Podcast: Download (Duration: 5:36 — 7.5MB)
Martes ng Ika-16 na Linggo sa Karaniwang Panahon (II)
o kaya Paggunita kay San Lorenzo ng Brindisi, pari at pantas ng Simbahan
Mikas 7, 14-15. 18-20
Salmo 84, 2-4. 5-6. 7-8
Pag-ibig mo’y ipakita,
iligtas kami sa dusa.
Mateo 12, 46-50
Subscribe to Awit at Papuri Communications YouTube Channel
Tuesday of the Sixteenth Week in Ordinary Time (Green)
or Optional Memorial of St. Lawrence of Brindisi, Priest and Doctor of the Church (White)
UNANG PAGBASA
Mikas 7, 14-15. 18-20
Pagbasa mula sa aklat ni propeta Mikas
Patnubayan mo ang iyong bayan, Panginoon, ang bayan na iyong hinirang. Nag-iisa siya sa gitna ng matabang lupain. Bayaan mo silang manirahan sa magandang pastulan ng Basan at Galaad.
Magpakita ka sa amin ng mga kababalaghan tulad noong ilabas mo sa Egipto ang iyong bayan.
Wala nang ibang Diyos na tulad mo. Pinatatawad mo ang mga kasalanan ng nalabi sa bayan mong hinirang. Hindi ka nagkikimkim ng galit. Sa halip ay ipinadarama mo sa kanila ang tapat mong pagmamahal. Muli kang mahahabag sa amin, lilimutin mo ang mga pagkakasala namin at ihahagis sa kalaliman ng dagat. Ipamamalas mo ang iyong katapatan sa Israel at ang walang maliw na pag-ibig sa angkan ni Abraham, gaya ng iyong ipinangako sa aming mga magulang mula pa nang unang panahon.
Ang Salita ng Diyos.
SALMONG TUGUNAN
Salmo 84, 2-4. 5-6. 7-8
Pag-ibig mo’y ipakita,
iligtas kami sa dusa.
Ikaw, O Poon, naging mapagbigay sa iyong bayan,
pinasagana mo’t muling pinaunlad ang bansang Israel.
Yaong kasamaan ng mga anak mo’y nilimot mong tunay,
pinatawad sila sa nagawa nilang mga kasalanan.
Ang taglay mong poot sa ginawa nila’y iyo nang inalis,
tinalikdan mo na at iyong nilimot ang matinding galit.
Pag-ibig mo’y ipakita,
iligtas kami sa dusa.
Kaya naman, Poon, ibalik mo sana ang iyong paglingap,
ang pagkamuhi mong aming nadarama’y limutin nang ganap.
Ang pagkagalit mo at poot sa ami’y wala na bang hanggan?
Di na ba lulubag, di na matatapos ang galit mong iyan?
Pag-ibig mo’y ipakita,
iligtas kami sa dusa.
Ibangon mo kami, sana’y ibalik mo ang nawalang lakas,
at kaming lingkod mo ay pupurihin ka na taglay ang galak.
Kaya ngayon, Poon, ipakita mo na ang pag-ibig mong wagas.
Kami ay lingapin at sa kahirapan ay iyong iligtas.
Pag-ibig mo’y ipakita,
iligtas kami sa dusa.
ALELUYA
Juan 14, 23
Aleluya! Aleluya!
Ang sa aki’y nagmamahal
tutupad sa aking aral.
Ama’t ako’y mananahan.
Aleluya! Aleluya!
MABUTING BALITA
Mateo 12, 46-50
Ang Mabuting Balita ng Panginoon ayon kay San Mateo
Noong panahong iyon, samantalang nagsasalita pa si Hesus, dumating ang kanyang ina at mga kapatid. Naghihintay sila sa labas at ibig siyang makausap. May nagsabi sa kanya, “Nasa labas po ang inyong ina at mga kapatid, at ibig kayong makausap.” Ngunit sinabi ni Hesus, “Sino ang aking ina, at sinu-sino ang aking mga kapatid? Itinuro niya ang kanyang mga alagad at sinabi, “Ito ang aking ina at mga kapatid! Sapagkat ang sinumang sumusunod sa kalooban ng aking Amang nasa langit ang siya kong ina at mga kapatid.”
Ang Mabuting Balita ng Panginoon.
Pages: 1 2
« Lunes, Hulyo 20, 2026
Miyerkules, Hulyo 22, 2026 »
{ 4 comments… read them below or add one }
Pagninilay: Ang ating Ebanghelyo ay paalala sa atin kung paano tayo’y tinatawag bilang Sambayanan ng Diyos. Nang sabihin ng isang tao na dumating ang ina at kapatid ni Hesus sa labas ng bahay, tila nga bang nagtaka ang Panginoon kung sino ang kanyang mga ina at kapatid. Ang mga kapatid na itinutukoy dito ay galing sa salitang Griyego na ‘aldephoi’ na nangangahulugang “kamag-anak” o kaya mga anak ng isa pang babaeng nangangalang Maria. At itinuro niya ang kanyang mga alagad at tagasunod bilang ina at kapatid. Hindi ninanais ni Hesus na magkumpara ng kahit sinong indibidwal, ni hindi niya tinatanggihan ang kanyang lahing dugo. Ang ginagawa niya ay palawakin ang Pamilya ng Diyos na kanyang Ama sa pakakasiguro na sinumang sumusunod at tumutupad sa kalooban ng Ama ay ang kanyang ina at mga kapatid. Ang ating Mahal na Birheng Maria ay isa sa mga mabubuting huwaran ng pagtatalima sa Diyos sa pamamagitan ng kanyang pananampalataya, kababaang-loob, at pagiging masunurin.
Ipinahayag ni Propetang Mikas sa Unang Pagbasa ang mga kadakilaan ng Panginoong Diyos katulad ng paglikas ng kanyang bayang Israel mula sa pagkaalipin sa Egipto. Ang pagiging matapat ng Panginoon sa kanyang mga pangako ay ang kanyang katapatan na gabayan ang mga taong nananalig sa kanya at sumusunod sa kanyang mga utos. Kaya bilang mga Kristiyano, nawa’y makilala natin kung gaanong matapat ang Panginoon sa ating mga buhay, at bilang pagpapasalamat at pagpupuri sa kanya, nawa’y patuloy tayong maging masunurin at matapat sa kanyang dakilang kalooban upang palagi tayong mabibilang sa kanyang Sambayanang umaasa sa kaluwalhatian ng langit. At ang pagsunod sa kanya ay may kasamang kaakibat ng tama at mabubuting gawain sa ibang tao.
Patnubayan mo ang buong bansa, Panginoon, at
Magpakita ka sa amin ng mga kababalaghan tulad noong ilabas mo sa Egipto ang iyong bayan maghimala ka Panginoon sa bawat isa sa amin na nakakaranas ng pagsubok lalo na ang buong Mundo Panginoon.
MAGNILAY: Si Maria at ang mga kamag-anak ni Hesus na nasa labas ay kumakatawan sa lahat sa atin. Taga-labas tayo hangga’t hindi tayo tumutupad sa kalooban ng Diyos. Kahit mismong mga kadugo ni Hesus ay hindi ligtas sa kondisyong ito. Naging kapamilya lang silang tunay noong sandaling tumupad sila sa kalooban ng Diyos. Si Maria ay Ina ng Manunubos hindi lang dahil siya ang nagsilang kay Hesus kundi siya mismo ay naging perpektong alagad at tagasunod ng sarili niyang anak.
MANALANGIN: Panginoon, tulungan mo kaming makapasok sa loob ng iyong pamilya sa pamamagitan ng pagtupad namin ng kalooban ng Diyos sa aming buhay.
GAWIN: Laging timbangin kung kalooban nga ng Diyos ang bawa’t desisyon at hakbangin mo sa buhay.
PAGNINILAY
Ang ating “lumang” pag-iisip ay kailangan nating kumita ng sapat na mga puntos o merito upang ipagpalit para sa ating tiket sa langit. Ang katotohanan ay wala tayong magagawa upang maging karapat-dapat sa kaloob ng kaligtasan at matalik na pagkakaisa sa Diyos. Ito ay dalisay na kaloob sa bahagi ng Diyos. Kapag nalaman na natin ang kagandahang-loob ng ating Diyos, dapat nating naisin na gawin ang hinihiling ng Diyos sa atin upang ipakita ang ating pagpapahalaga at pasasalamat sa Diyos para sa kagandahang- loob na ipinagkaloob sa atin ng Diyos. Habang lalo nating hinahangad na umangkop sa plano ng Diyos para sa ating buhay at sa buhay ng mga nakapaligid sa atin, mas mararanasan natin ang pagiging malapit ng Diyos sa atin. Kapag nakalimutan natin ang tungkol sa labis na bukas-palad at mapagmahal na kabaitan ng Diyos sa atin, nauuwi tayo sa pagtutuon ng pansin sa ating sarili at “nakakaligtaan natin ng pamantayan” (nagkakasala tayo). Ngunit, ang ating mapagmahal na Diyos ay handang kunin ang ating mga kasalanan at itapon ang mga ito sa kailaliman ng dagat kung saan hindi na sila ilabas muli.
Ang dahilan kung bakit si Maria ang pinakamalapit na tao kay Hesus ay hindi dahil mayroon Siya ng kanyang mga lahi, ngunit ganap at lubos niyang hinangad na gawin ang ipinagagawa sa kanya ng Diyos.
Panginoong Hesus, nawa’y pagsikapan naming tularan ang ugali ng Inang Maria at madama namin na mapalad kung marinig namin ang mga salitang binibigkas para sa amin: “Sinumang gumagawa ng kalooban ng Aking Ama sa langit ay aking kapatid na lalaki at babae.” Amen.
***