Podcast: Download (Duration: 7:37 — 5.4MB)
PANALANGIN NG BAYAN
Patnubay sa Misa
Ika-17 Linggo sa Karaniwang Panahon
Ginaganyak tayo ng pagdiriwang ng Linggo ng Misyong Pilipino at ng mga pagbasa ngayon upang ibahagi natin sa ating kapwa ang mga biyayang kaloob sa atin ng Panginoon. Hilingin natin sa Panginoong buksan ang ating mga puso sa mga pangangailangan ng ating kapwa. Manalangin tayo:
Panginoong Hesus, dinggin mo ang aming panalangin!
Nawa maging laging nakatuon ang Simbahan sa mga pangangailangan ng mahihirap at magsikap na mapabuti ang kanilang kalagayan. Manalangin tayo!
Nawa gamitin ng mga Katolikong mayayaman ang kanilang kakayahan at impluwensiya alang-alang sa pagkakaisa ng mga dukha’t kapus-palad. Manalangin tayo!
Nawa lahat ng mga misyonero: pari, madre, relihiyoso, at boluntaryong laiko ay maging kapani-paniwalang patotoo sa Ebanghelyo sa kani-kanilang pinaglilingkuran. Manalangin tayo!
Nawa lahat ng ating mga misyonerong may sakit o pinanghihinaan ng loob ay makatagpo ng kailangan nilang lakas at kasiyahan sa biyaya ng Diyos at ating pakikipagkaisa. Manalangin tayo!
Nawa makatulong ang lahat ng Katolikong Pilipino sa pangangaral sa mundo sa pamamagitan ng kanilang dasal, mabuting halimbawa, at masiglang pagtulong sa lahat ng misyonero. Manalangin tayo!
Tahimik nating ipanalangin ang ating mga pansariling kahilingan. (Tumigil saglit.)
Manalangin tayo!
Panginoong Hesus, pagpalain mo ang mga misyonero nang makita nila ang bunga ng kanilang pagsisikap. Patugunin mo kami sa mga pangangailangan ng aming mga kapatid, at gawin mo kaming mga kasangkapan ng iyong mapagpalang pagmamahal sa kanila. Ikaw na nabubuhay at naghahari magpakailanman.
Amen!
Pages: 1 2
« Sabado, Hulyo 24, 2021
Huwebes, Hulyo 29, 2021 »
{ 3 comments… read them below or add one }
PAGNINILAY: Ang teleserye natin mula ngayong Linggo hanggang sa susunod na 4 na Linggo ay hango mula sa Ika-6 na Kabanata ng Ebanghelyo ni San Juan. Dito inilalarawan ang ating Panginoong Hesukristo bilang Tinapay ng Buhay. At nagsisimula ang teleseryeng ito sa Pagpapakain ni Hesus sa 5,000 Tao (5,000 lalaki sapagkat hindi po binibilang ang mga kababaihan at kabataan).
Ang kababalaghang ito ay may pinagmulang ugat sa Unang Pagbasa. Isang lalaki ay naghandog kay Propetang Eliseo ng 20 piraso ng tinapay upang pakainin sa madla, ngunit tinanggi ito ng alipin ng propeta sapagkat 100 ang bilang ng mga tao. Ngunit inituos ni Eliseo na pakainin ang mga tao ng tinapay, at hindi akalain na ipinarami ng Panginoong Diyos ang 20 piraso sa 100, at sila,y nabusog.
Ayon naman sa Ebanghelistang si San Juan, si Hesus ay tunay na Tao at tunay na Diyos. Siya’y Taong totoo sapagkat alam niya na malayong pinanggalingan ang madlang dumulog sa bundok, kaya’t pinaghanapan niya ang mga Apostol ng pagkain. At ipinakita nga ni Andres ang isang batang lalaki na may dalang 5 tinapay at 2 isda. Siya’y Diyos na totoo sapagkat ipinamalas niya ang kapangyarihan ng pagpaparami sa dalawang pagkain, at iniutos niya ang mga Apostol na ipamigay sa mga tao. Sabi naman ng ibang eksperto ng Bibliya ay pinaghahati-hati lamang niya ang mga tinapay at isda upang pakainin ang mga tao. Ngunit hindi dapat malawa sa ating pananampalataya ang paniniwala tungkol kay Kristo bilang Tao at Diyos. Kung pinaghati-hati niya ang mga ito, paano ba natin maipapaliwanag ang 12 bakol ng tirang pagkain? Ito’y patunay na pagpapalain ng Diyos ang mga tao nang higit pa sa mapupuno ng isang tao.
Tuwing ipinagdiriwang natin ang Banal na Eukaristiya, tayo’y pinabubusog ni Hesukristo sa pamamagitan ng pag-aalala ng pagbabahagi ng kanyang sarili na ating ginugunita sa pagsasalo ng Tinapay na kanyang Katawan at ang Alak na kanyang Dugo. At ito rin ay hamon sa ating buhay na katulad ni Kristong nag-alay ng kanyang buhay upang tayo’y maging mga anak ng Diyos, tayo rin ay magbahagi ng mga bagay at pagpapalang mayroon tayo sa iba’t ibang tao, lalung-lalo na sa mga nangangailangan. Tularan natin ang batang nagbahagi ng 5 tinapay at 2 isda nang ang mga ito’y ipinamalas ni Hesus ang kapangyarihan ng Diyos sa pagpaparami ng mga ito upang ang higit sa 5,000 tao ay mabusog. Kahit malaki o maliit lang ang mayroon tayo, kung may pagtitiwala tayo sa Panginoon sa ating pagbabahagi ay magkakaroon ng higit pa sa sapat na pagtugon sa bawat pangangailangan ng tao.
Maraming salamat po sa pagbabahagi ng Salita ng Diyos. Ito ay malaking tulong sa mga hindi makakapunta sa Simbahan upang makiisa sa pagdiriwang ng Banal na Misa
Pagpalain at ingatan kayo ng Panginoon sa lahat ng sandali, sa bawat panahon.
Sa ating ebanghelyo ngayon, tunay ngang walang imposible sa Diyos kung nais nya. Ano ang nais iparating sa atin nito? Kay Hesus tayo umasa at hindi sa tao, ano man ang iyong pangangailangan, kahilingan o matagal ng panalangin, darating ito, ibibigay ito ng Diyos, hindi man sa oras na gusto natin pero siguradong darating, sa oras na loob ni Hesus. Ito ay kung nananalig ka. Kaya’t kapag ikaw ay nagdasal at humiling, wag ka ng mangamba, ibigay mo na sa kanya ang lahat ng iyong tiwala at maghintay. Pero habang ikaw ay naghihintay sa pagdinig ng iyong kahilingan, aba, gampanan mo nman ang dapat mong gawin, ito ay ang pagsisisi sa kasalanan, paghingi ng tawad, at pagtalikod sa masasamang gawi. And it will surely comes, if only you believe.