Lunes, Agosto 22, 2022

August 22, 2022

Paggunita sa Pagka-reyna ng Mahal na Birheng Maria

2 Tesalonica 1, 1-5. 11b-12
Salmo 95, 1-2a. 2b-3. 4-5

Sa lahat ay pinahayag,
gawa ng Poong nagligtas.

Mateo 23, 13-22

o kaya Mga Pagpipiliang Pagbasa

Isaias 9, 1-6
Salmo 112, 1-2. 3-4. 5-6. 7-8

Ngalan ng D’yos ay idangal
ngayon at magpakailanman.

Lucas 1, 39-47


Subscribe to Awit at Papuri Communications YouTube Channel

Memorial of the Queenship of Mary (White)

Mga Pagbasa mula sa
Lunes ng Ika-21 Linggo sa Karaniwang Panahon

UNANG PAGBASA
2 Tesalonica 1, 1-5. 11b-12

Ang simula ng ikalawang sulat ni Apostol San Pablo sa mga taga-Tesalonica

Mula kina Pablo, Silas, at Timoteo – Sa simbahan sa Tesalonica – mga hinirang ng Diyos Ama at ng Panginoong Hesukristo:

Sumainyo nawa ang pagpapala at ang kapayapaan ng Diyos Ama at ng Panginoong Hesukristo.

Dapat kaming magpasalamat sa Diyos tuwina dahil sa inyo, mga kapatid. Matuwid na gawin namin ito sapagkat patuloy na tumatatag ang inyong pananalig kay Kristo at patuloy ring umaalab ang inyong pagmamahal sa isa’t isa. Ipinagmamalaki namin kayo sa lahat ng kaanib sa simbahan ng Diyos dahil sa inyong pananampalataya at pagtitiis, sa kabila ng mga pag-uusig at mga kahirapang dinaranas ninyo.

Ito ang katunayan ng makatarungang hatol ng Diyos: na kayo’y ariing karapat-dapat sa kanyang kaharian na siyang dahilan ng inyong pagtitiis.

Nawa’y maging karapat-dapat kayo sa pagkatawag niya sa inyo. At ipagkaloob nawa niya sa inyo sa pamamagitan ng kanyang kapangyarihan ang lahat ng mabuti ninyong hangarin at lubusin ang inyong mga gawang bunga ng pananampalataya. Kung magkagayon, mabibigyan ninyo ng karangalan ang pangalan ng ating Panginoong Hesus, at kayo naman ay bibigyan din ng karangalan ayon sa kagandahang-loob ng Diyos at ng Panginoong Hesukristo.

Ang Salita ng Diyos.

SALMONG TUGUNAN
Salmo 95, 1-2a. 2b-3. 4-5

Sa lahat ay pinahayag,
gawa ng Poong nagligtas.

Purihin ang Panginoon, awitan ng bagong awit;
Panginoo’y papurihan nitong lahat sa daigdig!

Sa lahat ay pinahayag,
gawa ng Poong nagligtas.

Awitan ang Panginoon, ngalan niya ay purihin;
araw-araw ang ginawang pagliligtas ay banggitin.
Kahit saa’y ipahayag na ang Poon ay dakila,
sa madla ay ipahayag ang dakila niyang gawa.

Sa lahat ay pinahayag,
gawa ng Poong nagligtas.

Ang Poon ay tunay na dakila, marapat na papurihan
higit sa sinumang diyos, siya’y dapat katakutan.
Ang diyos ng sanlibuta’y pawang mga diyus-diyosan;
ang Poon lang ang may likha ng buong sangkalangitan.

Sa lahat ay pinahayag,
gawa ng Poong nagligtas.

ALELUYA
Juan 10, 27

Aleluya! Aleluya!
Ang tinig ko’y pakikinggan
ng kabilang sa ‘king kawan,
ako’y kanilang susundan.
Aleluya! Aleluya!

MABUTING BALITA
Mateo 23, 13-22

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus, “Sa aba ninyo, mga eskriba at mga Pariseo! Mga mapagpaimbabaw! Hinahadlangan ninyo ang mga tao upang hindi sila mapagharian ng Diyos. Ayaw na ninyong pasakop sa paghahari ng Diyos, hinahadlangan pa ninyo ang ibig pasakop!

“Sa aba ninyo, mga eskriba at mga Pariseo! Mga mapagpaimbabaw! Inuubos ninyo ang kabuhayan ng mga babaing balo, at ang sinasangkalan ninyo’y ang pagdarasal nang mahaba! Dahil dito’y lalo pang bibigat ang parusa sa inyo!

“Sa aba ninyo, mga eskriba at mga Pariseo! Mga mapagpaimbabaw! Nilalakbay ninyo ang karagatan at ginagalugad ang buong daigdig, makahikayat lamang kayo ng kahit isang Hentil sa pananampalatayang Judio. At kung mahikayat na’y ginagawa ninyong masahol pa kaysa inyo, kaya’t nagiging ibayo ang dahilan para siya’y parusahan sa impiyerno.

“Sa aba ninyo, mga bulag na taga-akay! Itinuturo ninyo na kung ipanumpa ninuman ang templo, walang anuman ito, ngunit kung ang ipanumpa ay ang ginto ng templo, dapat niyang tuparin ang kanyang sumpa. Mga bulag! Mga hangal! Alin ang mas mahalaga, ang ginto o ang templong nagpapabanal sa ginto? Sinasabi rin ninyo na kung ipanumpa ninuman ang dambana, walang anuman ito, ngunit kung ang ipanumpa ay ang handog na nasa dambana, dapat niyang tupdin ang kanyang sumpa. Mga bulag! Alin ba ang mas mahalaga, ang handog o ang dambanang nagpapabanal sa handog? Kaya nga, kapag ipinanumpa ninuman ang dambana, ipinanunumpa niya iyon at ang lahat ng handog na naroon. Kapag ipinanumpa ninuman ang templo, ipinanunumpa niya iyon at ang tumatahan doon. At kapag ipinanumpa ninuman ang langit, ipinanunumpa niya ang trono ng Diyos at ang nakaluklok doon.”

Ang Mabuting Balita ng Panginoon.

PANALANGIN NG BAYAN

Pages: 1 2

Mga Pagbasa Kahapon
«
Mga Pagbasa Bukas
»

{ 5 comments… read them below or add one }

Mark Jefferson Criste July 31, 2022 at 9:12 pm

Salamat sa Diyos!

Reply

Reynald Perez August 22, 2022 at 2:53 am

PAGNINILAY: Sa Mateo 23:1-12, na binasa noong Sabado, narinig natin kung paanong tinuligsa ng Panginoong Hesus ang mga eskriba at Pariseo dahil sa ugaling pagkukunwari. Sila’y tinuturing na hindi isinasabuhay ang kanilang pinaparangal na mga salita.

Ngayong araw, muli tinuligsa ni Hesus ang mga pinuno ng mga Hudyong ito. Tinawag silang mga mapagimbabaw sapagkat mapagkunwaring banal, ngunit may mga pasang binibigay sa kanilang mga kapwang Hudyo. Sila rin ay tumatanim ng masasamang loob ng kasahulan kapag nag-aanyaya ng mga Hentil na umanib sa kanilang relihiyon. Isa pang panunuligsa ng Panginoon ay ang paggalang ng mga eskriba at Pariseo sa ginto ng Templo kaysa sa Templo mismo bilang tahanan ng Panginoon at trono ng kanyang luklukan.

Makikita natin dito ang ugali ng ilang tao na nakatuon palagi sa mga makamundong bagay katulad ng kayamanan, malakas ng impluwensiya higit sa ibang tao, at ang pagpapakita di umano ng kabanalang pakunwari lamang, at iba pang kasamaan. Minsan may mga natatago tayong sikretong ugali depende sa konteksto at taong ating kinakausap. Sa pagsuot natin ng mga maskara ng buhay, hindi nating akalain na alam ng Panginoon ang ating mga tunay na pamumuhay, kahit mabubuti ito o masasama. Kaya’t hindi nating kailangan itago ang ating mga kahinaan o kaya’t magpakunwari na mabuti sa ibang tao, samantala masama naman sa iba pang tao.

Ngunit ang panawagan sa atin ay maging mga mabubuting Kristiyano na kapag tayo ay may mabubuting relasyon sa Panginoon, sikapin din nating patatagin ang mabuting relasyon na iyon sa ibang kapwa. Huwag po nating pagsamantalahin ang ibang tao na tila nga ba’y ipinagmumukha natin na tayo’y mas mabuti daw, at sila raw ay masasama. Nawa’y patuloy tayo sa paggawa ng matuwid at mabuti sa ibang tao, upang ang mga magandang gawain natin ay kanilang isasabuhay para sa ikakarangal ng ating Panginoon.

Reply

Awit at Papuri Communications August 22, 2022 at 5:41 am

Maraming salamat po sa walang sawang pagbabahagi ng inyong pagninilay. Patuloy nawa kayong pagpalain ng ating Panginoon.

Reply

Rosalinda Jubilado August 22, 2022 at 8:25 am

Ang ating Inang Maria ay isang regalo sa atin at magandang huwaran nating mananampalataya. Ina siya ng Diyos pero ni walang bahid ng makamundong pamumuhay niya dito sa mundo at pagsasamantala sa pagkapili sa kanya bilang Ina ng ating Panginoong Jesus. Naging masunurin
siya sa ating Ama. Ika nga ng ating Inang Maria … LIVE ONLY FOR TODAY , DO NOT WORRY FOR TOMORROW FOR TOMORROW WILL WORRY ITSELF.
Ang mga tao sa mundong ito ay abalang abala sa makamundong bagay. Hindi ko sinasabing ayaw kong magkaroon ng kayamanan ngunit sinasabi ng Panginoon ay unahin nating pagtuunan ng panahon ang pinagmumulan ng lahat ng ito.. ANG ATING PANGINOON.
Dahil kung unahin natin Siya, ang lahat ng hinahangad natin ay ipagkakaloob Niya sapagkat ibig ng Diyos na Siya ang ating napaparangalan sa mga blessings na kaloob Niya.
At kung unahin natin Siya
(Kilalanin natin siya, establish an intimate relationship sa Kanya) then anything na gagawin na natin ngayon ay according to His Holy Will na. Ayaw ng Panginoon na may higit tayong pinagtutuunan sa araw araw nating buhay bukod sa Kanya.
Kaya ipanalangin natin ang mga mayayaman na maging generous sa ating mga kapatid na mahihirap at maligtas din sila tulad ng ating pagsusumidhing makasunod sa Kanyang Banal na Kalooban. Ika nga sa nasusulat, the greater the blessings the greater the responsibilities lies on our shoulders.
Ganon din ang mga pinagkatiwalaan Niyang mga workers ng Kanyang Pamahalaan. Siya ang nagtatag ng bawat Pamahalaan. Nawa silang mga workers ay tapat sa kanilang tungkuling ipinagkatiwala sa kanila ng Panginoon at walang bahid ng pagsasamantala na yumaman sa kanilang posisyon kundi magmalasakit din sila sa ating bayan at mamamayan tulad ng pagmamalasakit ng ating Diyos sa Kanyang bayan.
Sumaatin nawa ang paghahari ng ating Panginoon.

Reply

Francisco R. Azupardo August 22, 2022 at 7:35 pm

Pinupuri ka namin Panginoong Hesukristo. Aleluya. Amen

Reply

Cancel reply

Leave a Comment



Previous post:

Next post: