pangalan ni Pedro bilang “Petrus” sa Griyego o “Cephas” sa Aramaiko. Itong batong ito ay sumasagisag din sa pananampalataya ng bawat taong nanalig sa iisang Diyos na Tatlong Persona. Kaya ganito katatag ang ating Simbahan, dala na rin ang pangako ni Kristo na hindi kailanman mawawasak ang anumang masamang puwersa.
Kaya sa Dakilang Kapistahang ito, itinuturo sa atin na mahalin natin ang Simbahang ating ikinabibilang. Sa tulong nina San Pedro at San Pablo, nawa’y mas makilala natin si Kristo sa bawat miyembro ng kanyang Katawan, ang Sambayanan ng Diyos.
MAGNILAY: Bilang mga haligi kinakatawan nina San Pedro at San Pablo ang panloob at panlabas na buhay ng Simbahan.
Si San Pedro ang kumakatawan sa panloob. Siya ang tagapangalaga ng pagkakaisa ng Simbahan bilang komunidad. Siya ang bato na sandigan ng pananampalataya ng mga kapatid sa Simbahan. Minana ng Santo Papa ang tungkuling ito hanggang ngayon. Siya ang kahalili ni San Pedro.
Si San Pablo naman ang nanguna upang lumabas ang Simbahan sa kanyang sarili upang abutin ang lahat ng tao. Siya ang unang misyonero na tumupad sa atas ni Hesus na gawing alagad niya ang lahat ng bansa. Umiiral ang Simbahan hindi para sa kanyang sarili lamang kundi para sa buong mundo.
Parehong mahalaga ang panloob at panlabas na buhay ng Simbahan. Dapat panatilihin ang pagkakaisa sa loob ng Simbahan ngunit upang lumabas lamang siya sa kanyang sarili at abutin at pag-isahin ang lahat ng tao kay Hesus.
MANALANGIN: Panginoon, patibayin mo ang Simbahan bilang instrumento ng pagkakaisa at kaligtasan sa mundo.
GAWIN: Abutin mo ang mga kapatid mo sa loob at labas ng Simbahan.