Mga Pagbasa – Miyerkules, Setyembre 18, 2019

by Roxanne Pena on September 18, 2019 · 13 comments

in Tagalog Mass Readings

Miyerkules ng Ika-24 na Linggo sa Karaniwang Panahon (I)

1 Timoteo 3, 14-16
Salmo 110, 1-2. 3-4. 5-6

Gawa’y napakadakila ng Panginoong Lumikha.

Lucas 7, 31-35

UNANG PAGBASA
1 Timoteo 3, 14-16

Pagbasa mula sa unang sulat ni Apostol San Pablo kay Timoteo

Pinakamamahal, malaki ang pag-asa kong magkikita tayo sa lalong madaling panahon. Gayunma’y sinulat ko rin ang mga tagubiling ito upang hindi man ako makarating agad ay malaman mo rin ang dapat ugaliin sa sambahayan ng buhay na Diyos, sa simbahan na siyang haligi at saligan ng katotohonan. Napakahiwaga ng mga katotohanan ng ating relihiyon:
Siya’y nahayag nang maging tao,
at pinatotohanan ng Espiritu,
nakita ng mga anghel.
Ipinangaral sa sanlibutan,
pinaniwalaan ng lahat,
at sa langit ay tinanggap.

Ang Salita ng Diyos.

SALMONG TUGUNAN
Salmo 110, 1-2. 3-4. 5-6

Tugon: Gawa’y napakadakila ng Panginoong Lumikha.

Buong puso siyang pasasalamatan,
aking pupurihin sa gitna ng bayan
kasama ng mga lingkod na hinirang.
Napakadakila ang gawa ng Diyos,
pinananabikan ng lahat ng lingkod.

Tugon: Gawa’y napakadakila ng Panginoong Lumikha.

Lahat niyang gawa’y dakila at wagas,
bukod sa matuwid hindi magwawakas.
Hindi inaalis sa ating gunita,
na siya’y mabuti’t mahabaging lubha.

Tugon: Gawa’y napakadakila ng Panginoong Lumikha.

Sa may pagkatakot pagkai’y sagana;
pangako ng Poon ay hindi nasisira.
Ipinadama n’ya sa mga hinirang,
ang kapangyarihan niyang tinataglay,
nang ibigay niya lupa ng dayuhan.

Tugon: Gawa’y napakadakila ng Panginoong Lumikha.

ALELUYA
Juan 6, 63k. 68k

Aleluya! Aleluya!
Espiritung bumubuhay
ang Salita mo, Maykapal,
buhay mo ang tinataglay.
Aleluya! Aleluya!

MABUTING BALITA
Lucas 7, 31-35

Ang Mabuting Balita ng Panginoon ayon kay San Lucas

Noong panahong iyon, sinabi ng Panginoon, “Sa ano ko nga ihahambing ang mga tao ngayon? At ano ang nakakatulad nila? Katulad sila ng mga batang nakaupo sa plasa at sumisigaw sa kanilang mga kalaro:

‘Tinugtugan namin kayo ng plauta, ngunit hindi kayo sumayaw!
Nanambitan kami, ngunit hindi kayo tumangis!
Sapagkat naparito si Juan Bautista na nag-aayuno at hindi umiinom ng alak, at sinasabi ninyo, ‘Inaalihan siya ng demonyo.’ Naparito naman ang Anak ng Tao, na kumakain at umiinom tulad ng iba, at sinasabi ninyo, ‘Masdan ninyo ang taong ito! Matakaw at maglalasing, kaibigan ng mga publikano at ng mga makasalanan!’ Gayunman, ang karunungan ng Diyos ay napatutunayang matuwid sa pamamagitan ng kanyang mga anak.”

Ang Mabuting Balita ng Panginoon.

Previous post:

Next post:

{ 13 comments… read them below or add one }

Patrick Cu September 21, 2017 at 12:12 am

Salamat sa Diyos! Papuri sa iyo Poon aleluya aleluya!

Reply

Mark Jefferson Magno September 15, 2019 at 7:35 pm

Ngayon ay Miyerkules sa ika-24 na linggo sa karaniwang panahon. Pinupuri ka namin, Panginoong Jesukristo.

Reply

Reynald Perez September 15, 2019 at 11:13 pm

Pagninilay: Ang pagkakilanlan sa ating mga Kristiyano ay dahil sa pag-ibig. Ito ang ipinamalas ng Panginoong Diyos nang naparito ang Panginoong Hesukristo na kanyang Anak upang magkaroon tayo ng kaligtasan at bagong buhay na patuloy na ipahayag ang kanyang dakilang pag-ibig. Sa Unang Pagbasa (1 Timoteo 3:14-16), ipinaalala sa atin ni San Pablo ang tamang pamumuhay ayon bilang mga miyembro ng Sambayanan ng Diyos, ang kanyang pamayanang nanalig sa kanya. Tayo ay inaanyayahan maging mabuti sa ating kapwa at mamuhay nang marapat at naayon sa kagustuhan ng Diyos para sa ikabubuti ng ating kapwa. Sa ating Ebanghelyo (Lucas 7:31-35), makikita natin ang isang pahayag ng Hesus tungkol sa henerasyon ng kanyang kapanahunan. Ito’y katulad daw ng mga batang nakikisayaw at tumutugtog ng plauta, at sinabi nila sa mga hindi sumasabay sa kanila na parang ayaw nilang makisabay sa takbo ng panahon. At idinugtong ni Hesus ang pagdating ng kanyang pinsan na si San Juan Bautista na parang ang tingin sa kanya ng mga Pariseo at eskriba na demonyo raw dahil nag-aayuno at hindi nag-iinom. Ngayon nabatid nila si Hesus nang makita nila siya’y nakikisalo at nakikikain kasama ang mga makasalanan, at siya’y itinuring na lasenggero at matakaw. Ngunit ang karunungang mula sa Panginoong Diyos ang nagpapatibay sa kanyang misyon at mga gawain. TIla nga bang dalawang magkatunggaling sitwasyon ang ipinakilala ni Hesus sa Ebanghelyo. May mga taong nakikisaya at ang ibang ayaw ay parang tinuturing na mainip na buhay. May mga taong tumitingin sa ibang nakikisalamuha sa mga kapwang tinataguriang “walang kwenta” o “walang silbi” na ang mga ito ay nagsasayang lang daw ng oras at ng mga mapagkunan na yaman. Hindi ba minsan kapag nakikiusap tayo sa mga taong niyuyurakan o kaya tinatawag na salot at binansagang makasalanan, marami ang magkokomento ng mga masasamang hinala laban sa atin? Ito’y natural sapagkat kadalasa’y mataas ang paningin ng tao sa kanyang sariling “karangalan”. Ngunit ang pahiwatig ni Kristo na ang ating misyon ng awa at malasakit ay matuwid ayon sa karunungan ng Diyos. Kung tayo’y sisiraan ng mga matalas na nagmamasdan sa atin dahil lang sa pagtulong natin sa mga nangangailangan ng pisikal at espirituwal na tulong, laging alalahanin natin na ang Diyos ang makakasabi mula sa ating mga konsensiya kung ang mga desisyon natin ay tama o mali. Mahal niya tayong lahat, kaya ang ninanais niya na gumawa tayo ng matuwid at mabuting bagay sa lahat ng aspeto ng buhay. Huwag tayong mawalan ng gana kung sasabihin ng iba na parang tayo’y nag-aaksaya ng oras sa paggawa ng kabutihan sa mga nangangailangan. Patuloy tayo sa pagtupad ng misyong itinkada sa atin ng Panginoon para sa pagpaparangal ng Mabuting Balita tungkol sa kanyang paghahari.

Reply

Bobby Javier September 18, 2019 at 3:50 am

Salamat panginoon saiyong mga banal na salita at pangalan, nagabay namin sa araw-araw,,,, Pinupuri at pisasalamatan kanamin Panginoon,,,AMEN

Reply

Jose M. Javier September 18, 2019 at 5:21 am

Yes Lord ilayu mo PO kami sa anumang mga pagkakasala tulad Ng pagka mahusga sa kapwa at turuan m po Ang among puso na maging magpakumbaba sa lahat Ng bagay na among ginagawa. Amen

Reply

Aida Ramirez September 18, 2019 at 6:45 am

Pinupuri ka namin Panginoong Hesukristo.Amen.

Reply

Mylene Farinas September 18, 2019 at 7:44 am

Dear God, forgive me if there were times that I had despised the sinners, the poor, the lowly. Help me to love them as you do. This as I ask in Jesus’ name. Amen.

Reply

Lilian M.Saltore September 18, 2019 at 10:52 am

Pinupuri ka namin Panginoong Hesu-Kristo.

Reply

Dolly Sun September 18, 2019 at 2:29 pm

Pinupuri Ka namin Panginoong Hesukristo!

Reply

Francisco Del Rosario Azupardo September 18, 2019 at 7:57 pm

Salamat sa Diyos! Amen!

Reply

Celine September 18, 2019 at 11:37 pm

PINUPURI KA NAMIN PANGINOON JESUS KRISTO.
ALLELUIA!

Reply

Jerry September 19, 2019 at 12:10 am

Pinupuri ka namin Panginoong HesuCristo.Amen

Reply

PATRICK CU September 19, 2019 at 2:04 am

Salamat sa Diyos! AMEN!

Reply

Leave a Comment



Previous post:

Next post: