Mga Pagbasa – Martes, Mayo 28, 2019

by Roxanne Pena on May 28, 2019 · 16 comments

in Tagalog Mass Readings

Martes sa Ika-6 na Linggo ng Pasko ng Pagkabuhay

Mga Gawa 16, 22-34
Salmo 137, 1-2a. 2bk-3, 7k-8

Ligtas ako sa ‘yong piling, lakas ko’y sa ‘yo nanggaling.

Juan 16, 5-11

UNANG PAGBASA
Mga Gawa 16, 22-34

Pagbasa mula sa Mga Gawa ng Mga Apostol

Noong mga araw na iyon, dinaluhong sina Pablo at Silas ng mga tao, at matapos pahubaran ng mga pinuno, sila’y paulit-ulit na ipinahagupit, saka ipinabilanggo at pinabantayang mabuti. Ipinasok sila ng batay sa kaloob-looban ng bilangguan at ipinangaw ang mga paa.

Nang maghahatinggabi na, si Pablo at Silas ay nananalangin at umaawit ng mga imno, at nakikinig naman ang ibang mga bilanggo. Di-kaginsa-ginsa’y lumindol nang napakalakas, anupat nayanig pati ang mga pundasyon ng bilangguan. Pagdaka’y nabuksan ang mga pinto, at nakalag ang mga tanikala ng mga bilanggo. Napabalikwas ang bantay-bilangguan at nang makitang bukas ang mga pinto, hinugot ang kanyang tabak at tangkang magpakamatay sa akalang nakatakas ang mga bilanggo. Ngunit sumigaw si Pablo, “Huwag mong saktan ang iyong sarili! Narito kaming lahat!” Humingi ng ilaw ang bantay, patakbong pumasok at nanginginig na nagpatirapa sa harapan nina Pablo at Silas. Inilabas niya ang mga ito at sinabi, “Mga ginoo, ano po ang dapat kong gawin upang ako’y maligtas?” Sumagot sila, “Sumampalataya ka sa Panginoong Hesus, at maliligtas ka – ikaw at ang iyong sambahayan.” At ang salita ng Panginoon at ipinahayag nila sa kanya at sa lahat ng nasa kanyang bahay. Nang gabi ring iyon, hinugasan ng bantay ang kanilang mga sugat, at nagpabinyag siya pati ang buo niyang sambahayan. Pagkatapos, sila’y isinaman niya sa kanyang tahanan at hinainan ng pagkain. Galak na galak siya at ang kanyang buong sambahayan, sapagkat sila’y natutong sumampalataya sa Diyos.

Ang Salita ng Diyos.

SALMONG TUGUNAN
Salmo 137, 1-2a. 2bk-3, 7k-8

Tugon: Ligtas ako sa ‘yong piling, lakas ko’y sa ‘yo nanggaling.

Ako, Poon, buong pusong aawit ng pasalamat,
sa harap ng mga anghel, pupurihin kitang ganap.
Sa harap ng iyong templo ay yuyulo at gagalang,
pupurihin kita roon, pupurihin ang ‘yong ngalan.

Tugon: Ligtas ako sa ‘yong piling, lakas ko’y sa ‘yo nanggaling.

Dahilan sa pag-ibig mo at sa iyong katapatan,
ika’y tunay na dakila, pati iyong kautusan.
Noong ako ay tumawag, tinanggap ko ang tugon mo,
sa lakas mong itinulong ay lumakas agad ako.

Tugon: Ligtas ako sa ‘yong piling, lakas ko’y sa ‘yo nanggaling.

Nahahandang harapin mo mapupusok kong kaaway,
ligtas ako sa piling mo, sa takas na iyong taglay.
Yaong mga pangako mo ay handa mong tupding lahat,
ang dahilan nito Poon, pag-ibig mo’y di kukupas,
at ang mga sinimulang gawain mo’y magaganap.

Tugon: Ligtas ako sa ‘yong piling, lakas ko’y sa ‘yo nanggaling.

