Mga Pagbasa – Linggo, Marso 3, 2019

by Roxanne Pena on March 3, 2019 · 17 comments

in Tagalog Mass Readings

Ika-8 Linggo sa Karaniwang Panahon (K)

Sirak 27, 5-8
Salmo 91, 2-3. 13-14. 15-16

Totoong kalugud-lugod ang magpasalamat sa D’yos.

1 Corinto 15, 54-58
Lucas 6, 39-45

UNANG PAGBASA
Sirak 27, 5-8

Pagbasa mula sa aklat ni Sirak

Pag niliglig mo ang bistay, maiiwan ang magaspang;
pag ang tao’y nagsalita, kapintasa’y lumilitaw.
Ang gawa ng magpapalayok ay sa hurno nasusubok,
ang pagkatao ng sinuma’y makikita sa usapan.
Sa bunga ng punongkahoy nakikilala ang ginagawang pag-aalaga;
sa pangungusap ng isang tao, damdamin niya’y nahahalata.
Huwag mo munang pupurihin ang isang tao hanggang hindi nakapagsasalita,
sapagkat doon mo pa makikilala ang tunay niyang puso’t diwa.

Ang Salita ng Diyos.

SALMONG TUGUNAN
Salmo 91, 2-3. 13-14. 15-16

Tugon: Totoong kalugud-lugod ang magpasalamat sa D’yos.

Ang magpasalamat
sa Panginoong Diyos ay mabuting bagay,
Umawit na lagi
purihin ang ngalang Kataas-taasan.
Pag-ibig n’yang wagas
ay dapat ihayag, kung bukang-liwayway,
pagsapit ng gabi
ang katapatan n’ya’y ihayag din naman.

Tugon: Totoong kalugud-lugod ang magpasalamat sa D’yos.

Katulad ng palma,
ang taong matuwid tatatag ang buhay,
parang mga sedro,
kahoy sa Libano, lalagong mainam.
Parang punongkahoy
na doon natanim sa tahanan ng Diyos,
sa banal na templo
ito ay lalago na nakalulugod.

Tugon: Totoong kalugud-lugod ang magpasalamat sa D’yos.

Tuloy ang pagbunga
kahit na ang punong ito ay tumanda,
luntia’t matatag,
at ang dahon nito ay laging sariwa.
Ito’y patotoo
na ang Panginoo’y tunay na matuwid,
Siya kong sanggalang,
matatag na batong walang bahid dungis.

Tugon: Totoong kalugud-lugod ang magpasalamat sa D’yos.

IKALAWANG PAGBASA
1 Corinto 15, 54-58

Pagbasa mula sa unang sulat ni Apostol San Pablo sa mga taga-Corinto

Mga kapatid, kapag napalitan na ng walang pagkabulok ang nabubulok at napalitan na ng walang kamatayan ang namamatay, matutupad ang nasasaad sa Kasulatan: “Nalupig na ang kamatayan; ganap na ang tagumpay!”

“Nasaan, O kamatayan, ang iyong tagumpay?
nasaan, O kamatayan, ang iyong kamandag?”

Ang kamandag ng kamatayan ay ang kasalanan, at ang lakas ng kasalanan ay nagmumula sa Kautusan. Magpasalamat tayo sa Diyos na nagbibigay sa atin ng tagumpay sa pamamagitan ng ating Panginoong Hesukristo!

Kaya nga, mga kapatid, magpakatatag kayo at huwag matitinag. Magpakasipag kayo sa gawain para sa Panginoon yamang alam ninyong di nasasayang ang inyong pagpapagal para sa kanya.

Ang Salita ng Diyos.

ALELUYA
Filipos 2, 15d. 16a

Aleluya! Aleluya!
Sa daigdig ay laganap
liwanag na sumisikat,
Salitang buhay ng lahat.
Aleluya! Aleluya!

MABUTING BALITA
Lucas 6, 39-45

Ang Mabuting Balita ng Panginoon ayon kay San Lucas

Noong panahong iyon, tinanong ni Hesus ang kanyang mga alagad nang patalinghaga: “Maaari bang maging tagaakay ng bulag ang isa ring bulag? Kapwa sila mahuhulog sa hukay kapag ginawa ang gayun. Walang alagad na higit sa kanyang guro; ngunit kapag lubusang naturuan, siya’y magiging katulad ng kanyang guro.

“Ang tinitingnan mo’y ang puwing ng iyong kapatid, ngunit hindi mo pinapansin ang tahilan sa iyong mata. Paano mo masasabi sa iyong kapatid, ‘Kapatid, bayaan mong alisin ko ang iyong puwing,’ gayong hindi mo nakikita ang tahilang nasa iyong mata? Mapagpaimbabaw! Alisin mo muna ang tahila sa iyong mata, at makakikita kang mabuti; sa gayo’y maaalis mo ang puwing ng iyong kapatid.”

“Walang mabuting punongkahoy na namumunga ng masama, at walang masamang punongkahoy na namumunga ng mabuti. Nakikilala ang bawat punongkahay sa pamamagitan ng kanyang bunga. Sapagkat hindi nakapipitas ng igos sa puno ng aroma, at di rin nakapipitas ng ubas sa puno ng dawag. Ang mabuting tao ay nakapagdudulot ng mabuti sapagkat tigib ng kabutihan ang kanyang puso; ang masamang tao ay nakapagdudulot ng masama, sapagkat puno ng kasamaan ang kanyang puso. Sapagkat kung ano ang bukambibig siyang laman ng dibdib.

Ang Mabuting Balita ng Panginoon.

Previous post:

Next post:

{ 17 comments… read them below or add one }

Mark Jefferson Magno February 24, 2019 at 9:02 pm

Ito ang ikawalo at pansamantalang paghinto sa karaniwang panahon hanggang umabot sa Miyerkules ng Abo at bago ang apatnapung araw ng paghahanda ng Panginoong Hesukristo. Nawa po ay pagpalain po tayo ng Poong Maykapal sa buong linggong ito at buong araw ng Kuwaresma.

Reply

ferdinand delos santos February 25, 2019 at 12:18 am

Amen…Thank you so much…

Reply

Jun Sinco February 27, 2019 at 2:11 pm

Walang podcast / audio?

Reply

M.U. Francisco February 28, 2019 at 9:33 pm

Ang ating mga pagbasa sa Ikawalong linggo ng karaniwang panahon ay nagbukas kung ano ang ating ipinagdiriwang. Ang banal na Eukaristiya ay isang pasasalamat sa lahat ng ating mga natanngap at matatanggap lalo na ngayong unang linggo ng Marso. Ang pasasalamat ay hindi lamang sa mga bagay-bagay na dumarating sa ating buhay’ mula sa unang pagbasa hanggang sa ating Ebanghelyo tayo ay hinahamon na magpasalamat tayo dahil tinutulungan tayo ng ating Simbahan na makita natin ang ating sarili, malaman natin kung sino tayo at mapakilos tayo na magbago kung saan papasok tayo sa panahon ng Kuaresma na magsisimula sa araw ng Miyerkules.
Sa ating Ebanghelyo ayon kay San Lukas, napakaganda ng kanyang paglalarawan patungkol kung papaano natin lalong makikilala ang ating sarili.
Una, “Maaari bang maging tagaakay ng bulag ang isa ring bulag? Kapwa sila mahuhulog sa hukay kapag ginawa ang gayun. “ Bilang mga tagasunod ni Kristo, tayo’y kanyang hinahamon na kilalanin nating mabuti ang ating sarili, kilalanin natin ang ating mga nakakasama dahil kung ito’y nagpapalayo sa ating relasyon sa ating Panginoon tayo’y walang mapupuntahan. Ang pagiging bulag sa sarili at pagiging bulag sa labas ay isang kadiliman na kailangan nating kumawala sapagkat tayo ay walang magagawa at hindi natin maihahatid ang ibang tao kay Kristo. Ano ang dapat nating gawin? Alisin mo muna ang tahila sa iyong mata, at makakikita kang mabuti; sa gayo’y maaalis mo ang puwing ng iyong kapatid.” Sinasabi sa atin na una muna tayong tumingin sa ating sarili, tanggapin na tayo’y hindi perpekto at mahina bago natin itama ang kamalian ng iba.
Ikalawa, “Walang mabuting punongkahoy na namumunga ng masama, at walang masamang punongkahoy na namumunga ng mabuti. Nakikilala ang bawat punongkahay sa pamamagitan ng kanyang bunga.” Ipinapaliwanag sa atin na ang ating mga gawa ay sumasalamin kung paano natin binubuksan ang ating sarili sa ibang tao. Kung ang ating panalangin at gawa ay nagtutugma sa kabutihan tayo ay na kay Kristo; kung ang resulta ay masama tayo ay nasa masama.
Sa ating pagdiriwang, tayo ay hinahanda na aminin natin ang ating mga pagkakasala ng sabay-sabay upang maging totoo tayo sa ating pananamapalataya na namatay si Kristo, nabuhay si Kristo at babalik sa Kristo sa takdang panahon na ating inaantay at pinapasalamat dahil alam natin na ang pangako sa atin ng Panginoon ay matutupad. Amen.

Reply

Mildred March 3, 2019 at 12:49 pm

Marami pong salamat sa mga pagpaliwanag sa ebanghelyo. Pagpalain po kayo ng Panginoon.

Reply

M.U. Francisco February 28, 2019 at 9:41 pm

@UUdiel

Magpasalamat tayo dahil naaamin natin ang ating mga kasalanan sa ating Panginoon at tayo’y napapatawad sa pagkakataong magbago sa paggawa ng nararapat na kabutihan. Amen.

Reply

PATRICK CU March 3, 2019 at 2:47 am

Salamat sa Diyos! AMEN!!!

Reply

Arlin D. Mamales March 3, 2019 at 5:29 am

Pinupuri ka namin Panginoong Hesukristo

Reply

Jenny March 3, 2019 at 6:51 am

Thank you so much
sa pag publish ng mga pagbasa
At sa pag pagpapaliwanag….
God bless us everyone.

Reply

Liza Fuedan March 3, 2019 at 8:09 am

pls post podcast audio para naman mapakinggan. thank u

Reply

kulot March 3, 2019 at 8:42 am

Pinupuri ka namin panginoong hesukristo

Reply

Edward Ramirez March 3, 2019 at 10:55 am

Pinupuri ka namin panginoong hesukristo amen

Reply

ruben calindong March 3, 2019 at 11:48 am

pinupuri ka nmin panginoon.

Reply

Celine March 3, 2019 at 2:59 pm

PINUPURI KA MANIN PANGINOON JESUS KRISTO.
ALLELUIA!

Reply

Francisco R. Azupardo March 3, 2019 at 3:50 pm

Salamat sa Diyos! Amen!

Reply

Alfred B. Sugayan March 3, 2019 at 5:09 pm

Purihin ang Panginoon at Diyos Hesus…

Reply

Jerry Estanislao March 3, 2019 at 11:11 pm

Pinupuri ka namin Panginoong HesuCristo.

Reply

Leave a Comment



Previous post:

Next post: