Podcast: Download (Duration: 6:27 — 4.6MB)
Martes sa Ika-6 na Linggo ng Pasko ng Pagkabuhay
Mga Gawa 16, 22-34
Salmo 137, 1-2a. 2bk-3. 7k-8
Ligtas ako sa ‘yong piling,
lakas ko’y sa ‘yo nanggaling.
Juan 16, 5-11
Subscribe to Awit at Papuri Communications YouTube Channel
Tuesday of the Sixth Week of Easter (White)
UNANG PAGBASA
Mga Gawa 16, 22-34
Pagbasa mula sa Mga Gawa ng Mga Apostol
Noong mga araw na iyon, dinaluhong sina Pablo at Silas ng mga tao, at matapos pahubaran ng mga pinuno, sila’y paulit-ulit na ipinahagupit, saka ipinabilanggo at pinabantayang mabuti. Ipinasok sila ng batay sa kaloob-looban ng bilangguan at ipinangaw ang mga paa.
Nang maghahatinggabi na, sina Pablo at Silas ay nananalangin at umaawit ng mga imno, at nakikinig naman ang ibang mga bilanggo. Di-kaginsa-ginsa’y lumindol nang napakalakas, anupat nayanig pati ang mga pundasyon ng bilangguan. Pagdaka’y nabuksan ang mga pinto, at nakalag ang mga tanikala ng mga bilanggo. Napabalikwas ang bantay-bilangguan at nang makitang bukas ang mga pinto, hinugot ang kanyang tabak at tangkang magpakamatay sa akalang nakatakas ang mga bilanggo. Ngunit sumigaw si Pablo, “Huwag mong saktan ang iyong sarili! Narito kaming lahat!” Humingi ng ilaw ang bantay, patakbong pumasok at nanginginig na nagpatirapa sa harapan nina Pablo at Silas. Inilabas niya ang mga ito at sinabi, “Mga ginoo, ano po ang dapat kong gawin upang ako’y maligtas?” Sumagot sila, “Sumampalataya ka sa Panginoong Hesus, at maliligtas ka – ikaw at ang iyong sambahayan.” At ang salita ng Panginoon ay ipinahayag nila sa kanya at sa lahat ng nasa kanyang bahay. Nang gabi ring iyon, hinugasan ng bantay ang kanilang mga sugat, at nagpabinyag siya pati ang buo niyang sambahayan. Pagkatapos, sila’y isinama niya sa kanyang tahanan at hinainan ng pagkain. Galak na galak siya at ang kanyang buong sambahayan, sapagkat sila’y natutong sumampalataya sa Diyos.
Ang Salita ng Diyos.
SALMONG TUGUNAN
Salmo 137, 1-2a. 2bk-3, 7k-8
Ligtas ako sa ‘yong piling,
lakas ko’y sa ‘yo nanggaling.
o kaya: Aleluya!
Ako, Poon, buong pusong aawit ng pasalamat,
sa harap ng mga anghel, pupurihin kitang ganap.
Sa harap ng iyong templo ay yuyuko at gagalang,
pupurihin kita roon, pupurihin ang ‘yong ngalan.
Ligtas ako sa ‘yong piling,
lakas ko’y sa ‘yo nanggaling.
Dahilan sa pag-ibig mo at sa iyong katapatan,
ika’y tunay na dakila, pati iyong kautusan.
Noong ako ay tumawag, tinanggap ko ang tugon mo,
sa lakas mong itinulong ay lumakas agad ako.
Ligtas ako sa ‘yong piling,
lakas ko’y sa ‘yo nanggaling.
Nahahandang harapin mo mapupusok kong kaaway,
ligtas ako sa piling mo, sa takas na iyong taglay.
Yaong mga pangako mo ay handa mong tupding lahat,
ang dahilan nito Poon, pag-ibig mo’y di kukupas,
at ang mga sinimulang gawain mo’y magaganap.
Ligtas ako sa ‘yong piling,
lakas ko’y sa ‘yo nanggaling.
ALELUYA
Juan 16, 7. 13
Aleluya! Aleluya!
Espiritung isusugo
totoo ang ituturo,
pangako ni Kristong Guro.
Aleluya! Aleluya!
MABUTING BALITA
Juan 16, 5-11
Ang Mabuting Balita ng Panginoon ayon kay San Juan
Noong panahong iyon, sinabi ni Hesus sa kanyang mga alagad: “Ngayo’y paroroon na ako sa nagsugo sa akin. Wala isa man sa inyong nagtatanong sa akin kung saan ako pupunta. At ngayong sabihin ko sa inyo, natigib kayo ng kalungkutan. Ngunit dapat ninyong malaman ang katotohanan: ang pag-alis ko’y sa ikabubuti ninyo, sapagkat hindi paparito sa inyo ang Patnubay kung hindi ako aalis. Ngunit kung aalis ako, susuguin ko siya sa inyo. Pagdating niya ay kanyang patutunayan sa mga tao sa sanlibutan na mali ang pagkakakilala nila sa kasalanan, at ipakikilala niya kung ano ang matuwid, at kung ano ang kahatulan. Mali sila tungkol sa kasalanan, sapagkat hindi sila nanalig sa akin; tungkol sa matuwid, sapagkat ako’y paroroon sa Ama at hindi na ninyo makikita; tungkol sa matuwid, sapagkat ako’y paroroon sa Ama at hindi na ninyo makikita; tungkol sa kahatulan, sapagkat hinatulan na ang pinuno ng sanlibutang ito.”
Ang Mabuting Balita ng Panginoon.
Pages: 1 2
« Lunes, Mayo 10, 2021
Miyerkules, Mayo 12, 2021 »
{ 3 comments… read them below or add one }
PAGNINILAY: Habang tayo’y papalapit sa katapusan ng Pasko ng Muling Pagkabuhay, ang Ebanghelyo ngayon ay bahagi ng mga diskurso ni Hesus bago siyang umakyat papuntang langit. Nangyari ito bago pa man maganap ang kanyang Misteryong Paskwal noong gabi nang siya’y nasa Huling Hapunan kasama ang 12 Apostol.
Narinig natin kahapon kung paano plinano ni Hesus na suguin ang Espiritu Santo upang maging Tagapagtanggol nila. Ngayon ay tila inuulit niya ang pahayag ng pagsusugo ng Tagapagtanggol, ang Espiritu, upang maging gabay ng mga alagad sa kanilang misyon. Ang Espiritu ang tanging maghuhubog sa ating pagkatao upang makilala natin ang tama at mali ayon sa pamantayan ng Panginoon, at hindi sa mundo. Marahil ay dinidikta tayo ng tao o kaya ng isang grupo na namnamin ang isang bagay na akala natin ito’y mabuti. Subalit di lingid sa ating kaalaman na tayo’y tinutukso na gumawa ng masama. Kaya uso ngayon ang sinasabing sumunod sa “good influence”, at huwag sa “bad influence”. Ang Espiritu Santo ay ang “great influence” sapagkat siya ang magpapahayag sa atin ang dakilang kalooban ng Ama ayon sa Mabuting Balita ni Hesukristo. Kung bubuksan lang natin ang ating puso sa kalooban ng Panginoon ay matatanggap pa natin ang mga biyayang nararapat sa atin ayon sa kanyang pamantayan.
Makikita natin sa Unang Pagbasa ang katatagan nina Pablo at Silas nang sila’y ipinaghagupit at tsaka ipinakulong. Habang sila’y umaawit ng mga imno, biglang nagkalindol at nawasak ang bawat selda. Akalain ng bantay na guwardiya na nakatakas ang mga bilanggo, kaya tinangka niyang magpakamatay. Subalit nagpakita sa kanya sina Pablo, Silas, at ang lahat ng bilanggo. Nagtanong ang guwardiya kung paano niyang makakamtan ang kaligtasan, at tugon ni Pablo na siya’y sumampalataya sa ating Panginoong Hesukristo.
Nawa’y patuloy tayo’y maging matatag sa ating pananampalataya sa Panginoon sa tulong ng Espiritu Santo.
Ano nga ba ang konsepto ng tao sa kasalanan o sa pagkakamali. Sinasabi sa palatastas sa telebisyon, “ang mali pag ginawa ng matatanda ay nagigiging tama sa mata ng mga bata.” Ang isang kasalanan na hindi pinagsisihan at ginawang paulit-ulit ay parang nagiging natural na lamang at kalakaran na. Kaya nga ang daming nagkakamali. Sino nga naman ba ang hindi nagkakasala? Ngunit ang kalooban ng Diyos ang dapat masunod. Ang mga tao ay magbagong buhay. Ang mahalin ang Diyos, kapwa at ang pagtalikod sa kasamaan.Ang pagsunod sa Diyos ang magdadala sa tao ng saya at buhay na walang hanggan. Ang kayamanan, kasikatan at kapangyarihan ay para lamang sa mundong ito. Ikaw ba ano ang iyong pinapahalagahan?
Minsang may magtanong kay Hesus kung pano sya maliligtas, ang sagot nya ay sundin ang sampung utos, tumugon sya na ginagagawa nman nya lahat yun, muling sumagot si Hesus at sinabing “kung gayon ipagbili mo ang iyong ari arian at ipamahagi mo sa mga nangangailangan. Ibig sabihin ay bukod sa pagtalima natin sa kalooban mg Diyos meron din tayong tungkulin na tulungan ang ating kapwa. Hindi natatapos sa hindi pagawa ng masama ang pagsunod sa kalooban mg Diyos. Share your blessing, tumulong ka ng bukal sa kalooban mo, tumulong ka ng hindi pakitang tao lamang, tumulong ka ta wag ipagsabi maging sa matalik mong kaibigan, sapagkat pag ikinuwento mo ay tinanggap mo na amg gantimpala mula sa lupa, ngunit kapag ito ay iponaglihim mo, ang Diyos na nasa langit ang magbibigay ng gantimpala sa yo. Kailangan maunawaan natin ang kasalanan at manalig tayo kay Hesus.