ALELUYA
Juan 16, 7. 13

Aleluya! Aleluya!
Espiritung isusugo
totoo ang ituturo,
pangako ni Kristong Guro.
Aleluya! Aleluya!

MABUTING BALITA
Juan 16, 5-11

Ang Mabuting Balita ng Panginoon ayon kay San Juan

Noong panahong iyon, sinabi ni Hesus sa kanyang mga alagad: “Ngayo’y paroroon na ako sa nagsugo sa akin. Wala isa man sa inyong nagtatanong sa akin kung saan ako pupunta. At ngayong sabihin ko sa inyo, natigib kayo ng kalungkutan. Ngunit dapat ninyong malaman ang katotohanan: ang pag-alis ko’y sa ikabubuti ninyo, sapagkat hindi paparito sa inyo ang Patnubay kung ako aalis. Ngunit kung aalis ako, susuguin ko siya sa inyo. Pagdating niya ay kanyang patutunayan sa mga tao sa sanlibutan na mali ang pagkakakilala nila sa kasalanan, at ipakikilala niya kung ano ang matuwid, at kung ano ang kahatulan. Mali sila tungkol sa kasalanan, sapagkat hindi isla nanalig sa akin; tungkol sa matuwid, sapagkat ako’y paroroon sa Ama at hindi na ninyo makikita; tungkol sa matuwid, sapagkat ako’y paroroon sa Ama at hindi na ninyo makikita; tungkol sa kahatulan, sapagkat hinatulan na ang pinuno ng sanlibutang ito.”

Ang Mabuting Balita ng Panginoon.

Previous post:

Next post:

{ 16 comments… read them below or add one }

veronica May 23, 2017 at 7:40 am

Good morning po, maraming salamat sa pagbabahagi nyo ng Mabuting Balita. Hiling ko lang po na masusing tingnan at isaayos ang baybay ng mga salita upang mas lubos at madali itong maunawaan.

Reply

Patrick Cu May 24, 2017 at 12:09 am

Salamat sa Diyos sa kanyang kadakilaan at katapatan at lubos na pagmamahal sa sanlibutan, Purihin ang Panginoon!

Reply

Mark Jefferson Magno May 26, 2019 at 8:00 pm

Ngayon ay Martes sa ika-6 na linggo ng Pasko ng Muling Pagkabuhay ni Jesus.

Reply

Reynald Perez May 27, 2019 at 10:03 pm

Pagninilay: Habang tayo’y papalapit sa katapusan ng Pasko ng Muling Pagkabuhay, ang Ebanghelyo ngayon ay bahagi ng mga diskurso ni Hesus bago siyang umakyat papuntang langit. Nangyari ito bago pa man maganap ang kanyang Misteryong Paskwal noong gabi nang siya’y nasa Huling Hapunan kasama ang 12 Apostol. Narinig natin kahapon kung paano plinano ni Hesus na suguin ang Espiritu Santo upang maging Tagapagtanggol nila. Ngayon ay tila inuulit niya ang pahayag ng pagsusugo ng Tagapagtanggol, ang Espiritu, upang maging gabay ng mga alagad sa kanilang misyon. Ang Espiritu ang tanging maghuhubog sa ating pagkatao upang makilala natin ang tama at mali ayon sa pamantayan ng Panginoon, at hindi sa mundo. Marahil ay dinidikta tayo ng tao o kaya ng isang grupo na namnamin ang isang bagay na akala natin ito’y mabuti. Subalit di lingid sa ating kaalaman na tayo’y tinutukso na gumawa ng masama. Kaya uso ngayon ang sinasabing sumunod sa “good influence”, at huwag sa “bad influence”. Ang Espiritu Santo ay ang “great influence” sapagkat siya ang magpapahayag sa atin ang dakilang kalooban ng Ama ayon sa Mabuting Balita ni Hesukristo. Kung bubuksan lang natin ang ating puso sa kalooban ng Panginoon ay matatanggap pa natin ang mga biyayang nararapat sa atin ayon sa kanyang pamantayan. Makikita natin sa Unang Pagbasa ang katatagan nina Pablo at Silas nang sila’y ipinaghagupit at tsaka ipinakulong. Habang sila’y umaawit ng mga imno, biglang nagkalindol at nawasak ang bawat selda. Akalain ng bantay na guwardiya na nakatakas ang mga bilanggo, kaya tinangka niyang magpakamatay. Subalit nagpakita sa kanya sina Pablo, Silas, at ang lahat ng bilanggo. Nagtanong ang guwardiya kung paano niyang makakamtan ang kaligtasan, at tugon ni Pablo na siya’y sumampalataya sa ating Panginoong Hesukristo. Nawa’y patuloy tayo’y maging matatag sa ating pananampalataya sa Panginoon sa tulong ng Espiritu Santo.

Reply

PATRICK CU May 28, 2019 at 1:10 am

Salamat sa Diyos! AMEN!

Reply

Roberto M. Javier May 28, 2019 at 4:21 am

We Praise u Lord Jesus Christ,,,,, AMEN,,,

Reply

Jose M. Javier May 28, 2019 at 5:19 am

Praise. You Lord King of Kings, Lord of Lord my King my God and my salvation , my creator my Redeemer hallelujah Amdn

Reply

Terrence Salido May 28, 2019 at 5:24 am

Madalas po ay may mga “typographical error” sa mga babasahin. Para po mabawasan ang mga kamalian, maaari naman po siguro “copy” at “paste” na lang mula sa mga “digital media” ng bibliya. Kung hindi po maaari, siguro kaya naman kilatising mabuti ang gawa para maiwasto ang mali. Gayunpaman, maraming salamat sa bumuo at nagpanatili sa “website” na ito.

Reply

Aida Ramirez May 28, 2019 at 5:40 am

Pinupuri ka namin Panginoong Hesukristo.Amen.

Reply

Edward Ramirez May 28, 2019 at 6:11 am

Pinupuri ka namin panginoong hesukristo

Reply

Rachel Dela Cruz May 28, 2019 at 6:41 am

Pinupuri ka namin,Panginoong HesuKristo

Reply

EDNA AFIGURASIN May 28, 2019 at 8:52 am

Pinupuri ka namin Panginoong HESUKRISTO…AMEN.

Reply

Lovel Dorado May 28, 2019 at 9:10 am

Salamat sa Diyos na mapagmahal at pinagkalooban kami ng mga kapatid na kagaya ni REYNALD PEREZ na magbibigay pa ng malalim na reflection sa iyong mabuting balita. God Bless us all.

Reply

Francisco R. Azupardo May 28, 2019 at 8:06 pm

Salamat sa Diyos! Amen!

Reply

Dolly Sun May 28, 2019 at 10:28 pm

Pinupuri Ka namin Panginoong Hesukristo!

Reply

Maryrozz Magsino May 29, 2019 at 12:15 pm

Salamat Panginoong Hesukristo sa pagmamahal mo sa sanlibutan. Ako imbing makasalanan ay di po ninyo pinabayaan sa operasyon sa puso na aking napagtagumpayan. Nanalig po ako Poon ko gang sa aking pagpapalakas ay di ninyo ako iiwan. Labis po Panginoon ko ang aking pasasalamat sa pagkakaroon ko ng mga amo na akoy inalagaan ipinagamot at di pinabayaan dalangin ko po ang kanilang kalusugan at kaligtasan nawa po Poon kanilang kahilingan ay ipagkaloob na naayon sa iyong kalooban Dalangin ko rin po mahal kong Jesus ang kaligtasan ng aking pamilya kaibigan at lahat ng tao nanalig sa iyo patnubayan mo lagi Poon ang aking asawa at 3 anak. Tulungan mo po kami sa lahat ng amin problema. Ito po ay aking dalangin sa ating amang syang may pinaka makapangyarihan sa lahat sa ngalan ni Jesus at ni Maria na kanyang ina na sya n rin ina nating lahat. Amen

Reply

Leave a Comment



Previous post:

Next post: