Mga Pagbasa – Miyerkules, Oktubre 10, 2018

by Roxanne Pena on October 10, 2018 · 10 comments

in Tagalog Mass Readings

Miyerkules ng Ika-27 Linggo sa Karaniwang Panahon (II)

Galacia 2, 1-2. 7-14
Salmo 116, 1. 2

Humayo’t dalhin sa tanan Mabuting Balitang aral.

Lucas 11, 1-4

UNANG PAGBASA
Galacia 2, 1-2. 7-14

Pagbasa mula sa sulat ni Apostol San Pablo sa mga taga-Galacia

Mga kapatid, makalipas ang labing-apat na taon, muli akong pumunta sa Jerusalem na kasama sina Bernabe at Tito. Nagbalik ako sapagkat ipinaalam sa akin ng Diyos na dapat akong pumaroon. Nakipagpulong ako nang sarilinan sa mga pangunahin sa simbahan, at ipinaliwanag ko sa kanila ang Mabuting Balita ng kaligtasan na ipinangangaral ko sa mga Hentil. Ginawa ko ito sapagkat ayokong mawalan ng kabuluhan ang aking pagpapagal sa nakaraan at sa kasalukuyan.

Sa halip, kinilala nilang ako’y hinirang ng Diyos upang mangaral ng Mabuting Balita ng kaligtasan sa mga Hentil tulad din ng pagkahirang kay Pedro upang mangaral ng Mabuting Balita ng kaligtasan sa mga Judio. Ang Diyos na humirang kay Pedro bilang apostol sa mga Judio ang siya ring humirang sa akin bilang apostol sa mga Hentil. Nabatid nina Santiago, Pedro at Juan, mga kilalang haligi ng simbahan, na ang Diyos ang siyang nagbigay sa akin ng tanging kaloob na ito. Kaya’t kami ni Bernabe’y tinanggap nila bilang mga kamanggagawa. Pinagkasunduan namin na kami’y sa mga Hentil at sa mga Judio naman sila. Ang hiling lamang nila ay huwag naming pababayaan ang mga dukha, na talaga namang pinagsisikapan kong gawin.

Nang si Pedro’y nasa Antioquia, hayagan kong sinabi sa kanyang mali ang kanyang ginagawa. Sapagkat noong hindi pa dumarating ang ilang lalaking pinaparoon ni Santiago, siya’y sumasalo sa mga Hentil. Subalit nang dumating ang mga iyon, siya’y lumayo at hindi na nakisalo sa kanila dahil sa takot sa pangkat ng mga Judio. At gumaya rin sa kanya ang ibang mga kapatid doon na mga Judio; pati na si Bernabe’y natangay sa kanilang pagkukunwari. Nang makita kong hindi sila namumuhay ayon sa tunay na diwa ng Mabuting Balita, sinabi ko kay Pedro sa harapan nilang lahat, “Kung ikaw na isang Judio ay namumuhay na parang Hentil at di bilang isang Judio, paano mo mapipilit ang mga Hentil na mamuhay na gaya ng mga Judio?”

Ang Salita ng Diyos.

SALMONG TUGUNAN
Salmo 116, 1. 2

Tugon: Humayo’t dalhin sa tanan Mabuting Balitang aral.

Purihin ang Poon!
Dapat na purihin ng lahat ng bansa,
Siya ay purihin
ng lahat ng tao sa balat ng lupa.

Tugon: Humayo’t dalhin sa tanan Mabuting Balitang aral.

Pagkat ang pag-ibig
na ukol sa ati’y dakila at wagas,
at ang katapatan niya’y walang wakas.

Tugon: Humayo’t dalhin sa tanan Mabuting Balitang aral.

ALELUYA
Roma 8, 15bk

Aleluya! Aleluya!
Espiritu ng Diyos Anak
ay siyang ating tinanggap
nang D’yos Ama ay matawag.
Aleluya! Aleluya!

MABUTING BALITA
Lucas 11, 1-4

Ang Mabuting Balita ng Panginoon ayon kay San Lucas

Minsan, nananalangin si Hesus. Pagkatapos niya, sinabi ng isa sa kanyang mga alagad, “Panginoon, turuan po ninyo kaming manalangin, katulad ng ginawa ni Juan sa kanyang mga alagad.” Sinabi ni Hesus, “Kung kayo’y mananalangin, ganito ang sabihin ninyo:

‘Ama, sambahin nawa ang pangalan mo.
Magsimula na sana ang iyong paghahari.
Bigyan mo kami ng aming makakain sa araw-araw.
At patawarin mo kami sa aming mga kasalanan,
sapagkat pinatatawad namin ang bawat nagkasala sa amin.
At huwag mo kaming iharap sa mahigpit na pagsubok.’”

Ang Mabuting Balita ng Panginoon.

Previous post:

Next post:

{ 10 comments… read them below or add one }

marites pamulo - labaguez October 4, 2016 at 1:42 pm

Ngayon ko lang po nakita ang site na ito. malaki pong tulong ito sa aming mga lector.

Reply

kulotspark October 5, 2016 at 3:18 pm

amen.

Reply

Ver Valdez LP October 9, 2018 at 8:27 am

Pinupuri ka namin Panginoong Hesukristo!

Reply

Ver Valdez October 9, 2018 at 8:44 am

Salamat sa Panginoon sa pag-kakaloob ng awit at papuri website na nagsisilbing gabay namin sa pag-lilingkod.

Reply

Reynald Perez October 10, 2018 at 3:55 am

Pagninilay: Ang Ebanghelyo natin ngayon ay ang pagtuturo ni Hesus ng isang panalanging pamilyar sa ating lahat kapag tayo’y dumadalo sa Misa, nagdadasal ng Santo Rosaryo, at iba pang paraan ng pananalangin. Ito yung “Pater Noster” na tinaguriang “Panalangin ng Panginoon”. Mas kilala ito bilang “Ama Namin”. Ito yung dasal na kung saan tinuruan tayo ni Hesus na tawagin ang Diyos bilang “Ama”. Noong dati, “Panginoon” lamang ang pinayagang titulo ng Diyos na ito sapagkat ang kanyang pangalan ay tinuturing ng mga Hudyo na banal at hindi dapat lapastangin ito. Ngunit binigyang-diin ni Kristo na karapat-dapat na tawagin natin itong Diyos na “Ama” sapagkat katulad siya ng bawat tatay na tumutugon sa mga pangangailangan ng isang pamilya. Higit siya sa kanilang lahat sapagkat siya ang naghahangad sa kanyang dakilang kalooban ang ikabubuti ng tao dito sa lupa para nang sa langit. Kapag dinadasal natin ito, tayo ay humihingi hindi lang sa mga pisikal na bagay, kundi sa mga espirituwal din katulad ng kakainin hindi lang sa pisikal na aspeto, kundi kasama na diyan ang pampalusog mula sa Salita at Eukaristiya. Hinihiling din natin sa kanya na patawarin ang ating mga nagawang pagkakasala at pagkukulang upang tayo rin ay matutong magpatawad ng ibang nagkasala at nagkulang sa atin. At sa huli, hinihiling natin na tayo’y iadya sa lahat ng tuksong maaring magdulot sa kasamaan. Ito yung buod ng Ama Namin na binubuo ng 7 petisyon, 3 para sa pagpaparangal sa ating Diyos, at yung natitirang 4 para sa pagtutugon ng ating mga esporituwal na pangangailangan sa buhay. Higit sa lahat, tayo rin ay may misyong tawagin ang ating Ama sapagkat tayo ay kanyang mga anak. Nangyari ito dahil kay Hesus na inialay ang kanyang buhay upang tayo’y magkaroon pa ng pananampalataya sa Panginoon ng ating mga buhay. Si San Pablo sa Unang Pagbasa ay kilalang saksi ng Mabuting Balita sa mga Hentil na dating itinuturing ng mga Hudyo na walang pag-asang makamit ang kaligtasan. Subalit dito napansin niya ang ganyang pamumuhay ng mga kasamahan niyang Apostol. Kaya pinagsabihan niya sila na kung sila’y mga Hudyo namumuhay bilang isang Hentil, paano kaya nila ipapangaral ang mga pagpapahalaga ng Mabuting Balita sa mga Hentil? Kaya tayo’y mga binyagang Kristiyano ay tinatawag na talikdan ang mga lumang gawain at magsimula ng isang buhay na tapat sumunod sa kalooban ng Ama. Nawa’y ito’y maging ating misyon sa pagiging mga tunay na anak ng Diyos.

Reply

PATRICK CU October 10, 2018 at 4:19 am

Salamat sa Diyos! AMEN!

Reply

ANSELMARIE October 10, 2018 at 4:53 am

Among the four Gospels, Luke emphasises the most on the prayjnb Jesus, there are 21 enstances that He prayed from the age of 12 until he ascended into the Father. This shows how prayer is the constant part of the Son of Man. He is always in relation with the Father who is the source of His everything, thd beginning and thd end of all his thoughts and action. His way of relating to the Father is handed down to us through this prayer we have jn the Gospel today. We inherited what Jesus had received, this includes everything, not just the glory of being the sons and daughters of God but also His sufferings, rejection, mockery simply because He was thd Son of God so as we are…simply because we ard the sons anc daughter of thd Father. Are we ready for this…?

Reply

becky sanidad October 10, 2018 at 7:10 am

Pinupuri ka namin Panginoon Jesus..Maraming Salamat sa mga blessings na ipinagkaloob po ninyo sa kin sa aking pamilya.

Reply

Celine October 10, 2018 at 4:58 pm

PINUPURI KA NAMIN PANGINOON JESUS KRISTO.
ALLELUIA!

Reply

Francisco R. Azupardo October 10, 2018 at 7:38 pm

Salamat sa Diyos! Amen!

Reply

Leave a Comment



Previous post:

Next post: